خه‌ڵکی سلێمانی تکایە دەنگ بەم لیستە بده‌ن
Monday, 16/02/2009, 12:00
2267 بینراوە
بەڕیزان... لە هەرکوێ هەن تکایە، دەنگ بەم لیستە کاندید کراوە بدەن ...
دەنگ بەویژدان و به پاکی و به ڕەسانایەتی خۆتان بدەن ...
دەنگ بەئازادیی ڕاستەقینە و ئیرادە و کەرامەتی خۆتان بدەن ..
دەنگ بەم لیستە بدەن ... ئەم لیستە نە داخراوە، نە سەربەخۆیە ...
ئه‌م لیسته سەر بە بوونی ئینتمای قودسیەتی ئێوەیە ...
ئەم لیستە..... لیستی تێگەیشتن لە خواستی مافی ئێوەیه..
تکایە دەنگ بە ناوی ئەم کاندیدانە بدەن ...
ناوی کاندیدەکان ...
1: مام ئەورەحمانی پاقلە فرۆش .. 2: بەکری محەلەبی..3 : غەریبی چایچی..4 : مارفی بەقاڵ ...5 : مام وسوی گەنمە شامی فرۆش ..6 : ڕەحیمی عەلوە..7 : پورە مەنیجی مامان ..8 : مامۆستا ڕەئوفی سەرەتایی .. شەرم و شورەیی یە بۆ هەر کەسێ، دەنگ بەم ناوانە نەدا، چونکه:
مام ئەوڕەحمانی پاقلە فرۆش، بە سی و دوو ساڵی پاقلە فرۆشتن .. حەوت منداڵی بە پەروەردەیەکی پوخت پێگەیاند (دوو دکتۆر، یەک ئەندازیار، سێ فەرمانبەر، یاساناسێک) لەو پەروەردەیەی کە هەر تاکێ لەمندالەکانی، بێجگە لەیەزدان و خاک و خاوێنی پیشەیان سەر بۆ هیچ کەسێ نەوی ناکەن ...
دڵنیام ئه‌گەر دەنگ به مام ئەورەحمانی پاقلەفرۆش، بدەن وەک منداڵەکانی باوکایەتیتان پێدەدات به هەمان شیوە پەروەردەتان دەکات.
دەبا هەموو دەنگ بە مام ئەوڕەحمانی پاقلە فرۆش بدەین...
دەنگ بەکەسێ مەدەن کە هەژدەساڵە خەڵکی فێری درۆ و سەرشۆڕی و کۆیلایەتی دەکات، بۆ خۆشی لەولاوە دزیی لە جەستەی ووڵاتێکی داڕماوا دەکات..
ئاخر بەویژدانتان سوێندتان دەدەم ... مام ئەوڕەحمان خزمەتی کورد و کۆمه‌ڵگای کوردیی کردووه یان ئال فەتاح .و هاوشانەکانیان؟
دەنگ بە
بەکری محەلەبی بده.
بەکری محەلەبی بیست و پێنج ساڵ بەو پەڕی دەست پاکیی له پیشەکه‌ی خۆیدا، که دەمی خەڵکی شیرین ده‌کرد .. پاش بیست و پێنج ساڵ گەر تامی محەلەبیەکەی بکەیت، هەمان تامی محەلەبی بیست و پێنج ساڵ لەمەو پێشە، یەک تۆسقاڵ نەگۆڕاوە، خیانەتی تیا نەکردووه..
گەر دەنگ به به‌کری مه‌حه‌له‌بی بده‌یت، دڵنیام تاک بەتاکی کۆمەڵ وەک محەلەبیەکەی به زمان، به ڕه‌وشت و راستگۆیی شیرین دەکات... دەرگای هەموو قوتابخانەکانی خیانەت دادەخات و کۆمەڵگات بۆ پاک دەکاته‌وه، چونکە حەزدەکات وەک محەلەبیەکەی ووڵاته‌که‌ی شیرین و جوان و خۆش بکات. به‌کری مه‌حه‌له‌بی، وەک (بێ بەرهەمەکان) خیانەتی تاڵی ڕەوا ناکات و خۆی و چڵکاو خۆرەکان لەسەر حسابی خەڵکی دەوڵەمەند ناکات..
دیسان ده‌نگ به
غەریبی چایچیش بده...
