پرسی دووپشك
Saturday, 09/05/2009, 12:00
1359 بینراوە
ده‌سه‌ڵاتدارانی ئه‌مڕۆی كوردستانی باشوورله پێناوی هه‌ڵپه‌ی گیرفاندا، هه‌موو ئاواته چاره‌نووسسازه‌كانی گه‌لی كوردستانیان كرده قوربانی به‌رژه‌وه‌ندییه‌كانی سه‌رمایه‌ی هه‌ردوو بنه‌ماڵه‌و ئاگریان له‌خه‌رمانی خه‌باتی چه‌ندانساڵه‌ی باكووروڕۆژهه‌ڵات‌و ڕۆژئاوای كوردستان به‌ردا؛عێراقچێتی‌و وابه‌سته‌ییان كرده وشه‌پیرۆزه‌ی سه‌رزاری هه‌موو مرۆیه‌كی ئه‌م وڵاته .گه‌لێكیان به‌زۆر وابه‌سته‌ی دوژمنه‌كانی كرده‌وه؛تا له‌كورسی پاشایه‌تییان دڵنیابن له گه‌ل ناپرسنه‌وه، به‌ڵام كاتێك سه‌رده‌می هه‌ڵبژاردن نزیك ده‌بێته‌وه،فرمێسكی مرواری بۆ گه‌ل‌و چاره‌نووس ده‌ڕێژن.وه‌ك دوپشكی ژه‌هراوی ڕۆژانه سه‌دان جار به‌سه‌ر دڵی چاره‌نووسمانه‌وه ده‌ده‌ن ئێمه‌ش هیچ نابێژین؛ ئه‌و بێده‌نگییه نهێنییه‌كی تاڵه‌وچاره‌نووسمان به‌ره‌و هه‌ڵداشتن ده‌بات.
شیعری (پرسی دووپشك)شڵه‌قاندنی گۆمی ئه‌و بێده‌نگییه‌یه وپێشكه‌شه به‌وانه‌ی ده‌نگی گه‌ل نابیستن
وه‌ك دووپشك به‌ربوون تێمان
لێمان كه‌وتوونه پێوه‌دان
جێگه‌ی چزتان هێنده زۆره
له‌شمان هه‌مووی شین‌و مۆره
خه‌رمانی هیواتان سووتان
بێئه‌وه‌ی پرس بكه‌ن پێمان
ڕه‌نگی نێرگزتان كرد به سوور
هیوای نزیكتان كرد به دوور
ڕق‌وكینه‌تان پێ چاندین
سه‌ری به‌رزتان پێ نه‌واندین
دێڕی مێژووتان پیس كردین
ئابڕووی مرۆ‌ڤیتان بردین
٢
به‌ندو گۆمی درۆتان شڵقان
كۆرپه‌ی هیواتان تیا خنكان
ڕوومه‌تی سه‌گتان لسته‌وه
دڵسۆزیتان نوێ كرده‌وه
پێش له‌شكرو كۆچ‌و ڕه‌وی
دوژمن كه‌وتن، سه‌رتان نه‌وی
هه‌ر شه‌و له‌باوه‌ش‌و كۆشی
مه‌یگێڕێكا مه‌یتان نۆشی
كه‌چی جارێ نه‌تان پرسی
كه‌ئێمه تێرین یان برسی!
نه‌تان پرسی گوڵ بۆ دڕكه
كۆرپه‌ی هیوا ده‌م به‌وڕكه!
نه‌تان پرسی چۆنه چارمان
چۆنه ئه‌مساڵ چۆن بوو پارمان!
نه‌تان پرسی بۆچی ئه‌ژین
یان له‌پێناو چیدا ئه‌مرین!
چۆن دووپشك پرسیار ئه‌كات
كه به نێچیریه‌وه بدات!
[email protected]
