م. كرێكار: بسم الله الرحمن الرحیم. بەڵێ بێ گومان حوكمێكی وا توند كە پڕاوپڕی تاوانەكەیە حەتمەن دەبێت لە دەقەكانی قورئان و فەرموودەوە هاتبێت، هەر چوار مەزهەبەكەی ئەهلی سوونەت لەسەر ئەوە رێكن كە هەر كەسێك سوكایەتی بە قورئان كرد كافر دەبێتەوەو كوشتنیشی لەسەر موسوڵمانان فەرز دەبێت، ئەمە زانایان و شەرعناسانی كۆن و نوێ لەسەر ئەمە كۆ-ڕا (ئیجماع)یان هەیە، دەكرێت بۆ دڵنیابوون تەماشای كتێبەكانی (الصارم المسلول) ی ئیبنو تەیمییەو (الاعلام بقواگع الاسلام)ی ئیبنو حەجەری هەیتەمی بكرێت، زانایانی كۆن و نوێ تەنها ناكۆكیەكیان لەم مەسەلەدا هەبێت لەسەر ئەوەیە كە ئایا ئەگەر تاوانبارەكە تۆبەی كرد لێی قبووڵ دەكرێت یان نا؟! زۆرینەشیان (ئەو دوو ناوبراوە بەڕێزەش لەگەڵیاندان) رایان لەسەر ئەوەیە كە تۆبەشی لێ قبووڵ ناكرێت و هەر دەبێت بكوژرێت، كوشتنیشی پەیوەندی بە دادگاو دەزگای راپەڕاندنەوە نامێنێت، چونكە خەلیفەش بۆی نیە داڵدەی ئەو جۆرە تاوانبارانە بدات كە تاوانەكەیان دەرهەق باڵاترین موقەددەساتی ئوومەتەكە كردووە.

م. كرێكار: نا، گێڕانەوە و نەقڵ كردنی كوفر بكەرەی بە كافر ناناسێنێت، بڵاو كردنەوەی هەواڵەكە زۆر زەرووری بوو، پلانی ئەوەشمان بۆ كێشابوو دۆسیەی كێشەكە بە دەستی ببەین بۆ زانایانی سعودیە و ئەزهەر و شوێنەكانی تر، هەروەها نیازمان بوو لە رۆژی 17/5 دا كە جەژنی نیشتیمانی نەرویجە ئاڵاكەیان لەبەردەم سەفارەتەكانیاندا بسوتێنین بۆ ئەوەی لە ناو نەرویجدا زیاتر دەنگبداتەوە و موسوڵمانانی غەیرە كوردیش لێی ئاگادار ببمەوەو بێنە ناو كێشەكەوە، بەڵام لەبەر سومعەی كورد (هەڵمەتی هۆشداریی)ەكەمان وەستاند، چونكە سەیری كاردانەوەكەیمان لە ناو موسوڵماناندا دەكرد، هەڵوێستی زۆر سەختی لەسەر هەموو كوردێك دروست دەكرد، بەڵام ئەمە مانای ئەوە نیە وازمان لە كێشەكە هێنابێت.

