تەنزى سیاسیى: حیزبى دایك تەڵاق دەدرێت!

Wednesday, 15/04/2009, 12:00

1771 بینراوە

كاكى پەیامنێر هەركاتێك بەرهەمى چالاكیەكى لە یەكێك لە رۆژنامەكاندا بڵاو بكرابایەتەوە، ئەوا ئەو رۆژە لە یەكێك لەو دوو كەبابخانەیەى ناوشاردا كە بە ناوبانگ بوون، نانى دەخوارد!
هەرچەندە ئێمە لە دواى بەهارى ئەو ساڵەى كە مەڕ و ماڵاتمان لە زاوزێدا هەمیشە لە ئاوس بوونێكى بێ وێنەدا، دوو دوو، یا سێ سێ دەبوونە بەردەوام بوونى ئازاى فیكە لێدانى شوان و باڵاى گەنم و جۆى دەشتى نیشتیمانیشمان دەبووە حەیرانى وەزارەتى كشتوكاڵى بیابانەكانى دراوسێمان.
ئێمە لەو سەردەمەدا هەرچى نیعمەتى سروشت و بەرهەمى نەتەوەییمان هەبوو، بە تەقاندنى دوو فیشەكى خۆركە لێدراو كردمانە سەدەقەى ئاوازى ئەو ئازادى و دیموكراسیەى، كە لە زوڕناى دیموكراتەكان و مێژووى وڵاتى هیندیە سورەكان بۆمان لێدرابوو، ماڵم هەقە لە سەرێكیشەوە ناهەقمان نەبوو، چونكە عەیامێك بوو لەسەر خاكى خۆمان جووجكە ترسێن كرابووین، دەبوایە هەرچۆنێك بێت ئەو برادەرە بۆ ئەو زەماوەندە ئەو دوو فیشەكە هەر بتەقێنێت، چونكە گەر ئەویش ئەو كارەى نەكردبا ئەوا لە دوورى دوورەوە یەكێكى تر ئەو كارەى دەكرد و ئەوكاتەش عیززەت و پیاوەتیەكە بۆ ئێمە نەدەمایەوە، ئێستاش لە دواى ئەو هەموو كارەساتە، تاكە دەستمایەیەك كە بە دەستمانەوە مابێت ئەوەیە، كە ساڵانە بەس باسى مێژووى تەقاندنى ئەو دوو فیشەكە دەكەین!
هەرچەندە ئازادى و دیموكراسى لە بنەڕەتدا (جمكن) بەڵام بۆ نەگبەتى ئێمە لەوەشدا سودمان وەرنەگرتووە، ئەوەتا لە دواى ئەوەى كە بە یەكەوە لە دایك بوون، ماوەیەكى زۆرە دیموكراسى لاى ئێمە تووشى بارى دەروونى بووە و ناگەڕێتەوە سەر رێى راست! لە دواى زەماوەندى تەقاندنى ئەو دوو فیشەكە شوومەوە جگە لەوەى هەڵسوكەوتى كۆمەڵگە گۆڕاوە، دەتوانین بڵێین لە رووى نیعمەتى سرووشت و جوگرافیاى نیشتیمانیشەوە، خۆرهەڵات و خۆرئاوا و وەرزەكانیش بە شێوەیەك لە بەین چوون، تەنانەت دەزگاى كەشناسى وڵاتیشمان زۆرجار لەسەر مەزەندەى بڕوابوونى ریزكردنى بەرمیلى نەوتى بایەعى، مانگى مایس و حوزەیرانى كۆڵانەكان رێژەى گەرمى و ساردى وڵاتمان پێ دەڵێن!
هەربۆیەشە ئەم چەند ساڵە گوند نشینەكانیشمان لە كەمتەرخەمى رابەرانى زەماوەند و تۆرانى سروشت لە بەرهەمى نیعمەتى نەبارینى باران و نەبوونى وەزارەتێكى كاراى بەرهەمى (پەتاتە و باینجان) لە وڵاتدا، وازیان لە كانى و ئاوى دێرینى خۆیان هێناوە و بە تەواوى روویان دە شارى كردووە، ئەو پیكابانەى كە تا دوێنێش جوتیارەكان لە پێناو سەدەقەى تەوافقى سەندیكاكەیان وەریانگرت، جگە لە شەوانە كە سەردانى ماڵە خەزوران و دیدەنى خزمانیانى پێ دەكەن، هیچ كارێكى دیكەى كشتوكاڵى پێ ناكرێت!
