تانەمان لە بڕیارەكەی دادگاى سلێمانى هەیە

Sunday, 11/03/2012, 12:00

لە كەسوكارى تالیب غریب- ى بێ تاوانەوە بۆ ڕای گشتى
براكەمان دواى ئەوەى بەرائەتى وەرگرت لە لایەن دادگاوە . دووبارە بڕیارى گرتنی بۆ دەرچووەوە و ئەمجارە بەپێی خۆی چووە بەردەمی دادگا. چوونكە هیچى لە خۆیدا شك نەدەبرد.

بۆ تانەمان لەبڕیاری دادگا هەبێت؟ ئەمە پرسیارێكە كە هەموو خێزان و كەسوكاری ئێمەی تووشی سەرسوڕمان كردووە، ئەوەتەی بەبیری من بێت جیابوونەوەی ژن و مێردێك لەدادگا زیاتر لەساڵێكی پێچووە كەچی لەدۆسێیەكی ئاوادا كە پەیوەندی بەژیانی كەسێكەوە هەیە و پەیوەندی بەژیانی خێزانێكەوە هەیە بە 3 دانیشتن كۆتایی هات لەكاتێكدا لە هیچ دانشتنێكدا نە شاهیدەكان و نە ئەو بەڵگانەی لەبەردەستدا بوون تاوانباری تالیب نەدەسەلماند، بەپێچەوانەوە هەموو بەڵگەو شاهیدەكان بێتاوانی تالیب-ی برامیان دەسەلماند.
بۆئەوەی هەموو لایەك لەراستی ئەم رووداوە تێبگەن، پێویستم بەوەیە كە بچمەوە سەرەتای رووداوەكان و وەكو خۆیان باسیان بكەم، لەخۆپیشاندانى 26/2/2011دا لەسەرایى ئازادى شارى سلێمانى بۆمبێك لەبەردەركی سەرا تەقییەوە و بووە هۆی تەقەكردنێكی زۆر، لەو دوانیوەڕۆیەدا لەنێوان مزگەوتی گەورەی سلێمانی و كاسۆمۆڵدا بەهەزاران فیشەك تەقێنراوە، لەئەنجامی ئەو تەقانەدا كەسێك بەناوی ئومێد جەلال كوژرا و لەبەرامبەردا كەسێكى تر بوو بەقوربانى كە تالیب غەریب-ی برامە، بەبێئەوەى ئاگادارى ئەو ڕووداوە بێت، دوای ئەوەی بەدەیان كەس لەو شوێنەدا كەوتونەتە ئازار و ئەشكەنجەدانی و هەر لەوێدا لەژێر فشاری خەڵكدا دەدرێتە دەست ئاسایش، هەر لەیەكەم ساتی دەسگیركردنییەوە ئێمە باوەڕی تەواومان بەسەرەوەریی یاسا هەبووە و ویستومانە رێكارە یاساییەكان بەئاراستەی خۆی بڕوات، بەڵام بەداخەوە ئەوەی لەدوایدا بینیمان كە ئەو توَمەتەی خرایەپاڵ و پاڵپشت بە ئەحكامی ماددەی 405 لەیاسای سزاكان، سزایی هەتاهەتایی درا.
نكۆڵی لەوە ناكەم كە كورى ئیمە یەكێكە لەپێشمەرگەكانى مەكتەبى سیاسى ى.ن.ك و لەو رۆژەدا بەئەركی خۆى و بەفەرمانی فەرماندەی فەوجی 5ی مەكتەبی سیاسی چووتە سەراى ئازادى بۆ چاودێریكردنی هەموو جموجۆڵێكی نەخوازراو كە لەلایەن گێرەشوێنانەوە ئەنجامبدرێت.
