پێشمەرگە جەنگاوەرانی ئازادییو رزگاریی یان ئامرازێكی دەستی ستەمكاریی

Sunday, 25/04/2010, 12:00

رەنگە ئەستەمترین كار كە تا رادەی مەحالأ نزیك دەبێتەوە ئەوەبێ كە دیموكراسیی لە وڵاتێكی وێرانەو دواكەوتوودا رەگداكوتێت، وڵاتێك رەشەخەڵكانێكی ناهۆشیارو بژاردەیەكی سیاسیی بەدكامو پەروەردەنەكراو تانوپۆی بنكردایەتییو سەركردایەتییەكەی پێكبهێنن. هەربۆیە جێگەی سەرسوڕمان نیە كە پاش 19 سالأ لە راپەڕینی جەماوەری باشووری كوردستانو كێشانەوەی دەزگاكانی كارگێڕی بەعسو دامەزراندنی دەسەڵاتی كوردییو پاشتریش هاتنی ئەمەریكا بۆ ناوچەكەو رووخاندنی بەعسو ئەنجامدانی چەندین هەڵبژاردن بۆ بنیاتنانەوەی"عێراقێكی دیموكراتیی فیدراڵیی"، هێشتا مەسەلەی بوونی شتێك بەناوی "دیموكراسیی" لە باشووری كوردستاندا جێگەی پرسیار بێت، بەتایبەت كە دیموكراسیی لەسەر بنەمای كاری سیاسیی مەدەنیی، حیزبی مەدەنیی، سەروەریی یاسا، جیاكردنەوەی راستیینەی دەسەڵاتەكان، رووننواندن، ئۆپۆزسیۆنی دانپێدانراوی بوێرو رامنەكراو، كارگێڕیی تەكنۆكراتو بەدەزگاییكراوو هێزی چەكداری بێلایەن، هەڵبژاردنی بێگەردی بێ تەزویرو ئازادیی راستیینەی سیاسییو رێزگرتن لە مافەكانی مرۆڤ بنجدادەكوتێت. بەڵام ریالیتەی ئەوەی هەبووە زیاتر بەشێوەی دەبلأ دەسەڵاتی ئۆتۆكراتیی- تیمۆكراتیی بووە كە كوردستانیان كردۆتە دوو پاوانی ئاغایانەی تازە بەسەر سەرمایەكەوتەدا كە تێیدا خزمەتی بنەماڵەو بەدەستهێنانی پلەوپایەی مەزنو پڕكردنی گیرفان لەجیاتی چەسپاندنی رژێمێكی تۆكمەی دیموكراسیی و رزگاركردنی ناوچە داگیركراوە دابڕراوەكانو خزمەتكردنی گەلی كوردو پەروەردەكردنی ئینسانەكان بەڕێوەچووە.
هەربۆیە لەماوەی هەڵبژاردنەكانی ئەم دواییەی پارلەمانی عێراق، لیستی هێزە سیاسییەكانی كوردستان لەبری ئەنجامدانی هەڵمەتێكی مەدەنییانەی دیموكراسییانە، كەوتبونە نانەوەو بەڕێوەبردنی هەراو ژاوەژاوێكی ناشرینوتوندوتیژ كە هەموو هێڵێكی سوورو ستاندەرێكی خەتای تێدا بەزێنراو زۆری نەما كۆمەڵگای كوردیی بەرەو خولێكی تری جەنگی ناوخۆ پەلكێشكات، دیاردەكانی سەپاندنی سزای سیاسیی،جەنگی راگەیاندن، تەقەكردن لە بارەگاكانی یەكتریو فڕاندنو تەخوینكردنی یەكترو هەتا لێدانەوەی قەوانی جۆگەلەی خوێنو خۆ بە میراتگری مافی گەلی جینۆسایدكراوی كورد نموونەی ئەو هەڵمەتی بەدەعەجانكردنەی یەكتری بوو، كە لیستی دەسەڵات بە حوكمی ئەوەی حكومەتی بەدەستەو بودجەی وڵاتی لە گیرفانە، لە هەمووان زیاتر پێی لێڕاكێشابوو.
