تا نەوشێروان تاڵەبانی و بارزانی گرت بارزانی و تاڵەبانی نەوشێروانیان گرت!!

Sunday, 12/06/2011, 12:00

تا ماخۆماڵ دزی گرت، دز ماخۆماڵی گرت. ئەم پەندە، ڕێک پڕ بە پێستی ماخۆماڵەکەیە، کە نەوشێروان مستەفایە، بەڵام دزەکان دوو دزن، جەلال تاڵەبانی و مەسعودی کوڕی مەلا مستەفا بارزانی ئاشبەتاڵچی چۆکدادەرە. شتێکی تریش هەیە کە پەیوەندی بەو باسەوە هەیە، ئەویش ئەو قسەیە کە دەوترێت:" سیاسەت ڕەوشتی تیا نیە." ئەم قسەیە، کەسانێک پێیانوایە ڕاستیەکی ڕەهایە، وە کەسانێکی تریش هەر وەک پێناسەکەی خۆی پێیانوایە، سیاسەت زانست و هونەری حوکمڕانی و بەڕیوەبردنی کۆمەڵگایە، وەک تەواوی زانستەکانی تر. بەڵام هەندێک جار سیاسەت بێ ڕوشتیشی تێدەکەوێت. ئەویش بەو مانایە نیە، کە سیاسەت تەواو زانستێکی هەڵقوڵاو بێت لە بێ ڕەوشتی. خۆ ئەگەر سیاسەت هەر هەمووی بێڕەوشتی بوایە، ئەوا کۆمەڵگا مرۆڤایەتیەکان، بە هیچ شێوەیەک وەکوو ئێستای ئەمڕۆیان نەدەبوون، لە مانەوەو بەردەوامیەت و گەشەکردندا. بە هەرحاڵ مەبەست لێرەدا، باس لەو جۆرە سیاسەتەی جەلالیەت و مەلاییەتە. زۆر ڕاشکاوانە وە بەشێوەیەکی زۆر ڕەهایانەش دەڵێم: تاکە مرۆڤێکی کورد نیە، تائێستا بە وێنەی ئەم دوو دیاردە قێزەوەن و سەقەت و سەیرو سەمەرەی بە ناو،"جەلالیەت و مەلاییەتی" جگە لە مێژووی بزوتنەوە ڕزگاریخوازەکەی خۆیدا، لە مێژووی بزوتنەوەی ڕزگاریخوازی هیچ نەتەوەیەکی تر، کە هەبێت لە وجوددا بینیبێت. کێ تا ئێستا بیستویەتی یان بینیویەتی، دوو حزب و دوو سەرکردەی لێکجیاوزا لە ڕووی فکری و سیاسیەوە، لە پێناو مانەوەی خۆیان و بەرژەوەندیە تایبەتیەکانیاندا، پەیوەندی ستراتیژیان، لەسەر بنەماو پێگەی لێکترازانی ڕیزەکانی میللەت و دووبەرەکی و شەڕی ناوەخۆو ڕشتنی بەردەوامی خوێنی میللەتی خۆیان گرێدابێت، لە ژێر پەردەو ناوی شۆڕشی ڕزگاریدا؟! خەڵکینە خوێنەرانی بەڕیز وەرن با تەنها بۆ چەند چرکەساتێک چاوێکی کەمێک بە دیقەت و ڕەخنەگرانە بگێڕینەوە بە مێژووی ئەو دوو دیاردە نامۆو بۆگەنەی بە ناو جەلالیەت و مەلاییەت، بە ئاسانی دەبینین کە ئەمانە، نەوەک هەروەکوو دوو سەرکردەو دوو حزب، تیۆرە سیاسیەکەیان، تاکە سەرچاوەکەی تەنها بێڕەوشتیە، بەڵکو بوون و خوڵقانیشیان وەکوو مرۆڤ، سەرچاوەکەکەی تەنهاو تەنها بێڕەوشتیە. هەر لە ١٩٦٤ وە، تا ئەمڕۆ کە دەگات بە نزیکەی پێنج دەهە، لە یەکەم ڕۆژی جیابوونەوەی جەلالیەت لە