ئەو کاتەی دەنگخۆشی، ئەبێ بە خۆفرۆشیی

Sunday, 25/01/2015, 12:00

کاتێ یەکێ پەنا بۆ فرۆشتنی لەشی خۆی دەبات، لە زۆربەی کاتدا هۆکاری نەبوونی و بژێوی ژیان دەبێتە پەڵنەری سەرەکی بۆ ئەوەی ئەو کارە بکات، دەنا کەم کەس هەن بیانەوێ ئەو کارە بکەنە پیشەی ژیانیان. ئێمە ئەزموونی ئەم جۆرە مرۆڤانە ئەبینین و ئەزانین کەوا لەتەك ئەو کارەی ئەیکەن،کەچی هێشتا مۆڕاڵی نەتەوەیی و خۆشەویستی نیشتمان و یادە پیرۆزەکانی، کارەساتە سروشتی و مرۆییەکانیان لەیاد ناکەن. لەهەموو سەرکەوتنێك بۆ خاك و نیشتمان و یادێك،ئەمان لەگەڵ کۆی کۆمەڵگادا دێنە پێش و خۆشی خۆیان لەگەڵیاندا دەرئەبڕن. بەهەمان شێوە لەگەڵ هەر ناخۆشی و کارەساتێکدا ،هەمان ڕۆڵی تاك بەتاکی کۆمەڵگە ئەبینین و بەشداری تیا ئەکەن.
لەهیچ کات و لەهیچ شوێنێك کاری هونەری جگە لەخودی هونەرمەند، نە میری، نە هیچ ڕێکخراوێکی فەرمی بۆی نیە مووچە بدا بەو کەسە. مووچە بە کەسێک ئەدرێ کەکارێکی بۆ دیاری کراوە، ئەمە زانستی ئابووریە . واتە کاتێ تۆ کارێك بۆ کەسێك دەست نیشان ئەکەیت و ئەویش ئەو کارەت بۆ بەئەنجام ئەگەیەنێ، ئەوا بڕی پارەی دیاریکراو وەرئەگرێت؛ جا گرنگ نییە بڕی ئەو پارەیە مانگانە بێ وەیان ساڵانە وەیان ڕۆژانە. گرنگ ئەوەیە بەپێی زانستی کار و پیشە ، خاوەن کار بڕێك پارە دەست نیشان ئەکا بۆ ئەو کەسەی هەڵیبژاردوە کارەکەی بۆ بکا. لێرەدا پرسیارێك دروست ئەبێ کە ئایا هونەر کار و پیشەیە وەیان شتێكی تر. گەر هونەر وەك کارو پیشە دابنرێ ئەوا پێوستە مووچە وەیان بڕی تێچوونی دەست نیشان بکرێ. ئەگەر نا، ئەوا باسێکی ترە و هونەر هیچ کاتێ پێوستە وەك پیشە ڕەچاو نەکرێ. من پێموایە گەر کاری هونەری وەك پیشەی لێهات، ئەوا پێویستە بەیاسا ڕکبخرێ و بڕ و جۆر و چۆنێتی دەست نیشان بکرێ. بۆ نمونە؛ گۆرانیبێژێك کاتێ ئاهەنگێك ئەگێڕێ ئەبێ بزانین کەوا ئایا ئەو ئاهەنگە(خێزانیە وەیان نەتەوەییە) ئەوجا پێوستە لەلایەن کەسانی پسپۆرەوە هونەرمەندانی دڵسۆز و نیشتمانپەروەر دەست نیشان بکرێ و بخرێنە ئەجندای یادە میللی و نەتەوەییەکانەوە. ناکرێ هەر کەسێ دەنگی خۆشبێ هەلی وای پێبدرێ کەوا بەشداری ئاهەنگی نەتەوەیی و یادەکانیان بکا. پێوستە پێوەری مرۆڤی پاك و خاوەن ڕابردووی چاك و نیشتمانپەروەری بکرێنە مەرجی بنەڕەتی.
گەر نمونەی(حەسەن زیرەک،ماملێ و سافایی) وەربگرین،ئەوان لەڕێگای دەنگە خۆشەکانیانەوە چەندین ئاهەنگیان گێڕاوەو هەر کەسەو بەپێی گیرفانی خۆی پارەی داناوە و لەسەر کەسیش مەرج دانەنراوە تا پارە بدا. ئەم جۆرە لەم هونەرمەندانە بەو پارەیە نەژیاون و نەیاکردبوە پیشە.بەڵکە کاری تریان کردوەو ئەمەیان تەنها وەك کارێکی لابەلا کردویانە. دەنا (عەلی مەردان ،حەمە ساڵح دیلان و ئەوانی تر) زۆر جار نەك هەر مووچەیان نەبوە بەهۆی هونەرەکەیان،بەڵکە خۆیان پارەی خۆیان سەرف کردوە تا بتوانن خزمەت بەهونەری گۆرانی کوردی بکەن. هەر بۆیە پێیان ووتراوە هونەرمەندی ڕەسەن.
بەداخەوە،کەسێکی وەك عەدنان کەریم ئا بەو شێوەیە لەهونەر ئەڕوانێ و لەیادێكی وەك هەڵەبجە وەك لەشفرۆشێک مامەڵە ئەکا. ئەوو هاوشێوەکەنیان هیچیان لە لەشفرۆشێك جیاواز تر نیە. لەبەر ئەوەی پێشوەختە داوای پارەی ئاهەنگەکەیان کردوە. یادێکی وەك هەڵەبجە ئەبوو خۆیان لەسەر گیرفانی خۆیان ئاهەنگی بۆ بکەن و شەونوخوونی زیاتری بۆ بکەن،نەك وەك مانگا هەڵی لووشن.