پاراستنی قه‌ندیل ئه‌رکی هه‌مووومانه!
Friday, 22/07/2011, 12:00
پێم وایه که‌م که‌س له ئێمه‌ی کورد هه‌یه ، شاره‌زای رازه پنهانه‌کانی ناو دڵی قه‌ندیل نه‌بێت.
قه‌ندیل هیچ پێویستی به ناساندان نیه و ته‌نیا ده‌ڵێم:
هه‌روه‌کوو چۆن کاتی خۆی، قه‌ڵای(ماژینۆ) بوو به ڕه‌مزی به‌رخۆدان و پاراستنی ڕه‌وای فه‌رانسیه‌کان، قه‌ندیلیش چه‌ندین سه‌ده‌یه بووه به تاقه هاورێ ، تاقه سه‌نگه‌ر و ماڵی باوان بۆ پاراستنی ئاخرین سه‌نگه‌ر.
مامۆستا هێمن بۆ پاراستنی نیشتمان ده‌ڵێت:
"
وه‌ته‌ن! گیان و سه‌ر و ماڵم فیدای تۆ
وه گیانی من که‌وێ ده‌رد و به‌ڵای تۆ
له پێناوت ده‌نێم سه‌ر تا بزانی
...منم رۆڵه‌یه‌کی ئازا و به وه‌فای تۆ
له‌بۆ پاراستن و حیفزی سنوورت
له‌باتی (ماژینۆ) سینگم قه‌ڵای" تۆ
یان ده‌ڵێت:
"نیه باكم ئه‌گه ر زاڵم شكاندوویه‌تی باڵی من
ئه‌وه سه‌خته كه‌وا ناگاته گوێی كه‌س ناڵه ناڵی من".
سایکۆلوژییه‌تی ده‌وڵه‌تانی نه‌یار سه‌باره‌ت به قه‌ندیل:له سه‌رده‌می ئێستای تێکۆشانی بزوتنه‌وه‌ی ئازادیخوازی نه‌ته‌وه‌ی کورد له پارچه‌کانی باکوور و رۆژهه‌ڵاتی کوردستاندا، هاوپه‌یمانیه‌تیه‌کی ئیستراتیژیکی و پێویست له نێوان هێزه‌کانی پارتی کرێکارانی کوردستان و پارتی ژیانی ئازادی کوردستان(پژاک) پێکهاتووه.
ده‌وڵه‌تانی ئێران و تورکیه زۆر به باشی شاره‌زای ئیراده و به‌رخۆدانی ئاسکه کچان و که‌ڵه کوڕانی قه‌ندیلن، به‌ڵام تا کوو ئێستا نه‌یانتوانیووه کۆده‌کانی قه‌ندیل بدۆزنه‌وه.
چ له رادبردوو و چ له ئێستادا به هه‌موو شێوه‌یه‌ك شانسی خۆیان به مه‌به‌ستی شکاندنی وره‌ی قه‌ندیل، تاقی کردووته‌وه، به‌ڵام به هێچ ئاکامێک نه‌گه‌یشتوون.
تورکیه به پشتیوانی ناتۆ و ته‌نانه‌ت به که‌ڵك وه‌رگرتن له فڕۆكه ی جاسوسی ئیسرائیل نه‌یتوانیووه پاسۆرده‌کانی قه‌ندیل په‌یا بکه‌ێت.
ئێرانیچ 25 ساڵه قه‌ندیل بۆمباران و تۆپباران ده‌کات که‌چی نه‌ك هیچ ده‌سکه‌وتێکی به ده‌ست نه‌هێناوه، به‌ڵکوو ئه‌وانیچ وه‌کوو ژنراڵه‌‌کانی ئه‌نکارا به دۆربین چاوو له قه‌ندیل ده‌که‌ن.
کۆماری ئیسلامی ئێران خاوه‌نی تێئورییه‌کی تایبه‌ته له پێوه‌ندی له گه‌ڵ قه‌ندیل. ئه‌م تێئورییه کاتی خۆی به دژی حیزبی دیمۆکراتی کوردستانی ئێران و کۆمه‌ڵه به‌کاریان هێنا و ئه‌نجامه‌که‌شی ئه‌وه بوووهوه که ئێران به هاوکاری دۆسته‌کانی له باشووری کوردستان فشاریان خسته سه‌ر پارته‌کانی ناوبراو که به خاتری پاراستنی به‌رژه‌وه‌ندییه‌کانی باشووری کوردستان ، ده‌ستی خۆیان له قه‌ندیل بشۆرن و به‌م جۆره تا قوڵایی خاکی باشووری کوردستان پاشه کشه به هێزه‌‌کانیان بکه‌ن.
به حه‌ق کۆماری سێداره‌ی ئیسلامی له‌م سیناریوه، سه‌رکه‌وتنێکی به‌رچاوی به ده‌ست خست .
