ئازادیی ڕاده‌ربڕیین و ئاوده‌ستی مزگه‌وته‌کان
Sunday, 06/09/2009, 12:00
(به‌ختیار عه‌لیی سایته‌کان به ئاوده‌ستی مزگه‌وته‌کان ناوزه‌ند ده‌کات، ئێمه له سه‌دا سه‌د له‌گه‌ڵ ئه‌و قسه‌یه‌ی به‌ختیار عه‌لییداین.نووسینێکی سه‌ر ئاوده‌ستی هه‌ر مزگه‌وتێک، سه‌دهێنده له‌و دێڕانه جوانتره که له‌ناو ڕۆژنامه‌ی خه‌بات، برایه‌تی، کوردستانی نوێ، پی یو که‌ی میدیا و چاودێردا ده‌نووسرێن و بڵاو ده‌کرێنه‌وه).به ساده‌تریین زمان ده‌مانه‌وێت له‌م چه‌ند دێڕه‌دا بڵێین: حکومه‌تی کوردیی، حکومه‌تێکه، ڕێگای به خۆی داوه بۆ به یاساییکردنی تووندوتیژیی به‌رانبه‌ر به تاک و کۆی کورد له باشووری کوردستان. ئه‌م وتاره بۆ کورد و ڕای گشتیی جیهانه، ده‌مانه‌وێت لێره‌وه به جیهان ڕابگه‌یه‌نین، که به ده‌ست ئه‌م حکومه‌ته‌وه مرۆڤی کورد له باشووردا له ترسناکتریین قه‌یرانی سیاسییدا ده‌ژیی. به‌عس ته‌نها جه‌سته‌یه‌ک نه‌بوو له ڕێگای تانک و فرۆکه جه‌نگییه مۆدێرنه‌‌کانی ئه‌مێریکاوه تێکبشکێنرێت و له ڕێگای سه‌ربازه ئه‌مێریکاییه‌کانه‌وه له‌ناوببرێت. به‌عس ڕۆحیه‌تێکی زاڵده‌سته، به تانک و زرێپۆش له‌ناو نابرێت. بۆ ڕۆحێکی ئاوها، گرنگ نییه چ جه‌سته‌یه‌ک هه‌ڵده‌بژێرێت، ئه‌وه‌ی بۆ ئه‌و گرنگه درێژه‌دانه به‌و جۆره ژیانه سیاسییه‌ی، که ئه‌و ده‌یه‌وێت، درێژکردنه‌وه‌ی ئه‌و ژیانه زاڵده‌ستییه‌یه، که ئه‌و ده‌یه‌وێت، تۆقاندن، نیشاندانی هێز و قوردره‌ت و ئاماده‌بوون بۆ تۆڵه‌سه‌ندنه‌وه. ئیمڕۆ به‌عس به ته‌ندروستییه‌کی باشه‌وه له‌ناو حکومه‌تی ئێمه‌دا ده‌ژیی، که له په‌رله‌ماندا ده‌نگ هه‌ڵده‌بڕێت و هه‌ڕه‌شه ده‌کات، له کۆمه‌ڵدا ئیمزا به خوێندکار، فه‌رمانبه‌ر، مامۆستا، کرێکار و ده‌ستگێڕ ده‌کات، هه‌تا ده‌رنه‌کرێن، هه‌تا نانبڕاو نه‌کرێن. به‌عس جه‌سته نییه، به‌ڵکو به‌عس ڕۆحێکه له‌ناوماندا ده‌ژیی. سه‌رۆکه‌کان به‌عسیین، ئه‌ندام پهرلهمان و سه‌رۆک پهرلهمان و وه‌زیر و سیاسییه ده‌سه‌ڵاتداره‌کانی کورد به‌عسین.
ده‌سته‌ڵاتی کوردیی و به‌عس، وه‌ک ئاوێنه و تیشکدانه‌وه‌که‌ی وه‌هان، ئێمه کاتێک له ده‌سته‌ڵاتی کوردیی ورد ده‌بینه‌وه، ناتوانین دڵنیابین له‌وه‌ی، ئاخۆ ئه‌مه خودی به‌عس خۆیه‌تی یان تیشکه‌که‌یه‌تی!
