پەیکەرێک بۆ حاجی لەقلەقە تیرۆرکراوەکەی مزگەوتی خانەقا..

Friday, 15/07/2011, 12:00

چەند ڕٶژێک لەمەوبەر لەهۆردیسکەکەم بەدوای وێنەیەک دەگەرام. یەکێک لەو وێنانەی بەرچاوم کەوت ، هێلانە ی حاجی لەق لەقە تیرۆرکراوەکەی مزگەوتی خانەقا بوو ، کە لەسەردانی سالی ٢٠٠٧ م ، لەپیرە هەولێر و لە یەکێک لەو شوێنانەی زیارەتم کرد وێنەیەکم بۆ یادگاری لێ گرت . ماوەیەک بەتەنیشت مزگەوتەکەی خانەقاوە ، خەیال بردبومی بەرامبەر دەیان بیرەوەری ، هاوکات ئەو خۆشەویستی سەدان هەزار بوو لە خەلکی کوردستان بەگشتی و هەولێریەکان بەتایبەتی . لە هەموو چین وتوێژ و ئایدیەلۆجیا سیاسیەکانیەوە . تەنانەت هزرم بۆ ئەوەش رۆیشت بەعس بەهەموو فاشیەتی و رامالینی هەزاران جوانی کوردستان لەمرۆڤ و رەزو باغ و سروشتیەوە ، کەچی دەستی بۆ ئەو جوانیە دەگمەنەی هەولێر نەبرد، بەلام چەتەشەرانگێزەکانی پارتی ویەکێتی تیرۆریان کرد . لەوێنەکەش دیارە سەرباری تێپەرێنی ١٢ ساڵ زیاتر هێشتا هێلانەکەی وەک خۆی ماوە ، ئەوەی دیار نەبوو لەسەر مزگەوتەکەی خانەقا ، ئەو حاجی لەقلەقە دەنوک درێژە دەیان ساڵە بوو ، کە ساڵانە هەزاران کیلۆمەتری لەولاتە بیابانەکانی ئەفەریقاوە دەبڕی و دەهاتەوە سەر مزگەوتەکەی خانەقا و وەک(مانگ وپیرە قەڵا) جوانیەکی تری بە شار دەبەخشی .
بەگرنگم زانی بەبیر خەلکی بهێنمەوە بۆیە لەپەیجی فەسیبوکەکەم وێنەکەیم دانا ، خۆشەویستی بۆ حاجی لەقلەق و نەفرەت لە تاوانەکەی پارتی ویەکێتی ، دەیان کۆمینتاری بەدوادا هات و هەریەکەی ئازاری خۆی یان بیرەوەریەکی لەتەکیەوە دەنوسی ، لەسەرەنجاما گەلالەی ئەوەکرا کەهەوڵبدەین لە کەمینێکا داوای دروستکردنی پەیکەرێکی لەهەمان شوێنی بۆ بکەین .
لەمنالیم چەندین جار لەدیبەگەوە لەگەڵ باوکی شەهیدم هاتبمایە هەولێر ، ئەوا لەدورەوە دەمان بینی وتا ون دەبوم سەیرم دەکرد . کەگەورەتریش بوم ، هەموو جار کەدەهاتمە شار ولەکاتی گەرانەوەشم لە گەراجی (دیبەگە . هەولێر) تا نەفەری ئۆتۆمۆبیلەکە تەواو دەبوو ، لەگەل جوڵە و جوانی حاجی لەقلەقەکە کاتەکەم بەسەر دەبرد . وام دەزانی بینینی حاجی لەقلەقەکە تەنیا لای هەولێریەکان ئەو گەرم و گوڕیەی هەیە ، بەلام کاک عومەر سەیداش لەکۆمینتارێکی نوسیبوی ئەویش هەموو جار کەهاتبێتە هەولێر سەیری کردوە لەکاتێکدا خەلکی گەرمیانە. بەسوپاشەوە ئاماژەی بەوەکردوبو کەهونەرمەندیكی شێوەکار(سمکۆ ئەحمەد) تابلۆیەکی بۆ کێشاوە . کاتێک چومە سەر وێنەکە ، لەتەنیشت وێنەکە ی مزگەوتی خانەقا و حاجی لەقلەقەکە وێنەی شەهید سەردەشتیشی لەتەک دانابوو . ئای کەجوان هاتە بەرچاوم . ئاخر پارتی یەکێک لەهەڵە ستراتیژەکانی تیرۆرکردنی شەهید سەردەشت ئەوەبوو ، بۆ هەولێریەکان کردیە سیمبول ، کەدەمێکە لەو شارە سیمبول دروست نابێت .
