ئازادی له‌منداڵیه‌وه سه‌رهه‌ڵده‌دا‌ت عه‌بدولله ئۆج ئالان به‌شی یه‌که‌م .
Monday, 14/06/2010, 12:00
له‌تورکییه‌وه وه‌ریگێڕاوه
هێشتا له‌یادمه له ژێر سێبه‌ری دیواری مزگه‌وته‌که بووین ، من هه‌ر قسه‌م کرد و هه‌ر قسه‌م کرد ، کابرا پیره‌که‌ش سه‌ری باداو گووتی (کوڕی خۆم ئێمه وه‌ک کۆتکه‌دار واین ، تۆ چۆن ده‌توانی سه‌ر له‌نوێ ئه‌م کۆتکه‌داره سه‌وز بکه‌یته‌وه ؟) .
ئه‌مه یه‌که‌م یادگاریمه که هه‌رگیز له‌یادم ناچێت ، له‌ساڵی 1994 شاعیرێک هاته‌لام ، قسه‌یه‌کی منی به‌بیردا هێنامه‌وه که ووتومه (ده‌رخستنی گوڵ له‌به‌ردا) ئه‌مه‌ی به‌م شێوه‌یه پێناسه ده‌کرد که من گوڵێکم له‌به‌ردا سه‌وز بوومه یاخود به‌و شێوه‌یه‌م لێدێت ، واتا سه‌وز کردنی کۆتکه‌دار و ڕوانینی گوڵ له‌به‌ردا .
ئازادی له منداڵیه‌وه ده‌ست پێده‌کات :
هه‌رله‌کۆنه‌وه هه‌میشه ویستومه به‌شێوه‌ی کۆمه‌ڵ ڕێ بکه‌ین ، له منداڵیمدا زۆر حه‌زم له چالاکی و گه‌مه ده‌کرد ، یه‌کێ له‌هۆکاره‌کانی ئه‌مه‌ش کۆکردنه‌وه و به‌ڕێخستنی منداڵانی گوند بوو وه گه‌شه پێکردنیان ، ماندوبونێکی زۆرم ده‌چێشت تاکو بتوانم به‌ناوی گه‌مه‌کردنه‌وه کۆیان بکه‌مه‌وه ، به‌ڵام نه‌ک به‌یه‌که‌وه گه‌مه بکه‌ین به‌ڵکو ده‌مویست جیا جیا یاری بکه‌ین ، گه‌مه‌یه‌کی زۆرم ده‌خسته ئاراوه بۆ ئه‌وه‌ی هه‌رهه‌موومان به‌گوێره‌ی ویستی خۆمان یاری بکه‌ین ، به شه‌و و ڕۆژ نه‌م ده‌هێشت بێجوڵه بن ، له‌م باره‌یه‌شه‌وه له‌ناو گوندا ناوم ده‌رکردبوو ، هه‌موویان منداڵه‌کانیان لێ ده‌شاردمه‌وه ، به‌یه‌کیان ده‌گووت (منداڵه‌کانتان ڕاده‌ستی ئه‌مه مه‌که‌ن) دوای ماوه‌یه‌کی زۆر که‌مال بورکایش ئه‌مه‌ی هێنایه زمان ، وه‌ک ڕاوچییه‌ک به‌ده‌وری ماڵه‌کانیاندا ده‌سوڕامه‌وه ، ده‌یانگووت (دیسان هاته‌وه) له ته‌مه‌نی زۆر منداڵیمدا منداڵه‌کانیان له‌من ده‌شارده‌وه ، به‌ڵام من ئه‌وانم هه‌ر ده‌گرت ، ئه‌گه‌ر ڕۆژێک بچمه‌وه گونده‌که‌مان روبه‌رووی ئه‌وانه ده‌بومه‌وه که منداڵه‌کانیان له‌من ده‌شارده‌وه پێیانم ده‌گووت وه‌رن ، له گونده‌که‌ماندا کۆیانمده‌کرده‌وه و فێری گه‌مه‌یانم ده‌کرد .
به‌ڵێ به ویستی خۆم و به‌گوێره‌ی دڵی خۆم بوارم بۆنه‌ڕه‌خسا له‌گه‌ڵ منداڵه‌کاندا گه‌مه بکه‌م ، ئازادی له‌ئارادا نییه و ئه‌مه‌ش ئه‌و شه‌ڕه نه‌بوو که ده‌مانویست ، ته‌نها گه‌مه بوو له‌گه‌ڵ منداڵان ، گه‌مه‌ی ساده ، ڕێپێوان به‌سه‌ر سروشتدا ، کۆکردنه‌وه‌ی گوڵه زه‌رده ، کۆکردنه‌وه‌ی چیمه‌ن و راوکردنی باڵنده ، هه‌موو هه‌وڵه‌کانمان بۆ ئه‌م شتانه بوو ، گه‌مه‌یه‌کی زۆر که‌ممان کرد .
