كاوە گەرمیانى و گەمە بەردەوامەكانى دەستڕۆیشتوان

Saturday, 07/12/2013, 12:00

هەر لە هەرێم ڕۆژنامەنووسان ڕوو بەڕووى توند و تیژی و تیرۆر و هەڕەشە لێكردن نابنەوە، لەهەموو گۆشە و كونج و كەلەبەرەكانى ئەم دونیایەدا ژیانى ڕۆژنامەنووسان لەژێر هەڕەشەدایە، نەخاسمە ئەوانەى ڕاستیەكان وەك خۆی دەگوازنەوە و چاوپۆشی لە كەم و كوڕی و ئەو گەندەڵیانە ناكەن كە لێرە و لەوێ لەلایەن كەسانێكى دەست ڕۆیشتووى گەندەڵكارەوە پیادە دەكرێ.

بە واتایەكى دیكە تا بەم ئان و ساتە ڕادەگات هێشتا خەڵكان و كەسانێكى دەستڕۆیشتوومان هەیە بانگەشەى دیموكراسی دەكەن و كەچی باوەڕی بەبچوكترین بنەماكانى ئەو دیموكراسیەتە نییە.. كەسانێكمان هەن دڵی شێریان هەیە، تەقەبولی بچوكترین ڕەخنە ناگرن، لەهەر باسكردنێكدا بێ بیركردنەوە پەلاماری ئەم و ئەو دەدەن و گوێ بەوە نادەن ئاخۆ ئەو كەسە دەكوژرێ یان ناكوژرێ گرینگ ئەوەیە ئەو دەنگە زیندوانە و هەر دەنگێكى تر كە بەم شێوەیە بیر بكەنەوە، هەر بیركردنەوەیەك دژ بە خواست و ویستەكانى ئەوانبن، دەبێ كپ بكرێن و لەناو ببرێن.

ڕۆژ بە ڕۆژ كوشت و بڕ و تیرۆر و تۆقاندن و هەڕەشەلێكردن زیاد دەكات خەریكە لەم هەرێمەدا ببێتە دیاردە، لەكاتێكدا ڕشتنى خوێنى مرۆڤ ئەوەندە گچكە نییە تا ئەوەى لەجێی خۆی ڕاست بۆوە ئەقڵی شتێكى نەگرت، تێی ڕوو بێت و شلكوت و ماركوژی بكات تا ئاستى گیان دەرچوون و كەسیش زاتى ئەوە نەكات و نەوێرێ بڵێ: دەك ماڵتان كاولبێ بۆ خۆتان و بۆ بڕیارتان؟ تەنانەت دادگایش نەتوانێ ئەو كەیسە بجوولێنێ لەكاتێكدا ئەو كەسە بەرپرس و دەستڕۆیشتووبێ كە هەموو ئەمانە بۆ نادادپەروەری و سەربەخۆ نەبوونى دادگاكان دەگەڕێتەوە، لەكاتێكدا ئەگەر هەموومان گوێبیستى ئەو دیدارەى شاسوار عەبدولواحد بووبین كە دەڵێ: خەڵكی دەزانن ئەوانە كێن و...هتد.

كەواتە: كەسی بڕیاردەر بۆ ئەو كردەوانە لەو كەیسانە دیارن، بەڵام ترس لەژیان و هەڕەشەكان وادەكات ئەو كەسانە نەتوانن بێ پەروا ئاماژە بەو كەس و لایەنانە بدەن كە لەپشت ئەو كارەوەن، برادەرێك قسەیەكى جوانى بۆ كردم وتى: هەر كەیسێ لەماوەى هەفتەیێ دوو هەفتە یەكلایی نەبۆوە و دەستەكە ئاشكرا نەكرا ئەوە نیشانەى ئەوەیە بەرپرس و كەسێكى دەست ڕۆیشتوو لەپشتیەوەیەتى و دادگاش ناتوانێ قسەى لەبارەوە بكات و دۆسیەكە بە بێ ئاكامی دەهێڵێتەوە، لەكاتێكدا من وای دەبینم كە هێشتا یاسا لەژێر لەهەڕەشەدایە و یاسا سەروەر نییە، وە ئەگینە ئەوانەى ئەو كارانە ئەنجام دەدەن پێویستە لە هەر پۆست و پلە و پایە و بەرپرسێتیەكدابن بەئاشكرا ناویان ئیعلان بكرێ و ئەو لایەنەیش لەپەناى خۆی نەشارێتەوە و یەكسەر ڕادەستى دادگای بكات ودادگایش بەكاری خۆی هەڵسێ، ئا بەم جۆرە دڵنیام هەموو كەس زاتى ئەوە ناكات لەسەر شتێكى بچووك، لەسەر ڕەخنەیێ، لەسەر ئاشكراكردنى گەندەڵیەك بەناهەق خوێنى مرۆڤێك كە زۆر لەو شتانە گەورەتن، بڕێژێت.

