كاك. محمد حەكیم و سیاسەتى كۆڵەوارى كۆمەڵى ئیسلامى

Tuesday, 04/01/2011, 12:00

گەورەترین هەڵە لە سیاسەتدا ئەوەیە دژایتیەك و ململانەیەك لەنێو ماڵێكدا دروست بكەیت كە وەكو ماڵى دایك وابووە ئێستاش بۆتە میرات یان ئەوەتا بێت شەڕى دژایەتى لەگەڵ تەرەفێك یاخود لایەنێكدا بەرپا بكەیت كە هەم لە خۆت بچوكترە هەم نزیكى تۆیە.

كۆمەڵى ئیسلامى حیزبێكى تاڕاددەیەك خاوەنى جەماوەرى ئیسلامیەو پێگەكەشى لەچاو پارت و لایەنە بچوكەكان بەهێزە بەلام ئەوەى بەدیدەكرێت تا ئێستاش ئەو حیزبە یان بڵێن سەركردەكانى ئەو حیزبە زۆر لە سیاسەت تێناگەن و بەهۆى وتەیەك یان دەربڕینێكى زارەكى تووشى هەڵوێستێكى سیایسى لاواز و سەقەت دەبن، هەروەك ئەوە لەسەرەتاى دروست بوونى كۆمەڵى ئیسلامیەوە هەستى پێكراوە یەكەم هەڵەى دەربڕینیش كە بەبڕواى من كۆمەڵى خستە بارودۆخێكى زۆر ناخۆشە، وە لێدوانێكى م. عەلى باپیر بوو كە بەداخەوە نەدەبوو ئەو كاتە واتە ساڵى 2003 كەوتبایە هەڵەى دەربڕینەوە.

هەرچەندە هەڵدانەوەى لاپەڕەى ڕابردوو زۆرى ئیستیفادەى نییە بەلام هەروەك ناپلیۆن وتوویەتى "مێژوو، مێژوو، مێژوو" زۆر جار هەڵەى سەكردەیەك لە مێژوودا هەڵەى ترى بەدوادادێت و دوبارەش دەبێتەوە، لەگەڵ هانى ئەمریكا بۆ عێڕاق و داگیركردنى ئەو ولاتە لە 2003دا، ئەمیرى كۆمەڵى ئیسلامى وەك بڵێى خاونى گەورەترین هیزو تەكنەلۆجیایە لە لێدوانێكدا بۆ كەناڵێكى جیهانى وتى: گەر ئەمریكا لەدژمان شەڕ بكات ئەوا بە نووكى سوژنیش بێت بەرگرى لە خۆمان دەكەین. ئەو لێدوانەى م. عەلى زۆر بە خراپى بەسەر كۆمەڵدا شكایەوە قوربانیشى لێكەوتەوە چونكە:

1- ئەمریكا نیازى شەڕى لەگەڵ ئیسلامیەكانى كوردستاندا هەر نەبوو ئەو نیازەشى نییە ئەوەش بەڕوونى دیاربوو ، چونكە ئەمریكا ئیسلامیەكانى بە سێیەم هێزى ئۆپۆزیسیۆنى عێڕاقى لەدژى سەدام ناساندبوو كەوات چۆن ئەمریكا شەڕ لەدژى دوژمنى دوژمنەكەى دەكات.

2- دواى لێدوانى م. عەلى هەندێك لایەن كە دەیانویست كۆمەڵ لاواز بێت ئەو لێدوانەى ئەمیرى كۆمەڵیان زەقكردەوەو تا وای لێهات ئەمریكا حیسابى بۆ قسەكەى ئەمیر كرد و لە كەنداوى سورەوە هێرشى كردە سەر بارەگاكانى كۆمەڵ و زیاتر لە 40 كەس شەهید بوو، دواتریش كۆمەڵ بە نووكى دەرزیش بەرگرى نەكرد چونكە گەر هاتبا بەرگرى كردا ئەوا كارەسات دەقەوما و هەموو لایەكیش لێى زەرەمەند دەبووین بەڵكو كۆمەڵ ئەو سیاسەتە هەڵەى دریژە پێنەدا بارودۆخیشى باشتر بوو.

3- بەداخەوە لام وایە كۆمەڵ لەبەرژەوەندى ئێران ئەو لێدوانانەى دا بەڵام ئێران نەك ئەوەى لەبەرچاو نەگرت بەڵكو لەو نەهامەتیەى بەسەر كۆمەڵدا هات ئەو ولاتە سنورەكانیشى بەڕووى برینداراندا گرتو ڕیگەى هی كەسێكى نەدا بچێتە ناو خاكى ئێرانەوە ئەمیریش ئەوە چاك دەزانێ كە ئێران زۆر سپڵە لە بەرامبەر بزاڤى ئیسلامى.

