یەكدوو قسەی دۆستانە بۆ ئەوانەی لە من ناڕازین

Thursday, 23/05/2013, 12:00

سەبارەت بەو نووسینەی لە سایتی (كوردستانپۆست)دا بە ناوی (بەختیار عەلی شپرزەی كامە باوكێتی، (ئەمیتر) یا (ئەویتر)؟) كە بەشێوەی زنجیرە بڵاوی ئەكەمەوە . تا ئێستا (دوو جۆر بیڕوڕا) بە من گەیشتووە . لەبەر ئەوەی نەمویست باسەكە پچڕ پچڕ بكەم و ناخۆشی بخەمە نووسینەكەمەوە. حەزم كرد لێرەدا وەك وەڵامدانەوەیەكی تایبەت و سەربەخۆ قسە لەسەر هەر (دوو بیروڕا) كە بكەم و هەندێك ڕوونكردنەوە بخەمە خزمەتی هەموو لایەك تا لە یەكتر گەیشتن زۆرتر بێت و بەدحاڵی بوونیش كەمتر بێتەوە، ئەمەش ڕاو سەرنج و ڕوونكردنەوەكانی منە:


1/ جۆرێك لەو (دوو بیروڕا)یە بەم دروشمە قسە ئەكات و ئەڵێ : (ئیتر نەبڕایەوە... بەس نی یە .. كردت بە چی...هتد) هەموو كەس ئەزانێ ئەم جۆرە هاوار كردن و قسە بزڕكانە هی خەڵكانی زۆرتر ناحەز بە منە و بێ (سێ و دوو) كردن ئەزانرێ سەر بە عەشیرەتی (بەختیار عەلی)یە كە بە (عەشیرەتی ئۆدیبی) ناسراون و ئەوەی كۆشی كردوونەوە (بێ مانا كردن)ی ئەخلاقە.
لە ڕاستی دا ئەم (عەشیرەتە) لە دنیادا ، هیچ (ئینتما)یەك شك نابەن ، سەبارەت بە (نیشتمان) ێك یا (گەل)ێكی دیاریكراو تا بزانرێت كە چین و چی نین. چونكە ئەم (عەشیرەتە) بە قسە و زمان خەڵكی (كورداوی) و بە نووسین و جۆری دەربڕین خەڵكی (عەرەباوی) و بەشێوەی بیر و بیر كردنەوەش خەڵكی (ئەوروپاوی) و شتی وان ئەمانە لەسەر ڕەچەڵەكی (دوو رەگی) كۆكن و ئەكرێ لە ڕێپوانێكی سەدكەسی دا بەم دروشمە هاوریان لێ بكرێت:
عەشیرەتی (ئۆدیبی)............ هەم (شەرقی) یە و هەم (غەربی) ..........
ئەم (عەشیرەتە) وەها گۆشكراون كە هەموو شتێك لە دنیادا بە چاك و خراپی یەوە بۆ خۆیان بە ڕەوا ئەزانن و لەو بڕوایەدان هەموو شتێكیش هەر لە خۆیان جوانە و دروشمی نەبڕاوەی ژیانی ئەوان بریتی یە لە : (هی خۆم بۆ خۆم هی هەمووش ئەخۆم)بە هەقی خۆیانی ئەزانن چی سووكایەتی هەیە بە خەڵكی تری بكەن بەڵام كە (خووت) لێكردن پڕ بە دنیا ئەقیژێنن و ئەیكەنە فەرتەنە. هەر لەسەر ئەو بنەمایەش هاوار ئەكەنە من و ئەڵێن: (ئیتر نەبڕایەوە ...بەس نەبوو....كردت بەچی...هتد) وەك ئەوەی ژیان هەر شیاو بەوان بێت و باسكردنی ئەوان هێڵی سوور بەزاندن بێت. ئەم (عەشیرەتە) لە هەر سووچێكی دنیادا ببن و بژین هەمیشە (كەسانی سێبەرن) و دەسەڵاتێك بە خێویان ئەكات و هەر بەوەشەوە ئەنازن و بەسەر خەڵكی تردا دائەخووڕن. بۆ ئەوەی چاك بیزانن من لەسەر باسەكەی دەستم داوەتێ بەردەوام ئەبم و لەسەر وەڵامدانەوەكانی خۆم سوور ئەبم چونكە لە (جنێونامە)كەی (بەختیار عەلی) دا كە كوردی تیادا (ڕوو زەرد) كراوە، بەلای شەخسی خۆمەوە ، (وەك كوردێك) لە هەقی خۆم خۆش نابم تا ڕوو زەردی (بەختیار) دیاری نەكەمەوە . ئیتر چۆن ئەنەڕێنن و چەند ئەشیڕێنن بەلامەوە (ڕەشەبا) یەكن گوزەر ئەكەن ئەوەش ئەزانم كە لەو بیروڕا دەربڕینەدا سنووری ئازادی كەسم نەبەرزاندووە و وەك هەقی خۆم هاتوومەتە قسە و هیچی تر.

