بەهدینان ب قەلەمێ کەربگرتی یەکی..!

Thursday, 01/05/2014, 12:00

لژێر ناڤێ (بۆچی یەکێتییەکانی بادینان لە کاتی قەوماندا یەکێتی جێدەهێڵن)
کەسەکی لژێر ناڤێ : ئەندامێکی کۆمەڵەی ڕەنجدەران ، ل سایتێ کوردستان پوست 2014.4.20 لڕۆژا
کۆمەکا بسەرهاتیێن بێ بنیات دەربارەی بەهدینان بەڵاڤکری یە ، پشتی کو من بابەت خاندی من ئەڤ پرسیارە ژخوکر: چەوا مرۆڤ دشێت بڤی ڕەنگێ چەواشە دیروکا مرۆڤا ودەڤەرەکێ ڕەشبکەت؟ وێرانەکا باش وهەروەسا هەستەکێ بێ بەرپرسیاری پێدڤێت تاکو مرۆڤ بشێت کارەکێ بڤی ڕەنگی ئەنجامبدەت، لێ ل دەف هندەکا هوسایە: شوکا خوە باڤێژه کادێ چ پێڤەهێت، لێ لڤێرێ چونکی خودانێ بابەتی ناڤێ خوە نە نڤیساندی یە ولژێر ناڤەکی وەسا بابەت بەڵاڤکری یە کو بسەدان بەلکو بهزاران کەسا ڤەدگریت، ئەڤە ژی وێ چەندێ دسەلمینیت کو ئەڤ کابرایە ئێکە ژلەشکەرێن تاریێ ووێران ل دەف نینە ژبلی کو هەستا بەرپرسیارتیێ ل دەورێ وی نینە.
ل ڤێرە من دڤێت خال ب خال بەرسڤا وی بدەم داکو نەڕاستی وچەوتاتیێن وی ئاشکرابکەم
- ئاخفتنێن وی دەربارەی ڕێزدار مام جەلالی ، مێژووا مام جەلالی ژپێشمەرگە بو سەروک کۆمار بەڕەڤانیێ ژێ دکەت وپێدڤی ناکەت ئەز ل ڤێرە لدویف بچم چونکی بەرێ ڕۆژێ ب موخەلێ ناهێتە ڤەشارتن وئاڤا ڕویبارا بدەڤێ......پیسنابیت.

- دبێژی: ئەز پێشمەرگەیەکێ کۆمەڵە بووم وبو دەمێ دوو ساڵا ل بەهدینان بووم ، ئەڤ چەندە بەروڤاژی ڕاستیێ یە ، شەهید(ئازاد هەورامی) هەیڤا 5 ساڵا 1987ی دگەل هێزەکێ یێ هاتی یە بەهدینان و(رائد جلال) هەیڤا 10 دعەینی ساڵی دا دگەل هێزەکا 150ی کەسی یێ هاتی بەهدینان، و 20ی هەیڤا هەشت 1988 هێزا ی.ن.ک یا دگەل شەهید (ئازاد هەورامی) و(حاکم عمر)ی هاتی نەما ل بەهدینان ودئەنجامێ ئەنفالا بەهدیناندا بەرەو تخویبێ ئیرانێ ڕەڤین، هیڤیدارم بخو حسیبکەی کا تو چەند مایە ل بەهدینان و ل سەر ڕاستیا گاڤنەدەت.

- دبێژی: دوان (دوو) ساڵا دا من باش کەسایەتیا بەهدینیا ناسکر یە، هیڤیدارم بو مە باش ڕوونکەی کا ئاڤا کرنا کەسایەتیا بەهدینیا تە ب ج شێوەی ناسکری یە؟ ئایا تە چ بسپوری هەیە لەسەر جڤاکناسیێ کو نفشێ داهاتی سوود وقازانجێ ژێ وەرگرن، یانژی ئاخڤتنێت تە مینا تڤەنگێت داوەتیانە؟

- دبێژی: وبدلەکێ داخکری کوکەسایەتیا بەهدینیا گەلەک ژکەسایەتیا گەرمیانی وسلێمانی وهەولێری جوداترە، وڤێ چەندی دزڤرینی بو ئەگەرێن سیاسی هەروەچکو بەهدینی وبەهدینان ل 1946.8.16 یێن لسەر ڕویێ ئەردی پەیدابووین.
سوپاس بو ڤان زانیاریێن بنرخ...!