هه‌ر وه‌ک گووتم ئازادی له منداڵیه‌وه ده‌ست پێده‌کات .
زۆر ده‌مامه‌وه له شاخ ، چواله‌م کۆده‌کرده‌وه و باڵنده‌م ڕاوده‌کرد ، له ڕاستیدا باڵنده‌یه‌کی زۆریش له ئارادا نه‌بوو تاکو ڕاو بکرێت ، به‌ڵام له‌م باره‌یه‌وه ببوم به وه‌ستا ، دێته‌وه یادم که له ئاسمانه‌وه چه‌ند باڵنده‌یه‌کم پێکا ، هه‌ندێجار داوم ده‌نایه‌وه ، سوێسکه‌یه‌کی زۆرم ڕاوکرد ، هه‌ڵبه‌ت ڕاوکردنی 5 یان 6 دانه به‌یه‌که‌وه سه‌رکه‌وتنێکی گه‌وره بوو هه‌ر خۆشم ده‌مبرژاندن ، هه‌ڵبه‌ت ئه‌مه‌ش سه‌رنجی منداڵه‌کانی تری ڕاده‌کێشا ، کاتێک له‌گه‌ڵیاندا ڕاوی باڵنده‌مان ده‌کرد تاکو خواروی چه‌مه‌کان ده‌یانم برد ، وه به هه‌موویان پارچه‌یه‌ک له گۆشتی ڕاوه‌که‌م ده‌دانێ .
ئه‌و دیمه‌نانه هێشتا له‌به‌ر چاومن ، ئه‌و باڵندانه‌ی ڕاوم کردبوون له باوه‌شم دامده‌نان و گیرفانم لێپڕ ده‌کرد ، چاودێری چوارده‌وری خۆمم ده‌کرد ، له‌به‌ر ئه‌وه‌ی له گیرفانه‌کانمدا ده‌وڵه‌مه‌ندییه‌ک هه‌بوو ، له‌وانه‌بوو منیان ده‌ستگیر بکردایه ، به‌رده‌وام ئاماده‌بووم بۆ هه‌ڵاتن ، ئه‌گه‌ر یه‌کێک بیگوتایه (وه‌ره) بۆیده‌رده‌چووم ، مه‌حاڵ بوو ده‌ست گیرم بکه‌ن ، ئه‌وکاته به‌وشێوه‌یه بیرم ده‌کرده‌وه (نه‌ماڵه‌وه و نه گوند نشینه‌کان ناتوانن بمگرن ، به‌گوێره‌ی زانستی خۆم ئه‌م سوێسکانه ده‌برژێنم) .
دارێک له‌به‌رده‌م گونده‌که‌ماندا بوو ، ناومان نابوو [ داری تاڤێ ] دارێکی زۆر گه‌وره بوو ، ده‌چوومه ژێر داره‌که ، من 3 دارێک وه‌ک دارێ تاڤێ ده‌ناسم ، تاکو ئێستاش هه‌رسێکیان بۆ من پیرۆزن ، له‌ژێر سێبه‌ری دارێکیان بووم ، هاوینێکی گه‌رم بوو ، ده‌یانووت (ته‌کنیک هات) ، شوێنی ئێمه ووشکه ، ئاو په‌یداکردن زۆر زه‌حمه‌ته ، هه‌ڵبه‌ت دۆزینه‌وه‌ی دڵۆپێ ئاو بۆمن زۆر سه‌رنج ڕاکێشه ، له‌نزیکی گونده‌که‌مانه‌وه شوێنێک هه‌بوو که‌له ئه‌شکه‌وت ده‌چوو ، له‌ناویدا دڵۆپ دلۆپ ئاو کۆده‌بۆوه ، له هاویندا به پڕی گۆزه‌یه‌ک ئاو کۆده‌بۆوه ، گه‌یشتن به‌و ئاوه زۆر سه‌رنج ڕاکێش بوو بۆ من ، پاڵده‌که‌وتم ، به‌ژیر به‌رده‌کاندا ده‌خشام و ده‌مویست بگه‌مه ئاوه‌که ، که ده‌مم ده‌گه‌یانده ئاوه‌که هه‌ستم به تام و چێژێکی خۆش ده‌کرد ، هێشتا تامی ئه‌و ئاوه له ده‌ممایه ، هه‌رله‌و کاته‌وه به‌رامبه‌ر له زه‌حمه‌تی ووشکایی ده‌کرده‌وه که ئایا چی بکه‌م ؟ گه‌ڕان به‌شوێن ئاودا زۆر گرنگه .
