پیاوێك له‌تاو نه‌بوونی به‌نیازه خۆی‌و منداڵه‌كانی بكوژێت
Tuesday, 25/05/2010, 12:00
ئه‌م ریپۆرتاژه له ئاوێنه بڵاوکراوه‌ته‌وه . وێرای ده‌ستخۆشی له ریپۆرته‌ری ئاوێنه ،داواکارین له‌خه‌ڵکی خێرخوازی کوردستان ئه‌گه‌ر بتوانن هاوکاری ئه‌و خانه‌واده بکه‌ن و له مردن رزگاریان بکه‌ن.. هه‌ر بۆ زانیاری خوێنه‌ران و خێرخوازان سه‌یرکه‌ن و بوراوردێک بکه‌ن له نێوان مووچه‌که‌ی سه‌رۆکی ته‌زویر و به‌هادین. له کاتێکدا سه‌رۆکی ته‌زویر ته‌نها مانگانه مووجه‌ی 480 ده‌فته‌ر دۆلاره ، که‌سێکی وه‌ک به‌هادیینیش ته‌نها مووچه‌که‌ی 1/33 ده‌فته‌ر دۆلاره واته مووچه‌ی سه‌رۆکی ته‌زویر و تیرۆریست زیاتر له15 هه‌زار جاری مووچه‌ی به‌هادینه..
فه‌رموون له گه‌ڵ ریپۆرتاژه‌که:
ئا: ئاسۆ شوانی، هه‌ژار بابان
پیاوێكی نیشته‌جێی شارۆچكه‌ی چه‌مچه‌ماڵ دادو بێدادییه‌تی له‌تاو نه‌بوونی‌‌و ده‌ڵێت "گه‌ر تا پانزه رۆژی تر چاره‌سه‌ری ژیانم نه‌كرێت، خۆم‌و ژن‌و منداڵه‌كانم ده‌كوژم بۆ ئه‌وه‌ی رزگارمان بێت له‌م ژیانه".
ئه‌م پیاوه كه ناوی به‌هادین قادر عومه‌ره‌و ته‌مه‌نی 55 ساڵه، له‌گه‌ڵ ناهیده ره‌زای ته‌مه‌ن 48 ساڵی هاوسه‌ری‌و سێ منداڵه‌كه‌یاندا كه ناویان (محمه‌دو تواناو باوان)ه له‌خانووییه‌كی گڵی بچكۆلانه‌و په‌ڕپوتی گه‌ڕه‌كی سه‌نگاوییه‌كانی ناحیه‌ی شۆڕشدا كرێنشینن.
ئه‌م پیاوه كه مووچه‌كه‌ی 370 هه‌زار دیناره، 40 هه‌زاری لێده‌دات به‌كرێ خانوو، به‌مه‌رجێك دوو منداڵی خوێندكاری پۆلی سێ‌و دووی بنه‌ڕه‌تین‌و منداڵێكیشیان هێشتا نه‌چووه‌ته به‌ر خوێندن. به‌هادین كه ماوه‌ی 12ساڵه خێزانی پێكهێناوه، پێشتر له‌بینایه‌كی حكومیدا بووه، به‌ڵام ماوه‌ی 2 ساڵه له‌و بینایه ده‌ركراوه‌و به‌ڵێنی پارچه‌یه‌ك زه‌وی پێدراوه له‌لایه‌ن حكومه‌ته‌وه، به‌ڵام تائێستا پێیاننه‌داوه.
به‌هادین وتی "نه‌بوونی هێزی لێبڕیوم‌و 12ساڵه من له‌م ده‌رده‌سه‌رییه‌دا ده‌ژیم، چه‌ندینجار سه‌ردانی مه‌ڵبه‌ندی یه‌كێتی‌‌و قائمقامییه‌تی چه‌مچه‌ماڵم كردووه به‌ڵام ئه‌وان نه‌یانتوانیوه ده‌ردی من تیمار بكه‌ن، هه‌ر ده‌ڵێن به‌سه‌رچاو كه‌چی هیچ دیار نییه، هه‌ربۆیه چیتر تاقه‌تم نه‌ماوه‌و لێره‌وه به‌هه‌مووان ده‌ڵێم دوای 15 رۆژی تر هه‌ر سێ منداڵه‌كه‌م‌و ژنه‌كه‌م ده‌كوژم‌و پاشان خۆشم، به‌خوا ئه‌وكاره ده‌كه‌م چونكه ئه‌وه‌نده كه‌مده‌رامه‌تین به‌ڕاستی ژیانمان بووه به‌دۆزه‌خ‌و هیچ رۆشناییه‌ك له‌ژیانماندا نه‌ماوه ئه‌وه‌ش وایكردووه منداڵه‌كانم توشی گه‌وره‌ترین گرفتی ده‌رونی ببن‌و مردن به‌باشترین چاره‌سه‌ر ده‌زانم".