ڕابردوو ڕۆیشت و ناگەڕێتەوە بەڵام ئەوەى من دەمەوێت قسەى لەسەر بكەم ئەوەیە كە كۆمەڵى ئیسلامى زۆر هەڵەى سیاسى دووبارە دەكاتەوە، چەند كەسێكى كەمى ناوسەركردایەتى بەزۆرى ئەو هەڵەیە دووبارە دەكەنەوە لەوانە كاك. محمد حەكیم كارگێڕى مەكتەبى سیایى كۆمەڵى ئیسلامیە بەكورتى ئەو بەڕێزە ئەو هەڵانەى كردووەو زۆریش بەسەریدا شكاونەوە:

1-دواى ئەوەى دەستورى كوردستان نووسرایەوە خەڵكێكى زۆرى كوردستان نیگەران بوون لەوەى مافى زۆرینە لە دەستوردا پێشێل كرابوون لەگەڵ چەندین هەڵەى ترى دەستور لەوانە دەستەلاتى زۆرینە بەپێى دەستورەكە دەكەوێتە بەردەم چەند كەسانێكى دەستەلاتدار قسە كردن لەسەر دەستور زۆرى دەوێت سەرەڕاى ئەو هەموو كەموكورتیانەو ناقسانە بەبێ ئەوەى ڕەچاوى ڕاى گشتى بكرێت كۆمەڵ دەنگى دایە دەستور. لەوەش ناخۆشتر لە بەرنامەیەكى كەناڵى ئاسمانى پەیام كاك. محمد حەكیم هەڵەیەكى زەقى بەناوى كۆمەڵەو كردوو وتى " بۆیە دەنگمان بەدەستور دا چونكە لە بەرژەوەندى كۆمەڵى ئیسلامیدایە" كاك. محمد ئەو قسەى كرد كە بەسەدان كەس بەهۆى ئەو وتە شیرنەى جەنابى لە كۆمەڵ زویربوون چەند هەفتەیەكیش دواى قسەكەى ئەم بەڕیزە هەڵبژاردن بوو كە بەداخەوە ئەو قسەیە زەڕبەیەكى گەورەى لە چوار حیزبەكە دا كە پێكەوە بەشدارییان لە هەڵبژاردندا كرد، ئاخر كاك. محمد ئێستاش گەر ڕاپرسى بكرێت لایەنى كەم 60% بۆ 70% خەڵكى دەستور ڕەت دەكەنەوە تۆش لەبەر بەرژەوەندى كۆمەڵ یان جەماوەر دەستور قبوڵ دەكەیت!؟

2- ئەوەش ڕۆیى دەنگۆى ئۆپۆزیسیۆن دروست بوو كە ڕەوتێكى بەهێزن و كاریگەرییان لەسەر جەماوەر هەیە و لایەنى كەم خەڵكێك پێى دڵخۆشە كەچى كاك. محمد لە لێدوانێكدا بۆ ڕۆژنامەى دەستور ڕایگەیاندبوو كەوا ئۆپۆزیسیۆن زۆر لاوازە ئەو قسەیەش زەڕبەیەكى گەورە بوو بەر كۆمەڵ و ئۆپۆزیسیۆن كەوت چونكى بەهەر پێوەرێك بێت ئۆپۆزیسیۆن پێگەیەكى بەهێزى هەیەو كاریگەرى زۆریشى بەسەر دەستەلات و ستراتیژى سیاسی هەموو لایەنەكانەوە هەبووە.

4- كۆنگرەى كۆمەڵ گیرا بەر لە كۆنگرە نازانم چی بوو كۆمەڵ كەوتە خۆ و لە خۆوە كەوتە بوختان و قسە هەڵبەستن بۆ هەندێك لە ئەندامە بالاكانى و چەندین كەسیش بەر لە كۆنگرە دەركران لەوانە: شوان هەورامى و م.ح و چەندانى تر، لە دواى كۆنگرەش یەكەم ئیشى سەركردایەتى تازەى كۆمەڵ كە هەر لە كارى منداڵۆكان دەچوو كەوتنە دەركردنى چەند كادیرێكى باڵا كە بەداخەوە ئەوەندەى ئەوان كاریان بۆ كۆمەڵ كربوو ئەندام سەركردایەتیەكانیش نەیانكردووە ئەوانیش م. موشیر گەڵاڵى و م. م....بوون ئەم دوو كادیرە لەسەر شتى زۆر سانا دەركران ئەمە لە كاتێكدا من ئەزانم كە كە لەناو كۆمەڵدا هەیە كە سەر بە دەزگاى زانیاریە و پەیوەندى تووندى لەگەڵ یەكێتیدا هەیە وە چەندین كەسى تر هەیە كەشتى زۆریان كردووە زۆریش بڤەیە كەسیش سزاى نەدان بەلام ئەوە لە بەینى خۆم و خوادایە، بەداخەوە دەبوایە م.محمد حەكیم و هاوڕێكانى ئەو كێشەیان دەبر كردبایە كەچى ئەوان لە جێگەى كێشەى ململانێكان و دژ یەكەكان كەم بكەنەوە ئاگرەكەیان لە كۆبوونەوەكان خۆش دەكرد.