م. كرێكار: هیچ سزایەكی تاوانی قورس لە هیچ ووڵاتێك لەسەر پاڵنەر ناوەستێت، ئەگەر فرۆشیارێكی موخەددیرات لە نەرویج ووتی بێ پارە بووم و خەریك بوو دەمردم لە برساندا، یان لە بێ داوودەرماندا، یان كرێخانووم نەبوو بۆیە فرۆشتوومە، یاسا گوێی لێ دەگرێت؟! نا، ئیسلامیش بۆ تاوانی قورس وایە، پاشان ئەگەر ئەو گریمانەمان دانا كە لایەنێكی گەمەسازیی سیاسەت لە پشتیەوەیە، خۆ ساڵەهای ساڵە رۆژئاواو ئیسرائیل لە پشت دەیان هەڵوێستی وا تاوانباریەوەیەن، دەبێت بەمە دەست بخەینە بەر چەناگەمان و بڵێین با لێی گەڕێین؟! نا، ئەوی ئەم كارەی كردووە، كەسێكی باڵغە، ئەقڵی بە كارەكەی شكاوە، نەزان نەبووە، لەژێر تین و فشاردا ناچار نەكراوە كە بیكات، خۆی سەربەست وسەرپشك بووە لە كردن و نەكردنی، تاوانەكەش كاتێكی زۆری وویستووە، لە ئامادە كردنی وەسیلەو تۆمار كردن و بڵاو كردنەوەی، لە نێوانی هەموویاندا كاتی تەواوی نەكردنی هەبووە، بەڵام زۆر موستەهتیربووە، بۆیە شایانی ئەو سزایەشە، دڵنیاشم دوای دە ساڵی تریش بێت، موسوڵمانان دەیكوژن، قەناعەتیشم وانیە بە دزیەوە بیكوژن، دەیكوژێت و بە پۆلیسی ووڵاتەكەش دەڵێت ئەوەتام من كوشتوومەو تەحەممولی سزاكەتان بە سەربەرزیەوە دەكەم، وەكو (محمد بوصری) مەغریبی كە لە 8/11/2004 (فان غوخ) ی كوشت، هەشت فیشەكی دەمانچەشی پێوەناو داشیە بەر چەقۆ و دواییش بەیانەكەی خۆی بە چەقۆكە لە سنگی فان غوخ چەقاند، هەر لەوێ خۆی تەسلیمی پۆلیس كردو چووە دادگاو حوكمی ئەبەدی وەرگرت، دوای پێنج ساڵ زیندانی كە چاوپێكەوتنیان لەگەڵدا كردەوە ووتی: ئەگەر زەمەن بگەڕێتەوەو فان غوخ ئەوە بكاتەوە، هەر بەو شێوەیە دیكوژمەوە.

م. كرێكار: نا، ئەمە ململانێیەكی شارستانێتیەو رۆژئاوا دەیەوێت دوای ئەوەی منارەكەمانی لە ئیسلامبوول رماندووە، دینەكەمان سووك بكات، ئەوانەی ئاماژەشت پێ كردن جۆرێكن لە دەستشكاندنەوەو پێوانی كاردانەوە. ئەوانەی دژی ئیسلام وەستاونەتەوە چاوەڕوانی ئەوەیان نەكردووە ئێمە هەنجەتیان بدەینە دەست، خۆیان لەوپەڕی بێ ئەدەبییەوە ئەوەیان كردووە، ئەدی بۆچی 1400 ساڵە ئوممەتی ئێمە كڵێسای قیامەی لە فەلەستین پاراستووە؟! بۆچی گۆڕی یاوەرانی سەیدنا مەسیحی لە مزگەوتەكانی ئەنتاكیادا پاراستووە؟! بۆچی ئەو هەموو كڵێسایە هەیە و هیچی ناڕوخێندرێت؟ كەچی ئاسەواری شارستانێتی ئیسلامەكەی ئێمە كە 600 ساڵ حوكمی ئەندەلووسی كرد لە ئیسپانیا و پورتۆگاڵدا نەما؟! بۆچی سەد هەزار موسوڵمان لە جەنگی جیهانی دووەمدا بوو بە قوربانی فەرەنسا كەچی لە پاداشتیدا حیجابی ئافرەتانمان بە تاوان دەدرێتە قەڵەم؟ رۆژئاوای سپی پێستی چاوشین لە سەرەتای مووی سەریەوە تا نینۆكی پەنجەكانی پڕە لە هەڵوێستی دوژمنكارانە دژی ئەم دین و ئوممەتەی موسوڵمانان، ئەوە پەیوەندی بەوەوە نیە كە ئێمە گێل و نەفامین و هەنجەت و بەهانە دەدەینە دەست دوژمن تا لەسەرمان بنووسن!! چما دوێنێ پێرێ هەر ئەوانی خاوەن شارستانێتی نەبوون 57 ملیۆن بەشەریان لە جەنگی جیهانی دووەمدا كوشت؟!

