زیادەرەوییەكانی بارتی و یەكیتی لە بیادەكردنی دەسەلاتدا

Thursday, 12/09/2013, 12:00

چركەكانی كاتژمێرەكەم هاودەنگ لەگەڵ ترپەكانی دڵم سات لەدوای سات بەئاگام دێننەوەو پێم ڕادەگەیەنن كەوا تێپەڕینی هەموو چركەو خولەكێكی بەر لە 21 ی ئەیلولی 2013 نزیك بوونەوەو نزیكبوونەوەیەكی تری هەرەسهێنانی گەندەڵی و ناپاكی و نادادپەروەرییە لەم هەرێمی كوردستانەداو لەبەرامبەریشدا هێدی هێدی ڕوون بوونەوەی ئاسۆی كورد و هەڵهاتنی خۆری ئاسوودەیی و ئارامی و بەرقەراربوونی دادپەروەری و یەكسانییە بۆ ئەم گەلە ستەمدیدەیە.
ئەگەر ئەم چەند دێڕەی سەرەوە ڕەنگدانەوەی خەیاڵ و عاتیفەی ئینسانیم بێت و هەڵقوڵاوی فیكرو ئەندێشەی تێكەڵ و پێكەڵ و لێكدانەوەی تیۆرییانەی ئەم چەند ڕۆژەی دوایی بێت كە ڕۆژ بە ڕۆژ لە وادەی هەڵبژاردن نزیك ئەبینەوە، لە هەمان كاتیشدا زادەو هەڵهێنجراوی واقیعی تاڵی ژیانی ئەم بیست و دووساڵەی ڕابوردووە كە ئەم میللەتە خێر نەدیوو ستەمدیدەیە لە سایەی حوكمڕانی پشتاوپشتى ئەم دەسەڵاتەی ئێستادا چەشتوویەتى.
گەر بمانەوێت لاپەڕەكانی ڕابوردووی ڕەش و بێ پێزی ئەم دەسەڵاتە هەڵبدەینەوە، ئەستەمە بتوانین بە چەند دێڕ و پەرەگرافێك وەسفی ناپاكی و زوڵم و ستەمیان بكەین، بەڵكو دەیان و سەدان كتێب نایگرێَت.. من هەوڵ ئەدەم بەشێوەیەكی كورت و خێرا چاوێك بەڕابوردووی ئەم دەسەڵاتە گەندەڵەدا بخشێنم و تەنها بۆ نموونە مشت بدەم لە خەرمانی بێ پێز و بێ بەرەكەتیان.. دەمەوێت تەنها باس لەو لایەنانە بكەم كە لە چوارچێوەی پەیبردن و ئەقڵی سنوورداری خۆمدا بەدی دەكەم، ئەگەر نا ئەوەی تۆ دەیزانی من نایزانم، ئەوەی ئەو ئەیبینێ تۆ و ئەوی تر ئاگاتان لێی نییە.. بەم شێوەیە من و تۆ و ئەو و هەموومان هەریەكەو كۆمەڵێك نموونەی ناشیرینی شێوازی حوكم كردنی ئەم گەندەڵانەمان لایە.
من تەنها باسی لایەنێك لە لایەنە نێگەتیڤەكان ئەكەم كە لە ئەنجامی حوكمڕانی ئەم چەند ساڵەی دواییدا بەبەرچاوی هەموومانەوە بووەتە دیاردەیەكی هەرە مەترسیدار كە ئەگەر بەردەوام بێت، ئەوا نەك تەنها خودی دەسەڵات خۆی، بەڵكو لە كۆتاییدا زیانێكی هەرەگەورە و هەمەلایەنەی لەسەر ژیانی تاك بە تاكی كۆمەڵگای كوردی و پاشانیش بۆ یەكجاری لەناوچوونی خەونی سەدەها ساڵەمان كە ئەستەمە بە پیادەكردن و بەردەوام بوونی سیاسەتێكی لەم شێوەیە لەلایەن ئەم دەسەڵاتەوەو لەبەرامبەریشدا بێدەنگی و بێ هەڵوێستى من و تۆ و هەر تاكیكی ئەم گەلە بتوانین نەك دەوڵەت پێك بهێنین بەڵكو ئەم كیانەی ئێستاشمان بمێنێتەوە.