ده‌سته‌ڵاتی کوردیی و به‌عس وه‌ک وێنه و کۆپییه‌که‌ی وه‌هان، کاتێک پشکنین له‌سه‌ر ڕه‌سه‌نایه‌تییان ده‌که‌یت، لێکجیاکردنه‌وه‌یان له‌گه‌ڵ ڕه‌سه‌نه‌که‌دا ده‌چێته خانه‌ی مه‌حاڵه‌وه.
له سه‌رده‌می به‌عسدا مرۆڤ نه‌یده‌توانی به به‌عس بڵێت تۆ ده‌سته‌ڵاتێکی زاڵ و چه‌وسێنه‌ریت، ناچار شه‌وانه له‌سه‌ر دیواره‌کان به دزییه‌وه بۆیان ده‌نووسی، بۆ سبه‌ینێ خاوه‌ن ماڵ ده‌بوایه له‌سه‌ر خه‌رجیی خۆی بیسڕێته‌وه. ئه‌مڕۆش هیچ تاکێکی کورد ناتوانێت ڕاسته‌وخۆ به‌رانبه‌ر به زوڵم و زاڵیی ئه‌م حکومه‌ته ناڕه‌زایی خۆی ده‌رببڕێت، ده‌نا باجه‌که‌ی ده‌بێت به خوێنی خۆی بدات. هه‌ر که‌سێکیش سنور بۆ خۆی داده‌نێت و له ڕێگای زمانێکه‌وه، که ناویان ناوه (
زمانی گوڵ) بۆی هه‌یه ڕه‌خنه له‌م ده‌سته‌ڵاته بگرێت، پێچه‌وانه‌که‌ی ئه‌وا به سووکایه‌تییپێکردن، ناوزڕاندن، تاوانبارکردن به سیخوڕیی وڵاتانی دراوسێ و ئه‌وروپا وه‌ڵامده‌درێته‌وه. ئه‌مه له‌کاتێکدا هه‌ردوو گه‌وره پارتی ده‌سته‌ڵاتداری کوردیی له‌پێش ڕاپه‌ڕییندا خوانی گه‌وره و گه‌رمیان له شام، تاران، ئه‌نقه‌ره و به‌غداد بوو. ئه‌مانه خۆیان وڵات نه‌ماوه نه‌بنه دارده‌ستیان، کورد و بزووتنه‌وه‌که‌یان نه‌خستبێته هه‌ڕاجیانه‌وه، که‌چیی ئێستا ده‌یانه‌وێت به هه‌موو چه‌کێک ڕێگا له گۆڕانێک بگرن، که ده‌سته‌ڵاتی ئه‌وانی خستۆته مه‌ترسییه‌وه.
سه‌ره دیکتاتۆر و مافیاکانی کورد شایه‌نی ئه‌وه‌ن، ته‌نها
له کونی ئاوده‌سته‌کانه‌وه فڕێ بدرێن و دووربخرێنهوهکاتێک به‌ختیار عه‌لیی سایته‌کان به ئاوده‌ستی مزگه‌وته‌کان ناوزه‌ند ده‌کات، ئه‌و مزگه‌وتانه‌ی، که ئاوده‌سته‌کانیان هه‌موو که‌سێبه ئازادیی بۆچوونی خۆی تێدا ده‌نووسێت، ئێمه له سه‌دا سه‌د له‌گه‌ڵ ئه‌و قسه‌یه‌ی به‌ختیار عه‌لییداین. چونکه ئاوده‌ستی مزگه‌وتێک به هه‌موو بۆن و پۆخڵی خۆیه‌وه، مزگه‌وته‌که‌ش به هه‌موو پرینسیپه ئایینییه‌کانی خۆیه‌وه، زۆر له‌و میدیایانه ئابڕوومه‌ندتره، دیموکراتتره، خاوێنتره، که نووسیین تێیدا ته‌نها په‌رده‌یه‌کی ڕه‌شه بۆ شاردنه‌وه‌ی ڕاستییه‌کان.
به‌عس هیچ شتێکی بۆ تاکی کورد نه‌هێشتبۆوه، بۆیه خه‌ڵکی په‌نای ده‌برده به‌ر ئاوده‌ستی مزگه‌وته‌کان و بۆچوونی خۆی دژ به به‌عس، دژ به جه‌نگی پارته‌کان له‌ناو خۆیاندا، ده‌نووسی.