ئیدى شاریش بە چەشنێك قەرەباڵغ بووە، مەگەر تەنها لە كاتى چوونەوەى خەڵك لە گەراجى پاسەكاندا هەستى پێ بكرێت، بە تایبەتى دەمەو ئێواران كە بتەوێت بەرەو ماڵ بچیتەوە، لە كاتى سوار بوونى پاسدا دەیان عەللاگەى سەموونى حەجەرى بە بنا گوێتا دەچزێت، خۆ ئەگەر پەڵە هەورێكیش یەك دوو رۆژ رێگەى كوێستانەكانى لێ تێكبچێت و بیەوێت بۆ ماندوو حەسانەوەى خۆى، لەسەر ئاسمانى وڵاتى ئێمەدا ببارێت، ئەوا لەو كاتەشدا بۆ سواربوونى پاس دەیەها كلكە چەتر دەچێت بە ناوگەڵتا! ئاخر درۆیان نەكردووە كە دەڵێن: "شارى گەورە یەعنى عەیبى گەورە"، شاریش كە گەورە دەبێت جۆرەها نەناس و بێ ئەسڵ و فەسڵیش رووى تێ دەكەن، گەر وانیە، بۆچى ئەمڕۆ دانیشتوانى ئەسڵى هەموو شارێك لە گەورە بوونى شارى خۆیان و هاتنە ناوەوەى دەمووچاوە جیاوازەكان وەڕسن!
كاكى پەیامنێرى رۆژنامەكە تازە لە نانخواردنەكە ببوەوە و لە سایەى تێر بوونى كەبابى چەورى گۆشت بەرخ، بە چیلكەى باریك خەریكى پاككردنەوەى وەتەرى تێر بوونى دەموودانى بوو، وردەوردەش بەدەم پاككردنەوەى دەموودانەوە خەریكى قوملێدانى ئەو چایە بوو، كە بە خەڵوز لێنرابوو، جارجارەش لە پێناو شوكرانە بوونى تێر بوونى ورگیدا، گوێبیستى ئاوازى قڕقێنەیەك دەبوویت، كە ئەویش دوایین بەلاغى خیتامى ورگی بوو، لەو ساتە وەختەدا یەك دوو زەنگى تەلەفونەكەى لێدرا، ئەویش بۆ وەڵامدانەوەى تەلەفۆنەكە، زۆر بە قەناعەت و لە خۆ رازى بوونەوە دەستى دایە و چاوەڕوانى ئەوەى دەكرد، كە لە سایەى دیموكراسیدا و ئەو كەمتەرخەمیە خزمەتگوزارییانەى كە لە بن باڵى حیزبى (دایك)ەوە دەركەوتبوو، ئەویش لە رۆژنامەدا بڵاوى كردبوەوە، سوپاسگوزارى و دەشخۆشى لێ بكرێت! بەڵام دەڵێى چى، كە تاكو ئێستا بەرپرسانى حیزبى (دایك) لە كۆمەڵگەى ئێمەدا تەنها بیر لە پاراستنى بەرژەوەندى شەخسى خۆیان دەكەنەوە، نەك كۆمەڵگە! بۆیە كە پەیامنێرەكە وەڵامى زەنگى تەلەفونەكەى دابوەوە، تەنها فریاى یەك دوو چاك و چۆنى كەوتبوو، پاشان بەرپرسەكە وەك ئەو ئافرەتە شڕ شێتانەى كە لە گەڕەكە میللیەكاندا لەگەڵ دراوسێكانیان تووشى دەمەقاڵێ دەبن و، لە كۆڵاندا دەستێكیان دەخەنە بەر كەلەكە و بەدەستەكەى ترشیان، كە پڕە لە بازنگ هەڕەشەى پێدەكەن، تەنها بۆ ئەوەى زیاتر گوێبیستى زڕڕەى بازنگەكانیان بیت، جارجارەش لە كاتى توڕە بوون و جنێودانیشیان بە یەكتر، رەفتە خوار و خێچەكانى سەر سەریان چاك دەكەنەوە و چى خوا پێى ناخۆش بێت بە یەكترى دەڵێن، بەرپرسەكەش لە تاو هەڵدانەوەى كەموكوڕى حیزبى (دایك)یەوە بە چەشنى ئەو جۆرە ئافرەتانە لە تەلەفونەكەدا، بەرەو رووى پەیامنێرەكە شەڕانگێزى خۆى بەرپا كردبوو، تەنانەت وتبووى: "ئاخر مێردمنداڵێكى وەك تۆ كە تازە شەیتانى كەناڵە جۆراوجۆرەكانى سەتەللایت پێت پێكەنیوە و هێشتا رومەتت مەكینەى تەراشى سێ گوێزانى بە خۆیەوە نەدیوە و، ناونیشانى بایەعى ئارد و رۆن و برنجەكەت نازانى كێیە، چۆن زات دەكەیت قسە بە حیزبى ئێمە بڵێیت!؟ بۆ تۆ نازانى حیزبى ئێمە حیزبى (دایك)ە و گەورەكانمان لە مێژووەوە لەسەر ئەم زەویە بەسەر كۆمەڵگەدا بوونەتە خواوەندى بەزەیى و خێر، نەوەكانیشیان ساڵ بە ساڵ گەورە دەبن و وەك برا گەورەیەك تەماشا دەكرێن و دەبنە خاوەنى دەسەڵات، حیزبى دایكى ئێمە هیچى كەمتر نییە، لە دەسەڵات و مێژووى یۆنانیەكان، جارێكى تر ناماقووڵى دەرهەق بە حیزبى (دایك) و مێژووەكەى نەكەیت، گەر لەم كارانە بەردەوامیش بیت، چیدى تیكە نانى حەڵاڵ لە ماڵەوە و لەسەر سفرە بەرامبەر باوكت ناخۆیت".
