بەراوردێك لەنێوان ڕەوشی ژن لە باكور و باشوردا(بەشی یەكەم)
Sunday, 25/05/2014, 12:00
2271 بینراوە
سەرەتایەك
"درێژترین سیستەم لە دنیادا سیستەمی چەوسانەوەی ژنان بوە"
بەهۆی داگیركردنی كوردستان و دواجار دابەشكردنی بەسەر چوار وڵاتی خوێن مژدا. گەلی كورد تائێستاشی لەگەڵ بێت لە ڕاستیدا نەگەیشتوە بە مافە ڕەواكانی خۆی.هەر چەندە بە بەردەوامی لەلایەن كوردەوە ئینكاری ئەو داگیركاری یە دراوەتەوە بەڵام هێندە بەهێز نەبوە تا ڕێگە لە پلانەكانی دوژمن بگرێت.بۆلێك ترازانی كۆمەڵایەتی و سڕینەوەی نەتەوەیی و نیشتمانی و جیاكاری ڕەگەزی و ئاینی.بەتایبەتی لەسەدەی ڕابردوودا كە قڕكردنی كوردان گەیشتە دوالوتكە. بەڵام خۆش بەختانە لەسەدەی نوێدا بەرانبەر بە گەورەترین ئۆپەڕاسیۆنە سەربازی و مەدەنیەكانی دوژمنان بۆ نەمانی شۆڕشگێڕان لە چیاكان و توانەوەی ڕۆحی نەتەوەیی و بێبەشكردنی دیموكراسی لە شارەكان حەرەكەتی كوردیش زۆر چالاكانەتر لە ڕابردوو بە ئەقڵیەتێكی باشتر هاتە مەیدان بۆ بەرەنگاربونەوەی پلانی دوژمنان سەركەوتنێكی مێژووی تۆمار كرد.
ئەوەی من زیاتر مەبەستمە لێرەدا باسی بكەم تایبەتە بە بواری ژنان. چونكە قوربانی یەكەم و هەرە لەپێشی دوژمن خودی ژن بوو. ئەگەر وەك سیستەم سەیربكەین بەگشتی هەردوو ڕەگەر پیاو و ژن وەك یەك لە لایەن دەوڵەتانی داگیر كەرەوە دەچەوسێنرانەوە. دووبارە بەتایبەتی جارێكیتر دیسان ژن لە لایەن هەمان پیاوی چەوساوەی دەستی سیستەم ژنی دەچەوسانەوە و وەك ئەوەی كە هەیە ڕێزی لێ نەدەگیراو مافی نەدەدرایە. ئەو غەدرەی لە ژن دەكرا قاڵبێكی یاسایی بۆ داتاشرابو تەنانەت ڕێڕەوێكی سروشتی نەشیاوی گرتبۆیە بەر. ئەو كێشانەی كە لە لایەن پیاو و سیستەمەوە ڕۆژانە بۆ ژن دەهاتە پێش ئەمانە بون وەك. فرەژنی. گەورە بە بچوك. هێشتنەوەی ژن وەك كۆیلە تەنها بۆ كار كردن لە چوار چێوەی ماڵدا. پرس و ڕاپێنەكردنی بۆ هەر شتێك.لە مافی بەركەوتەی میراتیدا نیوەی پیاو. وە گوێنە گرتن بۆ هەر داخوازی و داواكاریەك كەهەی بوو. هەموشمان شایەدی ئەوەین كەتائێستش بەردەوامە زۆر جار لە سەر بچوكترین كێشە ژن ئەو پەڕی سوكایەتی پێكراوە تەنانەت كەمنداڵی نەدەبو ژنی بە سەر دەهات یان منداڵیشی ببوایە گەر كوڕنەبوایە هەمان یاسای بەسەر دا دەسەپێنرا,
حەز دەكەم چیرۆكێكیشتان بۆ باسبكەم بۆ زیاتر دەوڵەمند كردنی بابەتە كە. كە ئەم بە سەرهاتە بەسەر خودی خۆمدا هات. لە دوای قۆناغی هاوسەر گیری كچێكمان بو. كە لە نەخۆشخانە هاتینەوە پورێكی خۆم لە ماڵی ئێمەبوو هات پرسیاری لە من كرد وتی لە خوا بەزیاد بێت خوا منداڵێكی پێ بە خشیون منیش وتم ڕاستە وایە بەزمانی خۆی وتی مندالچەكەتان نێرە یان مێیە وتم پورێ گیان كچێكی جوانمان بوە. پورم دەستی كردە گریان وتی خۆزگە ڕۆڵە كوڕ بوایە نەك كچ.منیش بیرم لەوە كردەوە كە ئەمە واهاتۆتە قەناعەت كە خۆی ژنە و ڕقی لە ژنە. دەستم كردە پێكەنین چونكە لەو كاتەدا هیچ تێنەگەیشتم,
لەدوایدا بیرم كردەوە كە ئەم پیاو سالاریە وای لە ژن كردوە كە خۆی لە بەر چاو بكەوێ و هاشا لە ڕەگەزەكەی خۆی بكات بە ڕاستی ئەمە ئەو پەڕی كارەساتە,
كێشەی بە كەم بینینی ژن بە هۆی ئەو پەیڕەو كاریە درێژخایەنەوە تەنها لە نێوان ئەقڵیەتی پیاودا نەمایەوە و ڕوبەرێكی گەورە تری گرتە بەر. تاوای لێهات ژنانیش ئەمەیان قبوڵكرد كە وایان دەبینی چینێكی نەفرەتین لای خوداوەند جگە لە تەسلیمبون هیچ چارەیەكیتریان نەبو,