ئه‌و سه‌رده‌مه ئاو به‌گۆزه ده‌گوازرایه‌وه منیش هه‌وڵم ده‌دا که ئاو نه‌ڕێژم ، کاتێک گه‌رمایی نیوه‌ڕۆ بوو ، ناڕه‌حه‌تیه‌کی زۆرمان ده‌چێژت بۆ خۆ فێنک کردنه‌وه ، ئه‌و کاته هه‌موو ئاره‌زووی ئێمه ئه‌وه‌بوو که جامێ ئاو له گۆزه‌که بخۆینه‌وه ، جام خۆڵاوی و ئاوه‌که‌ش هه‌ندێک سوێر بوو ، سه‌ره‌رای ئه‌مه‌ش به‌تامه‌زرۆوه ئاوه‌که‌مان ده‌خوارده‌وه ، که ئه‌و ئاوه‌مان ده‌خوارده‌وه وامان ده‌زانی هه‌موو دونیا هی ئێمه‌یه ، دوایش داده‌نیشتین ساوه‌رمان ده‌خوارد تاکو ئێستاش تامه‌که‌ی له ده‌مم ماوه ، ئه‌و ساوه‌ره‌ی دایکمم زۆر به‌دڵ بوو ، تاکو ئیستاش پێم وایه که که‌س ناتوانێت وه‌کو دایک ساوه‌ر لێبنێت ، یاخود ئه‌وکاته من وا بیرم ده‌کرده‌وه ، به‌ڵێ ژیانمان جامێ ئاو بوو له‌گه‌ڵ ساوه‌ردا .
هه‌ندێ براده‌رم هه‌بوون که ده‌ست به‌رداریان نه‌بووم ، براده‌رانی زه‌حمه‌تکێش بوون ، به‌یه‌که‌وه ڕاوێکی باشمان ده‌کرد و به‌شوێن گرتنی ماردا ده‌گه‌ڕاین و هه‌ڵگژان له‌خواره‌وه بۆ سه‌ر گرده‌کان وه زۆر ئاره‌زووی ئه‌وه‌م ده‌کرد که له‌گه‌ڵ مندا به‌رده‌وامی به‌م ڕێپیوانه بده‌ن ، ئه‌و ناڕه‌حه‌تیه و ئه‌و که‌سانه‌ی روبه‌رووم ببونه‌وه هێشتا له‌یادم ماون ، هه‌موو زه‌حمه‌تی و براده‌ری و ناڕه‌حه‌تی و خۆشیه‌کانیشم هێشتا له‌یاده ، سه‌رنج ڕاکێشه بۆنمونه داری فستق و زه‌یتوون هه‌بوو ، به‌ره‌و به‌هار ده‌چووین که‌کاتی چونمان بوو بۆ قوتابخانه ، ئه‌وکاته منداڵ بووم بیرمده‌کرده‌وه (ئایا ئه‌م مامۆستانه شێرن .. ئایا پڵنگن .. کوردن ؟ .. ئایا چی له‌من ده‌که‌ن ؟) ئه‌وسه‌رده‌مه راستی مامۆستام به‌م شێوه‌یه هه‌ڵده‌سه‌نگاند (ئایا ده‌توانن چی له‌من بکه‌ن ، ئه‌مانه کێن ؟) من هیشتا منداڵ بووم هێشتا له قوتابخانه ناونوس نه‌کرابووم هیچم نه‌ده‌زانی به‌تایبه‌تیش تورکیم نه‌ده‌زانی .
