لەكۆتایى ڕێگادا، هەر دەبنە پەند.!

Monday, 12/07/2010, 12:00

هەرێمى كوردستان یەكێكە لەو ناوچانەى دونیا كە زۆرترین شتى سەرسوڕهێنى لەخۆگرتووە. مەبەست لە شتى سەرسوڕهێن، خوانەكردە، شوێنەوارگەلى دێرینى وەكو هەڕەمەكانى وڵاتى میسر، شوراكەى چین و.. هتد، نیە، بەڵكو مەبەست لە شتە سەرسوڕهێنەكانى بوارى سیاسەتە. یەكێك لەو شتە سەرسوڕهێنانەش پارتە سیاسیەكانن. پارتە سیاسیەكانى ئەم هەرێمە كە قەوارەگەلێكن مێژووى دروستبوونى زۆربەیان بۆ ساڵانى بەر لە ڕاپەڕینى 1991 دەگەڕێتەوە، لەڕۆژگارى ئەمڕۆدا لە هەر دیاردەیەكى ترى ناو دونیا سیاسەت زیاتر جێى سەرنج و سەرسوڕمانن. ئەم پارتانە كە لە قۆناغێكى مێژوویى دیاریكراو، بۆ ئامانجێكى سیاسى دیاریكراو، دروستبوون، لە ئەمڕۆدا و لەدواى تێپەڕاندنى ئەو قۆناغە مێژووییەو، بەدیهێنانى، گەرچى لانى كەمى ئەو ئامانجە سیاسیەش بێت كە ڕزگاربوونە لە دەست ڕژێمێكى دیكتاتۆر كە ماوەى چل سالأ فەرمانڕەوایى گەلانى عێراقى كرد، پێویستیان بە چاو پێداخشاندنەوەو هەڵسەنگاندن و تەنانەت سكراپكردن هەیە، چونكە لەپاش ڕاپەرینەوە بوونەتە بارێكى گران بەسەر شانى میللەتەوە. ئەو پارتانەى كە بۆ نەهێشتنى مۆتەكەى بەعس لەسەر سنگى میللەتى كورد دروستبوون، ئەمڕۆكە خۆیان بوونەتە مۆتەكە و بیست ساڵە سەر سنگى میللەتیان قورس كردووە. ئەوان كە ئەوێ ڕۆژێ بۆ دژایەتیكردنى دەسەڵاتى بنەماڵە و فەرمانڕەوایى ژن و كوڕى سەرۆك هاتنە بوون، ئەمڕۆكە دەسەڵاتیان لە دەستى بنەماڵەدایە و لەلایەن ژن و كوڕى سەرۆكەوە بەڕێوە دەبرێن و وڵاتیش بەڕێوە دەبرێت. ئەوان كە ئەوێ ڕۆژێ لەپێناوى نەهێشتنى زوڵم و ستەم خەباتیان كرد، ئەمڕۆكە بوونەتە دەسەڵاتێكى ستەمگەر و پیادەكارى جۆرگەلێك لە تیرۆر چەندین جار بۆڕى ئەو جۆرە تیرۆرانە دەداتەوە كە لەسەردەمى بەعسدا پیادە دەكران. تیرۆرى دەم كوتكردن. ئەمڕۆكە ئێمە لەقۆناغێكداین كتومت لە قۆناغى سەرەتاى هاتنە سەر دەسەڵاتى بەعس دەچێت لەعێراق. ڕەخنەگرتن لە دەسەڵاتى بێسنورى بنەماڵە و پەردە هەڵماڵین لەسەر ناشیرینییەكانى ئەو دەسەڵاتە، لەباشترین دۆخدا بە تیرۆركردن وەڵام دەدرێتەوە. بۆ ماوەى بیست سالأ دەچێت ئێمە سامانى نەتەوەیمان تیرۆر دەكرێت. لەپاش ڕاپەڕینەوە ئێمە دۆخێكى سامناك لە بەتاڵانبردنى سیستماتیكى دەرامەت و سامانى ئەم وڵاتە بەخۆوە دەبینین. لەقۆناغى سەرەتاى ڕاپەڕیندا هەرچى ئامێر و ئۆتۆمۆبیل و كەرەستەى گرنگى ژێرخانى ئابورى ئەم هەرێمە هەبوو پارتەكانى ئێمە ئاودیوى ئێرانیان كرد. ئەمڕۆكە سەرە هاتووەتە سەر بەتاڵانبردن و ئاودیوكردنى نەوت. ئەمەیە مەبەستى ئێمە كاتێك كە دەمانەوێت بڵێین چیى تر ئەو بەهانەیە بەسەرچوو كە ڕۆژگارێك پارتە سیاسیەكانى ئێمەیان لەپێناودا دروستبوو. پارتە سیاسیەكانى ئەمڕۆمان كە ڕۆژگارێك سیمبولى خەبات و بەرەنگاربوونەوەى ستەم و زوڵمى دیكتاتۆریەت و جێى شانازى ئێمە بوون، ئەمڕۆكە بوونەتە مایەى شەرم بۆ ئێمە. لەگەلأ قین لەو پارتانەشدا قینێك لە سیاسەت، كە هونەرى خۆشگوزەرانكردنى ژیانى مرۆڤەكانە، دروستبووە. بەبڕواى ئێمە كارەساتى گەورە هێندەى لە ناشیرینبوونى فەساڵى سیاسەتدایە لەنێوەندى میللى ئێمەدا، هێندە لە ڕیسوابوونى پارتە سیاسیەكانماندا نییە. چونكە دواجار هەر دەبێت ئەوانە ڕیسوابن كە ڕۆژگارێك بۆ هێنانە دى مەرام و ئامانجى تایبەتى خۆیان سوارى شەپۆلى