لەم رووەشەوە هەڵچوونە ناسروشتییەكەی مەسعود بارزانی لەبەردەم كۆبوونەوەیەكی قوتابیانی حیزبەكەیدا، كە تێیدا هەڕەشەی كوردستانبەدەركردنی جیابیرانو رەخنەگرانی كرد بە بڕوای من یەك لە قێزەونترین كاری ئەو هەڵمەتی بە دەعەجانكردنە بوو، جگە لەوەی كە لەمێژووی سەرۆكایەتی هەرێمی ئەو كەسایەتییەدا وەك مەزنترین هەڵە دەبێ حیسابی بۆ بكرێتو لەكاتی دەنگدان لە دەستووری هەرێمدا پێویستە باش لەبەرچاوبگیرێت. چونكە سەرۆكێك هیچ شەرعییەتو سەلاحییەتێكی دەستووریی نەبێت هەڕەشەی كوردستانبەدەركردنی جیابیرانو رەخنەگران بكات، ئەی ئەگەر بە دەستوور ئەو هەموو سەلاحییەتی بۆ چەسپا كە بۆی دانراوە ئەبێ چ كارەساتێك بەرپا بكات؟!
لەولاشەوە، هێنانە سەر شەقامی پێشمەرگە بەوەی كە سوكایەتییان پێكراوەو وەك "ملیشیا" ناویان براوە،هێندەی تر ئەو هەڵمەتەی ناشرینتر كرد. ئەو پێشمەرگانەی هەروەك لێیڕاهێنراون سۆزی دەروێشییان بۆ حیزبەكەیان وای لێكردن بێئەوەی بزانن میلیشیا واتای چیو كێ بە درێژایی مێژوو ناوەرۆكی پێشمەرگەی شێواندووە، بكەونە قیڕەقیڕو داوای سزادانی "عەدنان عوسمان"ی ئەندام پارلەمان بكەن بەوەی كفرێكی گەورەی كردووەو سووكایەتیی بە ناوی"پیرۆزیی" پێشمەرگە كردووە، نەك هەر ئەوە بەڵكو حاكم شێخ لەتیفیشیان كردبووە ئامانج، ئەوەی پاڵێوراوی لیستی گۆڕان بوو بۆ ئەو پارلەمانی عێراقو لە سزای ئەو كفرەی كردبووی، زۆرترین دەنگی هاوڵاتیانی هۆشیاری كۆكردەوە كە دە هێندەی دەنگەكانی كەسایەتییەكی وەك "فوئاد مەعێوم"بوو!!
هەربۆیە لەم ماوەیەدا زیاتر لە هەر كاتێك لەناو رۆژنامەو گۆڤارەكاندا قسە لەسەر ناوی پێشمەرگەو میلیشیاو توڕەبوونی ئەو توێژەو مافەكانی كراو وشەی پێشمەرگە لە ناونیشانی ئەو گوتارانەدا بەكارهات. خوێنەری بەڕێز، ئێمەش لە رووەوە بە پێویستمان زانی لەم بابەتەدا سەرنجێك لەمەڕ ناوو ئەركی پێشمەرگەو ریالیتەی ئەو هێزە لە باشووری كوردستاندا لەماوەی چوار دەیەی رابردوودا بخەینە بەرچاوو پرسیارگەلێك لەو بارەیەوە بوروژێنین.
ئەوەی لەم رووەوە ئاشكراوو روونە ئەوەیە كە وشەی پێشمەرگە لە رۆژهەڵاتی كوردستانو دروست لە سەردەمی كۆماری كوردستاندا لەدایك بووەو نووسینی چیرۆكی "پێشمەرگە"ش لەلایەن رەحیمی قازی یەوە بووە. لە ئەدەبیاتی سیاسیی باشووری كوردستاندا تاكو نۆڤەمبەری ساڵی 1961دا شتێك بە ناوی پێشمەرگە نەبووە.لەو كاتەوە كە بەیاننامەیەك بەناوی"سەركردایەتیی پێشمەرگەوە" دەرچوو كە باسی لە شەڕەكانی نێوان چەكدارەكانی مەلامستەفا بارزانیو سوپای عێراق لە ناوچەی بادینان كردبوو.
