دەستەی پشتیوانی کەرکوک
Thursday, 09/05/2013, 12:00
((ئامادەیی پێشمەرگە داوای جه‌ماوه‌ره، هەق دەسەنرێت نادریت))
جەماوەری ستەمدیدەی کورد .... هاووڵاتیانی کوردستان
ئاشکرایە ماوەیەکە روداوە سیاسییەکانی ناوەوەی عیراقی فیدرال، بە بیانوی بەرەنگاریکردن لە مافە پێشێلکراوەکانی پێکهاتەی سوننە، بە ئاڕاستەیەکی کودەتا ئاسا دەچن و مەبەستیانە کە سەرجەمی بنیاتە دەستوورییەکانی عیراقی پاش رووخانی بەعس، هەڵبوشێننەوە.
هەڵبەتە زۆربەی هەرە زۆری ئەو هەوڵ و روداوانە، کە خۆیان دەبیننەوە لە کاری تێرۆریستی و خۆپیشاندان و هەڵوێستەی بوختان ئاسای سیاسی، لەو ناوچانەدا بەرپا دەکرێن کە هاوسنوری هەرێم و له ناوچە دابڕێنراوەکانی کوردستانن. هەوڵ و ئاژاوه‌و رووداوەکان بە رۆژانە لەو ناوچانەدان، کە حکومەتی ناوندیش لەلای خۆیەوە پەیتا پەیتا خەریکی به سوپا کردنیانە، بە مەبەستی ئاڕاستەکردنی عیراقی بە ناو دیموکرات و فیدرال، بەرەو سیسته‌می عەسکەرتاری و تاکڕەوی حوکمی ناوەند. کە ئەمانە حالەت و بارودۆخ و ئاڕاستەکانی هەردوولای دەسەڵات و دژە دەسەڵاتی ناوەوەی عیراق بن، ئایا ئێمەی کورد دەبیت چ جۆرە خوێندنەوەیەکمان بۆ ئه‌م هه‌وڵ و جموجۆڵانه‌ی ئەم دوو لایەنە هەبیت؟
ئایا دروستە خوێندنەوەمان، خوێندنەوەی ئاسایی هەڵکشان و داکشانی کارو گەمەی دیموکرسی و بانگەشەی حیزبی بێت؟ ئایا راستە وای لێک بدەینەوە کە ئەو هەموو گەڤ وهاژوهوژانە، چ کاریگەرییەکی گەورەی راستەوخۆیان لەسەر بەرژەوەندییە نەتەوەییەکانی ئێستاو داهاتوومان نیەو نابیت؟ ئایا هەڵوێست وەرگرتنی سلبی، واتە دەخالەت نەکردنمان، هەڵوێستەیە بۆ پاراستنی دەستکەوتەکانمان و مسۆگەرکردنی هەقەکانمان؟ باشە ئەگەر هەڵوێست وەرگرتن ئەرکی سیاسی و نەتەوەیی ئەمرۆیی بێت، دەی نەتەوەی کورد دەبێت چ جۆرە هەڵوێستەیەک هەڵبژێریت و بیکاتە هەڵوێستەی تاکتیکی و ستراتیجی خۆی؟ پشتیوانیکردنی حکومەتی ناوەند (کە ئەمڕۆکە حکومەتی مالکییە) دژ بە هەڕەشەکانی لایەنە جۆرواوجۆرەکانی بە ناو سوننەو بە بناخەو رەچە بەعس و قەومچی؛ یا هەڵوێستی پشتیوانیکردن لە داواکانی سوننیەکان کە لە دوا ئاکامدا دەکه‌نه هاوکێشەی گێڕانەوەی عیراق بەرەو حوکمی مەرکەزو دەسەڵاتی مێژینەی سوننیەکان و سەپاندنی عەرەبچێتی بەسەر هەموو پێکهاتەکانی عیراق؟ بێگومان وەرگرتنی هەر یەک لەو هەڵوێستانە، ئەرک و بەرپرسیارێتی دەکاتە مۆرکی مێژووی ئه‌مڕۆی نەتەوەی کورد به‌رامبه‌ر بە دوو پێکهاتەی شیعەو سوننە و پرۆسەی سیاسی ئەمرۆی عیراق، هەڵوێستەی لایەنگری لە پاراستنی حکومەتی مالکی، بە بیانووی راگرتنی عیراقی دیموکرات و فیدرال، دەکاتە هاوبەشیکردنی نەتەوەی کورد لە پێشێلکردنی هەندێ لە مافەکانی مرۆڤ سەبارەت بە پێکهاتەی سوننە. و هەروەها زۆر رۆییش لە پشتیوانیکردنی داواو خۆپیشاندنەکانی سێگۆشەی سوننە، رەواییدانە بە هەوڵەکانی هەڵوەشاندنەوەی کۆمەڵێ قانون و ماددەی دەستووری کە بناغەی عیراقی فیدرال و دیموکرات پێک دەهێنن.