خۆپیشاندان و ناڕەزایى و شۆڕشەكانى ئەم میللەتە بوون و خەڵكى هەژار و بەش مەینەتیان كردە سوتەمەنى. لەم سەروبەندەشدا سیاسەت وەكو هونەرى خۆشگوزەرانكردنى ژیانى مرۆڤەكان هیچ گوناهێكى نییە. خەباتى ئەوان، ئەمە لەبارێكدا ئەگەر لەماوەى ژیانى ئەواندا شتێك هەبێت ناوى خەباتى لێ بنرێت، هێندەى گەمەیەكى ناشیرین بوو میللەتى كردە هۆكار بۆ گەیشتن بە ئامانجى دەوڵەمەندبوون، هێندە خەبات نەبوو لەپێناوى میللەتدا. ئەوان لەو ڕۆژەوە كە دەستیان دایە ئەو كارەى كە، بەبڕواى خۆیان، خەبات بوو لەپێناوى میللەتدا، بەگیانى بازرگانى و هەناسەى باشكردنى گوزەرانى خۆیان و هەناسە سواركردنى بارى گوزەرانى میللەت هاتنە مەیدان. هەر ئەمەشە پاساوى هەموو ئەو سازشانەى كە بەدرێژاى مێژووى خۆیان لەسەر دۆزى ڕەواى میللەت كردویانە. لەهیچ كونجێكى دونیا لەنموونەى ئەو سیاسەتمەدارە بەدى ناكەین كە لەپاى ڕۆژێك تێكۆشانى لەپێناوى نیشتیمانیدا داواى ئەوە بكات زەوى و ئاسمانى ئەو نیشتیمانە لەسەر خۆى و نەوەكانى تاپۆ بكرێت. سیاسەتمەدارانى ئێمە نەك هەر داواى ئەوەیان كردووە بەڵكو بەكردەوەش تاپۆیان كردووە. كێشەى ئەوان لەگەلأ ڕژێمێكى دیكتاتۆرى وەكو بەعس، هێندەى كێشە بووە لەسەر ئەوەى حیزبى بەعس فەرمانڕەوایى میللەتى كورد بكات یان ئەوان، هێندە كێشەى نەتەوەیى و پرسى چەوساندنەوەى میللەتى كورد نەبوو لەلایەن دەسەڵاتێكى ستەمگەرى وەكو دەسەڵاتى بەعس. دەنا هەرگیز دەستیان نەدەچووە چەوساندنەوەى میللەتى خۆیان. ئەوان پێویستیان بە میللەت و خەڵكانێك هەبوو فەرمانڕەوایى بكەن، ئەوان پێویستیان بە سەرزەمینو خاكێك هەبوو تاوەكو لەڕێگاى دەستگرتن بەسەر سامان و دەرامەتەكەیەوە خەونى دەوڵەمەندبوونیان بهێننەدى، دەنا چۆن زاتیان دەكرد بڵێن:"خەونى دروستكردنى دەوڵەتى كوردى، خەونێكى شاعیرانەیە". ئەوان خەونى خۆیان هێنایەدى و خەونى میللەتیشیان نایە چالأ. ئەوان كە ئەمڕۆكە نیشتیمانپەروەرى بە ئێمەى نەوەى نوێ بە گرانترین نرخ و بەها، بە نرخ و بەهاى نیشتیمان، دەفرۆشنەوە، لەتاو گیانى خۆیان چوونە شاخ. ئەوان قوتابیگەلێكى تەوەزەل بوون قوتابخانەیان پێ تەواو نەكرا، ئەوان سەربازى هەڵهاتوو بوون و ناسنامەیان پێ نەبوو، بۆیە ڕوویان لە شاخ كرد. دۆستۆیڤسكى گوتەنى، نیشتیمانپەروەرى دوایین پەناگاى هیچوپوچانە، بۆیە نیشتیمانپەروەرى دوایین پەناگاى ئەوان بوو. ئەوان بەرهەڵستى بەعسیان كرد و خۆشیان بوونە بەعس؟ ئەوان ئیرەییان بە بەعس برد بۆیە هەر زۆر زوو چاویان لەو كرد. ئیرەییان بە دەزگا داپڵۆسێنەرەكانى بەعس برد بۆیە هەر زوو كەوتنە دامەزراندنى دەزگاگەلى سەركوتكەرى لەجۆرى دەزگاكانى ئەو. ئەگەر بەعس بادۆش و ئەبوغرێب و نوگرە سەلمانى هەبوو لەو شوێنانە خەڵكى ناڕازى گوللەباران دەكرد، ئەوان لەسەر شەقامەكان گوللە بەناو دەمیانەوە دەنێن. ئەوان بۆ ئەوە تێكۆشان و میللەتیان خستە ناڕەحەتیەوە تاوەكو لەشوێنى وێنەى دیكتاتۆرێك وێنەى دوو دیكتاتۆر هەڵبواسن. ئەوان هەموو كردەوەیەكى ناشیرین و ڕەفتارێكى دیكتاتۆرانە لە دیكتاتۆرەكانى دونیاوە فێردەبن بەڵام هەرگیز پەند لە چارەنووسى ئەو دیكتاتۆرانە وەرناگرن كە، لەكۆتایى ڕێگادا، دەبنە پەند و پارە سپاردەكراوەكانى بانكەكانى ناوخۆ و دەرەوەو ئەو كۆشك و تەلارانە كە بە پارەى میللەت دروستیان كردون، بۆ خاوەنەكەیان كە میللەتە، جێدەهێڵن.