منیش خەوێكم بینی خوا خێریكات

Saturday, 05/05/2012, 12:00

لە كوردستان لەسەر چیایەكی بەرز هاتوچۆم دەكرد.بەهارێكی خۆشبوو. سەرمەست وسەرسامی ئەو بەهەشتە بووم.هاوار هاورێ سەرنجی رَاكێشام. بەشوێن دەنگەكە كەوتم. خوایە ئەمە چیبێت ئەم دەنگە لە كوێوە دێت؟ ئاگرێكی گەورە لەخوارەوە سەرنجی رَاكێشام قەفەسێكم بینی لەقەفەزی ئاژەڵە درَندەكان دەچوو. ئاسنی قەفەسەكە واشاریابو هەمو سوور هەڵگەرَابوو. كابرایەكی پرتوپیسی بچكۆلەم بینی بەسەدان گوونیەی پارەی ئاسنی یەكدیناری جارانی لە ژمارنەهاتووی تێدابوو ئەرێ ئەم كابرایە دەناسم وناناسم, ئەمەم بینیوە لەكوێ, كێیە نەدەهاتە یادم.لە حەیبەت وگەرما وهەڵمی ئاگرەكە پێم نەدەكرا زیادتر برۆمە پێشەوە.لە دڵی خۆما وتم ئەمە دۆزەخە. دینارە ئاسنەكان بەدەیان لەخۆیانەوە دەفرَین ودەچوونە ناو ئاگرەكەوە كەباش سووردەبوون ودەشاریان دەچوون بەشێوەیەكی هەندەسی جوان و بەشوێن یەكدا دەلكان بەكابراوە هەندێجار لە خوارەوە بۆ سەرەوە جاریتر بەشێَوەی ئەڵقەئەڵقە ئەویش تا دەیتوانی خۆی دەدا بە زەوییا وهاواریدەكرد.دەنگی لام غەریبنەبوو دوای چەند دەقەیەك دەیانیتر لە ئاگرەكە دەفرَین ودەلكان پێوە. دەنگێكی بە سەهم وترس دەهات ئەم هەمو پارەت لەكوێ؟ پارەی میللەت وگومرك دەبەیت دە ئەوە پارەكە دەبیخۆ. كابراش بەدەم هاوار هاوار ئارام وئوقرەی برَابوو بەدەوری خۆدا رَایدەكرد ودەسوورَایەوە وپارەكانیش بە پۆلپۆل وەك پۆلە چۆلەكە بەفرَینەوە دەهاتن ودەچوون.
لەولاوە كابرایەكی ناشرین وبچكۆلەیتر بەدەستی دووكەڵەكەتی باڵابەرزەوە هاواری دەگەیشە ئاسمان. هەریەكە دارێكی ئاگرینیان بەدەستەوە بوو ولێیاندەدا. لەئێش وئازارا خۆی دەدا بەعەردا ودەتلایەوە.چۆن جل دەدرێت بەئاوا ئاوا دەدرا بەئاگرەكەیا یەكێكیان دەیگوت لەخوا نەترسایت ئەو گەنجەت والێكرد, هەی زاڵم لەخوا نەترسایت سەردەشتت جوانەمەرگ كرد وكوشت؟ زرم لێیاندەدا. كابراش تادەهات بچووك دەبووەوە وبەزۆر دەیگوت تۆبە تۆبە....كەدەیویست قسەبكات دەیاندا بەزەویدا وشتێكیان دەكردەدەمی ونقیان ئەبرَی.
رَووداوەكە ئاگرەكە چەوساندنەوەكە زۆر سەرنجرَاكێش وترسێنەربو, سەرسامبووبووم بەڵام نازانم بۆ دڵم پێیان نەدەسووتا. لەناو ئاگرەكە ژمارەی پێنجی مانگم دەبینی.
لەولاتر كابرایەكیتر بە زمانەوە هەڵواسرابوو. لەوانیتر بەتەمەنتربو بەرزیاندەكردەوە ودەیاندا بەزەوییا سێ باڵابەز وكەڵەكەت بوون. لێیان دەپرسی بۆ واتان لەو جوانەمەرگە كرد؟ نا نا دەیویست بلێت نازانم, كورَەكەم ...باش قسەی پێنەدەكرا یەكسەر بەزمانەوە هەڵیان دەواسی ودەنگێ دەیگوت ئەوەندەت درۆت بەمیللەتەكەت كردووە دەتەوێت لێرەش درۆبكەیت؟
لەپرَ لەخەو داچڵەكیم سەرتاپام ئارەقەبوو هەناسەم سوواربووبوو دڵم بەپەلە لێیدەدا وەكو بڵێی رَامكردبێت. هەستام پەرداخێ ئاوم خواردەوە, كەمێ حەوامەوە ,جارێكیتر بیرم لەخەوەكە كردەوە.تادەهات دڵم ئارامتر وخۆشتر دەبوویەوە. قورَیان بەسەر بۆ كوێ دەرَۆن ئەمرَۆ نە بەیانی ئەوە چەوەرَوانیان دەكات.