- دبێژی: دەمێ بەرەی کوردستانی دروستبووی ئێکەتیێ مەڵبەندێ بەهدینان دامەزراند و کاک شەهید(ئازاد هەورامی) بو بەرپرسێ مەڵبەندی. ئەگەر هشێت من خیانەتێ ل من نەکەن بەرەی کوردستانی 1988.5.20 ی یێ دامەزرای وشەهید(ئازاد هەورامی) مینا مە لسەری ئاشکراکری هەیڤا 5 سالا 1987 یێ هاتی یە بەهدینان، جوداهیەکا مەزن یاهەی دناڤبەرا تشتێ هەی(ریالست) وخەیالا تە یا سەرنجڕاکێش، مەڵبەندێ بادینان نە هاتە دامەزراندن بەلکو هاتە ڤەگوهاستن ژبالیسان بو بەهدینان جونکی بەری هینگێ مەڵبەندێ بەهدینان هەبی..لێ تێکهەلکرنا سەرهاتیا ژلایێ تە وەک ئەندامەکێ کۆمەڵا رەنجدەران یێ هشیار نەگرنگە.

- دبێژی: پشتی شەهید (ئازاد هەورامی) دگەل بەهدینیا نە گونجای وڕێکنەکەفتی زڤری ڤە..لدەف من گەلەک سەیرە..لجهەکی دبێژی : (ژمارەی پێشمەرگە بادینییەکان بە پەنجەی دەست لە ناو شۆڕش دەژمێردران لە ناویاندا "حاکم تلی و براکەی، مەلا سدیق و لەشکری و خزمێکی سەیدا برایم عەزۆ و چەند دانەیەکی دیکە بەڕاستی ژمارەیان لەپەنجەی دەست تێنەدەپەڕی) دێ باشە.. گومان تێدا نینە کوشەهید (ئازاد هەورامی) سەرکردەکێ خودان شیانێن مەزن بوو وبدیتنا من ژبو شیانێن خوە کەسێ سیێ بوو دناف ی.ن.ک پشتی بەڕیز مام جلال وکاک نەو شێروانی، چەوا نەشیا دگەل لەپەکێ بەهدینیا بگونجیت ورێکبکەڤیت، ئەڤە کێمکرنە بو شەهیدێ سەرکردە (ئازاد هەورامی) ودعەینی دەمی دا وێ چەندێ دسەلمینیت کو پێشمەرگەهێ بەهدینی یێ ی.ن.ک نە(بە پەنجەی دەست لە ناو شۆڕش دەژمێردران) بەلکو هێزەکا باڵکێش و کاریگەر بوو بەروڤاژی ئاخفتنا تە..ژبلی وان بەڕێزێن تە ناڤێن وان ئینای ئەز دشێم سەدان ناڤێن دی یێن پێشمەرگە‌هێن دلسوز وئێکەتی وکوردپەروەر یێن بەهدینان بوتە رێز کەم، تە ژبیر کرە یان تە دڤێت ڕاستیا داپۆشێ کو لبەهدینان سێ کۆمیتێن ی.ن.ک هەبوون: کۆمیتا ئامیدیێ (سیار بامرنی، غنی کورەمارکی، انور مجلمختی، وەستا سابیروعبدالله هروری) ستافێ کۆمیتێ دگەل دەهان پێشمەرگە ورێکخستن وبەرگری میللی کو ل شەڤا 13-14/9 / 1987 گەورەترین چالاکیا لەشکەری مل ب ملێ پارتی لدەڤەرێ ئەنجامدای، گرتن ورزگارنا ناحیا کانی ماسێ ودەور وبەر، نە(کونە ماسی..!) وەکو تو ناڤێ وێ دئینێ، دڤێ چالاکیێ دا زێدەتر ژ 150 جاش دیل هاتن گرتن و دوو مستشار(سادق سندی وبائیز بەر ئاشی) وسەیاریت ئیڤا وتویوتا وسەدان پارچە جەکێ سڤک وجیهازەکێ ڕاکال بزەند وبەندێن پێشمەرگەهێ بەهدینان وچەند پێشمەرگەهێن دەڤەرا سوران بسەر پەرشتیا پێشمەرگەهێ قەهرەمان(وەستا سابیر)ی، دڤێت تو باش بزانی کو مەڵبەندی پشتی ڕۆژەکێ ئاگەه ل چالاکیێ بی، شەهید سعیدچمسەیدی کورێ خەباتکارێ دێرین سید أحمد چەمسیدی بگولێن دوژمنی شەهید بوو هەروەسا کابانیا سید أحمدی ژی ب دوژواری برینداربوو ،هەروەسا شه هیدێ سەنگەری خیری هروری خوینا وی دگەل خوینا شەهید پاڵە یێ کەرکوکی دئێک سەنگەردا لدەڤەرا ئامێدیێ تێکهەل بوو.. یان ئەڤ ڕاستی یە ژبیرا تە چوونە..؟
کٶمیتا دهوکێ(قادر باجلوری، بدل باجلوری، سلام لیناڤای، رزگار علی) ودەهان پێشمەرگە ورێکخستن وبەرگری میللی.
کۆمیتا شێخان(خسرو بادینی، دکتور سعید، شێخ إسماعیل بابا شێخ.....) ودەهان پێشمەرگە ورێکخستن وبەرگری میللی.
هەروەسا زاخو شێخموس بوسەلی ومسعود بوسەلی وسلیم شرانشی ب خێزانێن خوەڤە وڕەفەکا بەرچاڤ یاپێشمەرگە وڕێکخستن وبەرگری میللی، ئەڤە هەمی بوتە(بە پەنجەی دەست لە ناو شۆڕش دەژمێردران).

