سه‌عات 5ی ئێواره‌ی ئه‌مڕۆ ده‌ستپێده‌کات به‌غداد: خۆپیشاندانێکی فراوان دژی تیرۆركردنی سه‌رده‌شت عوسمان به‌ڕێوه‌ده‌چێت
Thursday, 27/05/2010, 12:00
ناڕه‌زایی و خۆپیشاندانه‌کان بۆ ئیدانه‌كردنی تیرۆرکردنی خوێندکار و رۆژنامه‌نوس سه‌رده‌شت عوسمان درێژه‌ی هه‌یه‌و بۆ ئه‌و مه‌به‌سته‌ش ئه‌مڕۆ (پێنج شه‌ممه) له شه‌قامی ئه‌بو نه‌واسی شاری به‌غدا به به‌شداری که‌مپینی هه‌فته‌ی بێده‌نگ نابین و رۆژنامه‌نوسانی عێراقی و شاری به‌غداد خۆپیشاندانێك به‌ڕێوه‌ده‌چێت.
ره‌حمان غه‌ریب، ئه‌ندامی كه‌مپینی بێده‌نگ نابین و به‌شدار له خۆپیشاندانه‌که، به راگه‌یاند: سه‌عات 5ی سه‌رله‌ئێواره‌ی ئه‌مڕۆ رۆژنامه‌نوسانی سه‌ربه‌خۆی عێراقی و شاری به‌غداد و به به‌شداریکردنی که‌مپینی (بێده‌نگ نابین) له هه‌رێمی کوردستان، له شه‌قامی ئه‌بو نه‌واسی به‌غدا خۆپێشاندانێکی ناڕه‌زایی بۆ ئیدانه‌كردنی تیرۆرکردنی خوێندکار و رۆژنامه‌نوس سه‌رده‌شت عوسمان سازده‌کرێت.
وتیشی: بانگهێشتی ده‌زگا راگه‌یاندنه ئه‌هلی و حیزبییه‌کانیش کراوه بۆ ئاماده‌بون له‌و خۆپیشاندانه‌دا، هاوکات چاوه‌ڕوانیش ده‌کرێت خۆپیشاندانێکی گه‌وره‌و فراوان بێت.
سه‌‌باره‌ت به به‌رنامه‌ی خۆپیشاندانه‌که‌ش، ره‌حمان غه‌ریب ئاشکرایکرد: له خۆپیشاندانه‌که‌دا وتاری ئه‌و لیژنه‌یه ده‌خوێندرێته‌وه که خۆپیشاندانه‌که‌ی رێکخستوه، له‌گه‌ڵ خوێندنه‌وه‌ی وتاری که‌مپینی (بێده‌نگ نابین)، که خۆیان له داخوازییه‌کانی رۆژنامه‌نوسان و گه‌لی کوردستاندا ده‌بینێته‌وه له ئاشكراکردن و به دادگا گه‌یاندنی بکوژانی سه‌رده‌شت و راگرتنی هێرشی سه‌ر رۆژنامه‌نوسان له هه‌رێمی کوردستاندا.
ناوبراو رونیشیکرده‌وه، له هه‌مان کاتدا یاداشتنامه‌یه‌ك به‌رز ده‌كرێته‌وه بۆ سه‌رۆك كۆماری عێراق و سه‌رۆکی حکومه‌تی عێراق و سه‌رۆكی هه‌رێمی كوردستان، که تیایدا داوا ده‌كرێت بكوژانی سه‌رده‌شت ئاشكرا بكرێن و بدرێنه دادگایه‌كی عادیلانه‌ی دور له سیاسه‌ت و دور له ده‌ستوه‌ردانی حیزبی .
رێکه‌وتی 4/5/2010 خوێندكار و رۆژنامه‌نوسی لاو سه‌رده‌شت عوسمان له‌لایه‌ن چه‌ند چه‌كدارێكه‌وه له‌به‌رده‌م كۆلێژ‌ی زمانی زانکۆی سه‌ڵاحه‌دین له هه‌ولێر رفێندرا، دواتر دوای دو رۆژ له ونبونی ته‌رمه‌كه‌ی له شاری موسڵ به کوژراوی دۆزرایه‌وه.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