2/ جۆرێكی تر لە (دوو بیروڕا) كە ئەبینم زۆرتر وەك دۆست و ناسیاو قسە ئەكەن و ئەڵێن : (تۆ نیازتە بەم زۆر لەسەر ڕۆشتنە (بەختیار) گەورە بكەیت ئەگەین (ئەو) كەسە ئەوە ناهێنێ تۆ ئەوەندە خۆتی پێوە ماندوو بكەیت و ....هتد).
منیش بەو بەڕێزانە ئەڵێمەوە : ئەگەر (بەختیار) گەورە بێت تازە بە من بچووك ناكرێتەوە ، خۆ ئەگەر بچووكیش بێت هەر بە من گەورە ناكرێت . هیچ كاتێكیش لە هیچ نووسێنێكمدا بەو مەبەستە دەستم نەداوەتە قەڵەم.
لەوە ئەچێت ئەو برایانە ئەگایان لە (میدیا)جۆر بەجۆرەكانی (ئەحزابە پووچەكانی كورد) و لە (دەسەڵاتی بۆگەنی كوردی) نەبێت كە چۆن (فیل) بە دیواردا هەڵ ئەگێڕن و چۆن (دڵۆپێك ئاو) لە خەڵكی ئەكەنە دەریا ، ئەوە من نیم ئەوە ئەكەم بەڵكو ئەوە میدیاكانی ئەوانە بە گەورە و بچووكیانەوە ، بە هی دەسەڵاتدار و بێ دەسەڵاتیانەوە. بە هی كافر و موسڵمانیانەوە، بە هی باش و خراپیانەوە ، كە زیاتر لە (بیست ساڵە) بە (ئەنقەست) و بە (درۆ) بە شان و شەوكەتی (بەختیار) و (عەشیرەتە ئۆیبی) یەكەیدا هەڵ ئەدەن و خەڵكی بۆ (كەر) ئەكەن ، خەڵكی بۆ (چاوترسێن) ئەكەن و خەڵكی بۆ (كەڕ) و (كوێر) ئەكەن (ئەگەر هاتوو بەڕێزتان بەڵگە و شتی واتان گەرەك بوو لە ئەرشیفی (بەندە) دا بە (تەن) نموونەم لایە و بۆ كاتی پێویست هەڵگیراون) . زۆرم لا سەیرە كە پرسیاری گەورەكردنی (بەختیار) لە من ئەكەن وەك ئەوەی ئاگاتان لەو هەموو قسەو نووسینە پڕ تەوهین و سووكایەتی یەی ئەو نەبێ كە ئێوەى بە تێكڕایی تیایدا كردووە بە : (نەخوێندەوار ، هیچ نەزان ، دەبەنگ ، مێگەل ، دڕندە...هتد) تا لە دواجاریشدا هاواری سووكایەتی (تا سەر ئێسقان ئۆدیبی)ئەكات كە بە كوردی ئەكاتە: (تا سەر ئێسقان دایكە خۆ گێ) یەتی ، بۆیە زۆر سەیرە ئێوە خۆتان لەو هەموو سووكایەتی پێكردنە (كەڕ) ئەكەن و دێن بە من ئەڵێن : چی یە نیازت وایە (بەختیار) لە ئێمە گەورە بكەیت؟!!.