م. كرێكار: لە ساڵی 1949 دا منداڵانی جولەكەی قودس چوونە لای بن گۆریۆنی سەرۆك و ووتیان رۆژمێری ساڵانەی مەكتەب چاپ دەكەین، رستەیەكی خۆتمان پێ بڵێ تا لەسەری سەرەوە بینوسین، ووتی: (سێ هەزار ساڵ رەنجمان دا، تا گەیشتینە سەر ئەم رێیەی ئێستا یەكەمین هەنگاوی بەسەردا هەڵدەهێنینەوە). جیهانی ئەفكارو بیناسازیی ئوممەتان و ململانێی شارستانێتی خەباتێكی توولانیە، ئەگەر بە پێی ئەو پێوەرەی جەنابت بوایە دەبوو باپیرە سەلاحەددین لەو هەموو پەرتەوازییەی ئوممەتەكە رەشبین ببێت، دەبوو چاوی پڵنگانەی لەو هەموو هێرشەی سەلیبیەكان بترسێت، دەبوو لەو هەژاریی و دەسكورتی خۆو نەمانی هێزی موسوڵمانان گۆشەگیر بكەوێت و هەر هەنیسك بدات، بەڵام ئەوەی ئومێدە لەم دینەدایە، ئێمەی موسوڵمان هەرچەند پەرتەوازە بین زەمینە فیكریی و عەقائیدیەكەمان سەلامەت دەمێنێت، هەموو ئەو ئیسلامیانەی ناوت بردن كێشەی فیكریی و عەقائیدیان پێكەوە نیە، چەند ناكۆك بن لە سەروەری شەرعدا یەك دەگرنەوە، یەكگرتوویەكی نەرمڕەو دەسەڵات بگرێتە دەست، هەر بەرگری لەو شەرعە دەكات و پلان بۆ بڵاو كردنەوەی ئەو دینە دادەنێت كە هەموومان باوەڕمان پێیەتی، سەیری مێژوی ئیسلام كەو لە تەنیشیتیەوە سەیری دیدە فەلسەفیەكانی تر كە، دەیان دیدو تێڕوانینی رۆژئاوایی هات و رۆیشت و ئاسەواری نەما، كەچی ئەمڕۆی ئیسلام لەو كاتەی بەهێزترە كە منارەكەی سوڵتانی عوسمانی رمێنرا، ئا ئەمە قیاس كە لەگەڵ شۆڕشەكەی لینین و دەسەڵاتەكەی بریجنێف و بیرازكاریەكەی گۆرباچۆڤ و كورسیەكەی مەجید موسای لای ئیحتیلال، لە 1908 ەوە عەلەمانیەت لەسەر پشتی تانك و پشت بە رۆژئاوا دێتە سەر حوكم. ئادەی كامیان لە مەدای سەد ساڵدا گەیشتە نیوەی ئێرانی ئینقیلابی ئیسلامی؟! كام سەرۆكی خەیاڵاوییان نیوەی مەحموودی ئەحمەدی نەژاد بۆ ئوممەتەكەی هەڵسوڕا؟! لەگەڵ ئەمانەشدا ئێمە كە ناوی خیلافەتی ئیسلامی دەبەین وەكو سونبولێكی هێزی ئیسلامی نێو نەتەوەیی دەیڵێینەوە، وە نەبێت ئامانجێكی نزیكی ئێمەی ئیسلامیانی كورد بێت، ئێمە دەزانین بواری نێوان ئێمەو خیلافەت زۆر دوورە، بەڵام ناشڵێین خەونی شاعیرییە، نەشمانووتووە ئامانجمان دامەزراندنی دەوڵەتێكی ئیسلامییە، چونكە ئەوەشیان بە تەنها بە ئێمەیەكی ئیسلامی كوردستانی ناكرێت، كە كوردستانەكە خۆی لەتوپەت كراوە، بەڵام دەڵێین ئیمارەتێكی ئیسلامی، كە ئیدارەیەكی هەڵبژێرراوی دەبێت و لەژێر ئاڕاستەی شەرعدا ئاڕاستەی كۆمەڵگەكە دەكات و نان و ئەمانی تێدا بۆ هەموو دانیشتوان بێ جیاوازی دەستەبەر دەكات، دەشێت ئەمە لە سەد گوندا بێت، هەر وەكو كە دەشێت لە شارێكی گەورەدا بێت، هەر وەكو كە دەشێت لە پارچەیەكی كوردستاندا بێت، ئەمە لە جیهانی ئەفكاردا خەیاڵپڵاویی نیە، سەیركە سۆشیالیزم لە پێش ماركسیشدا هەبوو (ماركس لە 1818 لەدایكبووە) لانی كەم ماركسیزم سەد ساڵی زیاتر لە جیهانی ئەفكاردا