وڵاتی ملیاردێرەكان سەروەتەكەی بۆ كێیە؟!
Thursday, 20/02/2014, 12:00
1687 بینراوە
نزیكی سەدەیەكە كوردستان دابەشكراوە. دابەشكردنی خاكی نەتەوەیەك بە سەرچوار دەوڵەتدا پیلانێكی ترسناكی پاكتاوكردن و"ئاسمیلاسیۆن" وەك خۆلێكردن یان خودسڕینەوەی ناسنامەی نەتەوەیی كورد بە بنەما دەگرێت. لە بنەڕەتدا دابەشكردنی كوردستان بە واتای زەوتكردنی ماف و ئازادییەكانی گەلی كورد هەژمار دەكرێت، بێگومان مرۆڤ بۆ ماف و ئازادییەكانی هەمیشە لەنێو لێگەڕیندایە، ئەگەر بەشێوەیەكی كرداریش نەبێت خەون و خولیا و هیواكانی بەدوای ئازادییەوە وێڵن.
هەرلەسەر ئەو بنەمایە نەتەوەی كورد دەستبەرداری خەبات و تێكۆشان نەبووە بۆ گەیشتن بەو مافە سروشتیەی بە پیلانگێڕی دەسەڵاتدارانی جیهان لێی زەوتكراوە، لەهەر بەشێكی كوردستاندا مێژو گەواهیدەری سەرهەڵدان و شۆڕش و تێكۆشانی گەلی كوردە، سەرنەكەوتن و نەگەیشتن بە ئامانج چەندە هۆكاری دەرەكی هەیە لەوەش زیاتر هۆكاری ناوخۆیی بونی هەیە، ئەوەی جێگەی تێڕامانە دڕندەیی دوژمنان و چاو پۆشیكردنی زلهێزە بەرژەوەندی پەرستەكان نییە، بەڵكو ئەزموون وەرنەگرتنی خودی هێز و لایەنی سیاسی و خێڵەكی كوردە كە هەمیشە هەڵە كوشندەكان دووبارە دەكاتەوە،
دەردی كوشندەی كورد ئەوەیە هەردەم هێزێك بونی هەبووە كە لە پێناو چەند دەسكەوتێكی بێبەهادا ئامانجە گەورەكەی فەرامۆش كردوە، لەوەش زیاتر ڕەوایەتی داوە بە پیلانگێڕی نەیارانی كوردستان، سەرەڕای پێشكەوتنەكانی مرۆڤایەتی لەبواری تەكنیك و ئامرازەكانی سەردەم كە كارئاسانی بێوێنەی بۆ مرۆڤ فەراهەم كردوە لەبواری گەیشتن بەسەرچاوەی ڕاست و دروست بۆ ئەوەی ڕێگای ڕاست و هەڵە لە یەكترجودا بكاتەوە و بە رێگای هەڵەدا ئاراستە نەكرێت كە چی هێشتا كار و كردەوەی ئەوتۆ دەبینین لە ڕۆژی ئەمڕۆدا هەمان ڕۆژگاری كارەساتبار دێنێتەوە پێش چاوی مرۆڤ، زیاتر لە بیست ساڵە بەشێكی باشوری كوردستان لە ژێردەستی داگیركەران ڕزگاری بووە،
ئێستا كورد بۆ خۆی دەسەڵاتداری تیدا پەیڕەو دەكات، ئاوەڕدانەوە لەو بیست ساڵە حكومڕانییەی حزبی كوردی مرۆڤ ئاسودە ناكات بەقەد ئەوە ئازاری پێدەبەخشیت، ئێستاشی پێوە گەلی كورد لە باشوری كوردستان گیرۆدەی چەند كیشە و گرفتی ڕۆژانەن كە چارەسەركردنیان نەك ئەستەم نیە؛ بەڵكو زۆریش ئاسانە، خەڵكی باشوری كوردستان هەمیشە پێشەنگ بوون لە شۆڕش و بەرخۆدان بۆ گەیشتن بە ئامانج، ئەو قوربانییەی بۆ ئازادی و گەیشتن بە مافی ڕەوا دراوە لەسەر ئاستی جیهاندا كەم وێنەیە، بەڵام ئێستا هاوڵاتیان گیرۆدەی چەندین نەهامەتی ژیان بونەتەوە، جێگەی شەرمەزاریە بۆ بەڕێوەبەرانی هەرێمێك ژێرخانێكی ئەوەندە دەوڵەمەندی هەبێت، دەیان كۆمپانیای گەورەی جیهانی بواری نەوت سەرمایە گوزاری تێدا بكەن و قازانجی زۆر و زەوەند بەدەست بخەن، بەڵام فەرمانبەران و موچە خۆرانی هەرێمەكە دوو مانگ لە چاوەروانی وەرگرتنی موچەدا بن، ئەزمونی بەڕێوەبردن لەئەم هەرێمەی ئێمەدا، لە یەكەم هەنگاودا و لە سەرەتای ڕێگادا توشی ئیفلیجی بوو، ئەوەی لە هەرێمێكی سێ پارێزگایدا دەگوزەرێت بەو دەوڵەمەندیەوە نمونەی هاوشێوەی لە خراپیدا لە هیچ شوێنێك بەرچاو ناكەوێت، دابڕاندنی خەڵك