مەلاییەت، میللەتەکەشیان لێکجیاکردەوەو کردیان بە دوو بەش، ڕیزەکانی میللەتیان لەیەکترازاند،درزێکی گەورەو قوڵیان خستوەتە ناو کۆمەڵگای کوردی، کە بە دوو قاتی کاتی تەمەنی لێکجیابونەوەیان، ئەم درزە پڕناکرێتەوەو ساڕێژ ناکرێت. لە یەکەم ڕۆژی ئینشیقاقەکەیان، تا ئێستاش، بە کورد کوژی و خۆێنڕشتنی میللەتی کورد هێناویانە، تا ئێستا دەیان و سەدان خێزانی کوردیان کردوە بە دوژمنی خۆێنی یەکەتری، بە شەڕی کورد بە یەکتر بەکوشتندان، کە ئەمەش لەڕووی قەرەبۆکردنەوەی زەرەری گیانی و بەتایبەتیش زەرەری دەروونی، دەیان ساڵ کاتی دەوێت بۆ ئاشتکردنەوەی ئەو خێزانانەو چارەسەرکردنیان لە ڕووی دەرونیەوە. هەر لە یەکەم ڕۆژی لێکجیابوونەوەی جەلالی لە مەلایی، هەرچی نا نیشتمانپەروەری و دژ بەکورد بوون و خیانەتکردن هەیە، لە کوردو کوردستان بۆخۆیان حەڵاڵیانکردوەو ڕەوایەتیان پێداوە، ڕێگای پایتەختەکانی داگیرکەرانی کوردستانیان، تا ئەمڕۆش کردۆتە ڕێگەی حەجکردن بۆخۆیان. ئەوەتا سەیرکەن دوای بیست ساڵ لە دەستەڵات و حوکمڕانیاندا، هەر بەهەمان ئەقڵیەت و سیاسەتی کورد کوژی و دووبەرەکی یەکەمین ڕۆژی ئینشیقاقیان، حوکمڕانی دەکەن و ناوخۆی ماڵی کورد یەکناخەنەوە. لە وەتای هەن جگە لە پڕۆژەی حزبایەتی، لەسەر بنەمای دابەشکردن و لێکترازاندنی ڕیزەکانی میللەت، بۆ کۆمەڵگای کوردی. پڕۆژەی بیناکردنی دەوڵەتی کوردی و حوکمرانیەکی دیموکراسیانەیان نیە. ئەمە بێجگە لەوەی کە شۆڕشی ڕزگاریخوازی کوردستانیان، بە دەیان ساڵ دواخستوەو بەرەو دواوەیان گەڕاندۆتەوە. ئەمە وێرای ئەوەی کە سیاسەتی دوو بەرەکی و یەکتر قبوڵنەکردن و کوردکوژیان، وەکوو کەلتورێکی سەقەت لە تەواوی سەرتاسەری کوردستاندا، تا ڕادەیەکی زۆر دوورو خراپ چەسپاندوە. سەدان و هەزاران شتی تریش کە باسکردنی لێرەدا جێگای نابێتەوە. جەلال تاڵەبانی و مەسعودی مەلا مستەفا بارزانی هەمیشە نازیندوی دیکتاتۆر، بەشێوەیەکی زۆر چڕو خەست کەوتونەتە ژێر کاریگەری دیکتاتۆرە ڕیسواکانی بەهاری شۆڕشی عەرەبی، لە تۆمەتبارکردنی ئۆپۆزسیۆن و، هەوڵدان بۆ بچوککردنەوەو پوچەڵکردنەوەی ناوەرۆکی داواکاریەکانی گەنج و لاوانی بەهاری جەماوەری کوردستان. ئەمە هەروەکوو چۆن لەڕابردوشدا، جەلال تاڵەبانی دیکتاتۆرو ناسۆسیال و نادیموکرات، وەکو سەرکردەکانی حزب و ڕێکخراوەکانی دونیا، کەوتە ژێر کاریگەریەتی شۆڕشی پڕۆلیتاریای سۆڤیەتی و، بوو بە مارکسی و