بزوتنەوەی گۆڕان شتێکی گرنگی فەرامۆش کردووە
Sunday, 15/09/2013, 12:00
1884 بینراوە
بزوتنەوەی گۆڕان کە درێژکراوەی باڵی ڕیفۆرمی ناو یەکێتی نیشتیمانی کوردستانە لە گەڵ چەند ڕەوتێکی نەتەوەیی و نیشتیمانی ڕیفۆرمخوازی تری کوردستاندا
بە ڕێبەرایەتی کەسایەتی نەوشیروان مستەفا کە سەرکردەیەکی خاکی و سادەو خۆنەویستی باڵای ڕەنجاوی یەکێتی بوو لە دوای ٢٥/٧ /٢٠٠٩ پێکهێنرا، ئەم بزوتنەوەیە هەر لە ناوەکەیدا مزگێنییەکی گەورەو ئومێدێکی مەزنی بەخشییە کۆمەڵگەی کوردی ، چونکە دوای سەردەمێکی درێژ لە جاڕس بوونی خەڵکی بە دەست شێوازی بەسەرچووی کارگێڕی وڵات و کلتوری دۆگمای خێڵەکی کارپێکراوەوە لە ناو ماکینەی دەسڵاتدا ، لە ترۆپکی دەسڵاتدا یەکێك لە هەرە سپی ترین و بەرزترین سەرکردەکانی دەسڵاتی بەشێکی هەرێمی کوردستان هاوشانی زۆرینەی خەڵکی ماندوو خەباتگێڕی کوردستان نیگەرانێکانی ئاشکرا کردوو دەنگی هەڵبڕی و وتی ئیتر بەسە ستەم و نادادی، ئیتر بەسە بەشبەشێنەو خزم خزمێنەو خێڵ خێڵەکێ و ناوچەچێتی ، ئیدی بەسە بە تاڵان بردنی داهات و بەفێڕۆدانی سامان و دەسبڵاوی لە خەرجی گشتیدا ، ئیتر بەسە ئەنجام گەیاندنی پڕۆژە بەکاڵ و کرچی ، هەرچەندە ئەم دەنگ هەڵبڕین و هاتنە گۆیە زۆر درەنگ بوو چونکە شێوەیەك لە کلتوری دروست کردبوو لە کۆمەڵگەی کوردیدا ، کلتوری دەسبڵاوی دەسڵات و بێباکی لێپرسراوو گوێنەدانی بە هیچ جۆرە یاساو ڕێسایەك لە لایەك و کلتوری بێدەنگی و ترس و تۆقینی هاوڵاتیانیش لە هاتنە دەنگ لە بەرامبەر ئەم بێدادستانە لە لایەکی کەوە ، گۆڕستانێکی لە مرۆڤی زیندوو دروست کردبوو کە ڕۆبۆت ئاسا ئاراستە دەکران و کۆنترۆڵ دەکران ، دەسڵات و ئۆرگانە حزبییەکانی بارجەلیزم لە سای ئەم کەشە خودکارەیاندا هەلومەرجێکی وەهایان بۆ خۆیان ڕەخساندبوو کە سەر لەبەری کایەکانی ژیان و هەموو جومگەکانی حوکم و دەسڵات و کارگێڕی وڵاتیان خستبۆ ژێر دەسڵاتی بێسنوری خۆیانەوە ، هەر لە دامەزراندنی ژینگە پارێزێکەوە هەتا دامەزراندنی وەزیرێک ئۆرگانەکانی حزب لە پشتیەوە بوون، دەسڵات هەر بەمە نەوەستا بوو کە ژیانی سیاسی و ئابووری کۆمەڵگەی کوردی داگیر بکات و بەس ، بەڵکو کار گەشتە سەر داگیر کردن و کۆنترۆڵ کردنی ژیانی کۆمەڵایەتی خەڵکیش، بارجەلیزم هەستا بە زیندوو کردنەوەی بیرۆکەی خێڵەکی و چەندان سەنتەرو ناوەندیان لە ژێر ناوی جیاجیادا بۆ خێڵەکانی کوردستان دروست کرد لە پێناو جوڵاندنی هەست و سۆزیان و دواتر چنینەوەی ئینتیماو هەڵوێستیان کە بێگومان بەم کارەشیان کەلێنێکی نوێیان کردە ڕیزی گەلەکەمانەوەو جارێکی کە لە هەزارەی سێیەم و سەردەمی یەکێتی نێوان گەلاندا ئەمان تازە بەتازە بیری خێڵەکی و ڕەگەزایەتی سەردەمی فیوداڵیزمیان کردەوە بە بەری گەلەکەماندا، ئەمەناو سەدان هەڵەی تر کە من لێرەیا توانای باسکردنیانم نییە ، بەڵام کە گۆڕان دروست بوو ئومێدێك هاتە گۆڕێ بۆ پوچەڵکردنەوەی زۆرێك لەم هەوڵە خراپانە ، هەرچەندە لە کایەی سیاسی و ئابووریدا گۆڕان هەنگاوی باشی هەڵهێناو تاڕادەیەکی