حه‌ساس بووم ، هاوسێیه‌کمان هه‌بوو ، که‌سێک بوو که به‌دیقه‌ت گرتبووم ، له من گه‌وره‌تر بوو ، تفه‌نگێکی هه‌بوو که له پاشماوه‌ی سه‌ده‌ی 19 بوو ، سه‌ره‌تا ساچمه‌ی تێده‌کرد دوایش باروتی تێده‌کرد ، به‌و شێوه‌یه ده‌یته‌قاند ، ئه‌مه یه‌که‌م چه‌ک بوو که بیبینم ، کولانه‌یه‌ک هه‌بوو ، زوو زوو مار ده‌چووه ئه‌و کولانه‌وه ، ره‌ش ماری گه‌وره ، هه‌میشه له کونه‌کانی دیواره‌که‌ی ئێمه‌وه ده‌رده‌هاتن که به‌دیواری دراوسێکه‌مانه‌وه بوو ، هه‌ڵبه‌ت به‌ماره‌وه خۆم سه‌رقاڵ ده‌کرد ، بۆئه‌وه‌ی ماره‌که بکوژین به دراوسێکه‌مانم ده‌گووت (ده‌ی هاوسێ چه‌که‌که‌ت بێنه و ته‌قه بکه) به‌ڵام هاوسێکه‌مان داخی ده‌کرده دڵمه‌وه ، ماوه‌ی نیو کاتژمێرێک چه‌که‌کی به‌ده‌سته‌وه ده‌گرت چاوه‌ڕێی ده‌کرد و چاوه‌رێی ده‌کرد ، به‌گوێره‌ی دڵمی من ئه‌م چه‌که هیچ ته‌قه‌ی نه‌کرد ، سه‌ره‌رای ته‌قه نه‌کردنی به‌ڵام به‌رده‌وام دراوسێکه‌مان هه‌ڵی ده‌گرت ئه‌مه نیشانه‌ی هێزێک بوو بۆ ئه‌و .
ئێمه زۆر له‌م تفه‌نگه حاڵی نه‌بووین ، به‌ڵام هێشتا له خه‌یاڵمدایه ، به‌ڵێ ئه‌و چه‌که ده‌یکرده خاوه‌ن هێز ، ئه‌مه هه‌لێک بوو بۆ ئه‌و ، به‌ڵام هیچ کاریگه‌ریه‌کی به‌رامبه‌ر به ماره‌کان نه‌بوو ، به قه‌د دیواره‌که‌ی ماڵی ئێمه‌وه کولانه‌ی کۆترمان هه‌بوو ، کاتێک ده‌مان بینی مار به‌ره‌و کولانه‌کان ده‌کشێن زۆر نیگه‌ران ده‌بووین ، ئێمه‌ش ڕاسته‌وخۆ په‌یژه‌مان ده‌هێنا و هه‌ڵده‌گژاین ، به‌شوین ماردا ده‌گه‌ڕاین ، به‌ڵام ئایا به‌چی له‌ماره‌کان ده‌ده‌یت ؟ ، ئه‌مه شه‌ڕێکی زۆر جدی بوو ، ئه‌و گه‌یشتبووه ناو کولانه‌که‌و چه‌ند بێچووه کۆترێکی خواردبوو ، له‌بنمیچی دیوارێکی ترمانه‌وه ماری ترمان به‌دی کرد ، که‌واته هاتونه‌ته ماڵه‌وه ئه‌مه مانای وایه مه‌ترسی گه‌وره له ئارادایه ، به‌ڵێ هه‌وڵمان ده‌دا که ماره‌کان بکوژین ، به‌ڵام له‌م باره‌یه‌وه کاریگه‌ریه‌کی ئه‌وتۆمان نیشان نه‌ده‌دا .
له ئه‌نجامدا توانیمان سه‌رکه‌وتن به‌سه‌ر مارکوشتندا بهێنین ، ئاره‌زووی کوشتنی مار له دوایدا بوو به خواستێکی راسته‌قینه .
له‌مندا خۆشه‌ویستی نیشتیمان به‌هێزه ، هه‌روه‌کو چۆن فێربووم که چۆن له‌گه‌ڵ سروشتدا بژیم پێشم وایه که ناتوانم ئه‌مه هه‌روا به سانایی له‌بیر بکه‌م ، هیچ بێزار نه‌ده‌بووم له مانه‌وه‌م له‌وخاکه سووتاوه و قڵیشاوه‌دا ، به‌ڵام گوندنیشینه‌کانی ئه‌وکاتانه‌مان هه‌ڵه‌هاتن ، زاته‌ن هیچ حه‌زم له‌و شێوازی هه‌ڵاتنه نه‌بوو ، نه‌فره‌تم له‌و ژیانه ساده ده‌کرده‌وه که‌وان خۆیان تیا ده‌بینیوه ، هه‌میشه سه‌رقاڵمی کردبوو ، بیرم ده‌کرده‌وه که ئه‌و مرۆڤانه هه‌میشه ده‌دۆڕین .
