گازیه‌ك بۆ ده‌ڤه‌را بادینا
Monday, 21/03/2011, 12:00
گه‌لی خه‌لکێن ده‌ڤه‌را بادینا یێن بنده‌ست و ته‌په‌سه‌ر، رابن ! به‌سه خه‌وا گران ! رابن، گورگا هوون خوارن !
به‌سه ! چاڤێن خۆ ڤه‌کن و خۆ هشیار بکن !
ما هه‌تا که‌نگی بۆ مه‌سعوود بارزانیێ دره‌وکه‌ر و برازایێ وی دێ ده‌ستێ خۆ دن سینگێ خۆ و بێژنێ: " ئه‌زبه‌نی " !! ما رۆژا کو هوون ژ دایك بوونه، که‌نگی به‌نیێ که‌سه‌کێ بوون ؟
ما هه‌تا که‌نگی هه‌ر دێ گوهێ خۆ دن دره‌وێن مه‌سعوودی ؟
رابن ! بایێ ئازادی و سه‌ربه‌ستێ ل هاویر دۆر وه رابوو ! به‌له‌نگاز هشیار بوون و به‌رهنگاری خوینڕێژا بوون و گۆتن وان: به‌سه ! هه‌ڕن مه هوون نه‌ڤێن !
ئه‌ڤه برایێن وه ل سلێمانیێ ژی ژ 17/2 وه‌ره رابوونه سه‌ر خۆ و دبێژن مه‌سعوود و جه‌لالی: به‌سه دره‌و، به‌سه دزی، به‌سه گه‌نده‌لی !
ئه‌رێ ما هوون چ ژ خه‌لکێ سلێمانیێ کێمترن ؟
ئه‌رێ ژبلی دره‌وا مه‌سعوودی بۆ وه چ کریه ؟ باشترین عه‌ردێن باژێڕێن بادینا دانه زڕته‌کێن خۆ یێن بارزانی.
ئه‌گه‌ر هه‌تا نهۆ، مه‌سعوودی خۆ ل پێش چاڤێن وه وه‌کی شێر و پلنگا دابت دیار کرن، بزانن کو ئه‌و شێر و پلنگێ کارتۆنیه، ئو گاڤا کو وه ده‌ستێ خۆ لێدا، ئێکسه‌ر دێ ب سه‌رێك دا ئێت خوار.
گه‌لی خه‌لکێ بادینا !
ژبه‌ری هه‌یامه‌کێ مه‌سعوودی بۆ ئاژانسه‌کا راگه‌هاندنێ یا ئیتالی گۆت: ئه‌گه‌ر پێنجی هزار که‌س بێژن کو مه تو نه‌ڤێ، ئه‌ز دێ ده‌ستی ژ کاری کێشم. ئینا لژنه‌کێ ل سلێمانیێ زێده‌تر ژ پێنجی واژۆیا (ئیمزا) کۆم کرن و بۆ مه‌سعوودی هنارتن و ناڤێ لیستا خۆ کرنه (ئه‌ز قایل نابم کو تو سه‌رۆك بی). ئو مه‌سعوودی ب هل که‌تنا جه‌ژنا نه‌ورۆزێ جاره‌کا دی گۆت: ئه‌گه‌ر دزانن کو ئه‌ز ئاسگه‌نگم ل پێش پێشکه‌تنا وه‌لاتی، ئه‌و ژ هه‌می تشتی سانه‌هیتره، ئه‌ز دێ بێژم ب خاترا وه. به‌لێ ئه‌گه‌ر راست دبێژت و دره‌وا ناکت و خودانێ ئاخفتنا خۆ یه، بلا ئه‌و و بنه‌مالا خۆ ب روویه‌کێ سپی بێژن ب خاترا وه، ژبه‌ری کو نه‌چار ببن کو ب رووڕه‌شی بێژن.
گه‌لی خه‌لکێ بادینا !
کا چاوا 35 سالێن دهستههلاتداریا به‌عسیا ل ئیراقێ، (ژ 1968 ێ هه‌تا 2003 ێ) پنیه‌کا ره‌شه د دیرۆکا ئیراقێ دا، وه‌سا بیست سالێن دهستههلاتداریا بنه‌مالا مه‌سعوودی (ژ 1991 ێ هه‌تا 2011 ێ) پنیه‌کا ره‌شه د دیرۆکا گه‌لێ مه یێ کورد دا و چ جارا نایێت ژبیرکرن. ڤێجا رابن ! بلا ئه‌و پنیا ره‌ش مه‌زنتر لێ نه‌هێت.
بۆ خاترا جه‌حێلێن خۆ رابن ! ئه‌و جه‌حێلێن کو بنه‌مالا مه‌سعوودی و ره‌شه‌کێن وان ب دره‌و و ب بێ خه‌تیا گرتنه و بێ سه‌روشوون کرنه.
رابن و بێژن بنه‌مالا مه‌سعوودی یا خائین و کوردکوژ: به‌سه دره‌و ! به‌سه دزی ! به‌سه گه‌نده‌لی !
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
