پرۆژه‌ی گۆڕان و پازێزگاری کردن لێی،
Monday, 08/06/2009, 12:00
هه‌روه‌ك چۆن ڕاپه‌ڕین و دواتر دروستکردنی بۆشایی ئیداره‌و به‌ڕێوه‌بردن له‌لایه‌ن به‌عسه‌وه بۆ فشار خستنه سه‌ر ده‌ره‌نجامه‌کنی ڕاپه‌ڕین و به‌نیازی شکست پێهێنان به‌ڕێوه چوو، سه‌ره‌نجام به‌هۆی خۆڕاگڕی میلله‌ت و بێزاریان له ڕژێمی دیکتاتۆری نه‌توانرا نوشست به ئاکامه‌کانی ڕاپه‌ڕین بگیرێ ودواتر جه‌ماوه‌ری کوردستان به‌سه‌ربه‌رزیانه مامه‌ڵه‌ی سه‌ختیان له‌گه‌ڵ ڕۆژگاردا کردو پشتێنیان له‌که‌مه‌ر به‌ستوو خۆیان له‌به‌رانبه‌ر چه‌ندین ئابڵوقه‌ی ئابووری ونه‌بوونی سووته‌مه‌نی ونه‌بوونی مووچه‌و ده‌رمان ئازایانه خۆیان ڕاگرت و تا دواجار کۆڵیان به دکتاتۆر داو هه‌رگیزاو هه‌رگیز جارێکی دی دیکتاتۆر نه‌یتوانی به‌زۆر خۆی بسه‌پێنێته‌وه‌و فه‌رمانڕه‌وایی بکا.
ئێستاش وا گێژه‌ڵووکه‌ی گۆڕان هه‌ڵی کردوه‌و گه‌ر له‌گه‌ڵ خۆیدا چه‌ندین مژده‌و خه‌ونی خۆش و ئاواتی زێڕینی پێ بێ، ئه‌وه‌نده‌ش ڕه‌نگه دڵه ڕاوکێ و بێئومێدی ونانبڕان بۆ هه‌ندێ وده‌رکردن له‌ئێش و کار بۆ هه‌ندێکی ترو مووچه‌بڕینی گه‌لێك له‌وانه‌ی به‌ئاشکرا له‌گه‌ڵ ئه‌م پرۆسه‌یه‌دان و به‌هۆیه‌وه تووشی ئه‌م نه‌هامه‌تی وئه‌زێته بوون، وه له‌ته‌ك خۆشیاندا خانه‌وه‌داو مناڵه‌کانیان پزیسکی ئه‌م قه‌یرانه‌یان به‌رکه‌وتووه‌و ودوور نیه له‌وه خراپترشیان به‌سه‌ر بێ،، بۆیه وه‌ك کارێکی مرۆیی ومرۆف دۆستانه له‌لایه‌ك وپشتگیری مادی و مه‌عنه‌وی له‌لایه‌کی دی ، کاری هه‌موانه‌و نه‌هێڵین به‌ته‌واوی بکه‌ون و واهه‌ست نه‌که‌ن که‌بێکه‌سن و پشت وپه‌نایان نیه، بۆیه وه‌ك هه‌ر هاوڵاتی ونیشتمان په‌روه‌رێ چ له‌ناوه‌وه‌ی کوردستان و چ له‌ده‌ره‌وه‌ی که‌م تا زۆر ئاووڕدانه‌وه له‌و که‌سانه‌ی تووشی ده‌رده‌سه‌ری و ناڕه‌حه‌تی هاتوون ، ئه‌وا کۆمه‌ك پێیان ئه‌وپه‌ڕی له‌خۆبووردوویه‌تی و کوردایه‌تیه،، به‌س بۆ وه‌بیرهێنانه‌وه له‌کاتی ڕاپه‌ڕینه‌که که زیاتر له 100000 هه‌زار سه‌ربازی عێراقی خۆیان دایه ده‌ست ڕاپه‌ڕیوان و نه‌یانویست فه‌رمانی دیکتاتۆر جێبه‌جێ بکه‌ن له‌وه‌ی هاوڵاتیانی کورد به‌خۆڕایی بکوژن ، میله‌تی کورد که‌وتنه یارمه‌تی و کۆمه‌ك پێدان پێیان وحه‌واندنه‌وه‌یان له‌مزگه‌وته‌کان وهه‌ریه‌ك له‌لایه‌ن خۆیه‌وه چه‌ندیان بۆ کرا له دابه‌شکردنی به‌تانی وخۆراك له‌ده‌می خۆیان و مناڵه‌کانیانن ئه‌گرته‌وه‌و وه‌ك کارێکی مرۆیی و که‌لتووری هه‌ستان پێوه‌یی وتوانیان ئه‌وپه‌ڕی گیانی مرۆڤایه‌تی و کوردایه‌تی بنوێنن که‌ڕه‌نگه له‌و سه‌رده‌مه‌ی ئه‌وسادا نمونه‌ی له‌خۆبووردویه‌تی کوردی به‌رانبه‌ر دۆژمنه‌که‌ی ده‌رخست، که‌ئه‌مه‌ش به‌ڕاستی جێگای باسکردن و پێزانینه.
