پێداگیری هەرێم لە سەر (پارە و پوڵ) خاڵی لاوازی کورد نیشان دەدات

Monday, 01/04/2013, 12:00

ئەوەی کە تا ئێستا لە سەرمێزی گفتوگۆکانی نێوان هەرێم و بەغداد بە زەقی دەبینرێت و دەخوێندرێتەوە ، هەست دەکرێت جگە لە کێشەی بوجە و پارە و نەوت بەولاوە ، نەپەڕیوەتەوە بۆ ئاقاری کێشە بنچینەییەکانی تر ، لە ڕاستیدا و بە حوکمی ئەوەی ئەم مەسەلانە لە دەستوری هەمیشەیی عێراقدا چەسپاون بۆیە پێویستە حکومەتی ناوند (ژاکە ژاکی) لە سەر نەکات و لایەنی کوردیش ئەوەندە ئەو مەسەلانە نەکاتە (بنێشتە خۆشەی ژێر ددانی) قسەکردنی زیاتر لەم بارەیەوە
١ / دەبێت بە هۆکارێک بۆبە فیڕۆدانی زیاتری کاتی لایەنی کوردی و تێوەگلانی هەرێمی کوردستان بە کۆمەڵێک کێشەی تر کە دەستور خاڵی خستۆتە سەر پیتەکانی ، ئامانجی حکومەتی ناوەند لەمە خەساندنی مەسەلە جەوهەریەکانی ترە کە خۆیان لە (گەڕانەوەی هەموو ئەو شار و شارۆچکە و ناوچانەدا دەبینێتەوە کە لە سەر دەستی ڕژێمی بەعس ڕوبەڕوی لکاندنی بەزۆر و تەعریب و کۆچپێکردنی بەزۆر بونەتەوە بۆ کاتی پێش ئەو دەستکاریکردنە سیاسیە دوژمنکارانەیە) . لە دوای ڕوخانی ڕژێمەوە تا ئێستا ئەم خەساندنە درێژەی هەیە ، تا ئێستا مەسەلەی دیاریکردنی سنوری کوردستانیش بە منجەمنج و شەرمەوە جار ناجاری باسی لێوە دەکرێت !
٢ / زیاتر ڕەخساندنی کات و زەمینە لە بەردەم ، نوێکردنەوە و پڕ چەککردن وئامادەسازی زیاتری هێزی سوپا ، کە هێزێکە عەمامە بەسەر و پیاوانی تائیفی و جەمسەرە حیزبیەکان ، دەیجوڵێنن و ئاشتی و شەڕی پێ ئەنجام دەدەن ، بۆیە دەبێت سەرکردایەتی سیاسی کوردی حیسابی وورد بۆ ئەم لایەنە بکات و ئەزمونە تاڵەکانی بهێنێتەوە بەرچاو و ئەمجارە لانی کەم یەک هەنگاو پێش ڕوداوەکان بکەوێت . دەبو پێرار ، پێرار نەبو ، دەبو پار ، پار نەبو ، ئێستا هەرچەندە درەنگە ، بەڵام ئێستاش کورد وتەنی (زەرەر لە نیوەش بگەڕێتەوە هەر قازانجە) ئەگینا دوای ماوەیەکی تر و پاش ئەوەی کە دەبێتە خاوەنی سوپایەکی پڕچەک و ئامادە ، ئەوکات بە ئاسانی ناتوانرێت سەر لە ئاستیدا بەرز بکاتەوە و ئیتر کێشە و قەیرانە سیاسیەکان بۆ ماوەیەکی تر وەک سەردەمی ڕژێمی بەعس دوچاری چەق بەستویی دەبنەوە و کەرکوک و خانەقین و شەنگال و زەممار و مەندەلی و تەلەعفەر و گوێر و شوێنەکانی تر هەر دەبێت بەم دەردەی ئێستاوە بناڵێنن و خەڵکەکەشی ببنە قوربانی سیاسەتی چەوتی سەرکردایەتی و بنکردایەتی سیاسی کورد !! .
٣ / ئەگەر چی لە ئێستادا حکومەتەکەی مالیکی لە نێو بازنەیەکی داخراوی پڕ لە قیران و کێشەدا ، گیری خواردوە ، بەڵام ئەمە نەیتوانیوە لە پەلوپۆی بخات و زمانی هەڕەشەی لە گەڕان بخات ، دەرگای لە بەردەم هەمو ئەو ئەگەرانە خستۆتە سەر پشت کە ماڵی عەرەبی لە عێراقدا ڕێک بخاتەوە بۆیە لە ئێستادا ، دەیەوێت بە دانی هەندێ دەستکەوت ، بە عەرەبی سوننە ، بگاتە خاڵێ ڕێکەوتن و وەک نەتەوەی عەرەب لە عیراقی عەرەبیدا کێشەکانیان چارەسەر بکەن و (ئەگەر گۆشتی یەکتریش بخۆن ئیسکی یەکتر نەشکێنن) !!! گومان لەوەشدا نیە کە لە هاناوی ئەم جۆرە ڕێکەوتنانەدا (هەڕەشە و مەترسی) زیاتر بۆ سەر هەرێمی کوردستان و دەستکەوتەکانی گەلی کوردستان لە دایک دەبێت!