غەریب کە ئێستاش بە دەستێکی لەرزۆکەوە.. بە بزە و پێکەنینێکی خاوێنەوە.. چایەکی دەیان ساڵەی نەگۆڕت پێشکەش ئەکات، لەگەڵ هەر قومەچایەک نەشئەیەک لە دەرونتا لەنجە ئەکات، سەیری هەر تاکە کورسییەکی چایخانه‌که‌ی بکەیت، یادەوەری هەزاران پیاوی ئەزمووناوی بە ڕوحیانەتدا به‌دی دەکه‌یت، قسه خۆش و پڕ له حیکمەتەکانی وەک ئەڵقە لە گوێت دەکات، نه‌ک وه‌ک تاڵه‌بانی و هێرۆ و حاکم قادره‌کان، هه‌رچی جوانی و که‌لتوری کۆنی شاره‌که‌مه، بڕوخێنی و کاولی بکات و ده‌ستی به‌سه‌ردا بگرێ، نه‌ک وه‌ک پیاوه ده‌سه‌ڵاتداره، گرژ و مۆن و قسه تڕنه‌کان ڕه‌فتارتان له‌گه‌ڵتانا بکات، بۆیە دەڵێم گەر دەنگی پێبدەن .. گومانی تیا نییە هەموو کۆمەڵگا لە گەڵ بیرەوەرییه کەلتورکەیدا ئاوێتەتان دەکات...
تکایە دەنگی پێبدەن، چونکە هەموومان پێویستمان به نموونه‌ی ئه‌م جۆره که‌سانه‌یه، پیاوێکه ڕێز و حورمه‌ت تێکەڵ بە حورمەتی کولتوری کۆمەڵگامان ده‌کات، نەک وەک ئەو بێحورمەتانەی هەژدەساڵە... تاکی کۆمەڵ وەک خۆیان فێری بێحورمەتی دەکه‌ن، کەلتوری ووڵات زیندە بەچاڵ دەکه‌ن...
دەنگ بەو چایچیە بدەن.. ئەوسا دەبینن، چۆن نامەردایەتی ئەو بێحورمەتانەتان بۆ سەر ئاو ئەخات ..
ده‌نگ
به مارفی بەقاڵ بدەن، ئەو مارفەی که باو و باپیریشی هه‌ر به‌قاڵییان کردووه، چونکه پیشه‌ی به‌قاڵی له لای ئه‌و جوان بوو، ئێستا هەموو ساتێک بەدەم حەسرەتەوە تف لەم سەردەمە دەکات، دەڵێ: ئەگەر شتێکم بەدەست ده‌بوو، سه‌رده‌می به‌قاڵی خۆم و باو و باپیرانم ده‌گه‌ڕانه‌وه شوێنی خۆی، ئەو سەردەمە هەموو شتێک تام و چێژی بەرهەمیی پاکیی خۆماڵی خۆمانی هه‌بوو، هیچ کەسێکیش چاوی تەماعی لەسەر کەس نەبوو،
مارفی به‌قاڵ، گەرچی خوێندەواری نییە، بەڵام له خوێنه‌وارێکی ئه‌م حیزبانه، خوێنه‌وارتر و زیره‌کتره، با نه‌ڵیین مارفی به‌قاڵ له‌وان به ویژدانتر و شه‌ریفتر،ه چونکه ئه‌وان ویژدان و شه‌ره‌فیان نییه، چاکتره بڵێین مارفی به‌قاڵ شه‌ریف و به ویژدانه، بۆیه داوا ئه‌که‌م دەنگی پێبدەن....
دڵنیام لەگەڵ دەست بەکاربوونی، هەرچی بەرزیی ڕەوشت و جوانیی هه‌یه، وه‌ک چاوی چاوی پارێزگاری لێده‌کات، هەرچی تەماعکارانە بۆتان کوێردەکات و بازاڕتان بە بەرهەمی خۆماڵی بۆ پڕدەکاته‌وه.
مارفی به‌قاڵ ڕقی له‌و ناشەریفانه‌یه، کە کۆمپانیا و بازاڕی گه‌وره‌یان داناوه، ساخته‌چین و خواردنی کۆن و ئێکسپایه‌ر و ژاراویتان پێده‌فرۆشن.
مام وسوی گەنمە شامی فرۆش، کاندیدێکی زۆر باشه، ده‌نگ به‌میش بده‌ن ..