لە سروشتی خۆی و وێرانكردنی دوبارەی گوندەكان بەوەی هیچ پڕۆژەیەكی پێویستی بۆ فەراهەم نەكراوە و پەلكێشكردنی خەڵكەكەی بەرەو شار و پەیوەستكردنی بەموچەی مانگانە و لەژێر هەژمونی حزبدا كارەساتێكی تری ناڕەوا بوو بەسەر خەڵكی باشوری كوردستاندا هێنرا، تەشەنەكردنی گەندەڵی و زەبەلاح بونی گەندەڵكاران لە هەموو روویەكەوە و بەتایبەتی لەڕوی ئابورییەوە بەشێوەیەك لە هەڵكشاندایە هەروەك دایناسۆرێك دەیەوێ تەواوی وڵات بخوات، ئەو كۆمەڵگایەی هەموو بنەماكانی شۆڕشی تێدا بەرجەستە بوو بڕوا و هیوا و ئیرادە و هێزی تێكشكێنراوە بە جۆرێك دەستبەرداری تێكۆشان بووە لەهەر گۆرانكارییەكی نەخوازراودا و گیرۆدەی گەورەترین نەهامەتی دەبێتەوە، ئەوەش بەو واتایە نیە گەل ڕەخنە بكرێت؛ بەڵكو ئەوە حزبە گەلی گەیاندووە بەو ئاستەی لە پێناو بەرژەوەندیەكانی خۆیدا ئامادەی هەر كارێكی ناڕەوایە، هەموو دەسەڵاتێكی خۆسەپێن و گەندەڵ و نادیموكرتی پێویستی بە گەلێكی دەستەمۆكراوە، كارەساتێكی گەورەیە كۆی هاولاًتیانی هەرێمێك چاویان لە وەرگرتنی موچەی مانگانە بێت و دەسەڵاتدارانیش دەستەوەستان بە دیار بانكی خاڵی لە دراو دابنیشن، ئەوەش لە كاتێكدایە حكومڕانی هەرێم قسە لەسەر بازرگانی كردن بە نەوت دەكەن و بۆری لە كێڵگە نەوتییەكانەوە بەرەو توركیا ڕادەكێشن و سامانی وڵات تاڵانفرۆش دەكەن و لەلایەكی تریشەوە حكومەتی بەغداش هەراسان دەكەن بە كردەوە نادەستوریەكانیان. ئەگەر بەشە بودجەی هەرێم كە لەسەدا حەڤدەی بودجەی ئێراقە رابگیردرێت لە لایەن بەغداوە كارەساتی گەورە روو ئەدات.
بەڕێوەبردنی هەر وڵاتێك بە شێواز و كردەوەی مافیایی لە ئەنجامدا تەقینەوەی جەماوەری بەدوای خۆیدا دەهێنێت، خەڵكی باشوری كوردستان بەقەد ئەو تێكۆشان و قوربانیدانەی بۆ ئازادی و مافی زەوتكراو و ژیانێكی شایستە ئەنجامیداوە و بەخشیویەتی، زیاتر لەوە دانی بەخۆیدا گرتووە و بێكاردانەوە و بەگژداچون بووە لە بەرامبەر ئەو نایەكسانی و نادادپەروەرییەی دەسەڵاتدارێتی خۆجێی.
هەرێمی كوردستان كە خاوەنی سێ پارێزگای بێ بەرهەم بێ داهات و دەست بەتاڵە بێ بۆ هاوڵاتیانی، ئایا جێی سەرسوڕمان نییە"سی" میلیاردێر و دە هەزار و هەشتسەد میلیۆنێری دۆلاری كە سەرمایەكەی هەركامەیان لەسەروی پێنج میلوێن دۆلارە لە سێ شاردا هەبێت، ملیاردێرەكانی باشوری كوردستان لە ژمارەی ملیاردێرەكانی فەرەنسا زیاترە؟!
فەڕەنسایەك هەشتا میلیۆن دانیشتوی هەیە و سەدان ساڵە وڵاتە و خاوەنی چەندین شۆڕشی ڕۆشنگەری و پێشكەوتنە تۆ بڵێی ژیانی هاوڵاتیانی بەراورد بكرێت لە گەڵ ژیانی خەڵكی هەرێم، ئەوەی جێگەی دڵخۆشیە سەرەڕای نەهامەتیەكانی ژیان هەڵوێستی خەڵكی باشوری كوردستانە بەو هەموو دڵسۆزییەوە پشتیوانی لە دەسكەوتەكانی گەلی كورد دەكات لە سەرجەم بەشەكانی كوردستاندا كە چی بەداخێكی گرانەوە دەسەڵاتدار لەم هەرێمەدا داهاتی وڵاتەكەی خستۆتە خزمەتی دوژمنانی گەلی كوردەوە و دژایەتی دەسكەوتەكانی گەلەكەمان دەكات، تۆ بڵی ئەو سزادانەی خەڵكی باشوری كوردستان كە لەچوارچێوەی بێ موچەكردن و برسیكرن و ناسەقامگیری رەوشی ئاسایش و پاشاگەردانی ... هتد ئەنجامی هەڵوێستە جوامێریەكانی نەبێت؟؟.