کارێک کرا که پارته خاوه‌ن ئه‌زموونه‌کانی رۆژهه‌ڵاتی کوردستان هێدی هێدی له گه‌ڵ کۆمه‌ڵگای باشووری کوردستان تێکه‌ڵاو بن و ئیتر شتێک به ناوی هه‌رێمی ئازاد و پاراستنی ڕه‌وا بۆنی نه‌ما.
پێشتر ئێران به ته‌نێ سه‌رپه‌رستی ئه‌و سیناریویه‌ی ده‌کرد، به‌ڵام ئێستا ده‌وڵه‌تی ئه‌تاتۆرکیچ به بیانووی پارتی کرێکارانی کوردستان، له سیناریوی دژ به قه‌ندیل به‌شداره.
ئه‌و دوو هێزه داگیرکه‌ره له چه‌ندین ڕیگه‌ی جۆراجوور که‌ڵک وه‌رده‌گرن به مه‌به‌ستی ته‌سلیم بوونی قه‌ندیل:
1. هێزی هه‌وایی و زه‌مینی(ئه‌سکه‌ر، جه‌رده‌وان، به‌سیج و سپای پاسداران)
2. بنیاتگه‌رایی ئیسلامی (ئه‌نسار السونه) و هێزی چه‌ته(ئه‌رگه‌نه‌کۆن)
3. دۆسته‌کانیان له باشووری کوردستان(ئێران و تورکیه به ده‌یان جار له ڕێگای دۆسته‌کانیان له باشووری کوردستان هه‌وڵیان داوه په‌که‌که و پژاک به چاره‌نووسی حیزبی دێمۆکرات و کۆمه‌ڵه به‌رن)
4. ئه‌مریکا(هه‌ر ئه‌وه‌نده به‌سه که ئه‌مریکا په‌که‌که و پژاک به دوو هێزی تیروریستی ده‌زانێت)
5. ناتۆ(ئه‌مریکا و زۆربه‌ی ولاتانی په‌یمانی ناتۆ په‌یڕه‌وی له سیاسه‌تی ئه‌مریکا ده‌که‌ن و به هه‌موو شێوه‌یه‌ك پستیوانی له تورکیه ده‌که‌ن)
ئه‌مریکا و وڵاتانی رۆژئاوایی زۆر جار وان نیشان ده‌ده ن که ئه‌وان له گه‌ڵ حکوومه‌تی دینی ئێران کێشه‌یان هه‌یه، به‌ڵام له راستیدا بۆ سه‌رکۆتی ته‌ڤگه‌ریی ئازادی خوازی نه‌ته‌وه‌ی کورد، پێکه‌وه، هاوپه‌یمانی پشتی په‌رده‌ن.
ئه‌م سیناریوه بۆچی سه‌ر ناگرێت؟
به بڕوای من وه‌کوو تاکێکی جامگای کوردی ، نه په‌که‌که، دێمۆکراته که سه‌رۆك تاڵه‌بانی که‌ڵاویان له سه‌ر بنێت و نه پژاک، کۆمه‌ڵه‌یه که بکه‌وێته ناو شه‌رم و حه‌یاوه له گه‌ڵ مام جه‌ڵاڵ.
ئێران و تورکیه و هاوده‌سته‌کانیان له باشووری کوردستان وه‌ك رۆژ لایان مالوومه ك شێوازی خه‌بات و به‌رخۆدانی گه‌ریلاکانی قه‌ندیل جیاوازه له گه‌ڵ مێتودی خه‌باتی پێش ئاش به‌تاڵ.
چه‌ند تایبه‌تمه‌ندییه‌ك له‌و جیاوازییانه:1. پرسی ئیدۆلۆژی و شێوازی په‌روه‌رده له ناو گه‌ریلا
2. گه‌ریلا خه‌بات و به‌رخۆدان ده‌کات نه‌ك ماڵ و ماڵداری
3. پته‌نسیه‌ل(کچ و کوڕی گه‌ریلا)
4. تاکتیکی شه‌ڕی نیزامی
5. ئێراده
6. ناسنامه
7. پره‌نسیپ و ئه‌خلاق(مۆراڵ)
8. قه‌ناعه‌ت
9. باوه‌ڕ به خۆبوون
10. پشت به‌ستن به هێزی گه‌ل(نه‌ك ئه‌مریکا و ئه‌ورووپا)
11. په‌که‌که و پژاک زۆر به باشی کۆده‌کانی جڤاکی خۆیان ناس ده‌که‌ن
12. ئه‌وان خاوه‌نی پلان و ئه‌ڵته‌رناتیڤی گونجاون بۆ کاتی پێویست
13. خودان هێزن له باری کار و خه‌باتی مه‌ده‌نی
14. زۆر به باشی شاره‌زای تاکتیک و فێڵه‌کانی دۆژمنن
ئامانجی هێرشی هه‌وایی و زه‌مینی بۆ سه‌ر ناوچه‌کانی پاراستنی میدیا چیه؟
1. دروس کردنی شه‌ڕی ره‌وانی له نێوان دانیشتوانی ناوچه سنوورییه‌کانی باشووری کوردستان بۆ ئه‌وه‌ی وه‌کوو سه‌ره‌تای ده‌یه‌ی نه‌ووه‌ده‌کان، فشار بخه‌نه هێزه‌کانی گه‌ریلا قه‌ندیل چۆڵ بکه‌ن.