5- دوایەمین هەڵەى كاك.محمد دواى ئەوە دێت كە كێشەیەك دەكەوێتە مەڵبەندى كەلارەوە ئەویش بە بڕواى من كێشەكە دەبوایە بە هەڵبژاردن چارەسەركرابا لە هەندێك ڕووەوە پشتگیرى لە كاك. كمال حسن دەكەم و پێموایە دەبێت بە هەڵبژاردن كێشەى مەڵبەندى گەرمیان چارەسەر بێت، بەلام كێشەكە گەیشتە دەم ڕاگەیاندنەكان و وا بڵاوبوویەوە كەوا كاك. كمال و هەندێك لە هاوڕێیانى پەیوەندییان بە بزووتنەوە كردووە گۆڤارى لیڤینیش ڕاپۆرتێكى كاك. بیلالە بلاوكردەوە لەسەر ئەم مەسەلەیە بلاوكردەوە، لەدواى بلاوبوونەوەى ئەو باسە كاك.محمد حەكیم دیسانەوە دەستى بە ڕستە فڕێدان كردەوە بەبێ بیرێك لەو وشانە بكاتەوە كۆمەڵ نیوزیش لەبەر بێ هەواڵى هەواڵێكیان بڵاوكردەوەو كە تێیدا محمد حەكیم وتبووى " ئەوەى كایە لەگەڵ كۆمەڵدا بكات خۆى دەدۆرێت و زەرەر دەكات" جارێ كاك. محمد گەر تۆ مەقەسەدت بزووتنەوەى ئیسلامیە ئەوە بزووتنەوە دەستى بەكڵاوى خۆیەوە گرتووە تاكو با نەیبات، ئەوان كێشەكانى خۆیان پێ چارەسەر نابێت چ جاى بێن كایە لەگەڵ كۆمەڵدا بن جارێ ئەوان پێیەكیان لە حكومەتدا چەقیوە پێیەكەى تریان بەسەد وعا وەستاوە، ئێستا تۆ بە وەڵامدانەوەى بزووتنەوە هەم بزووتنەوە گەورە دەكەیت و هەم كۆمەڵ بچوك دەكەیتەوە بۆیە دەبوێت كاك. محمد بە كۆمەڵ بڵێت ئەوان لە بەغدا كایەیان لەگەڵدا كردن و لە پشتەوە كەستنیان لەگەڵ ئەوان ململانێ بكەن نەوەك بزووتنەوەى حیزبى دایك كە تازە بۆتە میرات.

قسەكردن لەسەر ئەو هەڵە سیاسیانە زۆرى دەوێت و شیكارو بەدواداچوونى زۆرى دەوێت من وەكو ڕەخنەم گرت ئەم چارەسەرانەش دەخەمە ڕوو بەو هیوایەى كۆمەڵ بە ڕقەوە ئەو نووسینە وەرنەگرێت بەڵكو بە ڕەخنە قبوڵى بكات.

أ‌- واباشە كۆمەڵى ئیسلامى و سەركردەكانى تۆزێك سیاسیانە هەڵوێست وەربگرن و پلانى دریژخایەن و دیراساتى دووریان لەسەر مەسەلەكان بكەن نەوەك لە خۆوە خۆ بكەن بە ئاوێكدا كە نەزانن چەند قووڵە، بۆیە وا پێویست دەكات ئەنجوومەنێكى ڕاوێژكارى كە زیاتر لە 100 ئەندام لە خۆ بگرێت پێكبهێنرێت و لەوێوە بەر لەدەرچوون و هەڵوێستەو بەیان و لێدواندان مەسەلەكان بەباشى هەڵسەنگێنرێت.

ب‌- پێویستە چەند كەسێك یان بڵێن كەسێكى ناتق و سیایى بكرێتە وتەبێژى كۆمەڵ كە بەزمانێكى تیروتەسەل و دوور لە دژیەك و ململانێ قسە بكات و، كاك. محمد كارگێرێكى بەتوانایەو ئیشى جوانى بۆ كۆمەڵ كردووە بەڵام لەبوارى سیاسەت و قسەى سیاسیدا دەكەوێتە هەڵەوە بۆیە بڕواى من واباشە یەكێك لەو كەسانە بكرێتە وتەبێژى كۆمەڵ: م. ئارام قادر، م. نازم یان كەسێكى تر بكرێتە وتەبێژ.

ت‌- پێویستە كۆمەڵ ململانێ لەسەر بەرژەوەندى گشتیدا بكات كە باقازانجى هەموو لایەكدا دەشكێتەوە وەك: مەسەلەى بودجەى هەرێم و ماددەى 140 و نەوت داهاتى گشتى نەوەك ململانێ ناوخۆیەكان و نێو ئیسلامیەكان كە ئەوەش هیچ حزەمەتێك بە اسلام و خەڵك ناكات.