وویست تا لینین لە 1917 دا بردیە سەر حوكم. زایۆنیزم لە 1890 دا خۆی رێكخست، دوای پەنجا ساڵی لە رێكخستن و خەباتی سیاسی و دیبلۆماسی لە 1948 دا ئیسرائیلی دروست كرد، هەر یەكێك لە كۆمۆنیست و زایۆنیست لایەنی بەهێزی نێو دەوڵەتی هەبوون پشتیان دەگرتن، كەوابوو شتێكی ئاساییە بۆ ئێمە، ماوەی خەباتە فیكرییەكە توولانی تر بێت چونكە هەموو لایەنەكان وەكو یەك دوژمندارێتیمان دەكەن، لەبەر ئەوەی دەزانن هەڵوێستی عەقائیدی خۆمان بە سیاسەتی هیچیان ناگۆڕینەوە، ئەو گەلەكۆمەكێ رۆژئاواییەی بۆ تاڵیبان چووە مەیدانەوە هەر لەم روانگەی ململانێ شارستانێتیەی ئیسلام و رۆژئاوایەوە بوو تا ئیسلام نەبێتەوە بە خاوەنی دارالاسلامێك و نەبێتەوە بە ژمارەیەكی نێو دەوڵەتی و لە پرۆژە چارەنووسسازەكانی گەلاندا رای هەبێت.

م. كرێكار: دەشێت سوود وەرگرین، چ مەناعەتێك هەیە؟ هیچ. بەڵام نابێت وا بزانین سوود وەرگرتن لە تەكنۆلۆژیا (كە وەسیلەیە) بە بێ وەرگرتنی دیدو تێڕوانینە فەلسەفیەكەی رۆژئاوا ناشێت، بۆچی ناشێت بە موسوڵمانی بمێنینەوەو سوود لە شارستانێتیەكەش وەرگرین، بۆچی نابێت وەكو ژاپۆنی توتم پەرست و سەنگافورەی بودایی و ئیسرائیلی جولەكەو ئێرانی شیعە بین؟! بۆچی ناشێت لە كلتورو قیەمی خۆمانەوە بڕوانینە ژیان و مرۆڤ و گەردوون و هەرچی بەرهەمێكی ئەم شارستانێتیە كە لەگەڵ دیدو كلتوری خۆماندا دەگونجێت وەربگرین و بكەوینە بیناسازیی ئیدارەی دەوڵەت و ئاڕاستەی كۆمەڵگە؟! ئەوەی جەنابت بۆ تالیبانێكی داماوی بە فەوزا دەدەیتە قەڵەم شتێكی سروشتیە لە بیناسازیی دەوڵەت و گوێزانەوەی دەسەڵاتی نەوعیدا، لە كۆمۆنیستیەوە بۆ ئیسلامی، دەبوو بەو چاوەوە سەیر كەیت كە ئەم نەرویجەی لای منیش لە هەمەجێتی فیكینگەوە هاتووە، سێ سەد ساڵ لەمەوبەر ئەمانیش یەكتریان دەخوارد، ئەو زەمانەش دەرپێی ژنەكانیان ئاسن بوو! قفڵی لێ دەدرا بۆ ئەوەی زینا نەكەن!! ئەم نەرویجە حەزارییەی ئەمڕۆ جەنابت بە ئیعجابەوە ناوی دەهێنیت لە 1971 دا بۆ یەكەمین جار یەكەمین ژنی چووە پەرلەمانەوە! ئەو كاتەی ئێمەی كورد حەپسەخانی نەقیبمان لە پیاوەكانی ئەمان زیاتر ئەقڵی بە سیاسەت و دیبلۆماسیەت دەشكا، بەڵام ئەمە پارسەنگ و لاسەنگی شارستانێتیە، رۆژئاوا ئێستا لە هەڵكشانی شارستانێتیە بێ روحمەكەیدایەو ئێمەش لە سەرەتای هەستانەوەی شكستە شارستانێتیەكەمانداین، ئینجا كێ ووتی ئەمریكا زۆر شەریفەو جێی دەرس لێ وەرگرتنە؟! ئەوە بە كەسێك بڵێ مێژووی قرتابێت، ئاخر ئەمریكاییەكی سپی پێستی تاوانكار كە هەر چی هیندەسوورەكانی دانیشتووی ووڵات هەیە لەناوی بردوون، ئەمریكاییەك كە 11 ملیۆن كەسی لە شەڕی ناوخۆیدا كوشتووە، ئەمریكاییەك كە گاروودی دەڵێت 57 ملیۆن كەسی لە حەملەی بە كۆیلەكردندا كوشتووە، ئەمریكاییەك كە لە ماوەی 150 ساڵدا 147 شەڕی كاولكارانەی وەكو ئەوەی عێراقی ناوەتەوە كوێی جێگای دەرس لێ وەرگرتنە؟! 

