ئێمه‌یش له ئێوە بێزار بووین..ئیتر بڕۆن.

Friday, 11/02/2011, 12:00

ئێوەیش ئیتر وا بیست ساڵه...

به‌زۆرداری و به‌هه‌ڕەشه..

به‌فرت و فێڵ و فریودان..

له‌سه‌ر کۆڵ و ته‌وقه‌سه‌ری میلله‌تێکی خێرنه‌دیو و...

قڕکراو و ژێردەسته‌ی چه‌ندین دوژمن و داگیرکه‌ری ...

ڕەگه‌زپه‌رست و بێ‌ویژدان.

لافی سه‌رۆکایه‌تی و ئاغایه‌تی‌تان لێ‌دەدەن.

له‌پێناو ئه‌و مه‌رامه‌شدا...

به‌هه‌زاران هه‌زار ڕۆڵه‌ی ئه‌م میلله‌ته ...

به‌ناهه‌ق و به‌ یه‌کدی به‌کوشتن دەدەن.

* * *

ئیتر به‌سه..

بێزار بووین له شێوە و شکڵ و سه‌روچاوتان..

بێزار بووین له گوێ‌گرتن له‌ گوزارشت و لێدوان و...

پله‌ و پایه و شوێن و ناوتان.

ئیتر به‌سه..

بێزار بووین له کۆشکه‌کانتان.

بێزار بووین له نازو نوز و له هه‌یمه‌نه‌ و مه‌کر و جادوی ژنه‌کانتان.

بێزار بووین له داوێن پیسی و بێ‌ڕەوشتی کوڕ و کچ و کوڕەزاتان.

بێزار بووین له مۆڕە و قسه‌ی ناشیرینی ...

پاسه‌وانی به‌ردەم ماڵ و بارەگاتان.

ئیتر به‌سه...

له هه‌موو شتێکتان بێزار بووین..

گه‌ر زووتریش واز نه‌هێنن..

گه‌ر زووتریش چۆڵی نه‌که‌ن..

بێزار دەبین له‌ هه‌موو شت..

بێزار دەبین له‌خۆشمان و...

له‌خاک و ئاوو ووڵات و ...

له کوردستان.