خۆپیشاندانەکانی عێراق لە خزمەت چینی کرێکار و خەڵکی زەحمەتکێشی ئەو وڵاتەدا نیە!

Saturday, 12/01/2013, 12:00

ماوەی زیاتر لە دوو هەفتەیە لە عێراقی نوێدا، خۆپیشاندان دەستی پێکردوە دژی دەسەڵاتە شیعیەکەی نوری مالیکی سەرۆک وەزیران، خۆپیشاندانێک نەک بە قازانجی چینی کرێکار و خەڵکی زەحمەتکێشی ئەو وڵاتە دەشکێتەوە، بەڵکو بارودۆخێکی وا دەخوڵقێنێت، نائاگاهانە دەبێتە بەشێکی ترسناک لە- لەنێوچونی یەک ڕیزی ئەو چینە بەرفراوانە کۆمەڵایەتیە. ئەو خۆپیشاندانانە، ڕاستەوخۆ پێی ناوەتە نێو پەرەسەندنی جەنگی مەزهەبی و بارودۆخی سیاسی ئەو وڵاتەی بردۆتەوە بۆ سەردەمی سەفەوی و عوسمانیەکانی پێش سەدەی بیست. لە باروەدۆخ و هەلومەرجێکی وادا، ئەوەی سوود مەندی سەرەکیە، ئەو گروپ و پارتە ڕەگەز پەرستانەن کە ئەمڕۆ ڕۆڵیان هەیە لە نێو کایە سیاسیەکانی عیراقدا.

خودی مالیکی، ئەو بەرەیەی دژی بەوە تاوانبار دەکات کە دەستی دەرەکی لە پشتیانەوەیە، خۆ ئەو تاوانبار کردنە لە جێی خۆیدایەو بە واقعیش بەرەی سونی مەزهەب، وڵاتانێکی وەک سعودیەو تورکیاو قەتەر و کێ و کێی تر لە پشتیانەوەیە. لەگەڵ ئەوەشدا دەبێت لە خودی سەرۆک وەزیرانیش بپرسین ؛ ئاخۆ بەڕێزتان هیچ وڵاتێک لە پشتانەوە نیە کە بوون بە هۆکاری هەڵگیرساندنی دوو بەرەکایەتی لە نێو خەڵکی زەحمەتکێشی ئەو وڵاتەدا؟ ئاخۆ لە عێراقدا بەفەرمی کار بە ئامانجە دزێوەکانی دەوڵەتی ئاخوندەکانی ئێران ناکرێت؟ ئاخۆ لە عێراقی نوێی فرە دیکتاتۆرەکاندا، هیچ لایەنێک هەیە بڵێت بە ڕاستی نوێنەرایەتی خەڵکی عێراق دەکەم، یان بەکۆی گشت لایەنەکانی نێو دەسەڵاتی ئەمڕۆی حوکومەتی عێراقی، هەر لایەو نوێنەرایەتی یەکێک لەو وڵاتانە دەکات کە لە ژێرەوە پاڵپشتی خۆیانتان بۆ ڕادەگەیەنن؟ ئاخۆ دەوڵەتی ئێران و دەوڵەتی تورکیا و سعودیەی پاشاکان، لە خزمەت خەڵکی بێچارەی عێراقدان؟ ئاخۆ دەوڵەتە فاشیستیەکەی ئەردۆگان لە خزمەتی ئایندەی خەڵکی کوردستاندایە، گەر هاتوو پشتگیری لە حکومەتی هەرێمی کوردستان کرد لە کاتی بڕیاری جیابوونەوە لە عێراق؟
ڕاستیەکی مێژوی لە عێراقدا بونی هەیە، ئەویش ئەو بنەما چەوسێنەرانەیەی خودی دەسەڵاتە یەک لە دوایی یەکەکانە لەو وڵاتەدا، لەوەی بە چ ئەندازەیەک گرێدراوی نێو بەرژەوەندیە دەرەکیەکانن و لە پێناو مانەوەی دەسەڵاتەکانیاندا، هەمیشە وەک نەخۆشی ژێر پەنجە وابوون بۆ سەر ژیان و گوزەرانی چینی کرێکار و خەڵکی زەحمەتکێشی ئەو وڵاتە.

