دوو جار ده‌ستان خۆش گه‌رمیان
Saturday, 01/08/2009, 12:00
نووسەرێک داوا له‌و ڕۆشنبیرانه‌ی ده‌ڤه‌ری گه‌رمیان ئه‌کا که هه‌ستاوون به سووتاندنی په‌رتووکه‌کانی فه‌رهاد پیرباڵ ، که داوای لێبووردن له‌خه‌ڵکی کوردستان بکه‌ن وکاره‌که‌یان ڕه‌خنه بکه‌ن.
ساڵی 1967 کاتێ(گیڤارا) دوای ئه‌وه‌ی تفه‌نگه‌که‌ی جووته ئه‌کاو له‌کار ئه‌که‌وێ، ئه‌که‌وێته ده‌ست سه‌ربازه‌کانی بۆلیڤی ودواتر داوای لێ ئه‌که‌ن که داوای لێبووردن له‌و کارانه‌ی بکا که به‌ئه‌نجامی گه‌یاندوه له ڕابردودا دژی هه‌موو ئیمپریالسته‌کان وئه‌وانه‌ی سه‌ر به‌و بلۆکه بوون تا ژیانی بپارێزرێ، له‌ئاکامدا پێی ووتن، من بۆ داوای لێبووردن نه‌هاتووم لێره بجه‌نگم ، بۆ ئه‌وه هاتووم له‌ناوتان به‌رم ، دواتر تفێکی کرده ناوچه‌وانی ئه‌و لێکۆڵه‌ره‌وه سه‌ربازیه‌و نه‌فره‌تی له‌هه‌مویان کرد، پاشان کوشتیان.
له‌کاتی شۆڕشی لیبی به‌سه‌رۆکایه‌تی عومه‌ر موختار له‌سه‌ر په‌تی سێداره ئیتالیه‌کان داوایان لێ کرد داوای لێبووردن له‌و کارانه‌ی خۆی بکا دژی ئیتالیا بۆ ئه‌وه‌ی ژیانی بپارێزرێ، تفێکی کرده ناوچه‌وانی ئه‌و جه‌نه‌ڕاڵه‌و مردنی هه‌ڵبژارد، ئه‌وه بوو له‌سێداره درا.
شه‌هاب وجه‌عفه‌رو ئه‌نوه‌ر و چه‌ندین ئه‌ستێره‌ی گه‌شاوه‌ی کۆمه‌ڵه‌ی ڕه‌نجه‌ده‌رانی کوردستان، دژومنی به‌عس هه‌مان داوایان لێ کردن،لێ مردن وپه‌تی قه‌ناره‌یان هه‌ڵبژارد.
ئه‌م چه‌ند نمونه‌یه‌ی سه‌ره‌وه ئه‌وه‌مان بۆ ده‌رئه‌خا که خه‌سله‌تی مرۆڤی شۆڕشگێر له قوربانیدانیاندایه وهه‌رگیز داوای لێبووردن له دوژمنانی ناکا.
په‌رتووك سووتاندن وه‌یان دڕاندنی وه‌یان پارچه پارچه‌کردنی وه‌یان کردنی له‌لایه‌ن گوڵه‌به‌ڕۆژه فرۆش وپاقله فرۆش وده‌ست گێڕو وه‌یان فه‌وتاندنی به‌هه‌ر شێوه‌یه‌ك و بۆ هه‌ر مه‌به‌ستێ بێ جیاوازی نیه ، ئه‌وه‌تا کاك یاسین بانیخێڵانی ته‌نها له شێڵفی کتێبخانه‌که‌ی لابردوه‌و هیچ کێشه‌شی بۆ دروست نه‌بوه‌و ڕه‌نگه که‌سیش داوای لێنه‌کا که‌داوای لێبوردن بکا.