پرسیاری ئه‌وه‌ی ئایا که‌سێکی چۆن بم ئه‌م پرسیاره بێ وه‌ڵام بوو ، ئه‌و شتانه‌ی که قه‌بوڵم نه‌ده‌کرد روو له زیاد بون بوون ، لێره‌دا پرسی هێز ده‌هاته ئاراوه ، ئه‌و شتانه‌م پێ قه‌بوڵ نه‌ده‌کرا به‌ڵام چیت پێده‌کرێت ؟ ، ته‌نها سه‌بر ، ده‌بوایه په‌ره بده‌یت به‌خۆت ، گه‌شه به ته‌کتیکی ژیان بده‌یت و یه‌که‌م هه‌ستی په‌شیمانیش ، بینیم که ماڵه‌وه‌مان گه‌وره‌م ده‌که‌ن و ده‌بوایه له‌گه‌ڵ بنه‌ماڵه‌ی [ حاسم ] شه‌ڕم بکردایه ، بۆ ئه‌وه‌ی رێ له‌و شه‌ره بگرم به نهێنی په‌یوه‌ندیم له‌گه‌ل کوڕه‌که‌یاندا به‌ست که ناوی [ حه‌سه‌ن بینداڵ ] بوو نازناوی [ کازم ] ، له‌ڕاستیدا ئه‌و له‌من زیاتر حاڵی ده‌بوو ، ئه‌مه په‌یوه‌ندیه‌کی تاکتیکی بوو ، ئه‌مه په‌یوه‌ندیه‌ک بوو که به‌رامبه‌ر به دواکه‌وتویی ده‌ره‌به‌گایه‌تی بوو ، وه من منداڵه‌کانی بنه‌ماڵی [ حاسم ] م باش ده‌بینی ، ئه‌وه‌ی زیاتر سه‌رنجی منی ڕاده‌کێشا ئه‌و منداڵانه بوون ، زاته‌ن ئه‌وانه‌ی تریانم خۆش نه‌ده‌ویست ، ئه‌م په‌یوه‌ندیه‌م ئه‌و ده‌سه‌ڵاتی سه‌دان ساڵه‌ی هیزی ده‌ره‌به‌گایه‌تی دوا که‌وتوییه‌م شکاند ، ئه‌مه گۆڕانکاریه‌کی زۆر باڵکێشه ، له ته‌مه‌نێکی منداڵیدا دژ به‌و تارزه شه‌ڕه‌م ده‌هێنایه ئاراوه که‌له کوردستان حاکمێتی هه‌بوو ، وه به‌گوێره‌ی بۆچونی خۆم چاره‌م بۆده‌دۆزیه‌وه ، منداڵ بووم ، ده‌مویست سه‌رنجی منداڵه‌کان بۆلای خۆمدا رابکێشم ، بۆئه‌وه‌ی ببین به کۆمه‌ڵ و کاریگه‌ر تر ببین .
هه‌ندێجار ڕاوکردن و له‌لایه‌کی تره‌وه کۆکردنه‌وه گوڵ و له‌باخ و بێستانه‌کاندا کۆکردنه‌وه‌ی چه‌ند شتیک و هێنانه‌وه‌یان ئه‌مه ده‌بووه هۆی دروست بوونی ڕێکخستن ، هه‌ریه‌که‌یانم ده‌نارد به‌لایه‌کدا ، که منداڵێک لێم نزیک ده‌بۆوه ده‌مویست هه‌ست بکات که شتێک له‌مندا هه‌یه ، به‌ڵێ من خۆمم وه‌ک ده‌وڵه‌مه‌ندیه‌ک دا به‌سه‌پاندن ، یه‌که‌م کۆمه‌ڵه‌ی منداڵانی گوندم به‌وشێوه‌یه دروست کرد .