باشیش دەسڵاتی بە ئاگا هێنا لە مەترسی ئەم ئاکارانەیان و تا ئەندازەیەکی سنوردار توانی پێش بە هەندێك کاری گەندەڵی بگرێت یاخود سنورداریان بکات لە ڕێگەی میدیاو کەمپەین و جوڵانی جادەو یاداشت و نامە ناردنەوە بۆ ڕێکخراوە ناو دەوڵەتی و جیهانییەکان ، کە شایستەی نرخاندن و ستایش کردنە ، کە بێگومان سەرەتا ئەم هەنگاوانەی کە گۆڕان بۆ ڕێگری لە گەندەڵتر بوونی کایەی ئابووری و ڕامیاریدا هەڵیگرتن لە خۆیەوە دەستی پێکرد ، واتە سەرانی بزوتنەوەکە پێشتر خۆیان داماڵی لە هەموو جۆرە چڵك و خۆڵێکی گەندەڵی کە پێوەیان بوو کە هەڵبەتە هەموشیان چڵكن و خۆڵاوی نە بوون ، بەڵکو تیایاندا بوو سپی وەك بەفری قەندیل دەچۆوە ، بێگەرد بوو لە هەموو جۆرە خەوش و گەردێکی گەندەڵی ئابووری و کارگێڕی ، بەڵام هەشبوو سیستم تێوەی گلاندبوو لە چڵك چەری خۆی ، بەڵام گرنگ ئەوە بوو کە لە نیوەی ڕێگەشدا بێت بە کاروانی گۆڕانخوازاندا گەشتن و توانییان بیابانی دووری، لە خەڵك و میللەت تێپەڕێنن و خۆیان بگەیەننەوە باوەشی گەل ، بەڵام بزوتنەوەکە شتێکی لەبیر چووە ئەویش خۆ داڕنینی هەندێك لە سەرکردە باڵاکانی ناوێتی لە هەندێك نازناوو ناونیشانی سەدەکانی ناوەڕاست و سەردەمی کۆمەڵگەی چینایەتی و سیستمی فیوداڵی وەکو زاراوەکانی شێخ و بەگ و جاف هتد ، کە هەموومان دەزانین ئەم پاشگرو پێشگرانە داهێنراوی کۆمەڵگەیەکی نەریتی داخراوو تا ڕادەیەکیش دوا کەوتووە ، کە پێویست بوو خودی ڕێکخەری گشتی ئەگەر بە فەرمانیش نەبوایە بە ڕێنمایی یان پێشنیار ئەوەی بدایە بە گوێی هەڵسوڕاوانی ئەم بزوتنەوەیەداو ئەو ناونیشانە خێڵەکی و ڕەگەزایەتیانە وەلا بنرایە ، بۆ ئەوەی چۆن گۆڕان لە کایەی سیاسەت و کارگێڕی و ئابووریدا شوێنەواری فشارە میدیایی و پەڕلەمانییەکانی دیارە ئاواش لە کایەی کۆمەڵایەتی و جڤاتیشدا پێشەنگی وەلانانی نەریتە کۆنەکانی بەجێماوی سەردەمی چینایەتی بوایە ، چونکە زۆر دەبیستم لە خەڵکی سادەو دڵسۆزی ناو کۆمەڵگە ئەم پلارو توانجە ڕوو بەڕووی بزوتنەوەکە دەکەنەوە کە دەڵێن بابە خۆ کاك نەوشروانیش دەوری بەشێخ گیراوە ، بۆیە تکا دەکەم با بە هەموومان نەك لە ناو گۆڕان و پارتەکانی کوردستاندا بەڵکو لە ناو خێزان و فەرمانگەو بازاڕو کۆمەڵگادا لە کاتی خۆ ناساندن و بانگ کردن و ئاخاوتندا هەندێك ناونیشان و ئەدرەسی سەردەمە تاریکەکان هەیە خۆمانی لێبپارێزین ، بە تایبەتی ئەم چەندە بۆ هێزێکی مۆدێرنی کراوەی گۆڕانخوازو نوێخوازی وەکو گۆڕان یەکێکە لەو کارە گرنگانەی کە لە کایەی کۆمەڵایەتیدا پێویستە دەستیان بۆ ببات و هەر هیچ نەبێت ڕێگری بکات لە خۆناودێر کردنی هەڵسوڕاوەکانیان بەو ئەدرەسانە کە بە هیچ جۆرێك لە گەڵ ڕۆشنبیری تاکیێکی گۆڕانخوازدا یەکانگیر نییە ، کە ئەمەش خوا نەخواستە هێنانە خوارەوەی گرنگی هیچ دەستەو تاقمێك نییە هێندەی هەوڵێکە بۆ بڵاو کردنەوەی وشیاری و چەسپاندنی بنەماکانی یەکسانی و وەكیەکی مرۆڤ ، هەروەك بەڵگەنامە ناودەوڵەتییەکان و ئاینی پیرۆزی ئیسلامیش ئاماژەیان بۆ کردووە .