کاتێ پارتی هه‌ڵئه‌ستی به کۆکردنه‌وه‌و دواتر سووتاندنی گۆڤاری لڤین ته‌نها بۆ مه‌به‌ستی شاردنه‌وه‌ی ڕاستیه‌کانه تا مرۆڤی ئه‌و ده‌ڤه‌ره پێی ئاشنا نه‌بن وهه‌روه‌ك چۆن که‌وی وده‌سته‌مۆ کراون ، لای پارتی ئه‌بێ هه‌ر به‌و شێوه‌یه بمێننه‌وه، چونکه گه‌ر وا نه‌که‌ن ئه‌وا کێشه‌ی گه‌وره بۆ پارتی دروست ئه‌بێ ودواتر هه‌موو تاوان وگه‌نده‌ڵی ومێژووی پڕ خیانه‌تیان بۆ خه‌ڵکی به‌سته‌زمانی بادینان ده‌رئه‌که‌وێ و چی تر ناتوانن فریویان بده‌ن وبه‌زۆر ده‌نگیان پێ بده‌ن.
به‌ڵام له‌کاتێکدا گه‌نجانی ڕۆشنبیرانی گه‌رمیان په‌رتووکه‌کانی فه‌رهاد پیرباڵ ئه‌سووتێنن، ئه‌وه بۆ ئه‌وه نیه تا خه‌ڵکی ئه‌م ده‌ڤه‌ره له ڕاستیه‌کان بترسێن ونه‌یانه‌وێ ڕۆشنبیر بن، به‌ڵکه ئه‌م کاره‌ی ئه‌مان بۆ ئه‌وه‌یه که ئه‌و چه‌واشه‌کاریه‌ی چه‌ندین سه‌ڵه فه‌رهاد له‌سه‌نگه‌ری کوردایه‌تی و پێشمه‌رگایه‌تیه‌وه به خه‌ڵکی ئه‌فرۆشێته‌وه ئه‌مڕۆ بۆ چه‌ند گه‌نجێكی خۆێن گه‌رم ده‌رکه‌وت که ئه‌م بۆره ڕۆشنبیره درۆی له‌ته‌کیان کردوه‌و پێوسته به‌رانبه‌ر به‌و درۆیه‌ی دۆرنامه‌کانی له‌ناو ببرێن، جا به‌رهه‌ر شێوه‌یه‌ك بێ ئه‌وا گرنگ نیه.
ئه‌وه هه‌ڵه‌یه‌کی گه‌وره‌یه کاری سووتاندنی گۆڤاری لڤین به دۆرنامه‌کانی فه‌رهاد به‌راورد بکرێ، ڕاسته هه‌ردووکیان سووتێنراون ، لێ له‌ڕاستیدا یه‌که‌میان په‌یامی ڕاستی بۆ کۆمه‌ڵێ خه‌ڵکی بێ ئاگا له‌ڕاستیه‌کان له توێی لاپه‌ڕه‌کانیدا به‌دی ئه‌کرێ وله هی دوهه‌میاندا کۆمه‌ڵی چه‌واشه‌کاری و درۆو ده‌له‌سه‌ی ڕیزکراو بۆ له‌خشته‌بردن وفریو دانی توێژی گه‌نجانی کوردستان له هه‌گبه‌یدایه.
ئه‌مه هه‌روه‌ك ئه‌و هه‌ویره وایه که گه‌ر بته‌وێ مشکێکی پێ بکوژی هه‌ندێ زه‌هری تێ ئه‌که‌ی، وه‌یان هه‌ر ئه‌و هه‌ویره‌یه ئه‌کرێ به‌نان ومناڵ وگه‌وره‌ی پێ تێر ئه‌کرێ، که‌واته مه‌حاڵه ئه‌و کاره‌ی سووتاندنه به‌یه‌ك چاو سه‌یر بکرێ.
ئه‌و کۆمه‌ڵه گه‌نجه‌ی گه‌رمیان ، کۆمه‌ڵی نووسه‌رو ڕۆشنبیری خوێن گه‌رم وتینووی فێر بوون و زانینی ڕاستیه‌کانن، خه‌ڵکانێکی به‌په‌رۆش بۆ ئه‌وه‌ی بزانن ڕۆژ له‌کوێوه هه‌ڵ دێ وله‌کوێوه ئاوا ئه‌بێ، که‌سانێکن ئه‌یانه‌وێ شتی ڕاستی فێرببن وخۆیان له چه‌وت و هه‌ڵه به‌دوور بگرن، ئه‌م گه‌نجانه شایه‌نی ئه‌وه نین هه‌ڵبخه‌ڵه‌تێنرێن ، هه‌روه‌ها شایه‌نی ئه‌وه نین داوای لێبووردنیش له‌که‌س بکه‌ن.
