هۆکاری سەرەکی شەڕی بودجە لەم کاتەدا

Tuesday, 26/06/2012, 12:00

دەستەیەك بەناو بەرگری و داکۆکی لەقوتی خەڵك و پارێزگاری لەبودجە پێك هاتوە کەپێیان وایە پێوستە شەقام بجووڵێت و دژ بەتێپەڕبونی بودجە خۆپیشاندان بکرێ. دڵسۆزی ئەم دەستەیەو ئەندامانی ئەبێ بخرێتە ژێر پرسیارەوە، لەکاتێکدا گەلێ پرسی گرنگ و چارەنووساز هەیە کە پەیوەستن بەژیانی سیاسی،کۆمەڵایەتی و ئابووری خەڵك کە ئەبوو نەك هەر لیژنەی بۆ پێك بێ، لێ ئەبوایە بۆ هەر هەمویان گردبوونەوە،کەمپین،ناڕەزایی و خۆپیشاندانی بۆ ساز بکرانایە.

ئەم دەستەیەی ئەوڕۆ لەمێژبوو ئەبوو هانی خەڵکیان بدایە بۆ خۆپیشاندان دژ بەو هەموو نایەکسانی کۆمەڵایەتییەی کەیەخەی کۆمەڵگای کوردی گرتوەو وەك مۆتەکە سوار شانی بوە. بۆ ئەم دەستەیە بۆ مرداربوونەوەی مادەی ٥٨ و دواتر ١٤٠ هانی خەڵکیان نەدا بڕژێنە سەر شەقامەکان. بۆ ئەم دەستەو تاقمە دڵسۆزە نەهاتن بەرۆکی دەستەڵات ڕابکێشن لە کاتێکدا ڕۆژانە سەداها و هەزارەها تەنکەرە نەوت ئاودیوو ئەکرێ و کەس نازانێ داهاتەکەی جگە لەگیرفانی دوو بنەماڵەی مافیا و دز کەسی تر سوودو قازانجی لێ ناکا. بۆ نەهاتن شەڕی دژ بە مەسئول و بازرگانە چاوچنۆکەکان بکەن لەوەی ئەوەندە دەرمان و خۆراکی بەسەرچوو نەهێننە ووڵات و خەڵکی لەمردن و شێرپەنجە ڕزگارکەن. بۆ ئامادە نەبوون شەقام بجوڵێنن کاتێ ئەم مەسئولانە بەرپرسن لە هێنانە ناوەوەی چەندین جۆری ڤایرۆسی کوشندەو لەوانەش ئایدز.. بۆ نەهاتن دژی بەهاتنی هێزی تورکان و ئێران شەقام هار کەن تا چیدی لادێ و گوندەکانمان تێك و پێك نەدرێن.. بۆ نەهاتن دژ بەو هەموو جاش و خۆفرۆش و ئانفالچی و کۆنە بەعسیانەی لەکوردستان دابەستراون و پارەی ئەم خەڵکە هەڵئەڵووشن ، خۆپیشاندان و ناڕەزایی دەرببڕن.. بۆ نەهاتن دژ بەو کۆمەڵ کوژیەی دژ بە رەگەزی مێینە ئەکرێ لەژێر چەتری شەرەف تۆڵە سەندنەوە خەڵکی ووشیار کەنەوەو بیان هێننە سەر جادەو شەقامەکان.. بۆ نەهاتن یەخەی ئاسایش بگرن کاتێ بکوژی هەزاران خەڵکی شاری هەڵەبجە بەچەکی کیمیایی لەڕێگەی تاریق ڕەمەزانەوە کەفڕۆکەوانێکی ئەو کاتە بوە و دەستی سوورە بەخوێنی ئەو خەڵکە ، خۆپیشاندان بکەن.. بۆ نەهاتن دژ بەکۆمیسێۆنی باڵای هەڵبژاردەکان خۆپیشاندان بکەن و خەڵکی هان بدەن بەوەی ناڕازی بن بەئاکامی هەڵبژاردن و خۆپیشاندان سازبکەن.. بۆ نەهاتن خۆپیشاندان بکەن دژ بەو پەرلەمانەی کەهیچ سەنگێکی نیەو جگە لەوەی ئەندامانی نوێنەی خەڵکی نین و تەنها نوێنەری پارەن.. بۆ نەهاتن خۆپیشاندان دژ بەیاسای کاری کۆمەڵایەتی بگرن کە پیاو بۆی هەیە لەژنێ زیاتر بێنێ.. بۆ نەهاتن دژ بەو مەلا و پیاوە ئایینیانە خۆپیشاندان بکەن کە تەنها دژ خەڵکی و ئازادی تاکەکانێتی.. بۆ نەهاتن کاتێ ڕۆژنامەنووسێ جگە لەوانەی خۆیان بەدڵیانە و لەخۆیانن کەمپینیان بۆ ساز بکەن و بۆ ئەوانی تریش هیچیان بۆ نەکەن.. بۆ نەهاتن بەدوا داچوون بکەن بۆ ووتەکەی سەرۆکی تەزوویر کە ووتی گەر واژووی پێوست کۆکرایەوە ئامادەم واز بێنم.. بۆ نەهاتن دژ بەو هەموو سوکایەتیەی تاڵەبانی بەکوردی ئەکا ، خۆپیشاندان بکەن و خەڵکیان لێ هان بدەن بۆ ئەوەی شەقامیان لێ بستێننەوە.. بۆ نەهاتن ،، بۆ نەهاتن....