به‌های ئاوده‌ستی مزگه‌وته‌کان سه‌د هێنده‌ی "پاشکۆی ئێراق، هاوکاریی، ئاسۆ و ...هتد" بوو. چونکه ئه‌وه‌ی له‌و ڕۆژنامانه‌دا به دڵی به‌عسی نه‌نووسیبایه، نه به نووسه‌ر ده‌ناسێنرا نه نووسیینیشی بۆ بڵاوده‌کرایه‌وه. ئێستاش به‌های نه‌ک سایتی کوردستانپۆست، که به‌ختیار عه‌لیی به ئاوده‌ستیی مزگه‌وت ناوی ده‌بات، به‌ڵکوو خودی ئاوده‌ستی مزگه‌وت، سه‌د هێنده‌ی ڕۆژنامه‌کانی دهستهڵات خاوێنتر، جوانتر و پیرۆزتره. ئه‌گه‌ر دهستهڵات دیموکرات و مرۆڤدۆسته، بۆچی پێمانناڵێن: بۆ خه‌ڵکیی به ناوی خواستراوه‌وه ئه‌م هه‌موو تووڕه‌بوونه‌ی خۆی ده‌رده‌بڕێت؟ بۆ په‌نا ده‌باته به‌ر سایت و ئاوده‌ستیی مزگه‌وت، یان له سه‌ر دیواره‌کان ده‌نووسێت؟
ئه‌ندامانی لیستی گۆڕان وه‌ک ژیژک سه‌ری خۆیان بردۆته‌وه ناوه‌وه، نقه‌یان لێوه نایه‌ت، که به‌م ڕۆژگاره دهستهڵات هێرشیان ده‌کاته سه‌ر و سووکایه‌تییان پێده‌کاتت و تاوانباریان ده‌کات. پێمانناڵێن له‌گه‌ڵ ده‌سته‌ڵاتێکی ئاوادا ده‌بێت به چ زمان و به چ ئه‌قڵییه‌تێک مامه‌ڵه بکرێت؟ ئایا به ئاشتییه هه‌میشه‌ییه‌که‌ی کانت؟ بێگوومان نه‌خێر چونکه مرۆڤ باسی ئاشتیی هه‌میشه‌یی له‌گه‌ڵ خه‌ڵکانێکدا ده‌کات، که خاوه‌نی هۆشیاریی و تێگه‌یشتن بن، نه‌ک خاوه‌نی بارووت و کێرد و چه‌قۆ.
دواکات به‌های ئاوده‌ستی مزگه‌وته‌که‌ی ئه‌حمه‌دی کاکیی سه‌د هێنده‌ی میدیاکانی ده‌سته‌ڵاته و باڵای نووسیینێکی سه‌ر دیواری ئاوده‌ستێکی ئه‌حمه‌دی کاکیی سه‌د هێنده‌ی باڵای پۆلیسه‌کانی ده‌سته‌ڵاته. ئه‌و ده‌سته‌ی، که له ئاوده‌ستی مزگه‌وته‌کاندا تاراتی پێده‌گیرێت، سه‌دهێنده‌ی ئه‌و ده‌سته پاک و خاوێنه که بۆ ده‌سه‌ڵات ده‌نووسێت و به‌شان و باڵای به‌رپرس و لێپرسراو و سه‌رکرده‌کاندا هه‌ڵده‌دات.
نووسینێکی سه‌ر ئاوده‌ستی هه‌ر مزگه‌وتێک، سه‌د هێنده له‌و دێڕانه جوانتره، که له‌ناو ڕۆژنامه‌ی خه‌بات، برایه‌تی، کوردستانی نوێ، پی یو که‌ی میدیا و چاودێردا ده‌نووسرێن و بڵاو ده‌کرێنه‌وه.
ئه‌و که‌سانه‌ی له سه‌ر دیوار و ئاوده‌ستی مزگه‌وته‌کاندا ده‌نووسن، که‌سانی کوردپه‌روه‌ر، وڵاتپارێز و دڵسۆزن، وه‌ک ئه‌وانه نین، که بۆ ڕاگه‌یاندن و میدیاکانی ده‌سه‌ڵات ده‌نووسن.
06.09.09
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