م. كرێكار: بەڵێ بە تەئكید پێم وایە ووڵاتی (موسوڵمانان) لە دەیان تەنگژەو قەیرانی فیكریی و سیاسیی و قیەمیدان، بەڵام هۆیەكەی ناگەڕێتەوە بۆ نەبوونی عەقڵانیەت و چاكسازیی و نوێخوازی لە ئیسلامدا، ئیسلام لە هاوكێشەكەدا نیە، بەڵام فاشیلەكان دەیانەوێت شكستەكەی خۆیان بدەن بەسەر ئیسلامدا، خۆ ئیسلام رێی لە سعودیەو سوریاو میسر نەگرتبوو لە پەنجا ساڵدا بگەنە بیست ساڵی یەكەمی ئێران؟! نەوتی سعودیە لە 1945 ەوە بۆ ئەمریكا دەڕوات و واریداتەكەی دەچێتە گیرفانی ئال سعودێكی نەخوێندەواری بێ قیەمەوە، هۆی سەرەكی دواكەوتنی ووڵاتی موسوڵمانان یەكەم دیكتاتۆریەتی حاكمەكانە كە دژی گەلەكانن، كە هەر رۆژئاوا دایاندەنێت و دەیانپارێزێت، دووەم نەڕەخساندنی ئازادیە بۆ فیكرو هەل نەڕەخسانە بۆ داهێنان، ئاخر پارتی و یەكێتیەك كە تا بن چەناگەیان خوێنی شەڕو وویستی شەڕخوازییە رۆشنبیری بیناسازیی دەوڵەت و ئاڕاستەی گەشەپێدانی میللەت لە كوێوە دێنن؟! كۆمەڵێك نەخوێندەواری مشەخۆری زەروو ئاسا كە كەوتوونەتە بەر دەستی كۆمپانیای موفلیسی رۆژئاوایی بە تایبەتی ئەمریكایی دەبێت غەیری ماشینەوەو دزی چی تر فێر ببن؟! ئێ سەرانی پارتی و یەكێتی بەم سیفەتە لاكۆڵانەیانەوە هەزار جار شەریفترو زاناترو ئاقڵترن لە قەززافی و ئال سعوودو موشەڕەف و زەرداری و مەلیكی مەغریب و كەرەزای و سۆكانۆو سۆهارتۆو حسەینە ئیرشادو بێنەزیرو باقی دڕندەكانی تری حەدیقەی حەیوانات، كێشەی ووڵاتانی ئێمە كێشەی رۆژئاوایە كە ناهێڵێت وەكو بەشەر بژین و وەكو بەشەریش ئیدارە بۆ ووڵاتی خۆمان هەڵبژێرین، چما كێ ناهێڵێت ئەنجامی هەڵبژاردنەكانی عێراق راگەێنرێت كە 70 رۆژیان بەسەردا تێپەڕیووە؟! هەر ئیحتیلالە ناهێڵێت، هەر ئیحتیلالیش بوو نەیدەهێشت سندووقەكان لە ئەفغانستان بكرێنەوە، تا حامید كەڕەزای هاواری لێ هەستا كە رۆژئاواییەكان ئەنجامی هەڵبژاردنەكان دیاری دەكەن.

