ته‌نیا حکومهتی نوێنه‌رانی جه‌ماوه‌ر، ده‌توانی زامنی خواسته‌کانی خه‌ڵکی ناڕازی کوردستان بێت!
Friday, 08/04/2011, 12:00
له‌باره‌ی پڕۆژه‌ی ڕاگه‌یاندراوی لایهنه ئۆپۆزسیۆنه‌کانه‌وه
سه‌ره‌نجام لایهنه ئۆپۆزسیۆنه‌کان، به‌دوای کۆبونەوەیه‌کی هاوبه‌شیان، ڕێکه‌وتنی خۆیان لەسەر پڕۆژەیەک ڕاگه‌یاند. کە ناوه‌ڕۆکی ئه‌م پڕۆژه‌یه بریتییە لە هەڵوەشاندنەوەی حکومەت و دامەزراندنی حکومەتێکی ئینتیقالی تا به" توافقی حزبه‌کان" پێکبێت و ئەرکی چاکسازی و زەمینە سازکردن بۆ هەڵبژاردنێکی پاکی پێش وەخت، له ئه‌ستۆ بگرێ.
ئەم پڕۆژه‌یه لەکاتێکدایە، کە بزوتنەوەی شۆڕشگێڕانە و خۆپیشاندان و ناڕەزایەتیەکانی کوردستان ڕاسته‌وخۆ ڕووی لە هەڵوەشاندنەوەی حکومەتی حزبی و تەوافوقی نێوان یەکیتی و پارتیه، ڕووی لە زامنکردنی دەورو بەشداری جەماوەری خەڵکە لە پێکهێنانی حکومه‌ت و بەڕێوەبردنی کۆمەڵگادا. ته‌نانه‌ت پڕۆژه‌ی ئه‌م لایه‌نانه و حکومهتی ته‌وافوقیان، نه‌ک هه‌ر ئازادییه سیاسیه‌کان، یه‌کسانی ژن وپیاو، به‌رزکردنه‌وه‌ی موچه و کرێی کرێکاران‌و فه‌رمانبه‌ران، دابینکردنی خزمه‌تگوزارییه‌کان و چه‌ندین داخوازی تر، که خواستی فه‌وری خه‌ڵکی کوردستانه، به‌ڕه‌سمی ناناسێ، له‌هه‌مانکاتدا هێزی چه‌کدار و ده‌زگاکانی پاراستن و زانیاری که‌ده‌زگای سه‌رکوت کردنی جه‌ماوه‌رن، له‌ژێر ناوی به‌نیشتمانی کردن و به‌یاسایی کردندا، له‌ده‌ستی حزبەکانی ئێستاو حکومهتی داهاتوودا به‌رانبه‌ر به خه‌ڵکی کوردستان ده‌‌هێڵێته‌وه.
تەرحی حکومهتی تەوافوقی ئۆپۆزسیۆن، لەکاتێکدایه کە خەڵکی کوردستان، ته‌جروبه‌ی تاڵ و کاره‌ساتباری 20 ساڵی حکومەتی حزبی و تەوافوقی یه‌کیه‌تی و پارتی و هه‌ر ئه‌م حزبه ئۆپۆزسیۆنانه‌ی ئێستای هه‌یه، که چۆن ژیانی خه‌ڵکی کوردستانی به ڕۆژگاری ئه‌مرۆ گه‌یاندووه. هه‌ربۆیه ناوه‌ڕۆکی پڕۆژه‌و به‌دیلی حکومهتی ئێستاشیان شتێکی زیاتر نییه جگه له ڕاکێشانه‌وه‌ی خه‌ڵکی کوردستان بۆ ژێرسایه‌ی هه‌مان حکومهتی حزبی و سیناریۆی هه‌لبژاردنیان.
خەڵکی ناڕازی و ئازدیخوازی کوردستان!
