" خەڵکی خاکی تۆم "

Monday, 19/05/2014, 12:00

ئەو کاتەی کە چاو لەدەریا دەکەم
لێی دوورم
چون تۆ دەریای منی
ئەو شەوانەی ئەستێرەکان دادەگیرسێن
مانگە شەوی چاردە خۆ دەنوێنێ
بیر لەتۆ دەکەمەوە
دەڵێم ئەستێرە ومانگەشەو
هەر تۆی و لەلای منی
دەچمە ناو گوڵزاران
سەرەبەهاران
دەڕوانمە شکۆفەی هەزار ڕەنگی کەنار جۆباران
باوەش باوەش گوڵە گەزیزەت بۆ دەسک دەکەمو
دێمە بەر دەرگاو رووگەی ماڵتان
چون تەنیا تۆ یاری منی
بۆیە هەموو وەرزەکانی ساڵ
بۆ چرکەساتێک لە بیرم ناچی
لە بێداری ولە خەودا
تان وپۆی جەستە و هەناسەی ژیانی منی
رۆژانە کاتێک پێ دەنێمە ناو دارستانەکان
لاوێن لاوێن دەژمێرم لاوێنەکان
ناوی پیرۆزی تۆیان لەسەر دەنوسم و
پێیان دەڵێم ئەوە منم شەیداو
خەڵکی وڵاتی رۆژ
لە دایک بوی خاکی مەزنی کوردوستان .

جەعفەر کەریمی/ ٣٠/ ١٠/ ٢٠١٣
ت/ فەنلاند