"ئەنوەر دڵسۆز" لە ژمارە 65ی رۆژنامەی "كوردستان"ی زمانحاڵی حیزبی دیموكراتی كوردستان لە 3ی ژوئیەی 1946داو لە ژێر ناونیشانی"لەشكری كوردستان" دا باس لە دوو شێوازی دامەزراندنی لەشكر دەكات، یەكەمیان بۆ پەلامارو داگیركردنی وڵاتانی دیكە وەك لەشكری وڵاتانی ئیستیعماریی، دووەمیشیان بۆ پارێزگاریی وڵاتو وەك سوپەرێكی میللیی. ناوبراو دەڵێت:"لەشكری میللیی لەو وڵاتە دەبێ كە هەمیشە پارێزگاریی ئازادیی نێو وڵاتی خۆی بكات یان ئازادیی وڵاتی خۆیو حەقی خۆی داوا بكات. ئێمە كە ئەمەمان زانی بۆمان ئاسان دەبێ بزانین لەشكری كوردستان لە چ پایەیەكیدا دابنێین وە بەتایبەتی چۆنێتی حكومەتمان بزانین، حكومەتمان حكومەتێكی میللییەو لە میلەتەوە دەرچووە...بەرامبەر بە قانون حكومەتمان هەموو كەسێك یەك پایەیەو هیچ كەس تەفاوتی لەگەلأ هیچ كەسدا نیە لەبەرئەوە لەشكرمان لە ژێر سێبەرو رەهبەری ئەم حكومەتە دەبێ ببێتە لەشكرێكی میللی، هەروەها هەروەكو دەبینین لەشكرمان لە خودی میللەت دەرچووە، كارگەرو رەنجبەرو ئاغاو تجار هەموو بۆ ئامانجێك لە ژێر بەیداغی مقدس كورددا بە هەمو ئیتاعەتێك كار دەكەنو داواێكی عادلانەو حقوقو ئازادیو سەربەستی میللەتی كورد دەكەن...لەشكری كوردستانی ئازاد كە عبارەتە لە 50000 پێشمەرگە بناغەی لەشكری كوردستانی گەورە بە هەڵگری بەیداغی ئازادیی، ئەم لەشكرە وەك زۆر لەشكرانی دنیا زەحمەتو سەرباری میللەتی خۆیان نین." بەم شێوەیە نووسەرەكەی "كوردستان" پێشمەرگە بە هێزێكی میللی ئازادییخواز لە سایەی رێبەرایەتیی حكومەتێكی میللی ئازاد لە قەڵمدەدات، كە گیانفیدایی لە پێناو ئازادیی گەلو مافەكانی میللەتدا دەكاتو داردەستی هیچ هێزو لایەنێكی لۆكاڵیی تایبەت نیە. ئەمەش زیاتر وەك هێزێكی خۆبەخشی پرۆفیشنالأ دەردەكەوێت كە لەسایەی حكومەتێكی وەك كۆمارەكەی مەهاباددا دامەزراوەو بۆچونێكی ریالیستانەیەو ئازادیی گەلو حكومەتێكی دادپەروەر دەكاتە مەرجی كاری پێشمەرگە، هەربۆیە لە تەواوی ساڵێكی تەمەنی كۆماری كوردستاندا پێشمەرگە نەك هەر سوپەری راستیینەی میللەت بوو، بەڵكو ئازاری بە تاكە مرۆڤێكی كورد نەگەیاند .
