بێده‌نگیی لیستی گۆڕان و به‌شداربوونیان له گه‌نده‌ڵیی ئاینده‌دا
Monday, 10/08/2009, 12:00
لیستی گۆڕان له یه‌که‌م هه‌نگاودا، به 25 کورسی خۆیان دا بهدهستهوهگۆڕان به‌رهه‌می ئه‌قڵی کوردستانپۆست بوو، ئه‌وه ئێمه‌ین، که داوای گۆڕان ده‌که‌ین، گۆڕانێکی ڕادیکاڵانه له‌پێناوی گه‌ڕانه‌وه‌ی به‌های مرۆڤی کورد بۆ دۆخی بڵندی خۆی، له‌پێناوی هێنانه‌وه‌ی شانازیی و شکۆی کورد و نیشتیمانه‌که‌ی، که دوو بنه‌ماڵه و چه‌ندیین ورده بازرگانی تری سیاسیی، جارێک ده‌یفرۆشن به ئه‌نکه‌ره، جارێک به تاران، جارێک به به‌غداد، جارێکیش به شام. کۆمه‌ڵێک مافیا ساڵانێکی دوور و درێژ کاریان گۆڕینی ویستی تاکی کورد بووه له ویستی ئازادییه‌وه بۆ ویستی ژێرده‌ستیی، له ویستی کوردبوونه‌وه بۆ ویستی ئێراقییبوون، له ویستی ڕۆحێک بۆ ئازادییه‌وه بۆ ویستی ڕۆحێکی کۆیله و کلتوورێک بۆ ژێرده‌ستیی. ڕۆحی مرۆڤی کورد به‌شێوه‌یه‌ک تێکچووه، که به ده‌گمه‌ن تاکێکی کورد ده‌دۆزیته‌وه به شانازیی و شکۆوه خاوه‌نی ڕۆحێکی ئازادی کوردیی بێت.
کۆمپانیای وشه، که له سه‌ره‌تادا خۆیان ته‌نها وه‌ک ده‌سته‌یه‌ک مرۆڤی ڕه‌خنه‌گر پێناس ده‌کرد، کاریان ڕیفۆڕمکردن بوو له‌ناو یه‌کێتییدا، ده‌سته‌یه‌ک یه‌کێتیی ڕیفۆڕمیست، که له‌سه‌ر بنه‌مای جێگۆڕکێ ده‌یانویست دره‌وشاندنه‌وه‌یه‌کی نوێ له‌ناو یه‌کێتییدا به‌رهه‌مبهێنن و هیچی تر. ڕیفۆڕمیش وه‌ک گه‌مه‌یه‌ک، که که‌سێک دوای چه‌ندیینجار تاقییکردنه‌وه‌ی لێیبزار ده‌بێت، به‌رهه‌می گه‌مه‌که هه‌مان به‌رهه‌مه، لێ له شێوه و فۆڕمێکی تردا. به‌مشێوه‌یه گه‌مه‌زانێک دوای هه‌موو بێزاربوونێکی ڕیفۆڕمێک له گه‌مه‌که‌یدا ده‌کات.
ویستی گۆڕانی ئێمه له سه‌ره‌تای کارکردنمانه‌وه هه‌تاوه‌کوو ئێستا به‌شێوه‌‌یه‌کی پرینسیپیانه بریتیی بووه له دانانی سه‌روه‌رێتیی نه‌ته‌وه‌ییی له‌سه‌رو هه‌مووشتێکه‌وه و پێدانی هه‌موو قوربانییه‌ک. ئێمه خۆیشمان بووینه‌ته قوربانیی ئه‌م ئامانجه پیرۆزه. سه‌رهه‌ڵدانی ویستی کاری کۆمپانیای وشه له لیستێکی سه‌ربه‌خۆدا چ هه‌وڵێک بووه بۆ که‌مکردنه‌وه‌ی هێزی کوردستانپۆست و چ کۆکردنه‌وه‌ی به‌شێکی گه‌وره‌ی چ نووسه‌ران و چ هه‌وادارانی کوردستانپۆست له‌ژێر چه‌تری خۆیاندا.
دروسته ئێمه ده‌زگایه‌کی وه‌ک وشه نین، خاوه‌ن سه‌رمایه و ده‌سته‌ڵاتێک نین، که توانای چێکردنی چه‌ترێکمان بۆ هه‌واداران و ئه‌ندامانمان هه‌بێت. ئێمه چه‌ندیین ساڵ هه‌وادارانمان له‌ژێر شه‌سته و ڕه‌هێڵه‌دا له چاوه‌ڕوانییدا ده‌ژیان، کۆمپانیای وشه نه‌ک چه‌ترێکیان بۆ هه‌ڵبدات، به‌ڵکوو هێناننیه ژێر سه‌قفی خۆیانه‌وه. ئێمه هه‌موو ئه‌وانه‌شمان په‌سه‌ند کرد، چونکه پێمانوابوو، ئێمه نه‌توانین ئه‌و خه‌ڵکه بگرینه خۆمان بۆ پارێزگارییان با بچنه گرده‌که.
که ئێوه بانگه‌شه‌ی گۆڕانتانکرد، ویستمان بوو هاوکارییتان بکه‌ین، چونکه به‌هه‌موو شێوه‌یه‌ک ده‌مانه‌وێت ده‌سته‌ڵاتی بنه‌ماڵه‌ییی له باشووری کوردستاندا له ڕه‌گ و ڕیشه‌وه ده‌ربهێنین، ده‌مانه‌وێت کورد و نیشتیمانه‌که‌ی ئازاد بێت. له پرۆسه‌ی هه‌ڵبژاردندا له یه‌که‌م هه‌نگاوه‌وه هه‌تا دوا چرکه‌ساته‌کانی ده‌نگدان له‌گه‌ڵتاندا بووین، لێ ئێستا چیدی نا، چونکه په‌سه‌ندکردنی ئه‌م ئه‌نجامی هه‌ڵبژاردنه ناپاکییه‌کی نه‌ته‌وه‌یییه، که جێگای مشتومڕ نییه. ناپاکییه به‌رانبه‌ر به گۆڕان و به‌رانبه‌ر به ویستی تینووی ئازادیی ئه‌و خه‌ڵکه.
وێڕای کۆمه‌ڵێک ساخته‌کاریی و پێشێلکاریی له پرۆسه‌ی ده‌نگداندا و دواخستنی ئه‌نجامی ده‌نگه‌کان به‌شێوه‌یه‌ک، که تاکی کورد هه‌ر بیریشی چووبۆوه، که ده‌نگی داوه و دواکاتیش په‌سه‌ندکردنی له %59ی ده‌نگه‌کان بۆ لیستی کوردستانیی و په‌سه‌ندکردنی هه‌ڵبژاردنه‌وه‌ی مه‌سعود به ساخته‌کاریی و عه‌نته‌ریایه‌تیی به سه‌رۆکی هه‌رێم، ناپاکییه‌کی گه‌وره‌یه به‌رانبه‌ر به‌و گۆڕانه‌ی، که خه‌ڵک چاوه‌ڕوانی ده‌کرد. چیی ده‌بوو ئه‌گه‌ر هه‌ڵوێستتان وه‌ربگرتایه؟ هیچ که‌س داوای هه‌ڵگیرساندنی شه‌ڕ ناکات، لێ مرۆڤ ده‌توانێت ده‌نگ هه‌ڵببڕێت و بڵێ: نا. نا بۆ ساخته‌کاریی (نا بۆ سه‌رۆكێک، که هه‌ڵبژێردراوی ئێـمه نییه)، (نا بۆ لیستێک، که هه‌ڵبژێردراوی ئێمه نییه). به‌قه‌د فارسه‌کانیشتان پێنه‌کرا، که چه‌ندیین ڕۆژ هاتنه سه‌ر جاده‌کان و داوای مافی ڕه‌وای ده‌نگه‌کانی خۆیان ده‌کرد؟ ئێوه ئێستا به له %25ی ده‌نگه‌کانتانه‌وه ده‌چن له په‌رله‌ماندا داده‌نیشن و ده‌بن به له %25ی ده‌نگی به‌ڵێ و ده‌نگی نه‌خیر، ده‌بن به که‌سانێکی شیڕه شیڕکه‌ر و له ده‌ره‌وه‌ی په‌رله‌مانیش سارد ده‌بنه‌وه و له ژێره‌وه فێری ئه‌وه‌تان ده‌که‌ن، که له گه‌ڵیاندا ڕێکه‌وتنێکی نهێنی تۆمار بکه‌ن، دێنه ناو خه‌ڵکیشه‌وه ده‌ڵێن به‌رژه‌وه‌ندی گه‌ل و نیشتمان وا ده‌خوازێت که به‌وه رازی بین.
