دەمیرتاش به توندی بەرپەرچی مهاته‌ره‌ته‌کانی ئەردۆغانی دایەوە
Wednesday, 29/12/2010, 12:00
سەرۆکی پارتی ئاشتی و دیموکراسی بە زمانێکی توند وەڵامی وتەکانی سەرۆک وەزیری تورکیای دایەوە.
بەپێی هەواڵێکی رۆژنامەی رادیکاڵ، دوای ئەوەی (رەجەب تەیب ئەردۆغان) سەرۆک وەزیری تورکیا لە ناو پەرلەمان توانجی گرتە داواکارییەکانی بەدەپە بۆ "فەرمی کردنی زمانی کوردی و ئۆتۆنۆمی دیموکراتی بۆ کوردستان" و ئەو پارتەی بە پاشکۆی پەکەکە لەقەڵەمدا، (سەلاحەدین دەمیرتاش) سەرۆکی پارتی بەدەپە لە لێدوانێکدا بە توندی وەڵامی ئەردۆغانی دایەوە.
(دەمیرتاش) لەمیانی وتەکانیدا سەرۆک وەزیری تۆمەتبار کرد بەوەی هەڕەشەی لێکردوون و سووکایەتی پێکردوون و راشیگەیاند، ئەوان داوای برایەتی دەکەن کەچی وتەکانی (ئەردۆغان) جیابوونەوە و جیاکاری قووڵتر دەکەنەوە.
سەرۆکی بەدەپە تەئکیدیشی کردەوە، ئەردۆغان سوورە لە سەر ئەوەی سەرکوتیان بکات، بەڵام ئەگەر سەریشیان ببڕن لە سەر پێ رادەوەستن و لە داواکارییەکانیان پاشگەز نابنەوە.
شایه‌نی باسە سەرۆک وەزیری تورکیا لەمیانی وتەکانیدا وتبووی، نەتەوەی ئەو بە یەک زمان قسە دەکات و یەک دەوڵەت و یەک ئاڵاشی هەیە.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