گەنجێکی تری پیرە هەولێر (نەبەز لۆڤە) بۆی نوسیبووم ، پەشێو پارچە شێعرێکی جوانی لەسەر داناوە . سەیرکەن دەیان روداو لەکوردستان زۆرمانی هەژاند کەچی پەشێوی نەجولاند !؟ بەلام خۆشەویستی وبیرەوەری لەگەل حاجی لەقلەق هەستی شیعری جولاندوە . بەکەسایەتیەکی نزیکی خۆمم وتت زانیاریم بۆ کۆبکەوە لەسەر ئەو حاجی لەق لەقە، وتی بۆچیتە ، وتم دەمەوێت هەولی جولاندنی ئەو کەیسە بدەم ، وتی کەسێتی خۆت بچوک مەکەوە لەناو سەدان کەیسی مرۆڤ مەچووە سەر ئاژەلان ، کوردستان سوێد نیە !؟ لەکاتێکدا پەیکەر مەرج نیە تەنیا بۆ مرۆڤ بێت بەتایبەتی بۆ مرۆڤەکانی حزب ، وەک نمونە پارتی لەهەولێر کردویەتی ، کە هەموو شوێنە گرنگەکانی ، بەناوی بەرپرسە حزبیەکانی کردوە ، وەک گەورەترین جسر بەناوی ئەکرەم مەنتکە ، گەورەترین هۆل بەناو سەعد عەبدوڵلا ، گەورەترین یاریگا بەناوی فرانسۆ ، گەورەترین باخجەش بەناوی سامی عەبدولرەحمانە .... بی ئەوەی یەک پەیکەر بۆ عەبدولخالق مەعروف یان جەمیل رەنجبەر دروست بکات لەکاتێکدا ئەوانە سیمبولی هەولێریەکانن . تەنانەت لەدوای ٣١ی ئابدا ئەوپەیکەرەی لەهەولێر و لەبەردەم هٶلی میدیا بۆهەردو شەهیدی بیرمەندی کورد (موسا عەنتەر و عەبدولحالق مەعروف) دروست کرابوو ، بەعس ئاسا تەختی کرد .
کاک شیروان عومەریش کە گەنجێکە پیرە هەولێرە و چەند سالێکە پەراگەندەی هەندەران بووە ، چەندین کۆمینتاری لەسەر نوسی ، لەیەکێک لەکۆمینتارەکانی ئاماژە بەوەدەکات کەدوای جەنگی جیهانی دووەم رەسول حەمزاتۆف سەردانێکی هیروشیما کردوە ، لەو سەردانەیدا لەگۆرەپانی ئەوشارەی ژار بارانکراوە ، منالێک دەبینێ و لەپەرە کاغەزێک وێنەی حاجی لەق لەقێکی دروست کردوە ... زۆر کاری تیا دەکات و پارچە شیعرێکی لێ دروست دەبێت و تاڕٶژگاری ئەمڕۆش ، بوتە گۆرانیەکی هەرە باوی ولاتە کۆنەکانی یەکێتی سوڤیەت . بۆیە ئەگەر شاعیرێکی وەک رەسول حەمزاتۆف هەست و دڵی بەوێنەیەک گربگرێت بۆئێمە بەتیرۆری حاجی لەقلەقێک کەدەیان ساڵ هاوڕیی هەموو شار بێت و لەبەرجاومان تیرۆری بکەن و وەک لەنوسینێکی کاک سەرکەش عەبدولکەریمیش نوسراوە ، ماوەی ٢ ڕۆژ بەتیرۆرکراوی لەسەر هێلانەکەی باڵەساردەکانی شۆربۆتەوە . بۆیە دروستکردنی پەیکەرێک بۆ ئەو ئاژالە جوانەی پیرە هەولێر ئەرکێکی ئەخلاقی هەموو دەنگێکی ئازادیخوازە بۆ ئەوەی تابمێنین نەفرەت لەجەنگە ناوخۆیەکانی مەلایی وجەلالی کۆن و پارتی ویەکێتی نوێ بکەین . ئافەرین بۆ ئەو هونەرمەندە شیوەکارەی پەیکەرەکە دورست دەکات بۆ ئەو بەرپرسەش ئەو بوێریەی هەبێت پەیکەرەکە لەناو هێلانەکەی یان لەناو مزگەوتەکە دروست بکات.