Pkk و چەند پەیڤێك لە پەراوێزى پەیامەكەى ((ئۆۆج ئالاندا))

Sunday, 31/03/2013, 12:00

پارتى كرێكارانى كوردستان لە سەر دەستى كۆمەڵێك لاوو خوێندكارى چەپى زانكۆكان و دەرەوەى زانكۆكان كە ((مەیلێكى دەرون مەكتەبى ماركسیزم ــ لینینیزمیان)) هەبوو بونیاد نراو هاتە نێو گۆڕەپانى خەباتى سیاسیەوە . كارەكتەرى سیاسى سەرەكیان عەبدڵا ئۆۆج ئالان دەستێكى باڵاى هەبوو لە تێورزە كردنى فكرى سیاسى و گڵاڵە كردنى پێكهاتەى ئەم پارتەدا . بیرى ئایدۆلۆژی چەپڕەوانەى ماركسیزم لەو قۆناغ و سەردەمەدا پرۆژەو پلاتفۆرمى سیاسى زۆربەى ئەو پارت و ڕێخراوە چەكدارو شۆڕشگیِڕانە بوو كە لە سەر بنەماى ((پارتیزانى فۆرمى گیڤاریزم)) خەباتیان دەكرد بۆ ڕزگارى و ئازادى ، پارتى كرێكارانى كوردستانیش هەمان ئایدۆلۆژى و ڕێچكەى سیاسى كردە بنەماى فكرى بۆ درێژە پێدانى خەبات دژ بە دەوڵەتى توركیاى كەماڵیزم و بانگەشە كردن بۆ دەوڵەتى سەربەخۆى كوردستان , pkk لە بارودۆخێكى سیاسى زۆر ئاڵۆزو پڕ لە كێشمەكێشى سیاسى كە دنیا لە دۆخى جەنگى سارد و دابەش بوونى جیهان لە نێوان دوو جەمسەرى ((سەرمایەدارى ئیمپریالیزم و ،سەرمایەدارى دەوڵەتى)) دروست بوو هاتە نێو گۆڕەپانى خەباتى سیاسى لە كوردستانى باكور . لەو كاتەدا زیاتر بەرژەوەندى ئابوورى و سیاسى دەوڵەتە زلهێزەكانى دنیا ڕەچاو دەكرا ، كە هەردوو جەمسەر دەسەڵات و هەژموونى سیاسى و ئابوورى و سەربازیان سەپاند بوو بە سەر نفوزو چوار چێوەى جێوپلۆتیكى دەسەڵاتى كۆڵۆنیالیزە كراویاندا . جەمسەرەكان نەخشى سەرەكیان دەگێڕا لە دیاری كردنى نەخشە ڕێگاى ئایدۆلۆژى و فكرى و سیاسى خەبات بۆ ئەو حزبانە . بیرى ناسیۆنالیستى توركى پان كەمالیزم لە توركیا كایەى دەوڵەت و دامەزراوەى سەربازى فاشیزمى كرد بووە ئامێرێك بۆ ستەمكارى و پاكتاو كردنى نەتەوەكانى ترى وەكو((كوردو ، ئەرمەن و ، عەرەب)) ، دەوڵەتە سەرمایەدارە گەورەكانى دنیاش چاو پۆشیان دەكرد لە هەنگاوە فاشیەكانى توركیا ، چونكە دەوڵەتى توركیا ئەندامى حلفى ناتۆ بوو ، كوردیش وەكو نەتەوەیەكى گەورە كە لە لایەن توركیاوە خاكەكەى داگیركراوە دووچارى شاڵاوێكى دڕندانەى لە ناو بردن و نەفى كردن ببووە . ئەو گروپە گەنج و خوێندكارانەى ئەو حزبەیان دامەزراند گەواهى چەوساندنەوەیەكى دڕندانە و سڕینەوەى سیماى نەتەوایەتى بوون لە لایەن ناسیۆنالستە توركەكانەوە ، كردەوەى فاشستانەى ناسیۆنالیستە توركەكان فاكتەرێك بوو بۆ زیاتر زاڵ بوونى ئایدیاى ناسیۆنالیستى كوردى و ئاوێتە كردنى بە ئەنگیزەى ((سۆشیالستى زانستى)) . هەنگاو بە هەنگاوى سیاسى پەكەكە پتر ئەنگیزەى k دووهەم كە كوردستان و ئەندێشەى ناسیۆنالیزمە زاڵ بوو بە سەر بزووتنەوەكەیانداو ، k یەكەم كە مەبەستى كرێكارو بزووتنەوەى كرێكاریە پراوێز خرا ، لەو چركە ساتەوە پەكەكە وەكو حزبێكى ناسیۆنالیستى كە ئامانجى كوردایەتى و ڕزگار كردنى كوردستان بوو لە چەوساندنەوەى نەتەوایەتى و بە دەست هێنانى مافە دیمۆكراسى و نەتەواتیەكانى كورد بوو لە گۆڕەپانى خەباتدا خەباتى بە ڕیوە دەبرد ، pkk وەكو بزووتنەوەیەكى پۆپۆڵستى تەنها لە سەر بنەماى ئایدۆلۆژى و بە شێوەیەكى سەتحى ناوى كرێكاریان بە كار دەبرد، نەك سوور بوون و جەخت كردنەوە لە سەر بەرژەوەندیەكانى چینى كرێكار . بەڵكو ئەوان پتر نوێنەرایەتى ناسیۆنالیستى كورد بوون تا كرێكار . بووونى باگراوەندێكى ئایدۆلۆژى ماركسیزم ـ لینینیزم لە نێو پەكەكەدا كەڵكەڵەى ئەو ئەندێشەیان ڕەواج پێدەدا كە ئەوان نوێنەرایەتى چینى ((پڕۆلیتاریاى)) كورد دەكەن و ئەركى دروست كردنى دەوڵەتى كورد لە ئەستۆى ئەم چینەدایە ، ئەوان پێیانوابوو دروست كردنى دەوڵەت ئەركى ((بۆرژوازى نیشتمانیە)) بەڵام ئەو چینە هێشتا دروست نەبووە كە بتوانێت دەوڵەت دروست بكات . تێكڕاى حزبە سیاسیەكانى كوردستانیش عەقڵى سیاسیان و نوێنەرایەتى ((سۆشیال ـ عەشایەر)) و ((سۆشیال ـ فیوداڵن)) فیوداڵ و عەشایەر زیاتر خولیاى بەرژەوەندى خێڵەكانى خۆیانن تا غەمى نیشتمان و پرۆژەى دروست كردنى دەوڵەتى نەتەوەیى , تەوژمى ناسیۆنالستى سەرەتاین و هەمیشە لە پاشكۆى ناسیۆنالیستە داگیر كەرەكانى كوردستانن و ئامادەن خاك و نیشتمان و نەتەوە بە گوێلێك پارە بفرۆشن و ببن بە جاش ، تەنانەت ئۆۆج ئالان ڕەگى مێژووى كولتورى جاشایەتى دەگەڕێنیًتەوە بۆ ئەفسانەى ((داستانى گلگامش)) .
 كەواتە ئەمان وەكو چینى پڕۆلیتاریاى كورد مەبەست پەكەكەیە ئەركێكى گەورەیان لە سەر شانە ئەویش دروست كردنى دەوڵەتى كوردستانە . ئاشكرایە ئایدیاى نوێنەرایەتى پڕۆلیتاریاى كورد ((تاكتیكێكى ئایدۆلۆژى پۆپۆڵیستانەى)) قۆناغبەندى ئەم پارتە بوو نەك ئیستراتیژیەكى ئایدۆلۆژى و سیاسى ماركسیزم ، هەروەها پتر دڵدانەوەیەك بوو بۆ چەپى دەرون مەكتەبى كە باڵى كێشا بوو بە سەر ئایدیاى زۆربەى كادرەكانى نێو بزووتنەوەكە كە لە سەرەتاوە لە نێو هەناوى چەپى توركیا سەری هەڵدا بوو . پاش كۆتایی جەنگى ساردو زاڵ بوونى هەژموونى سیاسى و سەربازى یەك جەمسەرى و گۆڕانى هاوكێشە سیاسیەكان لە جیهانداو داشكاندنى بە قازانجى سیستەمى سەرمایەدارى جیهانى بە ڕابەرایەتى ئەمریكا و هەرەس هێنانى سیستەمى سۆشیالیزمى بنیاد نراو كە هەندێك جار بە هاو پشتى پارتە چەپڕەوە كلاسیسكیەكان دەژمێردرا ، پەكەكە بە پێى داڕشتنى پیلانێكى هەواڵَگرى و جاسوسى و مافیایى نێو دەوڵەتى دووچارى گورزیكى كوشندە