بەڕێخستنی ئەو خۆپیشاندانانە گەر بهاتبایەو تەواوی خەڵکی زەحمەتکێشی عێراق و کوردستانی لە خۆ بگرتایە دژی ئەو هەلومەرجە مال وێرانکاریەی هێناویانە بەسەر خەڵکەکەدا، ئەو کات بەبێ گومان کردن، تەواوی مەلایانی سەر بە بەرەی شیعی و سونی و کۆی حیزبەکانیان یەکیان دەگرت لە دژی ئەو هاتنە مەیدانانە و جارێکی تر ئەوان دەیان گووت ئەوە دەستی دەرەکیە دژی عێراقی موسڵمان و بەرەی کوفر لە پشتی ئەو جۆرە بارگرژیانەوەن. ئەوە ئاستی ناوشیاری چینی کرێکار و خەڵکی زەحمەتکێشی ئەو وڵاتەیە وا بەو جۆرە ئامادەیە جەنگێک بباتە پێشەوە کە لە کۆتایەکەیدا تەنها خۆی زەرەر مەندی یەکەم دەبێت تێیدا. ئاستی ژیری و وشیاری ئەو چینە بەرینەی کۆمەڵگا هێشتا لەو قۆناغەدایە، کە ئامادەیە زۆر بە ئاسانی خۆی بداتە دەست بەرەیەک کە ڕاستەوخۆ لە دژی هەڵدەسوڕێت. ئاخۆ کۆی چینە کەمایەتیەکەی نێو کۆمەڵگا پێک نەهاتوە لە سەرانی بەرەی شیعی و سونی و کورد و تورکمان و مەسیحی و کلدانی و ئاشوری و سریانی....تاد.؟ کەواتە لێرەدا جیاوازیەکان لە کوێدایە؟ ئاخۆ گەر لایەنی سونە مەزهەب سەرکەوتوو بێت وڵاتی عێراق دەکات بە ماستی مەییوو، خەڵکەکەی دەتوانێت بە ئارامی ژیان بەسەر بەرێت؟ ئاخۆ دەوڵەتەکەی سەدام حسێنیش، سەر بە بەرەی مەزهەبی سونەگەرایی نەبوو؟ کێ لەو دەوڵەتە سەرکوت گەرەدا سوود مەند بوو بێجگە لەو دارودەستە دڕندەیەی ژیانی کۆمەڵگایان کردبوو بە جەهەنم؟ کەواتە کێشە بێچارەسەرەکانی نێو باڵە مەزهەبی و قەومیەکانی عێراق نە پەیوەستە بە غیابی سەرۆک کۆمار و نە پەیوەستە بە خەمی خەڵکی سیڤیلی ئەو وڵاتەوە، بەڵکو مانەوەی کێشەکان پەیوەستە بەو هەلومەرجە نوێیەی نێو ڕکابەرە زلهێزە جیهانیەکان و خاڵی کردنەوەی قەیرانەکانیان لە وڵاتانی ژێر دەستی دیکتاتۆرە کۆن و نوێکاندا.