کۆترم هه‌بوو :
کۆتره‌کانی من زۆر به سروشتیانه تێکه‌ڵی کۆتره‌کانی دراوسێکه‌مان ده‌بوون ، به‌ڵام کۆترێکمان هه‌بوو هه‌میشه له‌گه‌ڵ کۆتره‌کانی دراوسێکه‌ماندا ده‌فڕی ، هه‌ڵبه‌ت چاودێریم ده‌کرد ، جارێک له‌گه‌ڵیان فڕی بوو به 2 جار بوو به 3 جار به‌م شێوه‌یه له‌گه‌ڵ گروپی کۆتره‌که‌ی خۆی جارێکی تر نه‌فڕیه‌وه ، به‌گوێره‌ی من ئه‌م دیمه‌نه خیانه‌تێک بوو ، کۆتره‌که‌م گرت و په‌روباڵم ده‌رهێنا ، روتوقوتم کرد و له‌سه‌رباندا به‌ڕه‌ڵامکرد ، گووتم ئێستا بفڕه ، شیوازێکی جه‌زای له‌و شێوه‌یه‌م هه‌بوو ، سه‌یره ، به‌ڵی به‌ڕاستی وام له‌و کۆتره کرد ، جا نازانم دوایی چی به‌سه‌ر هات ، تاوانی ئه‌و ئه‌وه‌بوو که وازی له گروپه‌که‌ی خۆی ده‌هێناو و ده‌چوو له‌گه‌ڵ گروپێکی تردا ده‌فڕی ، ئه‌مه‌م وه‌ک خیانه‌تێک ده‌بینی .
سه‌گه‌که‌شمان هه‌ر وابوو ، سه‌گێکی سپیم هه‌بوو ، خواردنمان ده‌داپێی ، ئاومان ده‌داپێی ، به‌دیار داره فسته‌قه‌کانه‌وه ده‌ماینه‌وه ، زۆر سه‌یر بوو ، کاتێک که ده‌نوستم یه‌کسه‌ر ده‌چووه لای هاوسێکه‌مان ، جانازانم له‌وانه‌یه هاوسێکه‌مان باشتر ئه‌وی به ریکخستن کردبێت ، وه‌ک سه‌گێکی خاین وابوو ، منی هه‌ڵده‌خه‌ڵه‌تاند ، ته‌ماشام ده‌کرد ، چی کاتیک هه‌لی بۆ بڕخسایه ده‌چووه لای هاوسێکه‌مان ، زۆر سه‌رنجمی راکێشابوو به چاوێکی زۆر پڕ حه‌سره‌ت و نیانه‌وه له هاوسێکه‌مانی ده‌ڕوانی ، له‌ئاکامدا سه‌گه‌که‌م له خۆم دوور خسته‌وه ، بۆچی ئه‌و سه‌گه وایده‌کرد ، نازانم ، له‌وانه‌یه هه‌ندێک شانسی ئیمه وابوو بێت .
ئێمه گوێ درێژمان هه‌بوو ، منیش ده‌مویست که که‌ره‌که‌مان بخه سه‌ر رێگای راست ، ئه‌ویش پاشه‌ڵی له‌گه‌ڵ سه‌ری زۆر زۆر به‌رز ده‌کرده‌وه ، نه‌مان ده‌توانی کۆنتڕۆڵی بکه‌ین ، له‌گونده‌که‌مان ئه‌و که‌ره‌ی ئێمه یه‌که‌م گوێدریژ بوو که هه‌رگیز نه‌ده‌هاته سه‌ر خه‌تی راست ، تاکو ئێستاش له‌یادمه ، له گونده‌که‌ماندا خه‌ڵک به ئێمه پێده‌که‌نی ، گوێدرێژێکی وه‌ک ئه‌و له گونده‌که‌ماندا نه‌بوو ، گوێدرێژێکی سوپه‌ر ، دیاره سه‌گه‌که‌شمان سوپه‌ر سه‌گ بوو ، له بێستان و باخچه و له‌لای فستق بۆ ئه‌وه‌ی به‌دیارمه‌وه بووه‌ستێت ئه‌وه‌ی له‌ده‌ستم بهاتایه ده‌مکرد ، ئه‌ویش پێش ئه‌وه‌ی چاوم بکه‌وێته خه‌ویش چاوه‌رێی منی نه‌ده‌کرد و ده‌که‌وته غاردان .