دەبێتەوە . پلانەكەش كۆمەڵێك دەوڵەت تییدا بەشدار دەبن بە تایبەتى كارەكتەرى سەرەكیان ئیمپریالیزمى ئەمریكایە ، ئەویش گردن و فڕاندنى ((عبدڵا ئۆۆج ئالان)) بۆ نێو توركیا و زیندانى كردنى لە دوورگەى ئیمراڵى . ئۆۆج ئالان وەكو كارەكتەرى سەرەكى پارت و تێورێزە داڕێژەرى هزرى سیاسى و ئایدۆلۆژى پارتەكە گۆراِنكاریەكى گەورەى فكرى و سیاسى بە سەر ئەندێشەكانیدا دێت و دەكەوێتە ڕەخنە گردنى زۆرێك لە تێزەكانى ((كارڵ ماركس)) سەبارەت بە چەمكى ئابوورى ، دەوڵەت ، بە بنەما گردنى چینى كرێكار و هەندێك تێزى دیكەش ، بە پێى لێكدانەوەكانى ئۆۆج ئالان ((كارڵ ماركس و فردریك ئنجلس)) بە هەمان تێڕوانین و لۆژیكى بیرمەندانى سەرمایەدارى لە دەوڵەت و ئابوورى سیاسى گەیشتوون و هەڵەى كوشندەیان كردووە لە شرۆڤە كردنى ئەو چەمكانەدا . لە هەمان كات دا چەندە ڕەخنە لە تێزەكانى ماركسیزم دەگرێت ، بەڵام لە كۆتایى یەكێك لە پەرتووكەكانیدا دەڵێت مەبەستى ئەوە نییە بە تەواوى ماركسیزم ڕەت دەكاتەوە بەڵكو زۆرێك لە تێزەكانى پێ قبوڵە . ئەمە ئەو ڕستەیەى ((غورباتشۆف))مان بیر دەخاتەوە لە كۆتایى ساڵەكانى هەشتاى سەدەى بیستەم كە لە پەرتووكى ((بیروستروكیاو گڵاسنۆست)) دەیگوت بینا كردنەوە مەبەست گەڕانەوەیە بۆ بنەماكانى فكرى لینینیزم ، بەڵام لە راِِستیدا هەڵتەكاندنى ئەنگیزەكانى لینینبزم بوو . ئۆۆج ئالان چەندە ڕەخنەى تیۆرى ئاراستەى تیزەكانى ماركس دەكات ، لە لایەكى دیكەشەوە زیاتر تێزو بیروڕاكانى ئەنارشیزمەكانى وەكو ((برۆدۆن لە بوارى ئابوریدا، باكۆنیین لە بوارى دەوڵەت دا)) دەنرخێنێت ، كە خودى ماركس و ئنجلس ڕەخنەى تیۆرى توندیان لە ئایدیاى ئەو ئەنارشیزمانە هەبووە . هەر خۆى دەڵێت من دوو هەنگاو لە ئەنارشیزمەكان نزیك بوومەتەوە ، لە لایەكى دیكەشەوە زۆر شەیداى ئەندێشەكانى ((فردریك نیتشەى)) ئەڵمانى بووەو دەڵێت لە زیندان ئاشنا بووە بە بیروڕاكانى ئەو . زۆر سەر سامە بەو پەرتووكەى نیتشە بە ناوى ((زەردەشت واى گوت)) دەڵێت هەڵبژاردنى ئەو ناوە ڕۆژهەڵاتیە بۆ پەرتووكەكەى گوزارشت كردنە لە تێگەیشتنى ئەو فەیلەسوفە لە بەهاو سەروەرى ژیارو شارستانیەتى ڕۆژهەڵات . ڕەخنەى توندى ئەنارشیزمەكان بە تایبەتى باكۆنیین لە كایەى دەوڵەت وەكو سەرچاوەى سەرەكى ستەمكارى دژ بە مرۆڤ ، بۆتە بنەمایەكى سەرەكى فكرى سیاسى و ئایدۆلۆژى و دواجاریش دەبێتە ئامانجى ڕمى ڕخنەكانى ئۆۆج ئالان و ئەمیش ((دەوڵەت ــ نەتەوە)) كە مۆدێرنەى سەرمایەدارى ئاواى كردووە وەكو پارادۆكسێك بە سەرچاوەى نەهامەتى و ستەمكارى و كوێرەوەرى دەزانێت بۆ كۆمەڵگاى مرۆڤایەتى بە دەست دەستەبژێرێكى سەرمایەدارى خوێن مژەوە . خۆشەویستى