مەسعود و جەلال سیاسەتێکیان هەیە کەئەڵێ؛ بۆ ئەوەی تاوان بشارێتەوە، پێوستە تاوانی لەوە گەورەتر بکەیت. کێ هەیە داوا بکات، وەیان خۆپیشاندان بکا لەدژ(خیانەتی ١٩٦٦،ئاشبەتای ١٩٧٥،ئاشبەتاڵی ١٩٨٣،خیانەتی ئەنفال و کیمیاباران کردنی گوندەکانی کوردستان و کوژران و ئەنفالکردنی سەدەها هەزاران لەڕۆڵەی گەلەکەمان لەساڵانی ١٩٨٨کەدەستی تاڵەبانی و بارزانی تیابوو. دزین و ئاودویکردنی تەلی کارەبا و شۆفڵ و حەفارەو سەدی بێخمەو هەزاران شتی بەكەڵک لە دوای ڕاپەڕینی ١٩٩١، دزینی پارەی گومرگەکان ، شەڕی ناوخۆ، خیانەتی ٣١ ئابی ١٩٩٦، هێنان و جێگیر کردنی سوپای تورکان و بکوژانی هەریەك لە مامۆستا عەبولستار و شەهیدانی قەڵەم(سۆران و سەردەشت)، پاشان شەهیدانی ١٧ شوباتی ٢٠١١ و ڕۆژانی دواتر.. گەر بهاتایە تەنها یەك جار خۆپیشاندان و ناڕەزایی دژ بەیەکێ لەو هەموو تاوانانە بکرایە، ئەوا حەتمەن هەڵەو تاوانی لەوانە گەورەتر نەئەکرانەوە..

کێ هەیە پێی ناخۆش بێ لەوەی خەڵکی داوای بودجەیەکی شەفاف بکەن. کێ هەیە ڕازی بێ بەوەی پەرلەمان نەتوانێ ڕۆڵی خۆی ببینێ.. کێ هەیە حەز نەکا کوردستان ببێتە ووڵاتی یاسا و دادگای سەربەخۆو پێکەوە ژیان.. کێ هەیە پێی ناخۆش بێ کوردستان ئازاد بێ و تاکی کوردیش وەك هەر تاکێکی تری ئەم جیهانە ناسنامەو پاسپۆرتی خۆی بەزمانی کوردی هەڵبگرێ و حکومەتێك هەبێ دادکۆکی لێ بکا.. ئەمانە هەمووی شتی سادەن و ئەوڕۆ تاڵەبانی و بارزانی نایەڵن ڕووبداو بوون بەڕێگرو تەنها کلکە لەقێ بۆ دوژمنان ئەکەن و نایەڵن ئازادی و سەربەستی و یەکسانی لەکوردستان بەرکەماڵ بێ.

من لەگەڵ ئەوە نیم خۆپیشاندان تەنها بۆ بودجە بکرێ و چاو لەکەموو کوڕیەکانی تر بنووقێنرێ.. لەڕاستیدا ئەم دەسەڵاتە هی ئەوە نیە خەڵکی تەنها خۆپیشاندان بکەن و دەنگی ناڕەزایی هەڵببڕن. ئەم دەسەڵاتە ئەبێ بڕوا و مل بشکێنێ.. ئەگینا خۆپیشاندان و گردبوونەوەو ناڕەزایی دەربڕین تەنها کات بەسەر بردن و قازانجەکەی تەنها بۆ دەسەڵاتە.

بۆیە بەبڕوای من ، هەر خۆپیشاندانێك لەم کاتەدا بکرێ ، هۆکارەکەی تەنها بۆ ئەوەیە چەند کەسێکی تر بکوژرێن و چی دی خەڵکی داوای دادگایی کردنی تەقەکەرانی ساڵی ٢٠١١ نەکەن . ئەوسا لەجیاتی باوکی (ڕێژوان،سورکێو، ئومێد،هەردی،بیلال وئەوانی تر) کۆمەڵی ناوی تری دێنە کایەو لەجیاتی تەقەکەرانی پێشوو ،ئینجا داوای دادگاییکردنی تەقەکەرانی ٢٠١٣ ئەبێ بکەین.. لەپێش هەمویانەوە ئەم بەناو دەستەیە چی تر باس لەڕواداوەکانی ١٧ شوبات ناکەن و هەوڵ ئەدەن لەبیر خەڵکی و خاوەنەکانیان ببنەوە.. ئەمە ڕاستی و دروستی و ئەو هەوڵەیە کە ئەم بەناو ڕۆشنبیرو ڕۆژنامەنووسانە ئەیانەوێ بەیارمەتی ئۆپۆزیسیۆن ، خزمەتێکی تر پێشکەش بەدەسەڵات بکەن و پۆلێکی تر لەگەنجی ووڵات لەخوێن بگەوزێن و ئەوانی پێشتر لەبیر بکرێن.. جا بۆیە هیوامان گەورەیە کەئەمە ڕوونەداو کەسی تر نەکوژرێ بۆ ئەوەی بازاڕی ئەم چەتانە گەرم تر نەبێ.