لە گرمیان قەلەمیان گولەباران کرد!

Tuesday, 10/12/2013, 12:00

1548 بینراوە

خەڵکی تێکۆشەری کوردستان، خەڵکی بەش مەینەت و داماوی کوردستان، خەڵکی نەدامەت دیتووی و خنکێنراوی کوردستان، خەڵکی چەوساوەو زوڵم لێکراوی کوردستان سەرەخوشی بێت لە ئێوە، سەرەخوشی بێت لەهەموو ئەو خەڵکانەی کە ساڵیانی ساڵە چاوەڕوانی ئازادی و یەکسانی بوون، سەرخۆشیتان لێدەکەم خەڵکە لێقەوماوەکەم.
ئەوە بۆ هیچ مرۆڤێک نادیار نییە کە کورد هەمیشە لەژیر زبرو زەنگدا بووە، هەموو دوونیا دەزانێت کە ملی منداڵی کورد لەسەر پەتی سێدارە سێبەری داخستووەو هەموو زیندەوەرێک دەزانیت کە کوردبوون گەورەترین جورم و کێشەیە بۆ وڵاتانی داگیرکەری کوردستان، هەر هەموو ئاگادارین کە سەربازانی ئیسلامی ئێران و کونە بەعسییەکانی عیراق و جندرمەی کوردکوژی تورکیا، کوردستانیان لە سێدارە داوەو لە هەمان کاتدا هەر هەموو باش دەزانن کە کورد ئاشتی خوازەو تەنیا و تەنیا داوای مافی چارەنووسی خۆی دەکات.
جەنایت نەما کە داگیرکەران دەرحەق بە کورد نەیخوڵقێنن، کارەسات نەما کە بەسەر کوردی کڵوڵ و ماڵ وێراندا ڕوو نەدات، بەلام بەم حاڵەشەوە کورد هەر نەبەزی و زیاتر لە جاران لەسەر داوای مافە ڕەواکانی خۆی پێداگری کرد، بەلام بۆ پێداگرییان کرد؟ بۆ ئەوی کە ڕزگاریان بێت لەهەر چەشنە زوڵم و زۆرییەک، بۆ ئەوی بەو پەڕی خوشحاڵییەوە هەست بەوە بکەن کە وڵاتیان هەیەو دەتوانن خاونداری هەر هەموو ئینسانێک بکەن لە وڵاتەکەیان دا، بۆ ئەوەی ئاشتی و تەبایی لە ولاتەکەیاندا بەبێتە هێمای سەرکەوتنی گەلی کورد و نەتەوەکانی دیکە لەسەر گۆی زەوی.
ئێمەی کورد مافی خۆمانە کە گلەیی و گازندەمان هەبێت لە هەمبەر نەتەوەکانی دیکەی چوار دەورمان، چونکە ساڵیانی ساڵە کە ملی کورد بەپەتی سێدارەوەیە، بەڵام هیچ داکۆکیکەرێکمان لە نەتەوەکانی دیکە بەدەورمانەوە نەبوو، هەموو کاتێک بە وشەی جیاییخواز هێرشیان کردووینە سەرو وەکو دووژمن چاویان لێکردووین، بەڵێ ئێمە گلەیمان هەیە لێتان بەڵام بەدڵنیایەوە ئیستاکەش کوردستان مەڵبەندی سەداقەت و خەباتی ڕزگاری خوازانەیە.
بەڵام ئاخ و هەزار داخ بۆ هەموو ئەو خەباتە ڕەنگینە کە خەڵک خوڵقاندی و بۆ بەدەسکەوتی دەسەڵاتدارانی قەلەم کوژ. ئەمڕۆکە گەرمیان کەوتە بر هێرشی دەسەڵاتدارانی کورد، هەر ئەو دەسەڵاتەی کە بەخوێنی دەیان هەزار کاوە گەرمیانی پێکهات، هەر ئەو دەسەڵاتەی کە بەگیانی دەیان هەزار ئەنفال کراوو کیما باران کراو وەدی هات، هەر ئەو دەسەڵاتەی کە بەبێ ڕاپەڕینی گشتی خەڵک قەت وەدی نەدەهات، هەر ئەو دەسەڵاتەی کە بەچالاکی و تێکۆشانی هەزارانی وەکو سەردەشت عووسمان و سۆرانی مامە حەمەو... هتد پێکهات. بەڵێ نەتەوەکەم، ئەی هەژارتر لە هەژارترین کەسی ئەم سەردەمە، داپڵوساوی بەش مەینەت، ئەی ئاگرگرتووی بێ کوژانەوە، ئەی دۆزەخی دایکانی جەرگ سووتاو، ئەمڕۆکەش گەرمیانەکەمیان دایە بەر گولەو قەڵمیان لەوێ خستە ژێر گڵ.
ئاخۆ بەڵێ ئەم قەلەمە چی بێت؟ بەڕاستی ئەمڕۆکە ئەوەندەی تر هاندەرم کە سەرم لە هەمبەر قەلەمی شەرەفدا زیاتر دابنوێنم، ئاخۆ تۆ بڵەیت ئەم قەلەمە چی کردبێت کە ئاواها دیکتاتۆرەکان دەلەرزێنێت و زور ترسنۆکانە دەیخەنە بر هێرشی گولەی بێ ویژدانی.