مامۆستا جەمال نەبەز چەند ساڵێك لەمەوبەر سەبارەت بە پێشمەرگە دەڵێت:"هەن لە ماڵی خۆیاندا دانیشتوون، هەر رۆژێكیش كورد لێی قەوما، ئامادەن بچن چەك بكەنەوە شانیانو بەرگری لە خاكو نیشتمانی خۆیان بكەن، ئەوانە بۆ هیچ حیزبێك كار ناكەن. ئەو كەسانە چوونەتە ماڵی خۆیان دانیشتوون، نە پارە وەردەگرنو نە حیزب حیزبێنە دەكەن. دانیشتووە ژیانێكی كولەمەرگی دەباتەسەر، بەڵام رۆمەتو كەرامەتی خۆی دەپارێزێ. هەركاتێ تۆ بتەوێت، لێت بقەومێت دێتو دەتپارێزێت، ئەوە پێشمەرگەیە، بەڵام كەسێك پارە لەم حیزبو لەو حیزب وەربگرێتو كار بۆ ئەم حیزبو ئەو حیزب بكات، ناتوانم پێی بڵێم پێشمەرگە". لە راستییدا ئەم بۆچوونە زیاتر رۆمانسییەتی پێوە دیارەو سەردەمی خەباتی چەكداریی شۆڕشی كوردی كردۆتە بناغە بەتایبەتی دوو ساڵی یەكەمی شۆڕشی ئەیلول كە پێشمەرگەی كورد بە نانە رەقو بێ پارەو لە سایەی دروشمی"یان كوردستان یان نەمان"دژی سوپای عێراق گیانبازیی دەكرد. بەڵام ئەو پرسیارەش دێتە گۆڕێ كە ئایا بەدرێژایی مێژووی خەباتی كوردایەتیی لە باشووری كوردستاندا پێشمەرگەو حیزب بە یەكەوە نەبەستراونو لەژێر ئاراستەو فەرمانبەری رێبەرە حیزبییەكاندا نەبوون؟! ئایا كاتێك میللەت لێی دەقەوما پێشمەرگە دەیپاراست؟ ئایا پێشمەرگە چ شوێنێكی لەو كارەساتانەدا هەیە نەك هەر بەسەر میللەتدا، بەڵكو بەسەر خۆشیدا دەهات؟ بەراستیی كاتێك مرۆڤ لە مێژووی نیو سەدەی جوڵانەوەی كوردایەتیی باشووری كوردستان رادەمێنێت، ئەم پێناسەیەی مامۆستا نەبەزی وەك خەونی منداڵێك بۆ بینینی "سانتاكرۆز" دێتە بەرچاو!
"فلادیمیر ئیلیتش لینین"ی رابەری شۆڕشی ئۆكتۆبەری رووسیا پێشتر لە ژمارە 5ی گۆڤاری"پرۆلیتاری" 30ی سێپتەمبەری 1906 دا لە ژێر ناونیشانی "جەنگی پارتیزانیی" بەوردی باسی لەو تایبەتمەندییانە كردووە كە پێویستە لە هەر هێزێكی پارتیزانییدا هەبێت، دیارە بە دیدو تێڕوانینە بەلشەفییەكەی خۆی. شایەنی باسە ناوبراو چەند مەرجی زۆر گرنگی بۆ سەركەوتنی ئەو خەباتە بە پێویست زانیوە، یەكەمیان پەروەردەی تاك بە تاكی پارتیزانە بە هزری چینایەتییو ئازادییخوازانەو شۆڕشگێڕانە كە دژی ستەمو چەوسانەوەو بێ ئیرادەكردنی ئینسان بێت، بەشێوەیەك كاری جەردەییو ملهوڕییو تاكپەرستیی رەتكاتەوە. دووەم بریتییە لەوەی كە خەباتی پارتیزانیی نەكرێتە ئامانج، بەڵكو وەك یەكێك لە شێوازەكانی خەبات تێی بڕوانرێتو شێوازەكانی دیكەی پێ بەهێز بكرێت لە شارەكاندا نەك بە پێچەوانەوە. سێیەم بریتییە لە دیسپلینی ئەو هێزە بەشێوەیەك كە لە سایەی رابەری رێكخستنێكی بەهێزی شۆڕشگێڕی تۆكمەو خاوەن بەرنامەی توندوتۆڵدا بێت بۆئەوەی نەتوانێت لەو ئامانجانەی لە پێناویدا دروست بووە لابداتو تووشی شێوانو گەندەڵكاریی بێتو ببنە دەعبا. بە پێچەوانەوە لینین پێیوایە ئەو هێزە دەگۆڕێت بۆ هەموو شتێك جگە لە هێزێكی پارتیزانی شۆڕشگێڕی ئازادییخواز.