م. كرێكار: راجوێیی دیدو تێڕوانین و خوێندنەوەی جیاوازی دەق (پلۆرالیزم) مایەی دەوڵەمەندبوونی راوبۆچوونەكانە، ئەمەش وای كردووە لە سەردەمانی یاوەراندا ئینوعەبباس كە زیرەكترین شەرعناسی ئوممەتەكە بوو لە مزگەوت دەرس بڵێتەوەو بیست ئاڵقە دەرسی تریش هەبێت زانای تر بیڵێنەوەو هیچیشیان خاڵی نەبێت، ئێمەی ئیسلامیانی كوردستانی راجوێیین، بەڵام لەسەر ئوسوڵی دینەكە راجوێ نین، مامۆستا عەلی باپیر دەڵێ: ئێرانیەكان وەكو ئێمە بە خەمی ئیسلامەكەوەن و لە هێرشی دڕندانەی عەلەمانیەتی كورد دەمانپارێزن، بۆیە باشتر وایە سەربەوان بین، لەگەڵیان بین، مشاوەریان پێ بكەین، مشاوەرتیان قبووڵ كەین، چونكە ئەوان لێمان نزیكترن وەك لە پارتی و یەكێتی. من پێم وایە ئەم بۆچوونە هەڵەیەو خراپەو خەتەرە، چونكە پرۆژەی شیعەگەرێتی ئێران، لە چارەسەری كێشەی ئینتیما جیاوازەكانی ئێراندان بە پێوەری ئیسلام پرۆژەیەكی شكست خواردووە، ئەوە 30 ساڵی رەبەقە نەیتوانیووە جورئەتێك بە خۆی بدات كوردێك، ئازەرێك، بەلوچێك، عارەبێك بە زمانی زگماكی خۆی شیعەگەرێتیەكەی حكومەت بخوێنێت!! یان سوننیگەرێتی مەزهەبەكەی خۆی بە فارسی بخوێنێت، سی ساڵی رەبەقە بەڵام نەیوێراوە ئازادی بداتەوە بە مەرجەعیەتە مەزنەكانی خۆی وەكو مونتەزیریی و سەنعانی، یان بە سیاسیەكانی خۆی وەكو میرحسێنی موسەوی و خاتەمی و باقی ئەو سیاسیانە كە پێشتر حوكمی خودی ووڵاتەكەیان كردووە، ئیتر چۆن دەیداتە سیاسیەكی سنەیی و بۆكانی؟! كە هەفتانە پۆل لە دوای پۆل لێیان ئیعدام دەكات، پێم وایە ئێران و ئێرانیزمەكەی مامۆستا عەلی باپیر خەتەریاتی بۆ سەر رۆژهەڵات و باشووری خۆمان زۆرە، بەڵام ئەم ئیختیلافەی من و مامۆستا عەلی باپیر وامان لێ ناكات وەكو پارتی و یەكێتی یەكتری بكوژین، یان وەكو یەكێتی/یەكێتی (كۆسرەت/فەرەیدون عبدالقادر) یەكتری بە هاوەن لە ناو شاری سلێمانیدا بكوژین، یان پارتی/پارتی (نێچیرڤان/زەعیم عەلی) یەكتری بكوژین، بە نیسبەت یەكگرتووشەوە هەر وایە، ئەوانیش دیدو بۆچوونیان هەر ئیسلامیە، خۆ لە ئیسلامەكە دەرنەچوون، بەڵێ مومارەسەی یەكترمان پێ قبووڵ نیە، چونكە پێمان وایە ئەوان مەدرەسەیەكی فیكریی/ئەخلاقین زیاتر لەوەی سیاسی بن، چونكە جورئەتی خەباتی سیاسی و چەكدارییان نیە، بۆیە هەلپەرستانە وەكو كوڕە دەوڵەمەند كێ حوكم كات ئەمان دەعوەتێكی دەكەن و خۆیان دەكەنە دۆستی!! دكتۆر عەلی قەرەداغی كە فەرشی بۆ فێرگە عەسكەریەكەی قەڵاچوالان كردە دیاری و معاشی دوو مانگی ئەمنی یەكێتیشی بە بەرتیل پێشكەش كردن!! ئێمە وا ناكەین، ئێمە نامانەوێت دوو رەفتار كەین، دەمانەوێت لەگەڵ دینەكەو موسوڵمانان و كافراندا راستگۆ بین، دەمانەوێت جەنابیشت و ئەمریكای تاغووت و نەرویجی كلكە سیاسیش بزانێت كە كۆمەڵكارییمان بەم دینە بۆ دروست كردنی دارالاسلامێكە لە كوردستانی خۆمان، ئەمەش مافی خۆمانە، هەر وەكو ئەو ماركسی و لیبراڵە كوردەی بە فیكری خۆی كۆمەڵكاریی دەكات بۆ دروست كردنی كیانێكی سیاسی لەسەر دیدو تێڕوانینی فەلسەفی و سیاسی خۆی، 

ئەمانە راجوێیین، پەیوەندیان بەوەوە نیە كە شەریعەت ناتوانێت ناوكۆییەكانمان چارەسەر كات، خۆ ئێمە ناوكۆییەكەمان نەبردۆتەوە لای شەریعەت تا نەیتوانیبێت داوەریمان كات، ئەدی هەر ئەو شەریعەتەیەو دەتوانێت كێشەكانی مارەیی و تەڵاق و میراتمان چارەسەر كات، كێشەكانی بازاڕو سەوداو مامەڵەكانمان چارەسەر كات، ئێمە راجوێییە سیاسیەكەمان بە كێشە دانانێین، چونكە بەشێكە لە راجوێیی پەسەندی بۆچوون، ئەوەی جێ گلەیی خۆمان و موسوڵمانانمانە ئەوەیە كە دەبوو هەموومان لە چوارچێوەی بەرەیەكی ئیسلامیدا كارمان بكردایە، نەك جیاوازانە، ئەمما حوكمی كۆمەڵگا ئەوە بە ئیدارەیەكی سیاسی پارسەنگ دەكرێت كە لە وویستی ئازادی خەڵكەكەوە هاتبێت، ئێمە باوەڕمان بەوە نیە ئیسلام بدەین بەسەر خەڵكیدا، چونكە ئیسلامەتی دیندارییە، قەناعەتی فیكرو ژیریی و ویژدانە، پابەندبوونی قیەم و خواپەرستی رۆژانەیە، رازی بوونە بە سنوری حەرام و حەڵاڵ و پێوەپابەندبوونی، ناشێت و ناكرێت بە زۆر بدرێت بەسەر كەسدا، كەسیش بە زۆر قەناعەتی دین و فیكری بۆ دروست نابێت، ئەگەر خوا كردی و گەیشتین بە دەسەڵات، حەتمەن هەر بەو شێوەیە رەفتار دەكەین كە دیدو رێمانی لەسەر بینا كراوە، ئێستاو ئەوسا ئەوەی پەیوەندی خۆمانی لەسەر بینا دەكەین پێنج بوارە: پەیوەندیمان بە خواوە پەیوەندی بەندایەتیمانە. پەیوەندیمان بە خەڵكەوە، پەیوەندی دادو یەكسانیە، پەیوەندیمان بە ژینگەوە، پەیوەندی پاراستن و ئاوەدانكردنەوەیەتی، پەیوەندیمان بە ژیانەوە، هەستی دەرچوونمانە لە تاقی كردنەوەی خواییماندا، چونكە پێمان وایە ژیان و سەرزەمین كێڵگەی رۆژی دوایین و چی لێ بچێنین ئەوە لە رۆژی دواییدا دەدوورینەوە، پەیوەندیمان بە رۆژی دواییەوە، هەستی بەرپرسێتی و خۆ ئامادەكردنمانە بۆ موحاسەبەو سزاو پاداشتی لای خوا.