ئێوه بۆ چوار ساڵی ئاینده به‌شدار ده‌بن له گه‌نده‌ڵیی حکومه‌تێکی گه‌نده‌ڵ و زاڵده‌ستدا، ئێوه له په‌رله‌ماندا هیچ شتێک نابن بێجگه له، له %25ی خه‌ڵکی نووستووی ناو په‌رله‌مان. ئێوه بێڕێزییتان به هه‌ست و ویستی خه‌ڵکی گۆڕانخوازی کورد کرد، به‌شێوه‌یه‌ک نیگه‌رانتانکردن، که وه‌ک تابلۆیه‌کی شووشه‌ی ئازادیی ورد و خاش ده‌بێت، تابلۆیه‌کی شکاو، که کۆکردنه‌وه و پێکه‌وه‌لکاندنی ده‌چێته خانه‌ی مه‌حاڵه‌وه.
تا چوار ساڵی تر، 25 ئه‌ندامی په‌رله‌مان ده‌گۆڕێن، زۆریان لێ ده‌بن به بازرگان، به موعتادی مووچه‌ی زۆر، به داوێنپیسی شه‌وانی سوور، درۆزن و بوختانچیی، به خه‌واڵوو و خه‌وتوو، تاکو ته‌راتان نه‌بێ هیچی ترتان سه‌لامه‌ت لێی ده‌رناچن، ئه‌ویش به ڕووداوی سه‌یاره و به رووداوی دیکه‌ی هه‌مه‌جۆر دوور ده‌خرێنه‌وه و ده‌ترسێنرێن، به‌مه‌ش گۆڕانه‌که‌تان به لای گه‌نده‌ڵییدا وه‌رده‌چه‌رخێت. بنه‌ماڵه‌ی بارزانیی و تاڵه‌بانی ئه‌زمونیان هه‌یه له خراپکردن و به‌دڕه‌وشتکردنی تاکی کورددا، ئه‌زمونیان هه‌یه له خه‌واندنی ئه‌ندامانی په‌رله‌ماندا. ئه‌و بیست و پێنج ئه‌ندامه‌ی لیستی گۆڕان هه‌یه‌تی به بێ مه‌ڵامه‌ت له ژێر ده‌ستی بارزانی و تاڵه‌بانی و ده‌زگای پاراستن ده‌رناچن.
لێره‌وه ئێمه وه‌ک کوردستانپۆست هه‌ڵوێست به‌رانبه‌ر هه‌موو جوڵانه‌وه‌یه‌کی بچکۆلانه‌ی حکومه‌تی نوێ وه‌رده‌گرین، که ئێوه‌ش له‌گه‌ڵیاندا به‌شدارن. ئێمه لێره‌وه داوا له خه‌ڵکی به ئه‌مه‌گی کورد ده‌که‌ین، که به‌شداری پرۆسه‌ی هه‌ڵبژاردنی پارێزگاکان نه‌که‌ن، به‌شداری هه‌ڵبژاردنه‌کانی ئێراق نه‌که‌ن و هه‌ڵوێست وه‌ربگرن. به ده‌نگی بڵند هاوار ده‌که‌ین و ده‌ڵێین: نا بۆ ده‌نگدان له هه‌ڵبژاردنی پارێزگاکاندا، نا بۆ ده‌نگدان بۆ ئێراق. به‌ڵێ بۆ گۆڕان به‌ڵام گۆڕانێکی ڕاسته‌قینه، نه‌ک گه‌مه‌کردن به هه‌ست و ویستی خه‌ڵکیی.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