2. هه‌وڵی ئێران بۆ ئه‌وه‌یه پژاک قه‌ندیل چۆڵ بکات و له شوێنی گه‌ریلا، هێزه‌کانی بنیاتگه‌رایی ئیسلامی وه‌کوو(ئه‌ڵقائیده و ئه‌نسارلسونه) پاشکۆی ئه‌لقائیده، جێگیر بکات.
3. تورکیه ده‌یه‌وێ پشتی جبهه‌ی پارتی کرێکارانی کوردستان له رووی باشووری کوردستاندا، کۆنترۆڵ بکات و تا به‌م شێوه‌یه له دوو لاوه، هێزه‌کانی گه‌ریلا مه‌حاسه‌ره بکات.
4. ئێران وه‌کوو کارتی سیاسی ، فشار ده‌خاته سه‌ر(یه‌کیه‌تی نیشتمانی کوردستان) که به هه‌ر شێوه‌یه‌ك بووه، سیناریوی (دێمۆکرات و کۆمه‌ڵه) دووپات بکاته‌وه.
5. هه‌ردووك وڵاتی تورکیه و ئێران وه‌کوو ئامانجێکی هاوبه‌ش دخوازن به بیانووی په‌که‌که و پژاک گه‌ریلا و پێشمه‌رگه واردی شه‌ڕی دژ به یه‌ك بکه‌ن. ئه‌وان کاتی خۆی له‌م پرۆژه‌یه سه‌رکه‌وتن و دیسان ده‌یانه‌وێ هه‌مان پرۆژه تاقی بکه‌نه‌وه.
6. پرۆژه‌ی دڕێژماوه‌ی ئه‌م هێرشانه شێواندنی پارچه‌ی ئازادکراوی باشووره .
ئێران ده‌توانێ له رێگای کۆمه‌ڵی ئیسلامی و یه‌کگرتووی ئیسلامی کاری خۆی بکات و تورکیه‌ش له رێ حیزبه تۆرکمه‌نه‌کانی هاوپه‌یمانی له باشووری کوردستان.
7. په‌که‌که و پژاک خاوه‌نی فه‌رهه‌نگی به‌رخۆدان و پاراستنی ڕه‌وان. ئه‌م فه‌رهه‌نگه کاتی خۆی له زیندانی ئامێده‌وه ده‌ستی پێکرد تا کوو سه‌رده‌می به‌رخۆدانی مامۆستا فه‌رزادی که‌مانگه‌ر وهه‌ڤاڵانی له زێندانی ئوینی تاران و ئێستاش زۆر که‌س به نه‌فسی خه‌باتی مه‌ده‌نی مامۆستا فه‌رزاد و هه‌ڤاڵانی له زیندانه‌کاندا، به‌رخۆدان ده‌که‌ن.
په‌که‌که و پژاک هه‌م له شاخن و هه‌میچ له شار و به‌م جۆره خه‌باتی به‌رخۆدانی شاخیان گرێداوه به خه‌باتی مه‌ده‌نی له ناو شه‌قامه‌کان و زیندانه‌کاندا.
8. . پرۆژه‌ی دڕێژماوه‌ی ئه‌م هێرشانه، ده‌توانێ ببێته هۆکارێک بۆ شێواندنی پارچه‌ی ئازادکراوی باشوور به له به‌رچاوگرتنی ئه‌وه‌ی که ئێستا ده‌نگۆی ئه‌وه هه‌یه که هێزه‌کانی ئه‌مریکا تا کۆتایی ئه‌و ساڵ عێراق به جێ ده‌هێڵن.
حکوومه‌تی نوری مالکی هیچ کێشه‌یه‌کی له گه‌ڵ هێڕشه‌کانی ئێران نیه، چونکه ئه‌گه‌ر سبه‌ینی ئه‌مریکاش له عێراق نه‌مێنێت، ئه‌وا حکوومه‌تی دینی ئێران نفوزی خۆی له عێراق زۆرتر ده‌کات و به‌م جۆره ،فۆتۆکپی خۆی له به‌غدا دروس ده‌کات.
ده‌وڵه‌ته‌کانی ناوبراو، مه‌به‌ستی سه‌ره‌کیان له کارخستنی مۆتۆری حه‌ره‌که‌تی ئازادیخوازی گه‌لی کورده له باکوور و رۆژهه‌ڵات و پاشانیش شۆڕ ده‌بنه‌وه به‌ره‌و هه‌ولێر و سلێمانی.(ئه‌و کات وه‌زئیه‌تی هێزه‌کانی کۆمه‌ڵه و دێمۆکرات زۆر دژوار ده‌بێت). هه‌ر بۆیه ده‌کرێ ئه‌رکی هه‌موو هێز ه سیاسی و مه‌ده‌نیه‌کانی کورد له قۆناخی ئێستادا، پاراستنی قه‌ندیل بێت و هیچی تر.....
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
