وا بڕوات سێوه‌كه ئه‌گه‌نێت...وه‌ڵامێك بۆ نه‌به‌ز گۆران
Tuesday, 20/09/2011, 12:00
به چاو خشاندنێك به ناو مێژووی سیاسی كوردا،ده‌بینرێت كه سه‌رهه‌ڵدان و بزوتنه‌وه‌ی ڕزگاریخوازی و پارتی سیاسی زۆر هه‌ن،كه هه‌ر یه‌ك به ئاوازێك ئاڵای "كوردایه‌تیان" هه‌ڵ كردووه و هه‌ندێك جار زیره‌كانه به شوێن "بادا" گه‌ڕاون تا "شه‌نی" لێ بكه‌ن. "شه‌نێك" كه لای كه‌می به ده‌ست هێنانی كه‌مترین مافی گشتییه كه هه‌ر مرۆڤێك شایه‌نییه‌تی هه‌یبێت،و لای زۆریشی ده‌وڵه‌تێكی كوردییه به هه‌موو پارچه‌كانییه‌وه. له‌و پێناوه‌شدا زۆر جار زمانی جه‌نگ و شه‌ڕ و لێك تێ نه‌گه‌یشتن خواستراوتر بووه وه‌ك له زمانی دیبلۆماسی،هه‌رچه‌ند به‌رهه‌می ئه‌و "مشته دیبلۆماسییه" زیاتره له‌و "خه‌رواره جه‌نگه‌ی" كه خوێنی كوردان بۆ هه‌میشه كه‌ره‌سته‌ی خاوی بووه. گه‌ر زیاتر ڕۆچینه ناو مێژوو و بێ باك بین له خنكان له نێو "هه‌ڵه و كه‌مو كورتییه‌كان"،به جۆرێك كه "خیانه‌ت و دوو لایه‌نكاری" نه‌چێته نێو بازنه‌ی "هه‌ڵه‌كان"،ئه‌وا زۆر سانا ده‌رده‌كه‌وێت كه ڕه‌نگه جیاوازه‌كان له هه‌مان سه‌رچاوه‌وه هه‌ڵده‌قوڵێن، و وه به ته‌نها به ئاوێزه‌دا ڕه‌ت كراون و په‌رته‌وازه بوون. ئه‌گه‌ر نا،یه‌كانگیری و "هاو هه‌ڵوێستی" لایه‌نه "جیاوه‌زه‌كان" ڕوون و ئاشكرایه.
"هاوهه‌ڵوێستی" ئه‌و درمه‌یه كه سه‌رتاپا سیاسه‌تی پارته سیاسییه‌كانی ئاڵوده كردووه، و له‌گه‌ڵ هه‌ر "نوێبوونه‌وه‌یه‌كیش"،كه زیاتر به جیابوونه‌وه ده‌چێت،فۆڕمی خۆی ده‌گۆڕێت و جارێكی تر خۆی خۆشه‌ویست ده‌كاته‌وه. هۆكاری "نوێبوونه‌وه" یان با بڵێین جیابوونه‌وه‌ش سه‌ره‌تا بریتییه له درك كردن به‌و و له ئه‌نجامدا بازدانه بۆ نشێوێكی تر،به‌و هیوایه‌ی له كه‌ش و هه‌وا نوێكه‌دا نه‌ژی،بێ ئاگا له‌وه‌ی كه له ناخیاندا چه‌كه‌ره‌ی كردووه و دوای بازدان و ڕه‌نگ ڕێژكردن،وه‌ك ئه‌و جوجه‌ڵه زه‌ردانه‌ی بازاڕ ڕه‌نگی نوێ ده‌پۆشێت،كه په‌ڕیشی كرد ده‌چێته‌وه سه‌ر ڕه‌نگ و بۆی ڕه‌سه‌نی خۆی.