ماوەیەكە تەقە كردن و كوشتن بەشێوەیەكى تەم و مژاوى و كەس نەگرتن لەلایەن دام و دەزگا ئەمنیەكانەوە وایكردووە ترس و دڵەڕاوكێ لە ناخ و دەروونى ڕۆژنامەنووسان بڕسكێ و ئەو حاڵەتە بە زەنگێكى خەتەرناك ناوزەد بكرێ.

ئەوەى لەو چەند ڕۆژەدا سەرنجی ڕاكێشام، تیرۆركردنى(كاوە گەرمیانى) ڕۆژنامەنووس بوو لەنێو ماڵەكەیدا، دواتر ئەو هەموو ئیدانە كردنە بوو كە لەلایەن حزب و لایەنە سیاسیەكان و سەرۆكایەتى هەرێم و حكومەتەوە بۆ دەربڕینى نیگەرانى و پەرۆشیان كە وەختە بڵێم ئیدی كەس نەما لەم هەرێمە ئەو ڕووداوە مەحكوم نەكات.

ساڵێكیان برادەرێكم لە هەڵبژادنێكى ناوخۆیدا خۆی كاندید كرد و پرۆسەكە بەسەركەوتوویی بەڕێوەچوو، دوای جیاكردنەوەى دەنگەكان، ئەو برادەرەم تەنها دوو دەنگى هێنا، ئیدى سەیرەكەى لەوەدابوو ئەوەى كە دەچووە لای دەیوت: دەنگم پێت داوە، نە یەكێك و دوان و دە، زیاتر لەبیست كەس وتیان دەنگمان پێداوى، ئەویش بەچەپەرۆك لەسەری خۆی دەدا دەیوت: ئەى هاوارم هەیش من سووڕ دەزانم لەو دوو دەنگە دەنگێكیان دەنگى خۆمە، دەنگەكەى تریش هی خێزانمە، بەڵام ئەو هەمووە خەڵكەی وا دەڵێن دەنگمان پێ داوى، خەریكە گومانم لەلا دروست ببێ بڵێم تۆ بڵێی خێزانەكەیشم دەنگی پێ نەدابم؟.

كاكڵی قسانە بەگوێرەى ئەو هەموو ئیدانە و مەحكومكردنەى كاوە گەرمیانى بێ، كەس دەستى لە كوشتنى نییە، كاوە هەر لەخۆیەوە كوژراوە، كت و پڕ سێ گوللە لەو ئاسمانەوە بەربۆتەوە و پێی كەتووە.

هەقە حكومەتى هەرێم بەبێ سڵەمینەوە سنوورێك بۆ ئەو بێ رێزیانە دابنێ و بەجدی كار لەسەر دۆزینەوەى بكەرانى ئەو كارە قێزەونە بكات و لەسەر هەر كەسێ ساغ بۆوە، بەسزای یاسایی خۆی بگەیەنێ، كە ئەگەر ئەم هەڵمەتە ئاوا درێژەى هەبێ بێ شك ئەنجامەكەى بەوە دەگات حەڵەتەكە ببێتە دیاردە و ئیدى كەس زاتى ئەوە نەكات ڕاستیەكان دەرببڕێ و بۆ هەقیقەتەكان گۆ بكات و بەیەكجاری دیموكراسیەتەكەمان زیندەبەچاڵ ببێ.