ئەو مام وسوەی، کە لە بەیانییەوە هەتا ئێوارە بەگەنمە شامی فرۆشتن لە ژێر کونە ژێرخانێکا ساڵەهای ساڵ بێخەم سەری لەسەر سەرین ده‌نا، هێندەخاوەنی که‌رامه‌ت و ڕوحی سوک و عزەتی نەفسی بەرز بوو، بەدرێژایی تەمەنی نزیکەی شەست و سێ ساڵ لەدەرگای هیچ ماڵێکی نه‌ئه‌دا، مرد و نه‌ما، بەڵام دەنگ بەڕوحیانەتی بدەن، چونکە بە دەرس وەرگرتن لە ڕوحیانەتی ئەو پیاوه مەزنە لەمانای بێخەمی و عزەی نەفس دەگەن، ئه‌وسا تێده‌گه‌ن و ده‌چن تف له که‌سایه‌تیی نزمی جه‌لال تاڵه‌بانی و سووکیایه‌که‌ی ده‌که‌ن ...
گەورەیی و بەهای مرۆڤ لە پیرۆزیی و عزەی نەفسدایە، هەموو ئه‌مانه لە ڕوحیانەتەکەی مام وسودایە.. لە قسەی باق و بریقی سەرکردەو بەرپرسانی سەرشۆڕی ئێستادا نییە...
خۆشەویستان....
که‌ستان ناوی
ڕەحیمی عەلوەتان بیستووه؟..
تکایه زوو بڕۆن، بیدۆزنه‌وه و پێی بڵێن، وه‌ره خۆت کاندید بکه، ئێمه ده‌نگت بۆ ئه‌ده‌ین
ئەو ڕەحیمی عەلوەیە، ئه‌وه‌نده که‌سێکی پاکه، ئازاری که‌سێکی نه‌داوه، هەموو ئیوارەیەک لەگەڵ ئاهو نزولە و پاڕانەوە لە یەزدانی مەزن، بەدەم گریانەوە، داوی بەخشینی ڕەحمەتی خوا دەکات، دەڵێ: خوایە ئەم میللەتە لە بێویژدانی ڕزگار بکەیت
ئاخر چۆن دەبێ دەسەڵات بێویژدانی بەزۆر خه‌ڵکدا دەسەپێنێ ..
دەنگ بەویژدان و ئاهو نزلەی ئەم کاک ڕەحیمە بدەن ..
ئایا ده‌زانیت جارێك ڕەحیمی عەلوە، لە کۆبوونەوەیەکدا بە دانای ئەحمەد مەجیدی پارێزگاری شار دەڵێ: گوناحتان دەگات ئێوە هێندە باری عەلوە لە سەر شانی خه‌ڵکی گران دەکەن، داناش هاوار به سه‌ریدا ده‌کات و ده‌ڵێ: یاڵای دەکرد، عه‌لوه‌که کاول ده‌بوو، تۆپ تۆپێنتان لە عەلوەکەدا دەکرد..
بۆیە من پێم باشە دەنگ به ڕه‌حیمی عه‌لوه بده‌ن، نەک بە دانای ئەحمەد مەجید، کە خەڵکی فێری بێویژدانیی و بێئه‌خلاقیی و زمان شڕی ده‌کات.
پورە مەنیجی مامان، وه‌ک ڕه‌گه‌زی مێینه ده‌نگی پێبده‌ن...
ئەم شاژنە ساڵانێکە ئازاریی له جه‌سته‌ی سەدان ژناندا نه‌هێشتووه، ئەو شاژنەی شەو و ڕۆژی لا نەبووە، هەرکاتێ، هەر ساتێ، ئافرەتێک لە ژاندا بووبێ، نیوە شەویش بووبێ، وەک کچی خۆی لەگەڵ ئازاریدا لە لای سەریه‌وە بووە ..
دەنگی پێبدەن، چونکە هەموو ئافرەتان و ژنان و کچانی ووڵاتت، فێری خەمخۆری و بەتەنگەوەچوون و تێگەیشتن لە ئازار دەکات، نەوەک وەک ئه‌و ئافرەتانەی، که بەناوی ڕێکخراوەوە لەژێر خواست و حەز و ئارەزوی پیاوانی حیزبی و دەسەڵاتی قوتابخانەی فەسادی و لەشفرۆشی بەنهێنی ده‌که‌ن، یان وەک ئەو دکتۆرە ناکەس بەچانەی، کە لوتیان لە ئاسمانە و ڕەوشتیشیان له زه‌وییه، ده‌نگ بە پورە مەنیج بدەن، نه‌ک به‌وانه..
