سـەرمای شـەو

Saturday, 01/03/2014, 12:00

2244 بینراوە

دەبـێ ئەمشـەو
گڤەی ڕەشەبای سەر بەفـر
جەستەو ڕۆحـی
چەند مناڵی بێ بەرگ و نان
بتـەزێنـێ ؟

دەبـێ ئەمشـەو
لەم نیشتمانەی ئێمەدا
چەند هەژاری ئاشنا بە خـەم
لەژێـر دەوار
بەبێ پێخـەف
هەتا سەحەر
بناڵێـنێ ؟

دەبـێ ئەمشـەو
مـن و شیعر پێكڕا بگرین
بـۆ مناڵی چاو پڕئەسرین
بۆ هەژاری دڵ پڕگـرین

دەبـێ ئەمشـەو
مـن پەنجەرەی ژوورەكەی خۆم
بـۆ ڕەشـەبا
واڵا بكــەم
بەڵكو سەرما بێتە ژوورێ
هـەر بـەچەشـنی
مناڵانی پەنـجە تـەزیـو
سەرما بە نێو ڕۆحـم دابـێ
مـن وا دەكـــەم
دڵ بە گریان ئاشـنا دەكــەم