لە عێراق و کوردستاندا، ئەم جەنگە ناڕەوایە کۆتایی نایەت و تا دێتیش ئاگرەکە گەش تر دەکەن بۆ سەر گیانی چینی کرێکار و خەڵکی زەحمەتکێش، پەرەسەندنی جیهانبینی مەزهەبی و تائیفی و قەومی، پەیوەندیەکی لە بن نەهاتوی هەیە بۆ یەک نەگرتنی یەک ڕیزی ئەو چینەی تا ئێستا هەڵسوڕانەکانی بە قازانجی ئەو بەرەیە بوە کە خەریکی لێک بچڕاندن و لەبەریەک هەڵوەشاندنەوەی ئەو چینەن. ئێستا دەسەڵاتی هەرێمی کوردستان و خودی هەڵسوڕێنەری بزوتنەوەی گۆڕان و بەرەی ئیسلامی سیاسی کوردی پشتگیری بۆ خۆپیشاندانەکانی سونە مەزهەبەکان دەکەن کە مەلاکان لە نوێژی هەینیاندا بانگەوازیان بۆ دەکەن تا بڕژێنە نێو شەقامەکان لە دژی دەسەڵاتەکەی مالیکی، لە بەرانبەریشیدا، بەرەی لای مالیکی و پارتە شیعیەکانی تر خۆپیشاندان دەکەن دژی بەشی ئەم دیوو. عێراق بوە بە وێرانە و زیاتر %٢٦ ی خەڵکە هەژارکراوەکەی لە ژێر هێڵی هەژاریەوەن،(بەپێی ڕاپۆرتێکی کوردستان تیڤی) و ئەوەش ڕاستیەکی تەواوە لە ئاست بژێوی ژیان و گوزەرانی خەڵکی زەحمەتکێشی عێراقدا. ئاخۆ گەر ئەو کۆ پارتەی لە نێو دەسەڵاتی عێراق و هەرێمدان، لە خۆیان بپرسیایە گەر ئەوان ملیاردێر نەبونایە و داهات و سامانی وڵات بەیەکسانی دابەش بکرایە بەسەر ژیانی خەڵکیدا و پێداویستیە سەرەکیەکانی کۆمەڵگایان جێبەجێ بکردایە، خەڵکی بەو شێوەیە هەژار و کەم دەرامەت دەبوون لە عێراقێکدا زۆرترین یەدەکی نەوتی هەیە؟ ئاخۆ دەسەڵاتدارنی نوێی عێراق کە پێکهاتەیەکن لە جیهانبینی دژە ئازادی بۆ کۆمەڵگای عێراقی، هیچ جیاوەازیەکیان هەیە لەگەڵ ئەو ڕەفتار و ئاکارانەی حیزبی بەعسی پێشوو؟ کەوایە ئەوەی زەرەر مەندی یەکەمە لە عێراقدا شیعی بوون و سونی بوون وکورد بوون و کێ و کێ بوونی تائیفی و قەومی نیە، بە پێچەوانەوە زەرەر مەندی سەرەکی خودی تەواوی چینی کرێکار و خەڵکی زەحمەتکێشی عێراق و کوردستانە لە نێو ئەم هەلومەرجە دژوارانەدا، وە سوود مەندی سەرەکیش تەنها ئەو حیزب و سەرانەن کە خواست و سود مەندییان لەو ئاژاوە گێڕیەدایە و ماشینی بەڕێخستنی جەنگی تائیفی و مەزهەبی و قەومیان تەنها و تەنها بۆ لە بار بردنی پێک نەهاتنی کۆمەڵگایەکی مەدەنی و ئازادیخوازە. تا ئەو ساتەی چینی کرێکاری عێراق و کەوردستان بچێتە ژێر تەرەف داری ئەو حیزبانەوە تا ئەو ساتەش یەکەم زەرەرمەندی سەرەکی دەبێت لەو نێوەندەدا؟
زۆرجار گوێمان لێ بوە دەڵێن مام جەلال چەتری کۆکەرەوەی نێوان لایەنە ناکۆکەکانی عێراقە بە گشتی، ئاخۆ گەر ئەو لایەنانە لە خزمەتی خەڵکی عێراقدا بوایەن دەبوون بەو هۆکارەی پەرە بدەن بە درێژە کێشانی جیهانبینی ئیسلام گەرایی و لەوێشدا تێفکرینی جیاوازی بەینی سونی و شیعی، تا دەگات بە پەرەسەندنی پەروەردەی ڕەگەز پەرستی ناسیۆنالیستیانە درێژە پێبدەن؟ کەواتە کامە چەتری کۆکەرەوەیە؟ ئاخۆ چەترێکە لەخزمەت ئەو کۆ ملیاردێرەی کە جەنگیان تەنها بۆ پڕ کردنی گیرفانەکانیانە، نەک چەترێک بۆ برەودان تا گەشتنی کۆمەڵگا بە ئازادیەکانی و هەستکردنی بەوەی مرۆڤێکە و مافی ژیانی مەدەنیانەی هەیە، نەک دابەش بکرێت بەسەر بەرەی شیعی بوون و سوونی بوون و کورد بووندا؟ کەواتە سەرۆک کۆمار تەنها کۆکەرەوەی ئەو بەرەیە بوە کە ئەمڕۆ یان سبەی دەبێت لە نێو یەکدا جەنگ بەرپا بکەن و کۆمەڵگا هێندەی تر بەرەو ماڵوێرانی ببەن. ئاخۆ گەر سەرۆک کۆماری عێراق لە خزمەتی کۆی گشتی خەڵکی عێراقدا بوایە، دەیتوانی لەو جێگایەدا بێت و زۆرینەی دانیشتوانەکەشی لە ئاستێکی تەواو خراپی ژیاندا بن؟ ئاخۆ گەر پارتە نوێکانی دوای ڕژێمی سەرمایەداری ناسیۆنالیستی بەعس، لە خزمەت ئایندەی بەرەوپێشچونی خەڵکی عێراقدا بوایەن، ئێستا خەڵکی عێراق لەم جۆرە پەروەردە تایفەگەریەدا دەبوون؟ بێگومان دەڵێین ئەم پارتانەی لە دەسەڵاتی عێراقدان، گەر چەوسێنەرتر نەبن لە ڕژێمی بەعسی ڕوخاو ئەوا لەویش کەمتر نین. ئایندەی عێراق لەبەردەم جەنگێکی یەکجار ترسناکی تائیفی و مەزهەبیدایە، کە کۆی وڵاتانی چواردەور و خودی دەسەڵاتی دەوڵەتی عێراق لێی بەرپرسیارن.، نەک خەڵکی سیڤیلی ئەو وڵاتە.