م. كرێكار: هەر هەڵوێستێك دژ بە میللەتێك بكرێت هەڵەیە، ئێمە ناتوانین بڵێین هەموو جولەكە، هەموو عەرەب، هەموو تاجیك، بۆیە ناشتوانم وەكو جەنابت بڵێم هەموو ئیسلامیانی عەرەب و تورك و ئەوانی تریش دژ بە گەلی كورد دەوەستنەوە، چونكە ئەمە وانیە، هیچ كۆمەڵێكی ئیسلامی لە جیهاندا نیە دژ بە كورد بێت وەكو كورد، بەڵام هەیە دژ بە هەڵوێستێكی دەسەڵاتدارانی كوردە، ئەمەش لە سیاسەتدا شتێكی سروشتیە، چما جەنابت لایەنگریی عبدالله گویل دەكەیت؟! جەنابت خاتەمیت پێ پەسەندبوو؟! ئایا نوری المالیكیت پێ باشە یان تاریق الهاشمی؟! وەك تۆ هەیت ئەوانیش هەن، وەك تۆ هەڵوێست لە روداوێك دەگریتە بەر ئەوانیش هەڵوێستی شیاو لەگەڵ فیكری خۆیان و گونجاو لەگەڵ بەرژەوەندی خۆیان دەگرنە بەر، زڕە كوردێك قورئانی موسوڵمانانی سوتاندووەو دەتەوێت كابرای تورك و عەرەب بڵێن ئافەرین، ئەو قورئان سوتاندنە هەڵوێستی رەسمی دەسەڵاتی كوردیە، چونكە ئاڕاستەكەی لەوێوە دێت، ئەگەر لە هەڵەبجە قورئانیان لە بەرمیلی خۆڵە عەمەلەدا نەدۆزیایەتەوە، ئەگەر قورئانیان لە مزگەوتی خومخانەی سلێمانی لە ئاودەستدا نەدۆزیایەتەوە، ئەگەر قورئانیان بە پەڕپەڕكراوی لە ئەترافی هەولێر نەدۆزیایەتەوە، ئەگەر لە باوەنورو كەلار پۆلیس بە رۆژی روون لە نوێژی جەماعەتی نیوەڕۆدا نەچووایەتە ناو مزگەوت و قورئانەكانی نەدڕاندایەو بێ موحاسەبەش وەك بەرزەكی بانان بۆی دەرنەچوایە، كەسێكی ئەقڵ سووكیش لە نەرویج نەیدەتوانی قورئانەكە بسوتێنێت و وێنەی بگرێت و بیخاتە سەر یوتوب، لە ترسانیشدا دوای دوو رۆژ پێی لاببەنەوە، ئاخر كابرای عەرەب، تورك فارس كە ئەمانە دەبیستێت چۆن دەسەڵاتی كوردی بە كافری موتڵەق دانانێت و وەكو جولەكەیەك تەماشای ناكات؟ یان كابرای دەسەڵاتی سیاسی پووكاوەی كورد پێشمەرگەی كردۆتە كرێگرتەو لە موسڵدا پێش ئیحتیلالی خستووە بۆ عارەب كوشتن، بێ گومان كاردانەوەكەی هەر ئەوە دەبێت كە كورد بە میللەتێكی ئەقڵ سووك و ساویلكە بناسرێت، دەنا باشە بۆچی هەر حكومەتێك كە هاوكاری ئیحتیلال دەكات بە مەرجی قورس دەیكات، بەریتانیا یەكەمین مەرجی لەسەر جۆرج بۆش ئەوەبوو كە لە بەسرە جێنشین دەبێت، چونكە ساڵانێكی توولانی بوو پەیوەندی لەگەڵ هەموو سەرانی شیعە رێكخستبوو، جۆرجیا یەكەمین مەرجی ئەوەبوو كە سەربازەكانی لە ناوچەی سەوز جێنشین كات. كۆریاییەكان یەكەمین مەرجیان ئەوەبوو كە ناچنە شەڕەوە، ژاپۆنیەكان یەكەمین مەرجیان ئەوەبوو كە سەربازی شەڕ نانێرن، تەنها ئەندازیاریی و پزیشكی و خزمەتگوزاری تر، كەچی پارتی ویەكێتی پێشمەرگەی كرێگرتەیان نارد بۆ سەر فەللوجەو مەقبرەتوششوهەدای نەجەف؟! ئێ خۆ كاردانەوەی ئەمە مەتح و سەنای كورد نابێت؟!