دەبا بڵێین ئەمڕۆکە لە گەرمیان پێنووسیان خستە ژیر خاک، دەبا بڵێین سۆرانی مامە حەمە و سەردەشت عوسمانیش پەتی دواکەوتوویی و نەزانی خنکاندیان، بەڵام تۆ بڵێ ئەمانە قەت سەربەرز نەکەنەوە، دیکتاتۆرەکان قەلەمیان هەموو کاتێک خستووەتە ژێر گڵ، بەڵام قەلەم نەسرەوتووە و سەری هەڵهێناوتەوەو دڵنیاشم قەلەم هەر سەربەرزەو هیچ کات ناتوانرێت لە ژێر گڵدا حەشار بدرێت.
خەڵکی کورد، دەسەڵاتێک کە قەلەمەکەت داگیر بکات قەت بە هی خۆتی مەزانە، چونکە دڵنیابە لە بێگانە خراپترە، ئاخ چەندە خۆشە زلەی دەستی داگیرکەرێک، ئاخ چەندە خۆش بوو ئەنفال کردنمان بەدست داگیرکەرێک، ئێش و ئازاری زۆر کەمتربوو بۆ ئەوی سەلمێندرا کە لەلایەن دووژمنتەوەیە، بەڵام زلەی ئەمانە کە کوردن لە چەقۆی بێگانە ناخۆشترە، ئاخ نەتەوە ژێر دەستەکەم، وەدووی ڕووناکیدا دەگەڕان، بەڵام کەوتییە نێو تاریکستانی دۆزەخی کوردیە.
ڕۆژانێک کە پرسیارم لێ دەکراو کێ و لە کەوە هاتووی؟ بەو پەڕی سەربەرزییەوە دەمگوت کوردم و لە کوردستانەو هاتووم، هەر بەم ڕەستەیە یەک دوونیا سەروەری و شانازی دەکەوتە سەرشانم و دەکەوتمە بەر گوڵ بارانی وڵاتانی دەرەوە، بەڵام ئەمڕۆکە کە دەڵێم کوردم یەکسەر سەر وەردەسووڕێنن، تو بڵێی بۆ وا بن؟
باشە ئیستاکەش دەسەڵاتی کوردیمان هەر ساوان، ئیستاکەش هەر ساواو نەمام ماونەتەوە، ئیستاکەش هەر خەریکی ئاوەدان کردنەوەی کوردستانن؟ یان خود نە، ملتان لێ ئەستور بووەو مژینی خوێنی هەژاران تیری نەکردوون، یان خود بە تاڵان بردنی سەروەت و سامانی ئەم نەتەوە هەژارە تماحی نەبڕیون.
باشە خۆ کاوە گەرمیانی هەژار بوو، باشە خۆ راخەری ماڵەکەی حەسیر بوو، باشە خۆ سەلاجەکەی لە ئەمنی ئینسان برسی تر بوو، لاو بوو، سەروەت و سامانی وڵاتەکەم بوو، قیبلەی هەژاران بوو، بۆ ئاواها کاوەو قەلەمەکەیان نایە ژێر گڵی جهالەتەوە؟ دەسەڵاتێک کە لە ترسی پێنووس کردەوەی ئاوەها قێزەون دەنوێنێت تا سەر بەردەوام نابێت، ئەو دەسەڵاتە مەحکووم بە رۆخانە، ئەم دەسەڵاتە چوارچێوەکەی لە حاڵی ڕزین دایە و بەرەو ڕۆخان دەڕوات.
قەلەم ئەی زلهێزی باوەڕ پێکراو، قەلەم ئەی داهێنەر، ئەی ڕۆخێنەر، ئەی وەدیهێنەر، ئەی داپڵۆسێنەر، ئەی لەهەموو ئامرازێک و بوونەوەرێک سەرتر، سەر بەرزکەوەو بە جەوهەرەکەت دوونیای دیکتاتۆران بەلەرزینە، سەرهەڵدەوەو هەر لە گەرمیانەوە تاکوو قامیشلوو بۆکان، مەهاباد، سنە، دیاربکرو، هولیر و سولیمانی و تا دەگاتەوە ئافریقاو هەر هەموو وڵاتانی فەقیرو هەژارو ژێر چەپۆکەی دیکتاتۆران، ئازادی و یەکسانی و دادپەروەریمان بۆ بە دیاری بێنە.
قەلەم، سوێند بە نەترسیت و سوێند بە گەورەیت، هاودەمت بم و لە هەمبەر ستەمدا قەت سەردا نەنوێنم و وەکو تۆ باڵام بەرزبێت بە پانتای کوردستانی گەورە. ئەمڕۆکە کاوە گەرمیانی و سۆرانی مامە حەمە و سەردەشت عووسمان و هەر هەموو ئەم بوێرانەی کە سەریان بەدستی دواکەوتوویی و نەزانی کەوتە بر هێرشی دیکتاتۆران پەیمان لەگەڵ قەلەم نوێ دەکەنەوەو بەدنگی بەرز هاوار دەکەن:
نەسرەوتن تا سەرکەوتن
بژی قەلەم
نا بۆ لە سێدارە دانی قەلەم
نا بۆ دیکتاتوران
لوقمان فارووقی
Loqman Faroghi
09.12.2013