لەکوردستان پەیڕەوی دەکردو شۆڕشی کوردستانیشی بە شۆڕشی پڕۆلیتاریای سۆڤیەتی دەچواند. پاشان کە بوو بەماوی هەر بەهەمان شێوەی کرد. دوای ئەوەش کە جەمال عەبدولناسر لە میسر بە کودەتا حوکمی گرتە دەست و ناسریەتیش بوو بە مۆدێل لە وڵاتانی عەرەبیدا. جەلال تاڵەبانیش لە کوردستان ناسریەتی لە تەنگەی خۆی گرێدا بوو، لە کوردستان سەمای ناسریەتی دەکردو شۆڕشی ڕزگاریخوازانەی کوردستانیشی بە میسرو ناسریەت بەراورد ئەکردو بەیەکی ئەچواندن!! دوای ئەوانەش چو بۆ لیبیا، شۆڕشی کوردستانی بە " شۆڕش و کیتابە سەوزەکەی" لیبیا چواند، پاشان جەلال تاڵەبانی پێچەوانەی هەموو سۆسیال دیموکراتەکانی دونیا، ڕەنگی ئاڵاکەی یەکیەتی کردە "سەوز". ئەوەشیان لە پێخەمەت و لەبری ئەو چەند ملیۆن دۆلارە بوو، کە بۆ وەڕگێڕانی کیتابی سەوزی قەزافی لە کوردستان وەریگرتبوو!! ئەوە دوێنێ بوو جەلال تاڵەبانی، شۆڕشی هەر شوێنێکی گەرەک بوایە، شۆڕشی کوردستانی پێدەچواندو کارێکی نۆڕمالیش بوو. هەرچەندە ئەو بەراوردو بەیەکچواندنە، بە چەکوشکاری و نا خۆڕسک بوو! بەڵام کاتێک ئەو شۆڕشەی ئەمڕۆی خەڵکانی ئازادیخوازی دژ بەگەندەڵی و دیکتاتۆریەت، لە میسرەکەی هەمان جەمال عەبدولناسر پەرپا دەکرێت. وە لە کوردستانیش شۆڕشی بەرەی گەل، هەمان شێوەو ناوەرۆکی سەد دەر سەدی شۆڕشکەی میسرو تونس و سوریاو لیبیاو یەمەنی هەیە، کە خاڵی سەرەکی و هاوبەشیان لەناوبردنی گەندەڵی و دیکتاتۆریەتە. پرسیار بۆ جەلال تاڵەبانی و مەسعود بارزانی گەمژۆڵە، بۆچی دوێنی شۆڕشی کوردستان بە چەکوشکاری، بە شۆڕشی هەرکوێیەکتان ئارەزو بوایە دەچواند، بەڵام ئەمڕۆ شۆڕشی کوردستان هەرچەندە، نەوەک هەر خۆڕسکانەیە، بەڵکو "دوانەشە" لەگەڵ شۆڕشەکانی بەهاری عەرەبی، بەتایبەتیش وڵاتەکەی ناسر، دەتوانن پێمان بڵێن وێکنەچونیان لەبەر چیە؟! جەلال تاڵەبانی و مەسعود بازارزانی بەشێوەیەک لە داخی نەوشێروان توشی هیستریا بوون، کە گەیشتۆتە لێکترازانی کەسایەتیان، باری دەرونیان گەیشتۆتە ئەو ئاستەی کە زۆر ڕەمەکیانە قسە دەکەن، بە بێ ئەوەی لە بەرینایی قسەکانیان بکەنەوە. مەسعود بارزانی وەک قەزەمێک لە نەزانی و ئەحمەقی، هەر بە پای پەتی کەوتۆتەناوی و بێ ئەوەی بزانێت مێژوو چیەو، ڕابردوشیان چی بووە لە مێژوودا؟ بە تەواوی ئەقڵە ژەنگاوی بوەکەی بەچڵکی جامانە سورەکەی سەری، دێت سوکایەتی بە ئەقڵی تەواوی کۆمەڵگای کوردی دەکات و بۆ ڕۆژنامەی شەرقولئەوەستی عەرەبی دەڵێت: هۆکارو سەرچاوەی دەستپێکردنی هەموو قەیرانەکانی کوردستان، جیابونەوەکەی نەوشێروان مستەفاو بزوتنەوەی گۆڕان بوو لە یەکیەتی!! هەر بۆ هەمان ڕۆژنامە جەلال تاڵەبانی خەڵەفاوو پیری ئاخر شەریش دەڵێت: جیابونەوەکەیان دوژمنکارانە بوو!! یەکەم مەسعود بارزانی ئاخر مەلا مستەفای باوکیشت هەروا نەزان و نەفام بوو. ئەو قسەی ئێستا تۆ دەیکەیت ئاوا باوکە ئاشبەتاڵچی و نا پیرۆزەکەت. کاتی خۆی دەبوایە بە جەلال تاڵەبانی بڵێت: ئەگەر جیابیتەوە لێمان کوردستان و شۆڕشەکەی توشی قەیرانێکی بەردەوام و نەزۆک دەبێت، کە دەرچون لێیەوە ئاسان نابێت...تد. دووەم جەلال تاڵەبانی ملکەچ بە بنەماڵەی بارزانی، تۆش ئەوکاتەی بەر لەوەی لە "باوکت مەلا مستەفا بارزانی" کورد کوژ جیابیتەوە، بیرت لێکردبایەوە، بتوتبایە جیابوونەوەم دوژمنکارانەیە، نابێت بیکەم!! ئێستا مەسعود بارزانی ئایا ئەوە دەزانیت، کە ئەو قسانەی تۆو جەلال تاڵەبانی ئەقڵ خوساو، نەوەک هەر باجی حەلاو، بگرە حەمایلی دایکیشت بڕوای پێناکات و دەزانێت، ئەم قسانەتان درۆیەکی زۆر سوکە. هەی دزو جەردەو تاڵانیچینە، جیابوو نەوەکەی نەوشێروان، تەنها یەک فیشەک چیە تیایا نەتەقێرا، یەک تاکە کەس لوتی تیایا خۆێنی لێنەهات، ماڵ و خێزانی هیچ کوردێکی تیا کاول نەبوو، خۆ جیابوونەوەی نەوشێروان مستەفا، نەبوو بەهۆی لاوازی شۆڕش و هۆکارێکی ئاشبەتاڵ و حەڵالکردنی خیانەتی لە چەشنی ٦٦ و ٣١ ی ئاب....تد بەڵام ئەگەر ئەوە ڕاستبێت کە جیابوونەوەی نەوشێروان لە یەکیەتی، بوو بە هۆکاری وەئاگا هاتن و، وشیار بوونەوەی کۆمەڵانی خەڵکانی کوردستان، بۆ داواکاری مافەکانی خۆیان و گەڕاندنەوەی کەرامەتی پێشێلکراو دزراویان، ئەگەر ئەوە بوبێتە هۆکاری شۆڕشی کوردستان دژ بەگەندەڵی و دیکتاتۆریەت. پڕ بەقورگم هاوار دەکەم و دەڵێم: بژی جیابونەوەی نەوشێروان مستەفا لە یەکیەتی، بژی، هەر بژی سەرکردەی بە شەهامەت و جوامێر نەوشیروان مستەفا. ئەوەی تا ئێستا نەوشێروان مستەفا کردویەتی کارو هەنگاوی ئاشتیانە بووە بۆ چاکسازی، وە نەوشێروان مستەفا نە خەڵکی هانداوەو نەخەڵکیشی هێناوەتە ناو سەرشەقامەکانی کوردستان، گەر هاتباو نەوشیروان مستەفا بەمکارە هەڵسابوایە. ئێوە جەلال تاڵەبانی مەسعود بارزانی بەر لە هەموو کەسێک و هەموو چەکدارە چەقۆکێشەکانتان، ئەو ڕاستیە چاکتر دەزانن، لەشکرکێشی بۆ سەر بریارو کاری نەوشێروان مستەفا ئاوا بە