ئه‌و بارو دۆخه ئابووریه سه‌خته‌ی ئێستا له‌کوردستان گوزه‌ر ئه‌کا به‌تایبه‌تی بۆ چینێکی گه‌لێ زۆر ، گه‌لێ دژوارو سه‌خته و گرانی ونه‌بوونی که‌می مووچه‌و شه‌یتان بازار هه‌موو شتێکی ئاڵۆز کردوه، بۆیه له‌جێگای خۆیه‌تی بۆ ئه‌و که‌س وخێزانانه‌ی ئه‌وڕۆ به‌هۆی بڕیاره نابه‌رپرسیارانه‌ی سه‌رکردایه‌تی یه‌کێتی و پارتی نانبڕاو کراون به‌هه‌موو شێوه‌یه‌ك ده‌ستی یارمه‌تیان بۆ درێژ بکرێ وله‌میدیاکانه‌وه بانگه‌شه‌ی کۆمه‌ك وئابوونه کۆکردنه‌وه بۆیان گه‌لێ پێوسته‌و که‌مێ له‌ئازارو نه‌بوونیان که‌م ئه‌کاته‌وه‌و گوڕو تینێکی دی ئه‌کاته‌وه به‌جه‌سته‌ی ماندوویاندا.
دیاره باشترین وخێراترین ڕێگه بۆ به‌هانا کردنی ئه‌م زه‌ره‌ر لێکه‌وتوانه ڕێگای بانگه‌شه کردنه بۆیان له میدیاو سایته ئه‌لکترۆنی و بڵندگۆی مزگه‌وته‌کان وکۆمه‌ڵه‌ی خێرخوازان و ڕێکخراوه مرۆییه‌کان، که‌ی ئه‌م بانگه‌شه‌یه ده‌ستی پێکرد ئه‌وا ئه‌توانرێ ڕێ له‌گه‌شه کردن وبڵاوبوونه‌وه‌ی ئه‌م په‌تا ناڕه‌وایه بگیرێ و نه‌هێڵرێ چی دی ئه‌م جۆره سیاسه‌ته پیاده بکرێ، به‌م هۆیه‌وه که‌یسێکی مرۆیی سه‌رده‌م دروست ئه‌کرێ وهه‌موانی لێ ئاگه‌دار ئه‌کرێته‌وه‌و ئه‌وه‌ی وه‌ك یارمه‌تی بتوانێ به‌شێوه‌یه‌کی خۆڕسك یارمه‌تیان بداو ئه‌وانی تریش ڕێکخراوه نێو ده‌وڵه‌تیه‌کان وئه‌مریکاو ئه‌وروپایان لێ هه‌ستیار بکه‌ن.
ئه‌مڕۆ نه‌ك هه‌ر سه‌رده‌می نانبڕین نیه له‌سه‌ر بیرو ڕای جیاواز، به‌ڵکه ئه‌وانه‌ی بانگه‌شه‌ی دیموکراتی وناوی دیموکراتیان له‌خۆ ناوه به‌بێ هیچ پاساوێ ناتوانن ئه‌و ده‌نگانه کپ بکه‌ن ، یه‌کێتی وپارتی له‌بودجه‌ی میله‌ت به‌بێ گه‌ڕانه‌وه بۆ میله‌ت لرف له‌و به‌شه پاره ئه‌ده‌ن وجارێکی دی له‌ده‌میان ئه‌گرنه‌وه‌و خۆیان وه‌ك میراو پیشان ئه‌ده‌ن، له‌کاتێکدا ئه‌و پاره‌یه له به‌غداوه دێت وبه‌شی هه‌موو هاوڵاتیانه، جا چۆن چۆن مامه‌ڵه به‌و بودجه‌یه ئه‌کرێ ، ئه‌وا ئه‌و پرسیاره‌یه که ئه‌بێ وه‌لامی بده‌نه‌وه، ئه‌گینا ئه‌م پێشێلکاریه‌ی ئه‌مان به‌پاساوی سیاسه‌ته‌وه بانگه‌شه‌ی بۆ ئه‌که‌ن، کارێکی هه‌ڵه‌یه‌و خاوه‌ن هه‌ڵه به‌رپه‌رسیاره لێی.