تالیب-ی كوڕمان لەئەسحابەسپی بووە
وەكو باسمكرد لەو رۆژەدا تەقەیەكی زۆر دەكرێت و دەبێتە هۆى شپرزەیى و شڵەژانى خەڵك و تالیب-ی براشمان وەك زۆر كەسی تر دەیەوێت بەدەنگ تەقەكانەوە بچێت چونكە تالیب-ی برامان لەكاتی تەقەكاندا لەئەسحابەسپی بووە و لەكاتی رۆیشتنی بەرەو بەردەركی سەرا لەلایەن چەند كەسێكەوە گومانى لێدەكریت سەر بەدەسەڵاتە، گێچەڵى پێدەكرێت و راودەنرێت تا لەخوار سینەما سیروان دوای ئەشكەنجەدان چەندین چەقۆى لێدەدەن و هاواری خەڵك دەكەن... وەرن بیكوژن!، بۆیە ئەگەر باس لەرێكاری یاسایی بكرێت ئەوا لەسەر ئەو رووداوە پێویستە بەدەیان كەس دەستگیربكرێت و داوای یاساییان لەسەر تۆمار بكەین.
كاتێك لێدەدرێت لەلایەن ئەو كەسانەوە ئەوسا دەزانرێت كەدەمانچەى پێیە، لەمكاتەدا دەمانچەكەى پێدەگیرێت، تەنانەت یەكێك لەشایەتحاڵەكان لەبەردەم دادگادا شایەتیدا و وتى: یەكەم كەس بووم دەمانچەكەم وەرگرت دەمانچەكە تەقە پێَنەكرابوو، چونكە بۆنم كرد بۆنى باروتى لێنەدەهات فیشەكەكانیشى كەمى نەكردبوو، كە بەپێی راپۆرتی بەڕێوەبەرایەتی لێكۆڵینەوەی بەڵگەی تاوانی هەرێم (مكتب الاسلحة الجرمية) كەشفى چەكەكەى دەكرێت راستی ئەو شاهیدە دەسەلمێنێت بەهیچ شێوەیەك تەقەى پێنەكراوە، تەنانەت لەلایەن فەوجەكەشییەوە فەرمانی تەقەكردنی پێنەكراوە.
یەكێكی تر لەو بەڵگانەی بیتاوانی تالیب-ی برامان دەسەلمێنێت لە راپۆرتى پزیشكى دادوەریدا و توێكاریی جەستەیدا ئاماژە بەوە دراوە كە ئومێد جەلال بەفیشەكى كڵاشینكۆف كوژراوە نەك بەگوللەی دەمانچە لەكاتێكدا تالیب-ی برامان دەمانچەى پێبووە.
ئەوەی ئێمە بەتەواوی تووشی سەرسوڕمان دەكات لەم بڕیارەی دادگا ئەوەیە كە پاش 72 ڕۆژ لەزیندانی بڕیارى بێتاوانی وەرگرت لەلایەن دادگاوە كەچی دواى ماوەیەكی كەم دۆسیەكەى لەلایەن ئەندامێكی داواكاریی گشتی تەمیزكرایەوە و دەستگیركردنى بۆ دەرچووەوە، ئەمجارەش چونكە پشتئەستوور بوو بەبێتاوانی خۆی و باوەڕی بەسەروەریی دادگا هەبوو بەپێى خۆى چووەوە بۆ بەردەم دادگا، بەڵام كۆتایی دادگا ئەوە بوو كە بینیمان.
چەندین بەڵگەمان هەیە
بۆیە چەندین بەڵگەمان هەیە یەك لەو بەڵگانە لەدانیشتنی دووەمی دادگاییكردندا سی دی-یەكمان پێشكەش بەدادگا كرد كە چەند گرتەیەكی ڤیدیۆی تێدایە، نەدروستكراوی ئێمەیە و نەئێمەش خاوەنین بەڵكو لەلایەن خەڵكی خۆپیشاندەران خۆیەوە گیراون، بەڵام بەداخەوە دادگا هیچ كارێكی بەو گرتە ڤیدیۆییە نەكرد، لەو گرتە ڤیدیۆییەدا گەنجێك دەردەكەوێت و دەلێت من لەناو پێشمەرگەكاندا بووم، پێچشمەرگەكان لای كاسۆمۆڵ كەسێكی بەتەمەنیان كوشت و فیشەكێكیان نا بەتەپڵی سەرییەوە.