ئاسانئ ئەنجامنادرێت. بەر لە هەر بڕیارو هەنگاونانێکتان دەبێت هەزارویەک حیسابی بۆبکەن و پیاوی خۆشی دەوێت. پاشان پیاویش نیە بتوانێت بە ئاسانی لەشکرکێشی بۆ مەیدانێک بکات کە لەسەر قسەی نەوشێروان خەڵک چوو بێتە ناوی. وە ئەو چەقۆکێشانەی کە بۆلەشکرکێشیش دەینێرن دەبێت تەنهاو تەنها " تکیتی یەکسەرەیان" بۆبکڕن. ئەوەی نەوشێروان مستەفا کردویەتی تەنها هەوڵدان و پشتگیریکردن بووە لە داوا ڕەواکانی خەڵکانی کوردستان. دڵنیاشبن هەر لێدوانێکی ناسیاسی نەزانانەتان، هەر هەنگاوێکی لەشکرکێشی نابەجێ، وەکوو ئەوەی تا ئێستا کردوتانە چاکترین خزمەتی سیاسی بەخۆڕایی نەوشێروان مستەفاو بزوتنەوەی گۆڕانتانکردوە، هەروەک دیکتاتۆرەکانی لیبیاو یەمەن و بەتایبەتیش سوریا. مەسعود بارزانی هەی لە باوکی خۆت ناسیاسی و نەزانتر، تۆو جەلال تاڵەبانی بە خەونیش نایبینن نەوشێروانتان پێ لاواز بکرێت و بیڕوخێنن، وەئەگەر دڵیشت بەوە خۆشە کە جەلال تاڵەبانی، وەکوو زەمانی باوکت بۆتەوە ملکەچ و سەرشۆڕی بنەماڵەکەتان و ئیتر تەواو دەتوانن هەموو شتێک تەواو کۆنتڕۆڵ بکەن. گوێبگرە با ئەو قسەیەت بۆ بگێڕمەوە کە ئێستا وەکوو نوکتەشی لێهاتووە. بێ گومان بارزانی مەلا خالید، چاکدەناسیت وە دەشزانی خزمایەتی لەگەڵ قادر عەزیز هەیە. دوای کیما باران و ئەنفالەکانی ١٩٨٨ ئێمەش حزبی زەحمەتکێشان، حزبەکانی تر ئاسا لە ئۆردوگای " زێوە " لێیکەوتبوین. جا ئەو بارزان مەلا خالیدە، بە حوکمی ئەوەی کۆنە "حسک" بوو، وە خزمی قادر عەزیز بوو، ناو بە ناو سەردانی دەکرد، وە زۆر جاریش قسەی دەکردو گلەیی و ڕەخنەی زۆریشی لە سەر بنەماڵەکەتان و پارتی هەبوو، تا جارێکیان بردەران لێیان پرسی: ئەی کەوایە بۆچی بوویتەوە بە پارتی؟ بارزان مەلا خالید بەم شێوەیە وەڵامی دایەوەو ووتی: گوێبگرن هەموو ئەو کەس و خەڵکانەی کە دەبن بە پارتی، لە نەزانی و کەرایەتیەوە دەبن بە پارتی، کەچی من دەزانم و تێشدەگەم، بەڵام بە ئاقڵانە بوومەتە پارتی!! جا لە دوا دوای بوونی جەلال تاڵەبانیش بە پارتی هەر وایە بە " ئاقڵانە" هاتۆتەوە بۆ ناو پارتی. هیچتان لەگەڵ نەوشێروان مستەفا پێناکرێت، وە ئێستا لە هەموو کاتێک بەهێزترە، بە دانیشتن و گفتوگۆی بێ ئاکامیشتان، جگە لە کڕینی کات بۆ تەمەنە بەسەرچووەکەتان شتێکی ترتان پێناکرێت. بەڵام ئەگەر هەرواز لە ڕووخانی نەوشێروان مستەفا ناهێنن، قیڕوسیا ئەو فێڵەشتان فێردەکەم، چاوەڕێ بن.