دەسەڵاتی کوردی گرفتێکی هەیە ئەویش ئەخلاقە!
Friday, 31/01/2014, 12:00
1565 بینراوە
فیزیای ئەخلاق:
بە پێی زانستی فیزیا هەمیشە هێزێک تەنەکان لە چەق دەردەپەڕێنێت، بەڵام هێزی کێشکردن بەردەوام بەرەو لای خۆی کێشیان دەکات و دەبێتە هۆی هاوسەنگی.من لەو بڕوایەدام اخلاق هەمان هێزی کێشکردن و هاوسەنگ کردنی کۆمەڵگایە، چونکە بەرژەوەندییەکان پاڵ بە مرۆڤەوە دەنێن، کە لە سیاقی مرۆڤایەتی دەرچن و اخلاقیش بەرەو لای خۆی کێشی دەکات، تا لە چوار چێوەی مرٶڤایەتی دەرنەچێت. دیارە بوونی بەرژەوەیی ئەگەر لە سەر حیسابی کەسانی تر نەبێت گرفتێکی ئەخلاقی نییە، بەڵام کاتێک بەرژەوەندی کرا بە پێوەری حەقیقەت گرفتە ئەخلاقییە، کە لەوێدایە و مرۆڤ جگە لە پیسخۆر و گەندەڵخۆر و بەرتیلخۆر شتێکی دیکە نییە.
مێژوو ئەوەی سەلماندووە، کە ئەو کۆمەڵگایانەی هێزی کێشکردنی اخلاقیان لاواز بووە لە ناو چوون و ناوێکیان لە ناودا نەما، پێچەوانەکەشی هەر ڕاستە.
لێرەدا ناچمە ناو ئەو مشتومڕەیوە کە اخلاق کێ دایهێناوە؟! بە هێزەکان یان لاوازەکان؟ بەڵکو باس لە دەسەڵاتیک دەکەم، کە گرفتێکی اخلاقی هەیە، دەسەڵاتێک تا سەر ئێسقان گەندەڵ ، مشەخۆر، پیسخۆر.
هەر ئەو بۆشاییە اخلاقییەیە، کە بۆشاییەکی سیاسیی مەعریفی دروستکردووە. ئەفلاتون لە کۆمارەکەیدا دەڵێت: تەنانەت لە ناو دزەکانیشدا بنەمایەکی دادوەری هەیە بۆ ئەوەی بتوانن دەستکەوتەکانیان دابەش بکەن لە نێوان خۆیاندا، بەڵام ڕەنگە سیاسییەکانی ئەم هەرێمە وەڵامێکی گونجاویان هەبێت بۆ جەنابی ئەفلاتۆن و بڵێن قوربان خۆ ئێمە دز نیین، بەڵکو مافیایین! دەسەڵات نەک هەرگرفتی ئەخلاقی هەیە، بگرە بەتەمایە کۆمەڵگاش فەساد بکات.
دەسەلاتێک زیاتر لە بیست ساڵە کاوێژی خابات دەکات و بە هاوڵاتیانی دەفرۆشێتەوە. بیست ساڵە بەڵێنی درۆ بەخەڵک ئەدات، زیاتر لە بیست ساڵە شەڕی دەرونیی لەگەڵ هاونیشتیمانیان دەکات و فێڵیان لێدەکات و هەمیشە بە هەڕەشەی دەرەکی و سیناریۆ ی عەجایب هاوڵاتیان دەترسێنێت، لە سەر ڕای جیاواز ڕۆژنامەنوس تیرۆردەکات ئەرێ ئەخلاق لەکوێی ئەم دەسەڵاتەدا هەیە؟
ئەگەر بینای ماڵی سەرۆکی حکومەت گەورەتربێت، لەبینای قوتابخانەیەک چۆن ئەتوانین باس لە ئەخلاقی دەسەڵاتداران بکەین.
لە زانستی سیاسیدا وا پێناسەی حزب کراوە، کە ئامرازێکە بۆ هەڵسوڕاندنی کۆمەڵگا، بەڵام لەم هەرێمە پێچەوانەکەی ڕاستە، حزب بۆتە بار بەسەر کۆمەڵگاوە.
پێویستە لەمەو ئێمە بڵێین ئیدی بەسە کاوێژی خەبات کۆتایی هات، چیتر ناتوانن عەورەتی سیاسیتان بشارنەوە، ئێمە باش دەزانین لە منداڵدنی ئەم حزبە نێرە موکانە حکومەتێکی نیشتمانی لەدایک نابێت، لەسەر بنەمای هاوڵاتی بوون و دادوەری و رەخساندنی هەلی یەکسان بێ جیاوازی ئینتیمای حزبی، بەڵکو تا دێت زیاتر و زیاتر نوقمی ناعەدالەتی و گەندەڵی و بێ ئەخڵاقی دەبن.
لە کۆتایدا دەڵیم دەسەڵاتی کوردی خاوەنی هیچ فچیلەتێکی سیاسی نییە، نەمانی فچیلهتی سیاسی وڵات بەرەو هەڵدێر دەبات، کۆمەڵگایەکی بەرخۆر بەرهەم دێنێت هاوڵاتی بێ ئینتیما و بی ئیرادە و بی هەڵوێست دروست دەکات لە ئاست کێشەکانی ژیان، جگە لە پڕکردنی قیتاڕی حزب لە مرۆڤی گەندەڵ و مشەخۆرو بێکار و ماستاوچی چاوەڕوانییەکی دیکەی لێناکرێت.