کێشەی خەڵکی کوردستان لەگەڵ سیستەمی ئابووری و سیاسی باودایه، سیستەمێک کە سەروەت و سەرمایەی لەدەستی کەمایەتیەکی که‌مدا، له‌سه‌ر حسابی هەژاری و نەداری بەسەر شانی زۆربەی هەرەزۆری کۆمەڵگاوە کەڵەکە دەکات. سیسته‌مێک که‌سه‌رکوت و ژێرپێنانی ماف و ئازادیه‌کانی هاوڵاتیانی کردۆته ئامڕازی هێشتنەوەی ئەم جیاوازیە چینایەتیە کە ڕۆڵی بەشداری نوێنەرایەتی کرێکاران، لاوان، ژنان، کارمەندان و توێژە زەحمەتکێشەکانی کۆمەڵگای له بە‌ڕیوه‌بردنی کۆمه‌ڵگاو حکومه‌تدا، به‌یه‌کجاری سڕیوه‌ته‌وه. هەر ئەمەشە بۆتە سەرچاوەی ئەوەی کە دەسەڵاتی حزبی و میلیشیایی، کۆمەڵگا بکاتە کۆیلەی خۆی و داخوازییە سەرەتایی و بنەڕەتیەکانی جەماوەر، بکاتە خەونێکی وەدی نەهاتوو. کۆبونەوەی گۆڕان، یەکگرتوو، کۆمەڵ و هەرلایەنێکی تریش لەپشتی جه‌ماوه‌ره‌وه، سیاسه‌تێکه بۆ پچرینی ئیمتیازاتی حزبی بۆ خۆیان و وه‌لانانی داخوازییە ڕەواکانی خەڵک و بەهەند نەگرتنی ئەنجومەنی کاتی سەرای ئازادی و پشتکردنێکی ئاشکرایە لە نوێنەرانی خۆپیشاندانەکان و نوێنەرانی شوێنی و کارو ژیانی خەڵکی کوردستان.
کرێکاران، زه‌حمه‌تکێشان، ژنان ولاوان!
ڕێگا چاره‌ی قه‌یرانی سیاسی وکۆتاییهێنان بەدەسەڵاتی ئێستا، لە ڕێگای سپاردنی دەسەلات بەحزبەکانی ترو حکومەتی تەوافوقی لایهنه ئۆپۆزسیۆنه‌کانەوە نیەو بەدیلی ئێوه نیه، هه‌رجۆره خۆش باوه‌رییه‌ک به‌م جۆره پڕۆژانه، به‌مانای ته‌سلیم کردنی داهاتووی خه‌باتی ئەو بزووتنه‌وه‌یەیە که بۆ ئازادی و یه‌کسانی و ژیانێکی باشتر، هاتۆته مه‌یدان. ڕێگای ئێمه‌ی کرێکاران و گه‌نجان و ژنان و خه‌ڵکی هه‌ژار بەردەوامیدانه بەخەباتێکی هەمەلایەنەو فراوانکردنەوەی خۆپیشاندانەکانی کوردستان، پەرەدانە بەبزوتنەوەی شۆرشگێڕانەی ئێستای کوردستان، تارادەی وەلانانی دەسەڵاتی حزبی و میلیشیایی سەرمایەدارانی کوردستان و جێگرتنه‌وه‌ی به‌دەسەڵاتێکی پشتبەستوو بە ئێرادەو ڕۆڵی ڕاستەوخۆی جەماوەر.
حزبی کۆمۆنیستی کرێکاریی کوردستان، بانگەوازتان دەکات بۆ یەکخستن و یەکگرتووکردنی ریزەکانتان، بانگەوازتان دەکات بۆ کۆبونەوە گشتیەکانتان لەشوێنی و کارو ژیانتان، هەڵبژادنی نوێنەرانی واقعی خۆتان و ئەم ریگایە بە ئەلتەرناتیفی واقعی و کارساز دەزانێت بۆ به‌سه‌رکه‌وتن گه‌یاندنی خۆپیشاندان و ناڕه‌زایه‌تییه‌کانی ئێستا و بڕانه‌وه‌ی قه‌یرانی سیاسی ئێستا به‌قازانجی خه‌ڵک. هەر هەوڵێکی پێچه‌وانه‌ش به‌م ڕێبازه هەنگاویکه لە دژی بزوتنەوەی شۆڕشگێڕانەی خەڵکی کوردستان و به‌لاڕێدابردنی داخوازییه‌کانی جه‌ماوه‌رە.
٦-٤-٢٠١١
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