دوای ئەوە بەو بەڕێزانە ئەڵێمەوە : ئەوە من نیم (بەختیار) گەورە یا بچووك ئەكەم ، بەڵكو ئەوە ئێوەن ئەترسن و بە پێ ى پەتی لە بەردەم شاڵاوی تەوهین و سووكایەتی پێكردنەكانی ئەودا هەڵدێن دواتر بە خۆ گێل كردنەوە پرسیاری گەورە و بچووكی (ئەو) لە من ئەكەن ، تەنها لەبەر ئەوەی ڕوو بەڕووی (جنێونامە)كەی ئەو وەستاومەتەوە و نامەوێ بەسەرمدا تێ پەڕ بكات ، لەوە ئەچێ ، ئەو وەستانەوەی منتان پێ ناخۆش بێت بۆیە حەز ناكەن درێژە بە باسەكەم بدەم. بەڵام جگە لەوەی من هەقم بەسەر گەورەو بچووكی (بەختیار)ەوە نی یە ، لەلای خۆمەوە تەنها وەڵامی (جنێونامە)یەك ئەدەمەوە كە ویستویەتی ڕاستەوخۆ با نا ڕاستەوخۆ لە (گوڵ كاڵتر) بە بیرو باوەڕمدا هەڵ بڵێت. خۆ ئەگەر پێویستشیی كرد ئەبم بە دڕك و ئەچمەوە بە چاوی ئەو كەسەدا كە تەوهین و سووكایەتی بە خۆم و بەو كۆمەڵگایە ئەكات كە منی تێدا ئەژیم و دەست و پێمی تیادا سووتاوە. ئەو وەڵامدانەوەیەش پەیوەندی بە گەورە كردن و بچووك كردنەوەوە نی یە بەڵكو لە جەوهەردا (تەحەدا) كردنەوە و بەرەنگار بوونەوەی منە لە ئاستی كەسی بەرامبەردا ئەگەر تا ئێستا بێ دەنگیم بە (هەڵوێست) زانیوە و لەسەر هیچ شتێك قسەم نەكردووە ، ئێستا تێ ئەگەم ئەوە هەڵەیەكی زۆر گەورە بووە كە كردوومە و تەنانەت خیانەتیش بووە لە خۆم كردووە چونكە بۆم دەركەوتووە (بێ دەنگی) تەنها (ترسنۆك) یە و (مرۆڤی ترساو)پەنای بۆ ئەبات. لەبەر ئەوە هەركەسێك (بێ دەنگی) بە (هەڵوێست) و (ئازایەتی) بزانێ و ورتە لە خۆی ببڕێت ، هەم درۆ لەگەڵ خۆی ئەكات و هەم خیانەت لە خۆی ئەكات و كەسێكی (بێ مانا) و (ترسنۆك) یشە و شیاوی مردنە . هەر بۆیە كاتێك گەشتمە ئەو قەناعەتەی (تف) لە (بێ دەنگی) بكەم و (بە گژا چوونەوە) بە بنەما وەربگرم بەم ڕەنگە تەقیمەوە كە ئێوە ناوی (گەورە كردنی) لێ ئەنێن و وەك ئەوەی شتێكی ناڕەوام كردبێت سەر زەنشتم ئەكەن و بە هەقی منی نازانن. لە كاتێكدا ئێوە هەر چۆنی ئەبینین و هەر چۆن قسەی لەسەر ئەكەن، وەك خۆتان ئازادن . لە بەرامبەردا منیش لەسەر بیرو بۆچوونی خۆم سوور ئەبم و جارێكی تر لە ژیانمدا (بێ دەنگی)ى ناكەمەوە بە پاساوی (هەڵوێست) بەڵكو وەك مرۆڤێكی ڕاست و دروست (تەحەدا) و (بە گژاچوونەوە) ئەكەمەوە دروشمی ژیانم و زۆر (بە پیاوانە) كارو كردەوەی پێ ئەكەم و لە هیچ قسە و باسێكیش سڵ ناكەمەوە. هەرلەبەر ئەوەیە ئەبینین ئێستا من بەو گیانی توورە بوونەوە هاتوومەتە باسەكەوە و بەو نیاز و مەبەستەشەوە قسەی خۆم ئەكەمەوە ، ئێوەش ئازادن لەوەی چ ناوێكی بۆ دائەنێن و چۆن سەیری ئەكەن، گرنگ ئەوەیە بە ئاشكرا و بە نهێنی ئەوە مەبەستی سەرەكی لەمەو بەدوای منە و كاری تیا ئەكەم و بچووكترین قسەش لە كەس ناخۆمەوە و تا ڕۆژى (مەمات) لەسەری بەردەوام ئەبم.
لێرەدا ئەوەی بۆ من جێ ی سەر سوڕمانە ئەوەیە (ئێوە بە كۆمەڵ) لە ئاستی توهین و سووكایەتی پێكردنی ناو (جنێو نامە)كەی (بەختیار عەلی) خۆتان (كەڕ و كاس) كردو نقەتان لێوە نەهات. كەچی هەر چەند ساڵێك لەمەو بەر بەرامبەر (هەڵە)یەكی (سەرۆ قادر) كە لە كۆبوونەوەیەكی حیزبیدا ڕوویدا ، هەرایەكتان بەرپا كرد نە سەری هەبوو نە بن ، تەنانەت لەسەر جادەكانی شاری (سلێمانی) یش (كەمپین) ى ئیمزا كۆكردنەوە بۆ مەحكەمە كردنی دانرا و دواتریش ناچاری هاتنە مەحكەمەشتان كرد. هەرچەند (بەندە)ش بە وتارێكی (چەند بەشی) قسەم لەسەر ئەو (هەڵە) یە كرد بەڵام بە بیروڕای جیاوازەوە بوو.