ئەوەی لینین بۆ پارتیزانی پرۆلیتاریا بە راستی دەبینێت، بۆ خەباتی پێشمەرگایەتییش هەر راستەو دەبێت هێزی پێشمەرگە لە كەسانێكی ئازادییخوازی خاوەن ئیرادەی ئازاد پێكبێن كە خۆبەخشانە ئامادەی گیانبازیی بێت لە پێناو ئازادیی گەلو پاراستنی كەرامەتو شەرەفی میللەتەكەیو رزگارییو پاراستنی سەروەریی خاكی كوردستان، هەروەها لە سایەی حكومەتێكی دیموكراتی نیشتمانییدا بێت یان لە سایەی رێكخراوێكی بە هەق دیموكراتیكو میللیو نیشتمانییدا بێت كە ئازادییو مافەكانی گەل خەتی سووری پێكبهێننو ئەسیری تاقمێكی ملهوڕ نەبێت كە بۆ بەرژەوەندیی خۆیانو ئاغاكانی بیانیی هەر رۆژەی لەسەر پەتێك یاری بكەنو بە داری گۆڵێكیاندا بدەنو ئاكامەكەشی بۆ پێشمەرگەو گەل بە كارەساتو ماڵوێرانی كۆتایی پێبێت.
بەداخەوە مێژووی پێشمەرگایەتیی لە باشووری كوردستاندا لاپەڕەی ئەوەندە تاریكو دزێوی گرتۆتەخۆ كە گومانی ئەوەمان لا دروست دەكات لە بنەرەتدا شتێك لە باشووری كوردستاندا هەبێت ناوی"پێشمەرگە"ی بەسەردا بچەسپێت.
لەو كاتەوەی لە باشووری كوردستاندا شتێك بە ناوی شۆڕشەوە دەسیپێكردووە رێكخستنێكی دیموكراتیكی میللی هاوچەرخ نەبووە رێبەرایەتیی بكات كە خاوەن سراتیژێكی روونو بەرنامەی تۆكمە بێتو زیرەكانە خەباتی پێشمەرگانە بە ئیرادەیەكی ئازادەوە لەسەر پێی خۆی رابوەستێنێتو لەپێناوی بەهێزكردنی شێوازەكانی دیكەی خەباتی دیموكراتییدا سوود لە گیانفدایی پێشمەرگە وەربگرێت. هەر لە كاتی دەستپێكردنی پێكهەڵپرژانەكانی ئەیلولەوە، مەلا مستەفا كە خۆی هەر بڕوای بە شۆڕش نەبووو خوازیاربوو وەك پەناهێندە لە سوریا وەریبگرن تا دوای ئاشبەتالأو هەڵگیرسانەوەی ئەوەی پێی دەگوترێت"شۆڕشی نوێی گەلەكەمان" جوڵانەوەی پێشمەرگانەی كورد زیاتر كاردانەوەی پەلامارو هێرشو فشارەكانی هێزەكانی سوپای عێراق بووە تا بەرنامەی تۆكمەو رێكخستنو ئامادەكارییو پەروەردەو بنیاتنانی ئیرادەی ئازاد. سەركردایەتیی سیاسیی لە شۆڕشی ئەیلولدا تا كۆتایی شەستەكانیش نەیدەزانی لەسەر چ داوایەك بۆ مافەكانی گەلی كورد ساغبێتەوەو هەر ماوەیەو لە هەر خولێكی گفتوگۆدا داوایەكی هەبوو،جارێك ئۆتۆنۆمیی، جارێك