نا بۆ سه‌رکوتکردنی ده‌سه‌ڵاتی چواره‌م!
Friday, 20/03/2009, 12:00
به نیگه‌رانییه‌کی زۆره‌وه سه‌یری بڕیاری دادگا ، ده‌رباره‌ی سزادانی هه‌فته‌نامه‌ی (هاوڵاتی) ئه‌که‌ین و به پێشینه‌یه‌کی نادادپه‌روه‌رانه‌ی ئه‌زانین له سه‌رکوتکردنی ئازادییه‌کان و به‌ستنه‌وه‌ی کاری ده‌زگاکانی ڕاگه‌یاندنی ئازاددا و به بیانووی هه‌مه‌جۆره‌وه.
ده‌سه‌ڵاتدارانی کوردستان ، له‌م سه‌رده‌مه‌ی پێشکه‌وتنی مرۆڤایه‌تی و مافی مرۆڤ و ئازادییه‌کاندا ، له بری ئه‌وه‌ی که ده‌ستپێشخه‌ر بن له دابینکردنی ئه‌و ماف و ئازادییانه‌دا ، به داخه‌وه و به کرداره‌کانیان ده‌ریئه‌خه‌ن که ته‌واو پێچه‌وانه‌ی ماف و ئازادییه‌کانی سه‌رده‌من.
جارێک سه‌رنوسه‌ری ئه‌م ڕۆژنامه و جارێک سه‌رنوسه‌ری ئه‌و گۆڤار و ئه‌مڕۆش سه‌رنوسه‌ری گۆڤاری (ڕێگا) و هه‌ر ڕۆژه‌ی کارمه‌ندێکی ڕاگه‌یاندن ، به بیانووی بێ بنه‌ماوه ئه‌یانگرن و سزایان ئه‌ده‌ن! ئه‌مه جگه له‌وه‌ی که خوێنی ڕژنامه‌نوسانیش ڕژاوه و تا ئێستاش ده‌سه‌ڵاتداران ، تاوانبارانیان ئاشکرا نه‌کردووه ، وه‌ک کوشتنی سۆرانی مامه حه‌مه‌ی ڕۆژنامه‌نوسی لاو. هه‌روه‌ها ڕفاندنی چه‌ندان ڕۆژنامه‌نوس و کارمه‌ندانی ده‌زگا هه‌مه‌جۆره‌کانی ڕاگه‌یاندن و لێدانیان و له لایه‌کی تریشه‌وه هه‌وڵدان بۆ کڕینیان ، یان نانبڕین و کپکردنی ده‌نگیان.
له هه‌مان کاتیشدا سوکایه‌تی پێکردنیان له لایه‌ن به‌رپرسانه‌وه به ناووناتۆره‌ی هه‌مه‌جۆره ، وه‌ک ئه‌وه‌ی (با وه‌ک سه‌گ بوه‌ڕن).
ئه‌بێت داد و دادپه‌روه‌ریی له‌ژێر باڵی ده‌سه‌ڵات ده‌ربچن و دوای په‌یامه مرۆڤایه‌تییه پیرۆزه‌که‌یان بکه‌ون و ڕێ نه‌ده‌ن که ببن به ئامرازێک به‌ده‌ست ده‌سه‌ڵاتدارانه‌وه.
له کاتێکدا که دادگاکانی کوردستان داکۆکیی له ده‌سه‌ڵاتداران و گه‌نده‌ڵییه‌کان ئه‌که‌ن و ڕۆژنامه‌نوسان و گۆڤار و ڕۆژنامه‌کان سزا ئه‌ده‌ن! له هه‌مان کاتیشدا هه‌زاران داوا و شکاتی هاونیشتمانییان له‌سه‌ر به‌رپرسان و ده‌سه‌ڵاتداران ساڵانێکه له دادگاکاندا که‌وتوون و پشتگوێخراون ، ته‌نانه‌ت به‌ده‌نگ ئه‌و شکات و داوایانه‌شه‌وه ناچن که هاونیشتمانییان و قوربانییه هه‌مه‌جۆره‌کان له‌سه‌ر جاش و سیخوڕ و کوردکوژه‌کان ، ساڵانێکه تۆماریان کردوون!
ئه‌بێت ده‌سه‌ڵاتداران و دادگاکانیان له‌بری ئه‌وه‌ی که به‌په‌له سزای ڕۆژنامه‌نوسان بده‌ن ، هه‌ر به‌و په‌له‌یه‌ش لێکۆڵینه‌وه له باسه‌کان بکه‌ن و به‌دواداچوون بکه‌ن و ئه‌و که‌سانه ڕاپێچی دادگاکان بکه‌ن که تاوانبارانی جینۆسایدی گه‌لی کوردستان ئازاد ئه‌که‌ن و داڵده‌ئه‌ده‌ن!
داوا له ده‌سه‌ڵاتداران و دادگاکانیان ئه‌که‌ین که له بڕیاره‌که‌یان ده‌رباره‌ی (هاوڵاتی) ، په‌شیمان ببنه‌وه و سنورێک بۆ ئه‌و پێشێلکردنانه‌ی مافی مرۆڤ و ڕۆژنامه‌نوسان و ئازادییه‌کان دابنێن.
هه‌روه‌ها داوا ئه‌که‌ین که ده‌ستبه‌جێ سه‌رنوسه‌ری گۆڤاری (ڕێگا) ئازاد بکه‌ن و چی تر ده‌نگی ئازاد سه‌رکوت نه‌که‌ن.
بوونی ڕاگه‌یاندنی ئازاد له هه‌ر جێیه‌کی دنیادا ، نیشانه‌ی پێشکه‌وتن و دیموکراتی و سه‌روه‌ریی یاسا و پارێزراویی ماف و ئازادییه‌کانه ، بۆیه ئه‌بێت ده‌سه‌ڵاتدارانی ئه‌مڕۆ و ئاینده‌ی کوردستان ، ئه‌و ڕاستییانه بزانن و له‌پێناوی سه‌رکه‌وتنی ئه‌زمونه‌که‌ماندا و له‌و بواره‌دا ده‌ستپێشخه‌ر بن ، نه‌ک سه‌رکوتکه‌ر.
18-03-2009
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