ئەگەر (هەڵە) كەی (سەرۆ قادر) بە توهین و سووكایەتی یەكەی (بەختیار) بەراورد بكەین دوو شتی زۆر جیاوازن ، ئەویان (قسە) بوو لە (دەم ترازا) و ئەمیان (نووسین) بوو بە (دەست) نووسرا... ئەو لە (كۆبوونەوەیەكی نهێنی) حیزبیدا لە ئەنجامی (شەڕەقسە)دا بوو ، ئەم لەسەر (ڕووبەری ڕۆژنامە)یەكدا بە ئاشكرا (دەربڕا) . كە ئەویش بەم جۆرەیە:
1/ (هەڵە)كەی (سەرۆ) لە كۆبوونەوەیەكی حیزبیدا وەك (شەڕە دەم)ڕویدا دوور لە (تەحەدا) كردنی سەرتاپای (كۆمەڵگا)بوو. بەڵام (تەوهین)ەكەی (بەختیار) بەشێوەی نووسین و بەوێنە و ناوی سەرحی خۆیەوە لە ڕۆژنامەیەكی باوی ناو هەرێمدا (بەشێوەی زنجیرە وتار) كە پتر لە (حەوت هەفتە)ی خایاند بە ئاشكرا بڵاو كرایەوە.
2/ (سەرۆ) دواتر هاتە قسەو باسی چۆنیەتی مشت و مڕی كۆبوونەوە نهێنی یەكەی كرد و بە ڕەسمییش لە ڕۆژنامەیەكی باوی ناو هەرێم بە (مانشێت) ى گەورە نووسی : (پێنج ملیۆن جار داوای لێ بووردن لە كورد ئەكەم) ئەگەر هەڵەیەكی وەهام (وتبێت) . كەچی (بەختیار عەلی) بە ڕەسمی بەشێوەی وتار نووسی و هیچیش لێ ى پەشیمان نەبووەوە و ئێوەش بە بێدەنگی لێتان قبوڵ كرد.
بۆم دەركەوت بۆ لە (سەرۆ قادر) كرا بە هەرا و لە بەرامبەریشدا بۆ لە (بەختیار) بێدەنگی كرا؟ چونكە (سەرۆ) لە ژێر (سێبەر)ی (پارتی) دایە و (بەختیار)یش لە هی (یەكێتی) دایە . ئەمەیە ئەو ڕاستی یەی ئێوە (لێ ى ئەترسن) و (ناوێرن) بچووكترین داكۆكی لەسەر (كەسایەتی خۆتان)ی تیادا بكەن تەنانەت ئەگەر داكۆكی كردنەكەش لەسەر (هەق) بێت و لەسەر كێشەی (شەرەف) ی خێزانیش بێت كە لەسەر بنەمای : (كوڕ لە بەرامبەر باوك و كوڕ لە بەرامبەر دایك)دایە و (بەختیار) توهین و سووكایەتی پێوە ئەكات. ئەویش نەك هەر لە (سنووری خێزانێك) لە خێزانەكان بەڵكو لە (ئاستی كۆمەڵگا)یەكدایە بە هەموو خێزانەكانی یەوە ، بە بێ جیاوازی... وەكی تر لە ئاستی نەتەوەیەكی (چل ملیۆن) ى گەورەدا پێ بە ئەرزدا ئەداو كەسی ورتەی لێوە نایەت و كەسیش جورئەتی ئەوەی نی یە سەر بەرز بكاتەوە . ئیتر بۆ گلەیی گەورە كردنی (بەختیار) لە من ئەكەن ، ئەی نازانن ئەوە (بێدەنگی ئێوە)یە ئەو ئەكاتە (كەڵەگا) نەك ڕووبەڕوو بوونەوەی من كە كردووتانەتە (بیانوو) بۆ شاردنەوەی (بێ جورئەتی) و (بێ دەنگی) خۆتان و بەخۆتاندا ڕانابینن (نقە) بكەن چونكە (چاوترسێن) كراون هەی پیاوە ئازاكانی ناو سەنگەرە (ڕەنگاو ڕەنگە)كانی ڕاستەوخۆ یا نا ڕاستەوخۆی ئەقڵەیەتی (یەكێتی نیشتمانی) كە (جورئەت) ناكەن داكۆكی لە (كەسایتی) خۆشتان بكەن لەبەر ئەوەی وا فێركراون ئەگەر هاتوو وەك پیاو لە سەنگەری (كورد بوونی خۆتان)ەوە لەسەر (شەرەفی كەسایەتی خۆتان) هاتنە قسە و بە گژا چوونەوەتان كرد بە (هەڵوێست) و (ناڕەزایی) ئیتر ئەوە ئەبێتە (بڤە)و هەر (سێ تەڵاقی كوردایەتی) پێ ئەكەوێ و ئێوەش (هەتیوو) ئەكەون ، لەبەر ئەوە ئێوە بوون بە كۆیلە و گوێ ڕایەڵی خەڵكی (گەندەڵچی) و (دەستپیس) و (دەمپیس) !