دەنگ بەم کەڵە پیاوە (
مامۆستا ڕەوئفی سەرەتایی) بده‌ن..
ئەو مامۆستا ڕەئوفەی، که سەدان و هەزاران قوتابی پێگەیاند..
ئەو مامۆستایەی، که نه‌یده‌هێشت قوتابییه‌ک ماڵئاوایی لێبکات، تا فێری تەرسانەیەک لەئەدەب و ڕەوشت و زانستی نەکات...
سی و حەوت ساڵ مامۆستا بوو، لە گوند و لە شار، قوتابیانی فێری هۆنراوە و سروودی (خوایە وەتەن ئاوا کەی و ئەی ڕەقیب و کوردایه‌تی) دەکرد..
ئەو مامۆستایەی هەر خۆی بەتەنیا پێگەیەک بوو هه‌ستیی بۆ کوردایه‌تیی و زانست و زانیاریی، مامۆستایه‌ک بوو بۆ فێربوونی ووڵات و نیشتمانپارێزیی.. نموونه‌ی دەست پاکی و ڕێز لە گەورە گرتن بوو، به داخه‌وه ئه‌م مامۆستایانه‌ی ئه‌مڕۆ، ئاگای له خۆی نه‌ماوه، سه‌ری لێشێاواوه، ئێستا پێڵاوە کانی تاکە و تاک لەپێدەکات، ئه‌مه‌ش حیکمه‌تی تێدایه، ئه‌گه‌ر ده‌نگی پێبده‌یت، گه‌ره‌نتیت پێده‌ده‌م، که هه‌موو شته پێچه‌وانه‌کانت بۆ ڕاست ده‌کاته‌وه، سه‌ری گه‌نده‌ڵی ده‌سه‌ڵاتت بۆ ئه‌خاته‌وه ناو گۆره‌وییه بۆگه‌نه‌کانیانه‌وه، قاچ و پای به‌رپرسه‌کانت بۆ ئاسمان به‌رزده‌کاته‌وه، بۆ ئه‌وه‌ی، مانای ئازار و نه‌هامه‌تیی میلله‌تیان تێبگه‌یه‌نێت.
مامۆستا ڕەوف ئەو مامۆستایەیە، لە بەر ئەوەی هێمای قودسیەتی مامۆستایە، چونکە بەس لە هەیبەت و مێژوویدا فێری ڕێزی تاک و کۆمەڵ و خۆشەویستی نیشتمان و شیعر و ئەدەب و شه‌ره‌ف دەبن .. نەک وەک ئه‌و که‌سه بێشه‌ره‌فانه‌ی، که له ڕێگای واسته‌ی ژنه‌کانیانه‌وه، پۆست وه‌رده‌گرن و ده‌بن به وه‌زیر....
لە کۆتاییدا دەمەوێت پەیامی ئەم کاندیدانەشتان پێ ڕابگەیەنم .. دڵنیام که هه‌موویان بەیەک دەنگ ، دەڵێن:
ئەگەر دەنگمان پێبدەن ..
بەخواست و ویستی ئێوە دەست بەکار دەبین ..
بۆ هەموو شتیک پرس بەخۆتان دەکەین ....
ئەگەر نەشمان توانی کار بکەین، هەر لەگەڵ خۆتان دەنگ بەیەکێکی باشتر دەدەین ..
دەشبێت هەموو پێکەوە فێری ئەوە بین دەنگ بەیەکتری بدەین، کە خۆمان لێی ڕازی بین
دەبێ فێر بین ئیتر دەنگ بە هیچ حزبێک نەدەین، چونکە بۆمان دەرکەوت، ئەم حیزبانە هیچیان ڕاستگۆ و شه‌ریف و داوێنپاک و ده‌ستپاک نەبوون، بۆ له‌مه‌و دواش هه‌ر نابن.
ئەوەتا لەسایەی ئەوانەوە .. ئینتمای نەتەوەیی نەما ..
پاکی و دڵسۆزی بەتەنگەوە هاتنی یەکتری نەما ..
ووڵات هەمووی ژەهراوی و بەدڕەوشت کرا..
سەروەت و سامان، هه‌مووی بەتاڵان برا..
هیچ شتێک لەجێ ی خۆیا نەماوه..
یاسا لە ووڵاتدا ئاسەواری نەما .. مێژوو و ئاسەواریش فرۆشرا ..
تکایە ئیتر دەنگ بەکەس مەدەن، تەنها دەنگ ئیرادەی خۆتان بدەن ...