کوردستانیانی تاراوگه ئه‌رکێکی وایان که‌وتۆته ئه‌ستۆ که بتوانن ڕۆڵی مێژووی خۆیان ببینن وئه‌م ڕه‌فتاره نامرۆڤایه‌تیه مه‌حکوم بکه‌ن وکامپینێکی گه‌وره له‌دژی ده‌ست پێبکه‌ن وخۆپیشاندان وناڕه‌زایی ده‌رببڕن له‌هه‌ر شوێنێکی ئه‌م جیهانه‌داو کاره ناڕه‌واکان بکرێن به‌دۆکیومێنت وبدرێنه ده‌ست ئه‌و ده‌زگایانه‌ی تابیه‌تن به‌مافی مرۆڤ و له یو توب بڵاو بکرێنه‌وه،، له‌هه‌مان کاتدا وه‌ك پاڵپشتێکی مادی بتوانرێ کۆمه‌کێك بۆ ئه‌و که‌س وخێزانانه کۆبکرێته‌وه به‌سه‌رپه‌رشتی (ناوه‌ندی چاك، کوردستان پۆست، ڕه‌وتی ڕه‌گ) وه کردنه‌وه‌ی حسابێکی بانکی بۆ ئه‌وانه‌ی ئه‌یانه‌وێ به‌شداری له‌م که‌مپیه‌نه‌دا بکه‌ن تا له‌ڕێگه‌ی ناوه‌ندی چاك وخه‌ڵکانی به‌ئه‌مه‌ك یارمه‌تی لێقه‌ماوان بدرێت و هانیان بدرێ له‌سه‌ر ئه‌و هه‌ڵوێسته ئازایانه‌ی نواندویانه.
کاری له‌م شێوه‌یه ئه‌شێ نه‌ك هه‌ر بۆ پرۆسه‌یه‌کی سیاسی که‌ڵکی خۆی هه‌بێ، به‌ڵکه وه‌ك هه‌ر شتێکی ترو بۆ هه‌ر کاره‌ساتێکی تر به‌کار بهێنرێ بۆ خزمه‌تکردنی لێقوماوان و هه‌ژاران و ده‌ستکورتان.
هیوادارین بتوانین به‌هه‌موان کارێکی مرۆیی ئه‌نجام بده‌ین له ڕێیه‌وه خزمه‌تی گه‌له‌که‌مان بکه‌ین و نه‌هێڵێن ئه‌و ئه‌زموونه‌ی به ماندووبوونی گه‌له‌که‌مان هاتۆته دی بکه‌وێته ژێر چه‌پۆکی ده‌سه‌ڵاتێکی خۆماڵی دیکتاتۆریانه‌وه‌و ملهوڕانه،، ڕه‌نگه ئه‌وان خۆیان به‌خاوه‌نی ئه‌م ئه‌زموونه بزانن، لێ له‌ڕاستیدا ئه‌مانه فه‌وتێنه‌ری ئه‌م ئه‌زموونه‌ن وگه‌ر جارێکی دی باڵا ده‌ستبن،ئه‌وا ئه‌وه‌ی هاتۆته دییش ئه‌که‌وێته ژێر مه‌ترسی نه‌مانه‌وه، بۆیه پێوسته به‌هه‌موو شێوه‌یه‌ك به‌ره‌نگاری ئه‌م کاره قێزه‌ونه بگیرێ و هاوکات پاڵپشتی خۆمان بۆ گه‌له‌که‌مان بسه‌لمێنین ، ئه‌ویش له‌ڕێگای ڕاگه‌یاندن وکۆمه‌کی مادی.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