ئاخر قوربان ئەو سەردەمە رۆیشت، ئێستا سەردەم سەردەمى ئازادى و دیموكراسیە، ئێمەش لەو روانگەیەوە دەمانەوێت خزمەت بە كۆمەڵگە بكەین، "بەخوا وامزانى لاوێكى ژیرى، بەڵام زۆر بێ ئاگا و دەبەنگى، ئاخر ئێمە ئازادى و دیموكراسیەك كە لە سەرتاى زەماوەندەوە بە قۆنتەرات گرتبێتمان و دیموكراسیەتەكەشمان بە فڕۆكە بە ئاسمانى چەندین وڵات بۆمان هاتبێت و لەسەر سنوور گەیشتبێتە دەست خۆمان، فیڕنەگولەیەكى وەك تۆ دەوێت هەروا بە ئاسانى تەخشان و پەخشانى بكات!؟ تێبگە هەى نەفام بە مەزەندەى حیزبى (دایك)ى ئێمە دیموكراسیەت وەك ژەمە خواردنى سەر سفرە وایە، كە چۆن لە ماڵان هەموو دایكێك لە دانان و دابەشكردنى خواردن، لە گەورەوە تا بچوك سەرپشكە، حیزبى ئێمەش حیزبىى (دایك)ە و لە پێدان و دابەشكردنى جۆرەكانى ئازادى و دیموكراسیدا بەسەر كۆمەڵگەدا سەرپشكە، ئەگەر زۆر ناڕازیشن لە پەروەردەكردنى حیزبى (دایك)ى ئێمە ئەوا دەتوانن بچن بە مێژوو بڵێن، كە هاوسەرێكى دیكە بۆ خۆى و كۆمەڵگەكەى بدۆزێتەوە و دەست بەردارى حیزبى (دایك)مان بێت، بەڵام ئەوەشتان لە بیر نەچێت، گەر دەستبەردارى حیزبى (دایك)ى ئێمە ببن، ئەوا هەموو نەفەقە و مارەیى و هەژدەكى گومرگ و داهاتى نیشتیمانى مێژووى هاوسەریەكتى بەر (دایك)مان دەكەوێت، ئێوەش دەبێت سەر لە نوێ ماڵ و ژیان بۆ خۆتان پێكبهێنن و ماڵى جیاوازتان هەبێت! تێگەیشتى!؟ تێگەیشتى!؟".
تەلەفونەكە داخرایەوە و پەیامنێرەكەش لە بەردەم خۆیەوە دەیگوت: "تۆ بزانە ئەم كۆمەڵگەیە تووشى چ رۆژێكى رەش و نەهامەتى بووە، ئاخر ئەگەر كۆمەڵگەكانى دیكە خاوەنى تەنها یەك خیزبى (دایك) بوبێتن، نەگبەتى ئێمەش لەوەدایە كە لەمەشدا خاوەنى دوو زڕ (دایك)ى حیزبین! هەى نەفرەت لەو حیزبانەى كە نازناوى خیزبى (دایك) دەكەنە ناسنامەى خۆیان و هیچ سیما و خەسڵەت و رەوشتى دایكایەتیان بۆ كۆمەڵگە تێدا نییە، بۆیە گوتوویانە هەتیوى و بێ (دایك)ى زۆر خۆشترە، تا لە جۆرى پەروەردەكردنى ئەم (دایك)انە".. بۆیە بە دەم رێشەوە كە دەڕۆیشت هەر دەیگوت: "رۆژێك دەبێت مێژووش حیزبى (دایك) تەڵاق بدات.. خیزبى (دایك) تەڵاق دەدرێت.. با حیزبى (دایك تەڵاق بدەین".