سەردەمێک وەک هەر هەرزەیەکی  گەڕەکی هەژار نشینەکان، منیش لەگەڵ هەڵچوونی تەمەندا چەقۆیەکی ئەڵقەدارم  لە گیرفاندا بوو. ئەو چەقۆیە  بۆ من لە لەشکرێکی تەیار دەچوو، دەتگوت ماخۆلانمە، بەردەوام  بەدەستمەوە بوو ، ڕامدەوەشان و دەمکردەوە و  دامدەخست، بە بەرد و تەلی کارەبا و تەنەکەی خۆڵ و بڕبەن  دەمەزەرد و تیژم دەکردەوە . 

نەم دەزانی بۆچی  هێندە هۆگری ئەو چەقۆیە ببووم!

ئیتر لەگەڕەکدا هەرچی قەل و قاز و مریشک و پەلەوەر هەبوایە ، چەقۆکەی من دەهات بەگەردنیدا و سەرم دەبڕی، ئەو سەردەمە  هەر کچۆڵە و ژنێک لەبەر دەرگا دەوەستا  ، یان دەهاتە لامانەوە دەیان ووت:  ئادەی کوڕینە کێ دەتوانێت ئەم پەلەوەرەم بۆ سەربڕێت ئێمەش بۆڕبۆڕێنمان دەکرد. من پشکی شێرم بەر دەکەوت لەو تاوانە، چونکە چەقۆکەی من تیژ و کارابوو.

تا ڕۆژێک  "ئامین" هات کات نیوەڕ بوو بە خۆی و دوو کەروێشکەوە، ئێمە سەرگەرمی هەلوکێن بووین چاکم لە بیرە پێی ووتین: کێ دەتوانێت ئەم کەروێشکانەم بۆ سەربڕێت ؟ 

من دانەیەکم لێوەرگرت، کەروێشکەکە زۆر بزێو بوو  هەر دەجوڵایەوە پێیە کورتەکانیم خستە ژێر پێم بەدەستی چەپم گوێچکەکانیم گرت و ئەبووئەڵقەکەم  بەدەمەوەبوو ، کە دیقەتم دا فرمێسکێکی قەتیسماوم  لەچاوە ڕەشەگەورەکەی کەروێشکەکەدا بینی، سەرەتا گوێم پێنەدا  بەڵام کە چاوی نوقاند و کردیەوە فرمێسکەکەی هەڵوەری ، ئیتر من بووم بەتنۆکێک ئاو و کەروێشکەکەم بەردا. ئەو بەسزمانە  جوڵەی نەکرد تاسابوو ، پاش کەمێک  دەستی کردە قونەقون و دورکەوتەوە ، ئیتر منیش  هەرلەوێدا چەقۆکەم بەبەردێک شکاند و وازم لە سەربڕینی باڵندە هێنا. ئەو کەروێشکە  بۆ من زەنگێک بوو کە کردمی بە مرۆڤ.