تۆ هه‌ر له‌دڵی من دای
Thursday, 17/10/2013, 12:00
1
هێندە
له‌تۆوه نزیك بووم
كه خه‌ڵكی تر
به ته‌نیشتمه‌وه تێده‌په‌ڕن
هه‌ست به‌سه‌رما ده‌كه‌م
تۆ...ته‌نها تۆ...
لێمه‌وه نزیك به!.
2
گه‌ر به‌ناوی تۆ
ده‌ستم پێكرد
له‌ئاكامدا ده‌گه‌م
به‌خودی خۆم
له‌كۆتایش هه‌ر ده‌گه‌مه‌وه
به‌تۆ...
چونكه
له‌ناخی من تۆ هه‌یت!.
3
له‌ئامێزت بگرم
قژی ره‌شت
تێكه‌ڵ به‌قژم ده‌بێ
هه‌ر هه‌مان شێوه‌ی ده‌ستم و
بۆنی ئامێزمت هه‌یه
سێبه‌ره‌كه‌م
ونت ده‌كات
هه‌روه‌ك به‌ردێك به‌ئاسمانه‌وه!.
4
ده‌زانی...
تاكو شه‌پۆلی روناكی
له‌نێو ماچدا
به‌گه‌رم و گوڕی ببریسكێته‌وه
تاكو شنه با
بۆن و به‌رامه‌ی گوڵ بپرژێنێ
تاكو ئه‌ستێره‌كان
له‌ئاسمان بجریوێنن
تۆ هه‌ر له‌دڵی من دای!.
5
بیرت بێت...
تاكو زانست بێ په‌روا
پایدۆزی دۆزینه‌وه‌ی
سه‌رچاوه‌كانی ژیان بێ
تاكو هه‌لدێره‌كانی ده‌ریا و
فراوانی ئاسمان
له‌به‌ره‌نگاریدا بن
باران و بیابان
چاوه‌روانی یه‌كتر بن
تۆ...ته‌نها تۆ..
له‌ئامێزمای!.
6
ئه‌و رۆژانه بیر ناچنه‌وه
به‌بێ ئه‌وه‌ی لێومان
بزه‌یه‌كی لێ سه‌وز بێ
دڵمان خۆش بوو
به‌شادی ده‌رده‌كه‌وتین
هیچ فرمێسكێ
كانی چاوه‌كانی
جێ نه‌ده‌هێشتین
بۆ ئه‌وه‌ی
له‌چاوی یه‌كتر
بمێنین و
له‌دڵی یه‌كتر
ژیان بكه‌ین!.
7
ده‌بێ پێم وت بی
تاكو دڵ و مێشك
به‌رده‌وام
له‌ململانێدا بن
تاكو هیواو ئاوات و بیره‌وه‌ری
له‌ئارادا بن
تۆش له‌خوێنمی و
به‌نێو دڵم گوزه‌رده‌كه‌ی!.
8
بیرت ده‌كه‌م
تاكو چاوه‌كان
ره‌نگی ئه‌و چاوانه ده‌ده‌نه‌وه
كه لێیان ده‌ڕوانن
تاكو ده‌م لێوه‌كان
به ئاهو ناڵین
وه‌ڵامی لێوانی تر ده‌ده‌نه‌وه
تاكو ماچێك
دوو جه‌سته ئاوێته ده‌كات
تاكو ناوی رۆمی و جولیت بێت
تۆش هه‌ر ده‌مێنیت
له‌نێو جه‌سته‌و رۆحی مندا!.
ده‌ریا ره‌واندزی
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