- دبێژی: (تا لە مەڵبەندی چوارەوە کۆسرەت ڕەسوڵ هێزێکی بەسەرکردایەتی "ڕائید جەلال" و کۆسرەت و شەهید حەسەن کوێستانی نارد، ووتیان گەر پێویست بکات لە زێی گەورە دەپەڕینەوە، ئیتر ئێمە نزیک بووینەوە لە ئەنفال)، لڤێرە ئاشکرا دبیت کو جەنابێ تە دگەل هێزا(رائد جلال) یێ هاتی یە بەهدینان، ئەڤە ئەگەر هاتبی، ئەوژی هەیڤا 10 لساڵا 1987 ێ بو، گەلەک تشت ژتە بوریبوون لێ لسەروێ چەندێ تو مافی ددەیە خو لسەر دەمەکی بنڤێسی هەروەجکو تو تێدا ژیابی لێ براستی تو تێدا نەژیای، چاف تاری بوون وکەربگرتنا تە دیروک ژی یا لبەر تە بەرزەکری، کەنگی هوین نێزیکی ئەنفالا ببون، چێتبیت ئەم ل گەلەک تشتێن تە گوتین، بەهدینی دبێژن دیێ قولتەینن، ل تە ببوورین، لێ دیروکێ تو بگهوری وئەنفالا بەهدینان نێزیکی هەیڤا 10/ 1987 بکەی ئەڤە قەبویل نینە ولسەر تە نابوریت، وبو زانینا تە بەڕێز مسعود بارزانی سالا 1986 ێ لدەڤەرا لقا ئێک بوو، چونکی من وسیار بامرنی وخسرو بادینی وتێلی مجلمختی نامەکا پێنج خالی یا بەڕیز مام جلال ی هەیڤا چوار1987 یابو جەنابێ وی بری بەری هاتنا شەهید (ئازاد هەورامی) بودەڤەرا بەهدینان.
- دبێژی:(ڕۆژێک ڕژێمی بەعس بە کیمیاوی لێیداین ...............، ئێمە چووینە چیاکە و ئەوان و..............).
کیمیابارانا گەلیێ زێوه کە بارەگایێ لقا ئێک یا پارتی ومەڵبەندێ ی.ن.ک وحزبا شیوعی وبزاڤا ێشوری..لێبون
ڕۆژا 1987.6.5 یێ هاتی یە کیمیا بارانکرن وی.ن.ک سێ بریندار هەبوون هەرسێ ژی بەهدینی بوون(هاشم مجلمختی، سلێمان هروری وأنور مجلمختی) هەرسێکا گوهداریا ڕێنمایێن کاک شەهید(ئازاد هەورامی) نەکرن وجلکێت خوە نەشویشتن وتوشبوون، وی دەمی هێشتا هێزا(رائد جلال)ی نەهاتبوو دەڤەرێ، وتوژی وەکی لسەری تەبخو ئیشارەت پێکری دگەل هێزا (رائد جلال)ی هاتبووی، ئەف چیرۆکا تە ڤەهاندی تە ژهەڤالێن دی یێن پێشمەرگە یاگولێ بووی وخو پێ قەپەدکەی.