یەكێكی تر لەو بەڵگانە لەكاتی لێكۆڵینەوەو لەكاتی دادگایكردنیشدا دوو شایەتحاڵە كە لەبەردەم دادگا وتیان ئەو كەسەی تەقەی كردووە دەیناسینەوە، بۆیە هەریەكەیان دووجار كرداری ناسینەوە (عملية التشخيص) پێئەنجامدراوە و سەلماندویانە كە ئەو كەسەی تەقەی لەئومێد كردووە، تالیب-ی برامان نییە، بەڵكو كەسێكی ترە قەمسەڵەیەكی رەشی لەبەردا بووە و قژی لولە.
هەروەها بەڵگەیەكی تر كە بێتاوانی براكەم دەسەلمێنێت و دادگا گوێی پێنەدا، وتەی یەكێك لەو دوو شاهیدە بوو، ئەو كەسێكە نەئێمە دەیناسین و نە بینیومانەو عەرەبانەی پێبووە لەشوێنی رووداوەكە لەبەردەم دادگا گێڕایەوە كە كەسێك لەناو خۆپیشاندەرانەوە تەقەی كرد و لەبەرامبەردا ژمارەیەك پێشمەرگە لەكاسۆ مۆڵەوە بەرپەرچی تەقەكەیان دایەوە لەئەنجامی تەقەی پێشمەرگەكاندا وتیان كەسێك كوژرا، بۆ راست و دروستی ئەمەش بەڵگەی ڤیدیۆیمان هەیە و پێشكەش بەدادگامان كردووە.
یەكێكی تر لەو بەڵگەیەی كە دادگای تاوانەكانی سلێمانی پشتی پێبەستووە و تالیب-ی پێ حوكمدا ئەوە بوو كە لەلایەن هیچ هێزێكەوە رانەسپێردراوە بچێتە بەردەركی سەرا، بەڵام من دەلێم ئەوە ئەركی دادگایە داوا لەلایەنی بەرپرس بكات كە ئایا بەفەرمانی فەوجی 5ی مەكتەبی سیاسی نێردراوە یان نا! یاخود یەكێكی تر لەو كەموكورتییانەی دادگا ئەوەیە كە تالیب-ی برامان لەكاتی ئیفادەدا لەبەردەم دادگادا وتی، كە لەو ئەركەی خۆیدا دوو كەسی تری لەگەڵدا بووە كە بەهەمان شێوە لەلایەن بەرپرسی فەوجی 5وە نێردراوە، بەڵام دادگا ئەو دوو كەسەی وەك شاهید بانگی دانیشتنەكانی دادگا نەكرد.
دادوەر لەدانیشتنی دووەمدا ئەوەی كرد بەبەڵگە كە بۆچی لەكاتێكدا تالیب لەلایەن یەك كەسەوە لێیدراوە بەرگری لەخۆی نەكردووە و هاوار بكات كە بێتاوانە، بۆیە من لەهەموو كەسێك دەپرسم كە كەسێك بە50كەس لێی بدەن چۆن دەتوانێت بەرگری لەخۆی بكات لەكاتێكدا ئەمەش بەبڵگەی ڤیدیۆی هەیەو پێشكەشی دادگا كراوە، بەڵام دادگا پشتی پێنەبەست.
لەسەروو هەموو ئەمانەوە ئەوەی كە ئێمەی دڵخۆشكرد كە بێتاوانی تالیب-ی سەلماند ئەوەبوو لەكۆتایی دادگایكردندا داواكاری گشتی هەستا داوای ئازادكردنی تالیب-ی برامانى كرد لەبەرنەبوونی بەڵگە كە تاوانبارە.
من لەكۆتایی قسەكانمدا ئەوە دووبارە دەكەمەوە كە ئومێد جەلال لەبەردەم كاسۆمۆڵ-دا كوژراوە، بەڵام تالیب-ی برامان نەك نەگەیشتۆتە ئەو شوێنە بەڵكو بەدووری300- 400مەتر لەوێوە دوور بووە و چەندین بیناو باڵەخانە لەنێوانیاندا بووە، بۆیە ئێستاش دەیڵینەوە كە هەر كەسێك لەشوێنی كوژرانی ئومێددا بەڵگەی تەواوی هەیە كە تالیب تۆمەتبارە ئەوا ئامادەیی هەموو سزایەكین.

لەلاین بنەماڵەى حوكمدراو