لامەركەزییو ئەو هەموو خوێنڕشتنەی لە كردەوە جەنگییەكاندا فشاریان بۆ رژێم ناوەندیی دروست دەكرد لە سەر مێزی گفتوگۆ مایەپوچ دەبوو. بنەماڵەی مەلامستەفا تاكڕەوانە لە رێگای بارەگاكەیانو دەزگای پاراستنەوە دەستیان بەسەر موقەدەراتی شۆڕشدا گرتبوو، چۆنیان بویستایە ئاوها دەیانهاژوو، پارتیش وەك رێكخراوێكی بێگیانو سڕو بێ ئیرادە مابووەوە. لەم رووەوە "د.حوسێن محەمەد عەزیز" لە لاپەڕە 80ی كتێبەكەی "رۆڵی سیستمی بنەماڵە لە بزاڤی رزگاریخوازی نیشتمانیی كوردستاندا" دەڵێت:"ئەوەتەی پارتی هەیە،لە رووی تیۆرییەوە، خاوەنی ئایدۆلۆژییو ستراتیژێكی دیاریكراویی نەتەوەیی نەبووەو نییە. هەرگیز گەشەی نەكردووە، هەر لە شوێنی خۆیەتیو بستێكیش پێش ناكەوێ. بەڵگەی ئەم بۆچوونەشمان خۆی لە هەرەسەكەی ساڵی "1975"دا دەنوێنێ. كاتێ بارزانی نەیتوانی یا نەیویست،لەسەر بەرەنگارییو خەباتكردن دژی دەوڵەتی عێراق بەردەوام بێ، وازی لە خەباتی چەكداریی هێنا،بڵاوەیان بە شۆڕشو شۆڕشگێڕەكان كرد،پارتیش وەك تەنێكی گەورە،فشۆلأو لاواز هەڵوەشایەوە. تەنانەت یەك ئەندامی پەلیتبیرۆو هەموو سەركردایەتیی پارتییش، نەك هەر نەیانتوانی، دەنگی ناڕەزایی خۆیان بەرز بكەنەوەو دژی ئەو بڕیارە راوەستن، بەڵكو هەڵوێستیشیان نەبوو. لەو بارەیەوە كریس كۆچێرا دەڵێ:" كەسێك نەیدەوێرا لەبەرامبەر بارزانییدا، ورتەی لێ بێ، تەنانەت لە كاتی تێكچوونی راپەڕینیەكەشدا، مرۆڤێ نەیتوانی دەنگی لەبەرەوە بێ، یا سەر بڵندكات."
ئەوەی لەبارەی پارتییەوە گوتراوە تەقریبەن سەبارەت بە تێكڕای حیزبەكانی دیكەی سەر شانۆی كوردستانی باشوور راستە. یەكێتی بۆ تاڵەبانی هەڵسوڕاوە، پارتی گەل بۆ سامی،حسك بۆ كاكە حەمەو زەحمەتكێشان بۆ قادر عەزیز و ئاوبێنەو دەستبشۆ. ئەوەی پێی بگوترێت ئازادییخوازییودیموكراتییو كوردپەروەریی ئەو حیزبانە كاریان پێی نەبووەو فلسە سورێكیان پێ نەداوە. ئاكامەكەشی بە ئاشبەتاڵەكان كۆتایی هات ،لە ئاشبەتاڵی 1975ەوە بۆ ئاشبەتاڵی دوای ئەنفالەكان و سوتماككردنی كوردستان لە ساڵی 1988دا، هەروەها ئەو ئاشبەتاڵەی كە دەشێت لە ئایندەدا بەسەرمان بێتو سەرەتاكانی ئێستا لە ئاسۆ دەركەووتون.