- دبیژی:(.. کاتێک دوای ئەنفال لە سەرەتادا بارەگای مەڵبەندی بادینان لە نۆکان بوو، چووینە شاری شنۆ، ئەوەی سەیر بوو لامان کە ئەندامە بادینییەکانی یەکێتی، هەموویان نا، زۆربەیان بۆ یادی مەلامستەفا لەڕیزی پێشيوە دادەنیشتن و قەت ئەو ئامادەیان تێدا نەبوو خۆیان بۆ یەکێتی هیلاک بکەن......).
خەلکێ دەڤەرا بەهدینان مینا هەمی خەلکێ کوردستانێ، ڕەوشت وئەخلاقەکێ مێهڤانداریێ یێ ڕند وجوان یێ هەی ئەوژی رێزگرتنا مێهڤانی یە،تشتەکێ خورستی یە کو بەرپرس وپێشمەرگە‌هێن ی.ن.ک لڕێزا ئێکی ڕوینن دهەلکەفتنەکا هوسادا ئەوژی نرخێ وان دسەلمینیت، ئەگەر لپشتێ ڕوینشتبان تو دابێژی کادرێن ی.ن.ک یێن بەهدینان کەسێن لاوازن تاکو لدەف پارتی ژی دبێ قیمەتن..! پاشی ئاشتبوونا گشتی دحالێ دا بوو وبەرەی کوردستانی هێشتا یێ ساڤابوو..گوتنەکا چینی یا یا هەی دبێژیت(مەژیێن مەزن لدویف سوحبەتێن مەزن دکەڤن و مەژیێن بچویک لدویف سوحبەتێن بچویک).

- دبیژی: (..... گەرچی دوو ڕۆژ بەر لەئەنفال باوکی سادق عومەر ئاغا بەخۆیی و فەوجەکەیەوە هاتنە ناو یەکێتی...).
لڤێرەژی تە خوە ئێخستە خەفکەکا دی، بو زانیاریێن تە، بابێ سادقی عەمەرێ سالحی ب چەندین هەیڤا بەری ئەنفالا هاتبو ناف ی.ن.ک، وئەز دگەل مەفرەزەکێ یێ چوویمە گەلیێ پیربلا ل ناف سندیا ومە ب شەڤێ ل جاددێ یێ دەربازکری ومە شەڤبێریا خوە ل گوندێ(بێغەبارێ) ل مالا خدرێ بێغەباری یاکری، وشەهید (ئازاد هەورامی) لگوندێ(دهێ) لدەڤەرا دوستکیا پێشوازیا وی یاکری، جارەکادی بوزانیاریێن تە شەهید(ئازاد هەورامی) بەری ئەنفالا پتر ژهەیڤ ونیڤا بەهدینان بجه هێلابوو.
لڤێرە من نەڤێت زێدەتر بابەتێ تە تێکڤەدم..چونکی بێهنا کەرب وکینەکا کویر ژبو بەهدینان وبەهدینیا ژێ دهێت، ئەڤەژی نە ڕەوشت وئەخلاقێ کەسەکی نە کو ڕۆژەکێ ژ ڕۆژا ئەندامێ کۆمەڵا رەنجدەرێن کوردستانێ بو، لێ بەلێ تو نەی بتنێ یی تە چەندین دەستە برا یێن هەین کو جهاڵی وان یێ مشتە ژ بێبەختی ودرەوا لسەر ئێکەتیێن دەڤەرا بەهدینان ئەز ل وێ باوەرێ مە، ئەگەر خویندەڤان بابەتێ تە بخوینن وبەراوردبکەن دگەل تشتێ من نڤێسی، دێ بوو وان خویا بیت چەند ب سادەیی وبێ بنیات تە نڤێسی یە.
کەس نەشێت وئەو ماف نینە ب چەپەر گهورینا کەسەکی یان چەندکەسەکا، کۆمەکا سیاسی یان یا جڤاکی خیچکەکێ لسەر ڕابکێشیت ب درەو وبوختانا ژهولێ ڕاکەت، کادر وپێشمەرگەهێن بەهدینان دێ بوتە وکەسێن لسەر ڕەنگی تە سەلمینن کو ئەوجهێ شەهید(ئیبراهیم عەزو)ی ورەفا شەهیدێن دگەل وی خوینا خوە لێ ڕژاندی توڤێ ئێکەتیێ هەر دێ لێ شین بیت ودارکوتەژی بلا سەرێ خوە بخوون.

عبدالله هروری
بەرپرسێ کۆمیتا ئامێدیێ دەمێ خەباتا چیا

٢٠/٤/٢٠١٤

http://www.kurdistanpost.com/view.asp?id=966db28e