خه‌ڵکانی شۆڕشگێڕ ودڵسۆزو پاك باکیان به‌که‌س نیه و چاوه‌ڕوانی پاداشت وشاباشیش نین، هه‌ر بۆیه ئه‌م گه‌نجانه خاوه‌نی هزری گۆران بوون وتوانیان نه‌فره‌ت له‌هه‌ڵه‌و لیستی به‌ناو کوردستانی بهێنن و ده‌ریان په‌ڕێنن. وه په‌یامێك به مه‌سعود وجه‌لال بگه‌یه‌نن که ئه‌نفالی ئه‌مان هیچی له‌ئه‌نفالی به‌رزانیه‌کان که‌متر نیه‌و ئه‌نجامی ئه‌و هه‌ڵه‌یه‌تان ده‌نگتان ناده‌ینێ.
له‌کاتێکدا ڕووی ده‌مت ئه‌که‌یته ئه‌وان و داوای ئه‌وه‌یان لێئه‌که‌یت داوای لێبووردن بکه‌ن، به‌بڕوای من وه‌کو ئه‌وه وایه ڕووی ده‌مت بکه‌یته هه‌موو ئه‌وانه‌ی ده‌نگیان به لیستی گۆڕان داوه‌و پێیان بڵێ وتکایه داوای لێبووردن له‌لیستی کوردستانی بکه‌ن، په‌یامه‌که‌ت هه‌ر ئه‌وه ئه‌گه‌یه‌نێ.
که‌م نین ئه‌و به‌ناو نووسه‌رو ڕۆشنبیرانه‌ی که ژێر به‌ژێر کار بۆ ده‌سه‌ڵات ئه‌که‌ن وئه‌یانه‌وێ گه‌نجانمان لێ بڕه‌خسێنن وگیانه شۆڕشگێڕیه‌که‌یان لێ هه‌ڵماڵن، ماوه‌یه‌ك له‌مه‌و پێش دکتۆر که‌مال سه‌ید قادریش وویستی به‌هه‌مان شت کۆمه‌ڵی گه‌نجی خوێن گه‌رمی وه‌ك کاك ناسیح له‌خشته به‌رێ ، لێ خۆش به‌ختانه نه‌مان هێشت ئه‌و کاره ڕووبداو هه‌ر له‌سایتی کوردستان پۆست سینارێۆ پڕ مه‌ترسیه‌که‌ی که‌له‌گه‌ڵ مه‌سعود بارزانی و پاراستندا دایان ڕشتبوو، توانیم بچمه نێو بنج وبناوانی وخاڵ به‌خاڵ هه‌موو درۆکانیم بۆ شی کردوه و ئه‌و ده‌مامکه‌ی بۆ چه‌ندین ساڵ بوو له ده‌موو چاوی کردبوو، پێمان داکه‌نی ودواتر نزارو بنه‌ی له‌کوردستان نێتی پارتیدا هه‌ڵدا.
به‌بڕوای من ئه‌وه فه‌رهاد پیرباڵه ئه‌بێ داوای لێبووردن له‌خه‌ڵکی کوردستان بکا، نه‌ك ئه‌و گه‌نجانه‌ی که نایانه‌وێ تا سه‌ر گێژ بکرێن وهڕی له بڕی جیا نه‌که‌نه‌وه، کاتێ فه‌رهاد وبراکه‌ی به‌شداری ئه‌که‌ن له نووسین ودانانی ده‌ستوورێك بۆ مه‌سعود و پڕ به‌باڵای ئه‌دوورن ، ئه‌وا ئه‌و ده‌ستووره نه‌ك هه‌ر پێوسته په‌راوێز بکرێ و ڕه‌تبکرێته‌وه، به‌ڵکه پێوسته له‌سوتاندنیش زیاتری پێ بکرێ، ڕه‌نگه سووتاندن که‌م بێ بۆ کاری هه‌ندێ له‌و که‌سانه‌ی ئه‌یانه‌وێ میله‌تێ بۆ به‌رژه‌وه‌ندی خۆیان ته‌سلیم به‌که‌سێکی نه‌خۆێنده‌وارو خێڵه‌کی و ناپاکی وه‌ك مه‌سعود بکه‌ن که هیچ نرخێ نه‌بۆ میله‌ت دائه‌بێ ونه بۆ ده‌نگه‌کانیشی.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