دوا "بازی" سیاسی كورد،بازی بزوتنه‌وه‌ی گۆڕانه ناوچه‌ی سه‌وزه‌وه بۆ ناوچه‌ی مۆر،هاوهه‌ڵوێستیش كه به ڕه‌چه‌ڵه‌ك درمێكی "زه‌رده" و بۆ ماوه‌یه‌ك "سه‌وز" وه‌رگه‌ڕاوه دواتر ڕووی له خه‌زان كرد ئه‌م جاره‌یان "مۆر" وه‌رگه‌ڕاوه و كه‌م و زۆر زۆرانبازی ده‌كات له نێوان "به‌هار" و "پاییزدا" وه‌ك له‌وه‌ی وه‌رزی سێیه‌م به مێژوو ئاشنا بكات. ئه‌وه‌ی به‌رهه‌می "به‌هاره" له‌م كێڵگه‌دا بچێنێت دواجار له ده‌ست "ڕه‌شه‌بای" زه‌رد قورتار نابێت و دنیای لێ ده‌كاته پاییز. بۆیه دوا چاره‌سه‌ر ئه‌وه‌یه كه نه‌هێڵرێت ئه‌و "درمه" په‌ڕ بكات و ده‌نگی گڕ بێت و له شه‌به‌قدا "زه‌رد" بخوێنێت.
وێنا كردنی نه‌وشیروان موسته‌فا به "كوره" ی ئه‌و بزوتنه‌وه‌یه به ته‌واوی وێنایه‌كی دروست نابه‌خشێته خوێندنه‌وه‌یه‌ك له ده‌ره‌وه‌ی بازنه،به‌ڵكو خولانه‌وه‌یه به ده‌وری هه‌مان سه‌نته‌ردا،ڕاستییه‌كان ده‌ڵێن كه هه‌نگه‌كان له ده‌وری كوره‌ی گۆڕان كۆبوونه‌ته‌وه و "شا"كه‌شیان خودی نه‌وشیروان موسته‌فایه،هێشتا وێناكردنی گۆڕان به كوره وێنانیه‌كی پێگه‌یشتوو نییه،چونكه كڕۆك و پێودانگی له ده‌ست ڕه‌گه‌زی نێرینه‌دایه كه ئه‌مه‌ش پێچه‌وانه‌ی كوره‌ی هه‌نگه كه حیكمه‌ت و جوانی و ده‌سه‌ڵات ده‌به‌خشێته ڕه‌گه‌زی مێینه و مێینه و نێرینه‌كانی تر ده‌كاته "پاڵه". به پێدانی وه‌ها وێنایه‌ك ده‌بینرێت كه هه‌موو هه‌ڵسوڕاوان "پاڵه‌ن" و ته‌نها كاریشیان هێنانی باشترین خۆراك و دابینكردنی باشترین جێگایه بۆی ،جگه له‌وه "پێوه‌ن كردنی" شایه به گه‌رای هاوهه‌ڵوێستی و خستنه‌وه‌ی وه‌چه‌ی هاوهه‌ڵوێست بۆ به ئه‌نجام گه‌یاندنی هه‌مان كار و كردار. كار و كردارێك كه پێی وایه هه‌میشه ده‌بێت تێرترین و جوان و پێكه‌وته ترینی هه‌نگه‌كان بێت و بۆ هه‌ركوێ ڕۆشت پێوه‌ی بنیشیت چونگه ئه‌و لوقمانی حه‌كیمه و ڕۆژگار جوان هاڕیویه‌تی.
به‌و پێیه‌ش،ئه‌وه شاكه‌یه كه هه‌نگوینه‌كه ده‌خوات و سێوه‌كه به ده‌ستی ئه‌و ده‌گه‌نێت. به مانایه‌كی تر،ناكرێت خودی نه‌وشیروان موسته‌فا به كێشه دانه‌نرێت و وا بزانرێت كه هه‌نگه‌كان بێ ویستی ئه‌و له ده‌وری كۆ بوونه‌ته‌وه. بۆ ڕزگار كردنی گۆڕانیش له‌و "بیمارییانه" ده‌بێت مه‌ودای ئه‌و كوره به‌رفراوان بكرێت تا زۆرترین هه‌نگ،نه‌ك پاڵه،له خۆ بگرێت،وه‌ك دوا هه‌نگاویش یاسای به "شا" بوون بگۆڕێت تا نێر و مێ،لاو و به‌ته‌مه‌ن هه‌ردوو بێ جیاوازی ئه‌و پۆسته به ده‌ست بێنن و هه‌موو مافی "نه‌فڕینیان" هه‌بێت ئه‌گه‌ر هات و "شا" "گوڵێكی زه‌ردی" پێ جوان بوو.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