سروشت و غەمى پاراستنى ژینگە یەكێكى ترە لە تێڕوانینەكانى ئەنگیزەى ئیكۆلۆژى ئۆۆج ئالان كە پێیوایە مۆدێرنەى سەرمایەدارى لە پێناوى بە دەست هێنانى قازانجى زیاترو كەڵەكە كردنى سرمایە وا ئەستێرەكەمان بەرەو وێران كردن دەبەن . بۆیە ڕەخنەیەكى توند ئاراستەى ڕۆشنبیران و بیرمەندانى كورد دەكات و دەڵێت ئەوە عەقڵێكى گەمژانەیە كە دەیەوێت پێكهاتەى پەیوەندیەكانى خێڵ و عەشیرەت لە كوردستان پایەماڵ بكات ، چونكە ئەگەر سرنجێكى مێژووى ئەو پێكهاتە كۆمەڵایەتیە لۆكاڵیە بدەین هەرگیز خێڵ و عەشیرەت كۆیلایەتى تێدا نەبووە ، نەبۆتە بنەمایەك بۆ دەركەوتنى پەیوەندى كۆیلایەتى ، پتر دیمەنێكى ژیانى هاوبەشانەیان گوزراندووە ، لە دۆخێكدا كە پارتى كرێكاران پێیوایە زۆربەى حزبە سیاسیەكانى كوردستان ڕنگدانەوەى عەقڵى سیاسى فیوداڵە و لە ئاستى دروست كردنى دەوڵەت دا نیین ، كە چى ئەوە خێڵ و عەشیرەتە پێكهاتەى فیوداڵ ئاوا دەكەن . ئۆۆج ئالان لەم دوایانەدا كۆنفیدرالیزمى دیمۆكراسى زۆر بە بنەما دەگرێت و جەختى لە سەر دەكاتەوە . ئەگەر سرنجێكى خێراى پەیامەكەى ئۆۆج ئالان بدەین كە بۆ پەكەكە ناردویەتى زۆرێك لە ڕەهەندى ئایدۆلۆژى فكرى كە لە نوسینەكانى ئەم دوایەى تێدایە ، بە تایبەتى لەوەیدا كە داوا دەكات تفەنگەكان بێدەنگ بكرێن و قۆناغ قۆناغى سیاسیە بۆ خەبات كردن ، پتر سوور بوون و سەلماندنى بیروڕا فكریەكانى خۆیەتى سەبارەت بە پرۆسەى دیمۆكراسى كە ماوەیەكى زۆرە لە نوسینەكانیدا جەختى لە سەر دەكاتەوە . بەو مانایەى دەست بەردار بوونە لە خەباتى چەكدارى شۆڕشگێڕانەى شێلگیرانە كە هەر پارتێكى سیاسى ماركسیزم دەیكاتە بنەمایەكى تیۆرى بۆ بە دەست هێنانى ئەو ئامانجە سیاسى و چینایەتیانەى كە لە پێناویدا بزووتنەوەى دەست پێكردووە . یان بە مانایەكى تر لە باتى سەرەواندنى زەبرو گورزى شۆڕششگێڕانە و خوێن ڕشتن ، قۆناغ بە قۆناغ و بە شێوەیەكى ئارام و ئاشتى و گەمەى دیمۆكراسى و بە ئامانج گردنى سندوقەكانى دەنگدان بكرێتە پێوەر بۆ بە دەست هێنانى ماف و ئازادى ، ئەم ڕەهەندە سیاسیەى بیرى ئۆۆج ئالان ڕیشەكەى لە نێو بزووتنەوەى سیاسى ((سۆشیال ـــ دیمۆكرات)) دایە ، هەرچەندە ڕەخنەش لە لیبرالیزم دەگرێت بەڵام لە ڕووى ئایدۆلۆژیەوە سەرچاوەى هەمان ڕووبارى فكرى لیبراڵ ــ دیمۆكراتە كە ئەوڕۆ وەكو پرۆژەیەكى سیاسی لە زۆربەى وڵاتانى ڕۆژ ئاواو ئەمریكا و زۆربەى وڵاتانى دنیا بایەخێكى زۆرى پێدەدرێت و زۆربەى سیستەمەكانیش لە سەر بەهاكانى پرۆژەی لیبرالیزم پێكهاتوون . گرنگ ئەویە ئەم پەیامەى ئۆۆج ئالان لە گەڵ چ چەشنە سیستەمێكى سیاسى بەرخورد دەكات ؟؟ ئایا سیستەمى سیاسى لە توركیا گەیشتۆتە قۆناغێكى دیمۆكراسى مافى هاوڵاتى بوون و ئازادیەكانى هەر تاكێك بە بێ جێوازى نەتەوەو ڕەگەزو ئایین لە بەر چاو بكرێت ؟؟ یان هاو وڵاتى تورك بە پلەى یەكەم دێت و ئەو هاوڵاتیەكانى نا تورك بە پلەى دووەم و سێیەم دەژمێردرین ؟؟ من پێموایە دەوڵەتى توركیا لە ڕووى دیمۆكراسیەوە نەگەیشتۆتە قۆناغێك بە ڕاشكاوانە ماف و ئازادیەكانى نەتەوەى كورد بسەلمێنێت . چونكە هێشتا كاژى كولتورى سیاسى ڕۆژهەڵاتى و پان كەماڵیزمى بە تەواوى فڕێ نەداوە . دەبێت ئەوەشمان بیر نەچێت پەیامەكە بۆ ئاشتى و پێكەوە ژیان و دیمۆكراسى بەهایەكى سیاسى زۆر گرنگى هەیە ، لە بەر ئەوەى دەیسەلمێنێت بۆ ڕاى سیاسى نێو دەوڵەتى كە ئەمان ئاشتیان دەوێت و ماڵ ئاوایان لە جەنگ و خوێن ڕشتن و تفەنگ دەكەن و بە شێوەى ئاشتیانەو دیمۆكراسى داكۆكى لە مافەكانیان دەكەن ، هەرچەندە پەیامەكە لە ڕووى مەعنەویەوە دووبارە جەخت دەكاتەوە لەسەر خەبات و دەڵێت ئەمە سەرەتاى كارى خەباتى سیاسیە ، ئاشكراو ڕوونە ئەمەش بۆ ئەوەیە ڕۆحێكى پەیگیرو نەپساوەى ئومید ببەخشێتە هەوادارانى pkk و نا متمانەیى سیاسى بڕەوێنێتەوە ، بەڵام ئەوەى جێى سرنجە پەیامەكە هیچ چەمكێكى سیاسى بە بنەما ناگرێت كە لە فەرهەنگى سیاسیدا پێناسەى چارە سەر كردنى پرسى نەتەوەیەكى ژێر دەست و داگیر كراو دەكات وەكو چەمكى ((دەوڵەت ، فیدرالى ، كۆنفدرالى دیمۆكراسى ، تەنانەت خۆڕێبەریش ....هتد)) ڕەنگە ئەمە پەیوەندى بەو ئەنگیزە ئایدۆلۆژیاوە بێت كە ئۆۆج ئالان زۆر هێرشى دەكاتە سەر بە تایبەتى ((دەوڵەت ــ نەتەوە)) . ماوەتەوە ئەوەى بڵێین ئەگەر پرۆسەى ئاشتى و دانوسان نێوان pkk دەوڵتى توركیا سەر بگرێت و بەردەوام بێت چ مافێك بۆ هاو وڵاتیانى كورد لە كوردستانى باكور دەستەبەر دەكات ؟؟ ئایا وەكو هاونیشتمانانى كوردستانى باشور لەو مافانە بەهەرەمەند دەبن كە بە دەستیان هێناوە ؟ یان تەنها بێدەنگ كردنى تفەنگەكان و قبوڵ كردنى كوردە بە مافى هاوڵاتى بوون ؟ دەبێت چاوەڕوان بیین چونكە هاوكێشە سیاسیەكان گۆراِنكارى گەورەیان بە سەردا هاتووەو كۆمەڵێك بەرژەوەندى سیاسى و ئابوورى نەخشیان دەبێت لە چۆنیەتى بردنە پێشەوەى ئەو پرۆسەیەدا . پاش ئاڵۆز بوونى پەیوەندى نێوان حكومەتى هەرێم و ناوەند لە عێراق و گەشە سەندنى بازرگانى نەوت و وا غازیشى دێتە پاڵ لە نێوان توركیاو كوردستانى باشورو دۆزینەوەى نەوت لە بنارى قەندیل و دروست بوونى قەندیلێكى دیكە لە كوردستانى ڕۆژئاواو ، تموحى توركیا بۆ چوونە نێو بازاڕى هاوبەشى ئۆرپاو ، خەونى ناسیۆنالستەكانى كوردستانى باشور بۆ خۆ نزیك كردنەوە لە ئۆرپا لە ڕێى جێوپۆلیتیكى توركیاوەو ، دەیان پرسى دیكەش ڕۆڵیان دەبێت لەم پرۆسەیەدا .