بۆ سه‌رۆکێ هه‌رێما کوردستانێ !!

Thursday, 07/04/2011, 12:00

ئه‌گه‌ر تو خۆ سه‌رۆکێ هه‌رێما کوردستانێ ددانی، وه‌ نینه‌، چنکی به‌یانا ته‌ یا پێنج خالی یا کو ته‌ ژبه‌ر چه‌ند رۆژه‌کا بۆ خه‌لکێ کوردستانێ دایه‌، چ مه‌عنا بۆ نه‌ بوو. ته‌ قاتل و مه‌قتوول، به‌رئاڤێژ و ته‌قه‌که‌ر، زالم و مه‌زلووم وه‌کی ئێك حساب کرن.
ئه‌و به‌یانا مه‌سعوود بارزانی چه‌ند تشتا نیشاددت:
1ــ مه‌سعوود و زه‌لامێن وی چ ژ یاسایێ نزانن، گه‌رنه‌ چاوا زالم و مه‌زلووما وه‌کی ئێك حساب دکه‌ت، ئو ژبه‌ر ڤێ چه‌ندێ ژی حوکمێ وی وه‌کی یێ قه‌ره‌قۆشی بوو.
2ــ وه‌سا ژ گۆتنا مه‌سعوودی دیار دبیت کو ئه‌و بێ منه‌ته‌، ئو چ پاکیێ ب مله‌تێ کورد و ئیرادا وی ناکه‌ت، له‌وا ب عه‌قلیه‌تا دکتاتۆرا هزر دکه‌ت و ب عه‌قلیه‌تا وان دان وستاندنێ ل گه‌ل کوردا دکه‌ت. ئو وه‌کی دیار مه‌سعوود بارزانی دڤێت کو وه‌کی قه‌زافی بکه‌ت و خه‌لکێ مه‌ یێ کورد بکێشت مه‌یدانێ و ده‌ست بده‌ن جه‌کێ و جاره‌کا دی خوینا کوردا بڕێژیت، چنکی بێ رشتا خوینا کوردا بێهنا وی و زڕته‌کێن وی نایێت. به‌لێ بلا باش بزانیت کو هینگێ دێ وه‌کی قه‌زافی شه‌همزار بیت.
3ــ گه‌له‌ك جاران ژبه‌ری نهۆ مه‌سعوودی دگۆت کو یاسا سه‌روه‌ره‌ و که‌سه‌ك د سه‌ر یاسایێ را نینه‌، ڤێجا ئه‌ڤه‌ چ سه‌روه‌ریا یاسایێ یه‌ یان ئه‌و چ یاسایه‌ کو که‌سه‌کێ یاسانه‌زان ب ناڤێ یاسایێ باخڤیت و بڕیارا بده‌ت ؟! ئو کا ئه‌و سه‌روه‌ری کو هه‌تا نۆکه‌ تاوانکاره‌ك نه‌هاتیه‌ گرتن، ئو کا سه‌وه‌ریا یاسایێ کو مه‌سعوود بارزانی به‌ڕه‌ڤانیێ ژ تاوانکارا دکه‌ت ؟
4ــ ژ گۆتنا مه‌سعوودی ده‌ردکه‌ڤیت کو هه‌روه‌کی ئه‌و نه‌ سه‌رۆکێ هه‌می هه‌رێما کوردستانێ، له‌وا دان وستاندنا وی ل گه‌ل خه‌لکی نه‌ وه‌ك دان وستاندنا سه‌رۆکه‌کێ یه‌. دڤێت کو سه‌رۆکێ هه‌رێمێ ب چاڤه‌کی به‌رێ خۆ بده‌ت هه‌می مله‌تی، چ ژ حزبا وی بن یان نه‌، چنکی سه‌رۆکێ هه‌میا یه‌. به‌لێ ئه‌گه‌ر تاگیریا حزبا خۆ کر و دژی ئیرادا خه‌لکێ دی راوه‌ستا، هینگێ دێ به‌س سه‌رۆکێ حزبا خۆ بیت، ئو خه‌لك ژی نه‌ مه‌جبووره‌ کو وی ب سه‌رۆکێ خۆ بزانن.
5ــ ئه‌ڤه‌ سه‌رێ هه‌یڤه‌ك نیڤێ یه‌ کو خه‌لکێ کوردستانێ، نه‌خاسمه‌ ل پارێزگه‌ها سلێمانیێ، رابوونه‌ سه‌ر خۆ و داخوازا چاکسازی و نه‌هێلانا گه‌نده‌لیێ دکه‌ن و هه‌تا نۆکه‌ نه‌هـ که‌س هاتنه‌ شه‌هید کرن و سێ سه‌د که‌س هاتنه‌ بریندار کرن، ئو ب ده‌ها که‌س ژی هاتنه‌ گرتن و د زیندانا ڤه‌ تێن ئێسکنجه‌دان، پشتی هه‌یڤه‌ك و نیڤێ ژنوو مه‌سعوود تێت سه‌ر ته‌له‌فزیۆنی و گرتنا به‌رئاڤێژ‌ و خۆنیشانده‌را دکه‌ت مه‌رج بۆ گرتنا قاتلێن تاوانکار. بڕاستی ئه‌و ئاخفتنا وی پتر ب سه‌ر ئاخفتنا ئاغایێ عه‌شیره‌کێ ڤه‌ یه‌، نه‌کو یا که‌سه‌کی کو خۆ ب سیاسی دزانیت. ژبه‌ر ڤێ چه‌ندێ ئێدی خه‌لك ب وی چاڤی به‌رێ خۆ ناده‌نێ کو سه‌رۆکێ هه‌رێمێ، به‌لکی سه‌رۆکێ قاتلێن تاوانکار و گه‌نده‌ل و جه‌رده‌چیایه‌.