باندواگۆن - Bandwagon

Tuesday, 27/11/2012, 12:00

لە ئینگلیزیدا کە شتێک دەبێتە باو، یان بەرژەوەندی، یان مودێل و هەموو کەس دەیەوی خۆی پێوە هەڵبواسێ دەلێن: سواری باندواگۆن ەکە بووە. تومەز باندواگۆن لە ئەسلا عەرەبانەیەکی سێرکی مۆسیقاژەن و ئاهەنگگێڕان بووە وەک کەژاوەی بووک بردن کە بەجاددەدا رۆێشتووە هەر کەسێ توانیبێتی خۆی پێهەڵواسیوە تا لە زەماوەندو هەلپەركێ و نوقلەبارانی بووکێ بێبەش نەبێ. دوایی وشەکە بۆتە زاراوەیەکی سیاسیی سۆسیۆلۆجیی.
بەلام کەژاوەکەی تالەبانی-بارزانی- بەرەو دووز وحەمرین ئەمجارە هەر نەبێ بە روالەت کەژاوەی بووکی دۆلارو تاڵان وسەیارە وکەلوپەل گوازتنەوە نەبوو تا ئۆپۆزیسیۆن شەرمنانە لە پشتەوە بەدوایدا رابکات و لە تاریکیدا دوور لە چاوی خەلک قوژبنێکی بۆخۆی تیدا مسۆگەر بکات.
بەلکو کەژاوەی تەپڵی تەقەو جەنگ و دەهۆڵی دەبابە خواردن بووو!!
ئای کە دەمێکە کە کورد سەردەمی دەبابەخواردنی شاخی لەبیرچۆتەوە؟
خۆشبەختانە ئەم کەژاوەنوێیەی بارز-تالەب- انی نۆستالجییایەکی گەرمی ژیاندەوە.
تەنیا سەیری کاکەحەمەی دەبابەخۆر بکەن چۆن بە هیممەتێكی گەنجانەی شاخییەوە بە خۆی و مەفرەزە حیزبییەکەیەوە بەرەو دووز دایشکاندووە؟
پیاوم دەوێ بڵێ ئەم دیمەنە: خوێنی خەبات لە ناو دەماری کوردایەتیدا ناخرۆشێنێ!
جا چۆن گەنجی ئەم سەردەمە کە تەنیا ئەفسانەو داستانی پالەوانێتیی پێشمەرگەی شاخی ئەژنەفتووە، شەرمەزار یان شاگەشکە نابێ و حەماسی بەرزنابێتەوە و هەموو نەگبەتی ژیانی گەنجانەی خۆی لە بیر ناچێتەوەو هاوار ناکا:
وەک چۆن ئێوە بۆ مانی ئێمە مردن، ئێمەش دەمانەوێ بۆ مانەوەی ئێوە بمرین!