منداڵ بووم ، شه‌ڕێکمان بوو ، منداڵێک سه‌ره‌ی شکاندم ، به‌گریانه‌وه چوومه لای دایکم ، دایکم له‌و منداڵه‌ی سه‌ری شکاندم زیاتر هێرشی کرده سه‌رم ، گووتی { نابێت ، هه‌تا تۆڵه‌ت نه‌که‌یته‌وه نایه‌یته ئه‌م ماڵه } دایکم یه‌ک وانه‌ی فێر کردم ، پێی ده‌گووتم دوای تۆڵه‌سه‌ندنه‌وه ڕێگام ده‌دات بچمه ماڵه‌وه ، هه‌ر چه‌ندێک دایکیش بوو به‌ڵام بێ به‌زه‌یی بوو ، هه‌رگیز نه‌یده‌گووت کوڕه سه‌ری شکاوه با دڵنه‌وایی بکه‌م هیچ به‌زه‌یی پێمدا نه‌هاته‌وه ، بیری له‌وه‌ش نه‌ده‌کرده‌وه ئایا من ئه‌و هێزه‌م هه‌یه که تۆڵه بکه‌مه‌وه یان نا ، ته‌نانه‌ت بیری له‌وه‌ش نه‌ده‌کرده‌وه به‌ڵکو من ترسنۆک بم یان به‌ڵکو نه‌توانم ده‌ست بکه‌مه‌وه هه‌رگیز بیری له‌و شتانه نه‌ده‌کرده‌وه ، ناڵێم بهتهواوی به‌ڵام دایکم کاریگه‌ری خۆی به‌سه‌رمدا دروست کرد .
له منداڵیمدا له‌من به‌سزمانتر نه‌بوو ، خه‌ڵکی ده‌یانگووت { ئینشالله ئه‌ولادمان وه‌ک کوڕی فڵانکه‌سی لێنه‌یه‌ت } ، ئه‌مه ماوه‌یه‌کی زۆری خایاند ، گاڵته‌یان به‌م وه‌زعه‌ده‌کرد ، باوکم ناوی [ عومه‌ر ] ه ، پێیان ده‌گووت [ یاندی عومه‌ر ] ، کابرایه‌کی ژیر کوڕێکی ژیری هه‌بوو ، ئه‌وانیش وه‌ک من به‌سزمان بوون ، له‌ڕاستی عومه‌ری باوکم زۆر سه‌یر بوو ، باوکم بێده‌نگ ترین پیاوی گونده‌که بوو ، باوکم که‌سێکی دیندار بوو ، ده‌توانم بڵێم سه‌ره‌رای بێده‌نگی و هه‌ژارێتی و بێ هێزیه‌که‌ی ده‌توانم بڵێم له‌پێناو هه‌ندێ نرخایه‌تی ژیا ، ئه‌گه‌ر بڵێم کاریگه‌ری نه‌بووه به‌سه‌رمه‌وه ئه‌مه بێ نمه‌کییه ، ئه‌و هه‌ستی به بێ هێزی خۆی ده‌کرد .
ڕۆژێکیان چوومه ناو باخچه‌ی فستقی کابرایه‌ک که خزمێکی دوورمان بوو ، به‌دزیه‌وه فستقم کۆکره‌وه ، کابرا هات ، خۆی پێگه‌یاندم ، زلله‌یه‌کی لێدام ، منیش پێم گووت { خۆم ئه‌زانم ڕۆژێک له ڕۆژان چیت لێده‌که‌م } له‌وکاته‌وه هزری ئه‌وه‌ی له داهاتودا شتیکت به‌سه‌ر ده‌هێنم له‌لا گه‌ڵاڵه بوو .
به‌ڵێ نزیکه‌ی 10 ساڵان بووم ، ده‌زانن دایکم چی پێده‌گووتم ؟ دایکم ئاغای ماڵه‌وه بوو ، به منداڵێکی وه‌ک منی ده‌گووت واشه‌ڕمه‌که وا شه‌ڕ بکه ، من ئه‌وه‌ی ئه‌و ده‌یویست نه‌م کرد ، بۆچی نه‌م کرد ؟ پاڵی پێوه‌ده‌نام و پێی ده‌گووتم { بڕۆ لێی ده } لێم توڕه ده‌بوو دوایش ده‌یگووت { تۆ بێشه‌ره‌فی شه‌ڕت پێ ناکرێت } هه‌ڵبه‌ت من منداڵێکی ژیر بووم ، ئه‌گه‌ر له‌سه‌ر ویستی ئه‌و بچومایه بۆ شه‌ڕ کردن ده‌مزانی لێم ده‌ده‌ن ، منیش وه‌ک شه‌ڕکه‌ره‌کانی ئێستا ده‌بوایه بمگوتایه { ئێره‌میان شکاند ئه‌وێمیان شکاند } دوایش بیرم کرده‌وه که ئه‌مه وانابێت هه‌ربۆیه خۆم ئاماده کرد .
