ناهەقییە ڤیان دەخیل بخرێتە رێزی کچانی کۆبانی، بکرێت بە پێشەنگی ژنانی جیهان بۆ ساڵی 2014
Saturday, 20/12/2014, 12:00
ئەگەر بگوترێ جیاوازی چییە لە نێوان هەڵوێستی کچانی شەرەڤان لە کۆبانی، لەگەڵ هەڵوێستی ڤیان دەخیل، پەرلەمانتار لەسەر لیستی پارتی دیموکراتی کوردستان لە بەغدادا؟
دەتوانین بڵێین، جیاوازییەکە بەقەد بۆشایی نێوان ئەستیرە و مانگ، زەمین و ئاسمان، گەورەیی و زەبەڵاحی دەریاکانە، بە قەد بۆشایی نێوان سەربەستی و ژێر دەستیییە، جیاوازییەکە هێندە گەورەیە، هێشتا ناهەقی لە بەراوردکردنەکە کراوە!
کچانی شەرەڤان، بەبێ بەرامبەری پۆست، پارە، خۆدەرخستن، بەبێ پشتیوانی ئۆباما، وڵاتانی ئەوروپا، تورکیا، ئێران، قەڵاچۆلان، پیرمام و گردی زەرگەتە، بەبێ لایەنگری میدیای پارەداری وەکو کەناڵی رووداو، کوردستان تیڤی، کوردسات، کەی ئێن ئین، ئێن ئارتی، سبێدە و کەناڵەکانی تری سێبەر و دەستەڵاتدارنی هەرێم ، بەبێ پرۆپاگەندە و هاوکاری ئەو راگەیاندن و حیزبانە کچانی شەرەڤان بڕیاریاندا بە پێوە بمرن.
بەشداریکردنی ڤیان لە دەرەوەی ئەو فۆرمەدایە! ڤیان زەمینەی پۆست، پارە، خۆدەرخستن، بەرژەوەندی شەخسیی هێناویەتە پێشەوە، پاڵپشت و لایەنگری ڤیان نەوتفرۆشەکانی هەرێمن، ڤیان وێنە و واجیهەی پیسخۆریی و گەندەڵترین پارتە لەو سەرزەمینە. ڤیان رۆژێک لە ژیانی بڕیاری نەداوە بە پێوە بمرێت لە پێناو خاك و نیشتمان و ئازادیی ژناندا، ڤیان سەر بە کۆمەڵێک سەرکردەی کوردە لە هەرێم کە دەستیان هەبوو لە بەجینۆسایدکردنی شەنگاڵ و کوردی هەڵگری بیروباوەڕ و ئاینی یەزیدی بەدەستی داعش. بۆیە ڤیان بوو بە جێگەی سەرنجی بەرژەوەندیپەرستان و دەستەڵاتدارە سیاسییەکانی حکومەتی بنکە فرەوانی هەرێم ، بەغداد، تورکیا، ئێران و ئۆبامای سەڕۆکی ئەمریکا، وەکو رەمزێکی دەستکردی ئەوانە لە شەڕی میللەتەکەمان دژ بە داعش هێنراوەتە پێش و هەڵوێستەکەی لەگەڵ هەڵوێستی کچە شەرەڤانی کۆبانی جووت دەکرێت!
کچانی کۆبانی، شەرڤان و پێشمەرگە، گیانی بەرخوردان لە پێناو ئازادیی و سەربەرزیی، تۆڵە سەندنەوە لە ناهەق، بەرەنگاربوونەوە دژ بە داعش، بوون بەهێز، توانا، گڕوتەوژمی شەپۆڵی دەریاکان، هەور و بروسکەی هەڵگری ناڵەی هەزاران منداڵی بێتاوان و مرۆڤی سەڕبڕاو.
کچانی کۆبانی بوون بە جێگە سەرنجی هەموو ئازادیخوازێک لە دونیا، بوون بە هێمای بەرخوردان و ئازادیی، بوون بە قوتیلەکەی ژوورە تاریکەکانی ماڵە هەژاران، بوون بە هیوای فرمێسکی قەتیسماوی ناو چاوی دایکی شەهیدان.
کچانی کۆبانی هەموو دونیای کەروڵاڵیان هێنایە سەر شەقامەکان، کچانی کۆبانی بوون بە رەمز و لۆگۆێ قەڵەمی ئازاد و سەربەست.
بۆیە ڤیان و کچانی کۆبانی دوو دونیای ئیجگار لەیەک دوورن!
سەرچاوە
ئاوێنە نیوز
کچانی کۆبانی و ڤیان دەخیل بوون بە پێشەنگی ژنانی جیهان بۆ ساڵی 2014
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