زۆر جار کە باس لە بەدەستهێنانی دەسکەوتی باش لە لایەن حکومەتی ناوەندەوە دەکرێت ، بەش بەحاڵی خۆم دوچاری شۆک دەبم ! خۆم لە خۆم دەپرسم ئایە کێشەی ئێمەی کورد و حکومەتە یەک لە دوای یەکەکانی عێراق تەنها لە کێشەی پارە و دەست پانکردنەوە و دەروەزە دا چڕکراوەتەوە ؟ ئەگەر ئەوە بایە ئەوا زۆر لە مێژ بوو ، نە ئەم ڕوبارە خوێن و فرمێشکەمان دەڕشت و نە دوچاری ئەم هەموو ماڵوێرانیەش دەبوین ! ئایە دانانی ژمارەیەک ، وەزیری دەست کورت و چەند پەڕلەمانتارێکی (ئاو بەدوای بێڵا ناهاتو) لە بەغداد ، کە تەنانەت توانای گەڕاوەی بوجەی ئەمساڵیشیان نەبوو ، ئاخۆ ئەمانە بە دەستکەوتی مەزن هەژمار دەکرێن ؟(خۆ لە کاتی بەعسیشدا و لە ماوەی ڕێکەوتتنانەی ١١ ی ئازاری ١٩٧٠ ٤ وەزیری کورد وەزارەتی وەرگرت) من نازانم کامە دەستکەوت ئەوەندە گەورەیە بەو قەبارەیەی کە لایەنی کوردی وا لە پێش چاومان (زل ، قەبە) ی کردۆتەوە ؟ ، ئەوەشی کە ئەمڕۆ لە کوردستاندا گەشەی سەندوە ، ناکرێ ئەوە بە دەستکەوتی سایەی حکومەتی مالیکی بزانن !
سێبەری دوکەڵی ڕەشی نەوت ، ( خۆشەویستی و حەیاتی پارە) خەریکە دەست لە بنەقاقای داخوازیە نەتەوایەتی و سیاسیەکانی گەڵەکەمان گیر دەکەن . ئەگەر بێین و مادەی (١٤٠) ی دەستوری هەمیشەیی عێراق بە نمونە بهێنینەوە کە خۆی لە سێ قوناخی (ئاساییکردنەوەی بارودۆخ ، سەرژمێری و ئەنجامدانی ڕاپرسی) لە ناوچە دابڕێنراو و کێشە بۆ دروستکراوەکاندا چڕکردۆتەوە ، هەرچەندە ، قۆناخی سێهەم کە نەدەبوو لایەنی کوردی بە هیچ جۆرێک سازشی لە سەر بکات ، چونکە ئەم قۆناخەی ئەم مادەیە بریتیە لە (گریمانە و گرەو چەڵەمەشکێنە لە سەر ڕاستیەک کە مێژوی کەڤنار و تازەش نەیتوانیوە و ناتوانی نکۆڵی لێ بکات) کەچی لایەنی کوردی هاتوە خۆی بە دەستی خۆی و بە بڕیاری خۆی ئەو شار و ناوچە دابڕاوانە دەخاتە بەر تیشکی گومان و لە هاوشانی نەیاراندا ئەم گومانە تۆخ دەکاتەو
ئەگەریش لە خودی ئەم مادەیە بکۆڵینەوە ، ئەوا دەبینین درێژەکراوەی مادەی (٥٨) ی یاسای حکومەتی عێراقی بوو لە قۆناخی گواستنەوەدا ، مادەی ١٤٠ ، بەدەر لەمەش ، دوا وادەی جێبەجێکردنی قوناخەکانی دەبوو لە ٣١ . کانونی یەکەمی ساڵی ١٩٩٧ دا بە کۆتا بهاتایە ! لەمانەش سەیر تر ، نەک هەر بەندەکانی بە کۆتا نەهاتون ، بگرە هێشتا لە قۆناخی (بسمالله الرحمن الرحیم) دایە و کەچی خەریکن یاسینی بەسەرا بخوێنن و لە کۆی بەندەکانی ، ئەوەتا حکومەتی ناوەند ، خەڵکەکەی بە پارەیەکی ڕەمزیەوە سەرقاڵ کردوە ، کە ئەگەر لە حەفتاکاندا ، شۆڕشی کوردی بڕیاری هەڵگیرسانەوەی شەڕی نەدایە ، بەیاننامەی ١١ ی ئازار بچەسپایە ، ئەوا بە دڵنیاییەوە ڕێژەی قەرەبوکردنەوەکان زۆر لەمەی ئەمڕۆ زیاتر دەبوو کە حکومەتی مەرکەزی ، پاش هەزاران (بڕو بیانوو) و (کێشمەکێش) بە خەڵکانی زیان لێکەوتوی کوردستانی دەدات ، کە بریتیە لە (١٠ ملیۆن دینار) ، کە خۆی لە خۆیدا جۆرێکە لە گاڵتەجاری و پێڕابواردنێکی سیاسیانە بە عەقڵی سیاسی کوردی و خەڵکانی بەش مەینەتی کوردستان !
کورد ئەگەر چی لە ڕۆژگارێک ، پارسەنگی هاوکێشەکان و لایەنێکی دیاری خاوەن بڕیاری گۆڕەپانەکە بوبێت ، بەڵام لە ئەمڕۆدا ، مەخابن خەریکە خۆی دەکاتە پاشکۆی( هێزە شیعی و سونیەکان ) و وەک وەرقەیەکی سوتاوی لێ دێت لە دەستیاندا و و هەر لایەنە و بۆ چاوترساندنی بەرامبەرەکەی دەیەوێت بەکاری بهێنێت . داهاتوش ئەمەمان بۆ سپی دەکاتەوە .