نه‌نکم ده‌یگووت { هه‌ستی ناموسی ئه‌م منداڵه زۆر ترسناکه } هه‌ڤاڵ حه‌سه‌ن بینداڵ خیزانه‌که‌یان دوژمنی خێزانه‌که‌ی ئێمه بوون ، منیش له‌به‌ر ئه‌وه‌ی منداڵێکی جیاواز بووم زیاتر ده‌مویست له‌گه‌ڵ حه‌سه‌ندا براده‌رێتی بکه‌م ، جارێکیان دایکم منی له‌گه‌ڵ حه‌سه‌ن بینی ، گووتی { ئه‌م بێناموسه براده‌ری له‌گه‌ڵ منداڵی دوژمنه‌که‌ماندا ده‌کات } ئه‌مه په‌یوه‌ندیه‌کی زۆر نهێنی بوو ، زاته‌ن دوایی ئه‌و دوژمنیایه‌تیه‌مان نه‌هێشت ، بۆچی من ئه‌و په‌یوه‌ندیه نهێنیه‌م ئه‌نجامدا ؟ خه‌باتم بۆ په‌یوه‌ندی یه‌ک ڕیزی ده‌کرد ، له منداڵیمه‌وه ده‌مویست شێوازی فیوداڵی تێک بشکێنم ، ئه‌گه‌ر ئه‌و هه‌ڵوێسته‌ی کۆنم نه‌بوایه ئێستا نه‌م ده‌توانی له‌ناو ئه‌و هه‌موو عه‌شیره‌ت و قه‌بیلانه‌دا ئه‌و هه‌موو که‌سایه‌تیه جیاوازانه‌م له‌یه‌ک شوێن کۆبکه‌مه‌وه .
ده‌رگایه‌کمان هه‌بوو ، به‌هۆی ئه‌و شه‌ڕانه‌ی له‌گه‌ڵ دایکم ده‌هاته ئاراوه ده‌رگاکه هه‌مووی قوپا بوو ، ئه‌وه‌ی ته‌ماشای ده‌رگاکه‌ی ئێمه‌ی بکردایه پێده‌که‌نی ، ده‌یانگووت { ئه‌م ده‌رگایه چییه ؟ } دوای شه‌ڕکردن که ده‌گه‌ڕامه ماڵه‌وه دایکم ده‌میبرده گه‌وڕه‌که‌وه ، ده‌ستی ده‌کرده بیناقاقام و به‌رزمی ده‌کرده‌وه پێی ده‌گووتم { تۆبه بکه } ، هه‌ڵبه‌ت بهتهواوی ملمی ده‌گوشی که هه‌ر که‌مێکی ده‌ما له‌ژێر ده‌ستیدا بخنکێم ، له‌بێچاریدا تۆبه‌م ده‌کرد ، هه‌ر که فرسه‌تێکی بچوکم بۆ په‌یداببوایه له‌ژیر ده‌ستی رام ده‌کرد ، هه‌ندیک جاریش ده‌رگای لێداده‌خستم منیش هه‌تا توانام هه‌بوایه له‌ده‌رگاکه‌م ده‌دا به‌ڵام زۆر خراپ له‌ده‌رگاکه‌م ده‌دا ، دایکم ده‌یگووت { که‌س له‌هه‌قی ئه‌مه نایه‌ت ، که‌س ناتوانێت خۆی پێوه خه‌ریک بکات } ده‌توانم به‌ڕاشکاوی بڵێم ئه‌و خووه‌شم هه‌بوو ، ئه‌مه چۆن هه‌ڵده‌سه‌نگێنن هه‌ڵی سه‌نگێنن ، به‌ڵام سه‌رنج بده‌ن به‌وشێوه‌یه‌ی من ده‌بینن ناتوانن هه‌‌رئاواش هه‌ڵسم سه‌نگێنن ، دوایش ناوه‌ندیمان هه‌ر به‌و شێوه‌یه منیان هه‌ڵسه‌نگاند ، پێیان وابوو ده‌توانن به‌کارم بهێنن به‌ڵام به‌هه‌ڵه‌دا چوون .
ئه‌وه‌ی دایکم ده‌یویست به‌ده‌ستی نه‌خست ، منیش ئه‌وه‌ی له دایکمم ده‌مویست به‌ده‌ستم نه‌که‌وت ، زۆر به‌یه‌که‌وه نه‌ژیاین ، به‌ڵام هه‌ر ساتێکمان زۆر دژوار به‌سه‌ر چوو ، ئه‌و به‌گوێره‌ی خۆی منی به‌باشی نه‌ناسی منیش به‌گوێره‌ی خۆم هه‌وڵمده‌دا که له‌و حاڵی ببم .
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