لەلایەكی ترەوە، ئەو جوڵانەوە چەكدارییەی كە لە ساڵی 1961ەوە دژ بە فشاری هێزە سەربازییەكانی دەوڵەتی عێراق سەریهەڵداوە، لە سۆنگەی بڕوانەبوون بە ئازادییو دیالۆگو مومارەسەنەكردنی دیموكراتییو كاركردن بۆ تاكە سەركردەیەك لەهەمانكاتدا كوردستانی رووبەرووی جەنگێكی زۆر گڵاوتری كردۆتەوە لەو جەنگەی كە لەلایەن دەوڵەتی داگیركەری عێراقەوە بەسەر گەلی كوردا سەپێنراوە. ئەو جەنگەش جەنگی كوردكوژیی نێوان حزبە سیاسییو چەكدارییەكانی كوردستان بووە لەگەلأ یەكتر، یاخود لەنێو ریزەكانی خودی ئەو حیزبانە، یاخود دژی خەڵكانێك كە لەگەڵ سیاسەتی ئەواندا نەبوونو ئامادە نەبوون ملیان بۆ كەچ كەن. كێ دەتوانێ ئەو راستییە بشارێتەوە كە شۆرشی ئەیلول هەر لەسەرەتاوە بەدەست دووبەرەكییەكی توندی نێوان سەرۆكو سكرتێری پارتییەوە دەیناڵاندو بەشێكی مەكتەب سیاسیی پارتی بڕوایان بە مەلامستەفا نەبوو، چاوەڕێی ئەوەیان دەكرد هێزەكانی قاسم بۆیان لەناوبەرێ. ئەو ناكۆكییانەی دواتر لە ساڵی 1964گەیشتە تەقینەوەو بە پەرتبوونی پارتیو دووبەورەكییەكی قولأو كوردكوژییەكی بێوێنە كۆتاییهات. لەم كاتەدا پێشمەرگەی سەنگەر نەیدەوێرا چاو خافلأ بكات، نەك لەبەر دوژمنو پەلامارەكانی، بەڵكو لەبەر هاوڕێی پێشمەرگەی كە نەوەكا چەكەكەی بەرێتو بچێتە بەرەكەی تر. دواتریش جەلالییەكان بوونە پیاوی رژێمی بەغداو لە پەلامارە مەزنەكەی "توكلت على اللە" دژی مەلامستەفاو چەكدارەكانی هێرشیان دەكردە سەر ئەو سەنگەرانەی كە دوێنی خۆیان بەرگرییان لێوە دەكرد. پاشتریش لە بنكەكەیانەوە لە "بەكرەجۆ" ئەوەی پێیانكراو بەغدا پێی خۆش بوو ئەنجامیانداو بەخۆشیان دەگوت پارتیو پێشمەرگە!!
لەورۆژانەوە تاكو ئەم دواییە زۆربەی هەرە كارەساتو نەهامەتییە جەرگبڕەكان هەیە بەسەر كوردو خودی هێزی پێشمەرگەدا هاتووە لەئاكامی ئەو شەڕو ململانێ گڵاوەدا بووە كە پێشمەرگە خۆی جێبەجێكەری بووە بێ ئەوەی سەركردەكانیان رۆژێك بیر لە خوێنی بەخۆڕایی رژاوی ئەو هەموو رۆڵانەی گەل بكەنەوەو پەنجەی پەشیمانی بگەزنو ئەو نەزیفە بوەستێن. جگە لە شەڕە گڵاوەكانی كە جەلالیی بە ویستی بەغدا لە ناوەڕاستی شەستەكانەوە تا ساڵی 1970ئەنجامیاندا، كارەساتەكانی هەكاریی، سوركێو، پشتئاشانو رەزگەو ئاشقوڵكەو قەڕناقاو كونەكۆترو وەرتێو هەموو ئەو هێرشو كوشتارانەی دی كە بەرەی جودو یەكێتی لە سەرەتای هەشتاكاندا دژی یەكتر ئەنجامیاندەداو باشتیرین رۆڵەكانی ئەم گەلەی تێدا لەنێو دەبرا.
بۆ خوێنه‌وه‌ی ته‌واوی وتاره‌که‌ تکایه‌ کلیک لسه‌ر ئه‌م لینکه‌ بکه‌:
http://www.kurdistanpost.com/view.asp?id=4e845e3a