خۆ دەمێکە ئێمە بیرو چەمکی نیشتمان و کوردستان یش مان لە بیرچٶتەوە؟
نە زمان، نە ئەدەب، نە کەلتوور، نە دیمۆکراسی، نە دادپەروەریی ، نە میدیا، نە پەروەردە، نە هەزاران هۆنراوەو وتار و ستوونی رۆژنامەو گۆڤارەکان، نە دەیان کەناڵی تەلەڤزیۆنی مێشکشۆرەوە، نا هێچ شتێ لە گۆڕێ نییە گوڕ بە ئینتیمای نەتەوەیی و نێشتمانییمان بدات.
خۆشبەختانە ئەوەتا تەپڵی توندی جەنگێکی نەتەوەیی نوێ هەموو چالە قووڵەکانی ناشتنی ئینتیمای نەتەوەیی، کۆمەلگایی، نیشتیمانیی لە دل و دەروون و ناو کۆمەل ژیانی و سیاسیی و بەرنامە و بەرێوەبردندا لە بیربردینەوەو دەمانەوێ بە سەریاندا بازدەین بۆ ئینتیمایەک کە نەک بە خەونی شاعیرانە بەلکو بە خەونی خوێن و مالوێرانی ئەنفالییانە دەشێ بەدەستی بێنینەوە.
ئەوەتا قارەمانێکی مافیای حیزب لە دووز بۆ خەباتی دیفاعکردن لە نەوتی کەرکوک ، کە بە تەنەکە لە بەردەمی مالێ خۆیدا دەیفرۆشێ، بە خوێنرشتن و دەستکردنەوەی مەردانەی لە پۆلیسی ئیتییحادیی، کە شەوو رٶژ سەرکردە کۆمارەکەی پێیدا هەلدەگوت، سەرەتای ئەفسانەی داستانێکی نوێی قارەمانێتی پێشمەرگەی شاری لە ناوجەرگەی دوژمنی نوێدا تۆما رکرد و، بووە پێشەنگ.
خێڵ لە سەروو خواروو رۆژاواو رۆژەلات، بۆ هیمداد و پاڵپشتی جما.
مام رٶستەمی ئازیز کە نۆ ساڵ پێش ئەمڕۆ، کەرکوکی لە ناو دەستا بوو، کەس پیاو نەبوو خۆی و پێشمەرگەکانی نەبێ و بە فەرمانێكی بەپەلەو تووڕەی تالەبانی بەناچاری چۆلی کردو کشایەوە، ئێستا ئەویش خوێنی جۆشاوەتەوەو دەیەوێ مونافەسەی کاکەحەمەی خۆشەویست بکات.
بە پێی راپۆرتێکی زێدەنهێنی کە وەک هەمیشە سەرچاوەیەکی بالای حیزب بە سایتێکی کوردی داوە، پێشمەرگە هەر لەگەڵ یەکەم تەکانیدا جەنەرال زەیدی تەوەککولعەلەڵلای مام جەلال دەرپەڕێنی ٣١ ی ئابی ١٩٩٦- ی وەک چۆلەکە دەگرت، بەلام مام بەدەم وردە خەندەوە فەرمایشتاندوویەتی: کەرینە!! چۆن شتی و ادەکەن؟
ئاخر مام دڵی فراوانە و قەت بیر لە تٶڵە ناکاتەوەو مۆڵەی بەسە!!
ئەوەتا ئۆپۆزیسیۆنیش هەمووی لە باندواگۆنەکەی سەرۆک بارزانیدایەو پەڕۆباران - نا ببوورن پرۆژە بارانیان کردووە.
ئەو تەپڵە نزیکەش بە پێچەوانەی ئەوەی باپیرانی نەفاممان وتوویانە: تا نزیکتر دەبێتەوە دەنگی خۆشترە.
دە ئەی پیاوانی مالکی و عێراقی فیدرالیی کوردو عەرەب بجوولێن تا راجیمەتان بکەین.
تەنیا ئەوە نەبێ چاوەروانی فەرمانی سەرۆک و (دان و نەستان) ی بەغداین تا دیجلەش وەک هەموو شتەکانی تر دەبێ بە ئەمری واقیع. ئەوسا سوێند دەخۆینەوە بە هەر چوار پێ: مەلەی تیدا دەکەین.
عەیبی تێدا نییە: دیجلە رووباری خۆمانەو سوپای عێراق ئەو سوپایەیە کە تەفرو تونا ببوو، کەس نەیدەوێرا بە قسەش باسی دروستبوونەوەی بکات: ئێمە دەسپێشخەریمان کردوو بە گۆشت و ئێسقانی خەڵکەکەمان دروستمان کردەوە.
ئاخر سوپای خۆمانەو هەر هی خۆمان بووە ئەو کاتەش کە ئەنفالی دەکردین بۆیە قەت پێمان ناخۆش نەبووە ببێ و هەمیشە بەهێزو بەهێزتر بێت.
ئەی نابینن هەموو پالەوانەکانی ئەنفال و هەلەبجە ئێمە بە خۆمان گرتن و پاراستمانن و بە نهێنی خەلاتێشمان کردن.
ئەی نابینن هەر ئەو کاکە زەیدی- یەی دیجلەی ئێستا بوو کە ئێمە خەڵاتمان کردو بە دەبابەکانی توکلنا علی اللە، عەمیلەکانی ئێرانی راو ناو لە هەولێردا ئێمەی کردە ئەوەی کە هەین؟
ئاه. کە وایە ئەمە چاکەیەکی تری خالە زەیدی -ش.
کورت بیرەوەرییەکەی کول و کورتە.
ئەم تەپلە بۆ ئەوەیە کە بیرەوەرییە خٶشەکانیش بژێنێتەوە!!
هەموو بۆنەکە بۆنی شایی و هەڵپەرینی نوێی لێ دێ.
ئۆپۆزیسیۆن ناهەقییان نییە سواری باندواگۆنەکە دەبن.
مامە ناهەقی نییە نایەوێ زەیدی نازدار بکاتە چۆلەکەی ناو قەفەزەکەی.