وتیشی "تائێستا چه‌ندین جار ویستومه منداڵه‌كانم له‌مه‌كته‌ب ده‌ربكه‌م به‌ڵام مامۆستاكان داوایان لێكردووم ده‌ریان نه‌كه‌م‌و ئه‌وان خۆیان جل‌و به‌رگیان بۆ كردوون".
له‌وه‌ته‌ی شومكردووه كراسی تازه‌م له‌به‌رنه‌كردووه
ناهیده‌ی هاوسه‌ری به‌هادین سه‌باره‌ت به ده‌ستكورتی خۆیان وتی "له‌جه‌ژنی قوربانی ئه‌مساڵه‌وه نه‌خۆم‌و نه‌منداڵه‌كانم گۆشتمان نه‌خواردووه، به‌ڕاستی سیل‌و دیقمكرد به‌ده‌ست ئه‌م نه‌بونییه‌وه".
هه‌روه‌ها به‌ده‌م قوڵپی گریانه‌وه وتی "هیچ به‌یانییه‌ك منداڵه‌كانمان وه‌ك منداڵی خه‌ڵكی خه‌رجی‌‌و پاره نابه‌ن له‌گه‌ڵ خۆیانداو به‌بێ ناز رو له‌مه‌كته‌ب ده‌كه‌ن".
ئــه‌م ژنه ئاماژه‌ی بۆ ئه‌وه‌ش كرد كه لــــه‌و كه‌لاوه‌یه‌ی تیایدا نیشته‌جێن شه‌وو رۆژ له‌ترسی دووپشك خۆمان‌و منداڵه‌كانمان ناحه‌وێینه‌وه. ئه‌و وتی "رۆژێـــك چوومه ناوچه‌ی پارتی له‌شۆڕش‌و پیـــــانموت وه‌ڵا وا منداڵه‌كانم له‌برسانا ده‌مرن وه‌رن به‌چاوی خۆتان بیبینن تا هاوكارییه‌كم بكه‌ن، به‌ڵام ئه‌وان وتیان تۆ ناوت لای ئێمه نییه‌و هیچیان بۆنه‌كردم، ناهیده وتیشی ئاخر من چوزانم حیزبایه‌تی چییه من منداڵه‌كانم وا له‌برسا ده‌مرن".
وتیشی "ئێواران پاش ئه‌وه‌ی دوكانه‌كانی گه‌ڕه‌كه‌كه‌مان دایده‌خه‌ن‌و خوارده‌مه‌منییه بێ كه‌ڵك‌و رزیوه‌كان فڕێ ده‌ده‌ن، من ده‌چم ده‌یهێنمه‌وه‌و ده‌یكه‌م به‌خواردن بۆمنداڵه‌كانم، كاتیك ئه‌و عه‌ره‌بانانه‌ی پاقلاوه‌و شیرینی ده‌فرۆشن‌و به‌گه‌ڕه‌كه‌كه‌ماندا تێپه‌ڕ ده‌بن منداڵه‌كانم وڕكم لێده‌گرن‌و ده‌گرین كه بۆیان بكڕم به‌ڵام من پاره‌م پێنییه‌و ناتوانم بۆیان بكڕم ئه‌وه‌ش ئه‌وه‌نده‌ی تر توشی خه‌فه‌ت‌و داخی كردووم".
به‌برسێتی ده‌ڕۆین بۆ مه‌كته‌ب
محه‌مه‌دی كوڕه گه‌وره‌ی ئه‌م خێزانه‌ش وتی "هه‌مووجار له‌گه‌ڵ براكه‌مدا به‌برسێتی ده‌ڕۆین بۆمه‌كته‌ب چونكه له‌ماڵه‌وه‌مان خواردنمان نییه‌و منداڵه‌كانی مه‌كته‌بیش پێمانده‌ڵێن ئێوه سواڵكه‌رن چونكه پێڵاوو جل‌و به‌رگتان كۆن‌و دڕاوه".
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