بۆیە لە مەترسی ئەم گەمە سەختەدا، ئەگەرکوردو دەسەڵاتی کوردی زۆر بە حەزەر نەبن، بێ شک زەرەرمەندو دۆراوی سەرەکی دیسان کوردو بەرژەوەندییەکانی نەتەوەی کورد دەبێت.
کاتێ که هه‌وڵ و ئاژاوه‌و ئاڕاستەکان هەموو بەرەو ئەو ئاقارە ئاشکرایانەن، کەواتە جۆرایەتی هەڵویست و شێوازەکانی خۆپاراستنی ئێمەی کورد دەبێت چی بن؛
- بەشداریکردن لە پشتیوانی یەکێ لەو دوو لایەنە، کە ئاسۆی دووری هەردوو لایان هەوڵی بچووککردنەوەی دەستکەوت و بەرژەوەندییەکانی نەتەوەی کوردە؛
- یا چاکی مه‌ردایه‌تی هه‌ڵماڵین و وەرگرتنی هەڵوێستی سەپاندن و چەسپاندنی ئەو هەقە مێژووییانەو مافە دەستورییانەیە، کە ساڵه‌های ساڵە رۆڵەکانی نەتەوەی کورد خەباتی بۆ دەکەن و قوربانی بۆ دەدەن؟
ئایا ئامرازی ئەو هەڵوێست سەپاندنە، چاوەڕوانیی دەستەوەستانە بۆ بەلادا خستنی ئەو ئاڵۆزی وهەوڵ و رووداوانە، یا سەپاندنی سه‌ندنەوەی هەقە لەو لایەن و خەڵکانەی کە هه‌ر خۆیان ماک و هەوێنی نەدانەوەی ماف و هەقی مێژینەی کوردن؟ ئایا چاوەڕوانی دەستەوەستان لە هیچ شوێن و لە هیچ مێژوویەدا داری بەردار بووە ؟ بەداخەوە، لۆجیک دەڵێت، لە هیچ وڵاتێک و لە هیچ چاغێکدا، چاوەڕوانی هیچی چارەسەرنەکردووە و هیچیشی لێ شین نەبووە؟ بۆیە کە داوای ئەو خەڵکە دوێنێ و ئێستاشدا هەر داوای هاتن و مانەوەی هێزی پێشمەرگەیە، داوای ره‌وای جه‌ماوه‌رییه. ئێمە له دەستەی پشتیوانی کەرکوک، پێمان وایە کە هاووڵاتیانی کوردستان و دەسەڵاتی سیاسی کوردیش، دەبێت هۆگریی و شێلگیری ئەمڕۆیان، ته‌نیا سووربوون بێت لەسەر سەپاندنی دیفاکتۆی هەبوونی هێزی کوردو دەسەڵاتی کوردی لەو ناوچە دابڕێنراوانەدا.
ئەمە ئەو داوا رەوایەیە، کە دەبێت ئەمڕۆ جێبەجێ بکریت، نەک سبەی، چونکە سبەی ئەرکی چارەسەرکردن قورستر دەبێت. چاوەڕوانی دەستەوەستان ئەو هەقە کاڵ دەکاتەوە کە هەقی گێرانەوەی ئەو ناوچە دابڕێنراوانەیە کە فاکتە مێژوویی و جیوگرافی و ئەتنیکیه‌کان بە بەشێک لە باشووری کوردستانیان زانیوه‌و دەیزانن.
ده‌سته‌ی پشتیوانی که‌رکوک / له‌نده‌ن
٥/٥/٢٠١٣
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