خوێنەری بەڕێز ... ئەزانم كە ئەو پێشەكییەی سەرەوە هەندێك بێزاركەر بوو، لەگەڵ داوای لێبوردنی زۆرم ، با ئێستا پێكەوە بچینە ناوەرۆكی باسەكەوە:
"زیادەڕۆیی لە مومارەسەی دەسەڵاتدا" ئەو بابەتەیە كە ئەمەوێت لەسەری بدوێم ... بەڕێزان، ئەم ناسیاسییانەی كە تا ئێستا لەسەر تەختى دەسەڵاتن و ئەشیانەوێت هەروا بۆیان بچێتە سەر و بەردەوام بن، لە هەر قوژبنێكی تری دنیا، لەدواكەوتووترین ووڵاتی جیهان ئەمەیان بكردایە دادگایی دەكران و لێپێچینەوەیان لێ دەكرا.. ئەمانە زیادەڕۆییەكی وەها گەورەو بەرچاویان لە سەروەت و سامانی ئەم نیشتمانەدا ئەنجام دا كە گەڕاندنەوە و قەرەبووكردنەوەیان ئاستێكی بەرزی هۆشیاری و كاتێكی ئێجگار زۆری پێویستە.. ئەوەی كە ڕژێمی گۆڕبەگۆڕی بەعس نەیپەرژا بیگاتێ ئەمان بە زیادەوە بۆیان تەواو كرد.. ئاخر نەهامەتییەكە لەوەدایە بەعس ناوی خۆی نابوو دوژمن، بەڵام ئەمان لەپاڵ ووشەی پیرۆزی دڵسۆزی و هاوزمانی و نیشتمانپەروەریدا دەستیان خستووەتە بینەقاقەی ئەو خەڵكە، گەر نا ئێستا دەمێك بوو ئەمانەش هاوشێوەی سەددام كۆتاییان دەهات.. ئەو قات و قڕی و گرانی و شەڕو ئاشوبەی كە بەعس بەرپای كردئەمان لەپاڵیداو بە دیوەكەی تردا ئەنجامیان داو هەلەكەیان بۆ بەرژەوەندی خۆیان قۆستەوەو بەردەوامیشن، ئازارەجەرگبڕەكەش ئالێرەدایە.. لێرەوە ئەمەوێت لە چەند خاڵێكدا "تەنها هەندێك" لەو زیادەڕۆییانەتان بیر بخەمەوە:
خاڵی یەكەم/ بەعس ئازادی لێ زەوت كردبووین .. ئەمان ئازادییەكی وایان پێداین كە هەموو بەنج بووین لە ئاست بینینی كارە نەشیاوەكانیاندا.. ئاودیوكردنی شۆڤڵ و ئامێركان لە دوای ڕاپەڕین بهێنەرەوە یادی خۆت كە دەستپێكی گەندەڵى و ناپاكی و دەستپیسی سەرانی ئەم دەسەڵاتەی ئێستا بوو.
خاڵی دووەم/ بەعس هەژاری كردبووین.. ئەمان هاتن فریامان كەوتن و بەكۆمەكی ووڵاتان و بە نەوتی خۆمان هەموومانیان لەژێر هێڵی هەژاری و برسێتی دەركرد.
خاڵی سێهەم/ سەردەمی بەعس سەردەمی گرانی بوو.. بەڵێ بەدەر لەو چەند ساڵەی دوای جەنگی كەنداو، ئەگەر بیرتان مابێت فەردەیەك ئارد لەبەسرەوە تا پێنجوێن و زاخۆ بە دوو دینار و ڕوبعێك بوو.. ئەمان هاتن بازاڕی ئازادیان فەراهەم كرد، كە بووە مایەی ڕۆژ بەڕۆژ بەرزبوونەوەی نرخی كاڵاو جیاوازی لەڕاددەبەدەری نرخی كاڵاكان نەك لەنێوان شارەكان بەڵكو لە نێوان دوو دووكانی دراوسێدا.
خاڵی چوارەم/ لە سەردەمی بەعسدا سنووری شار، بۆ نموونە لە سلێمانی جادەی شەستی بوو كە ئێستا پێی دەڵێن شەقامی بازنەیی مەلیك مەحمود، ئەی ئەو خوایەی مەلیك مەحموود فەوت و فەناتان كا، وە بە هیچ شێوەیەك ڕێگە نەئەدرا لەودیو جادەی شەستییەوە نەك گەڕەك بەڵكو تاكە خانوویەكیش دروست بكرێت.. خۆ ئەمانیش لەسەرەتاوە هەتا بەرژەوەندی خۆیان و نرخی ئەو زەوییانە وەك ئێستا نەبوو هەمان سیاسەتیان پیادە ئەكرد، ئەی قالەی حەمەجان دەیان جار لەودیو شەستییەوە خانووی بەسەر خەڵًكی هەژاردا نەڕووخان؟! بەڵام كە بەرژەوەندییان لە بەگەڕەك كردنی ئەو زەوییانە دەستی پێكرد، ئەمان شاریان فراوان كرد بە ڕێژەی لەسەدا هەزاری ڕووبەری ئەوسای شار، كەوتنە تەخشان و پەخشانی پارچەزەوی بەسەر فەرمانبەری ڕووت و ڕەجاڵدا، تاوەكو لەپاڵ ڕازیكردنی دڵی ئەو چینەوە بە پێدانی زەوییە بێ نرخ و دوورەدەسەكان سەرانسەری شار یان بۆ كۆمپانیاو پرۆژەتایبەتییەكانی خۆیان یان بۆ كەس و كار و كاسەلێسەكانیان باشترین زەوییەكانیان بۆ خۆیان لووش دا و شاریان گەیاندە ئەم وەزعەی ئێستا كە یەك مەتر زەوی نەماوەتەوە ناوێكی لێ نەنرابێت،عەرەب و تورك و فارسیش لە سلێمانی و هەولێر و دهۆك زەوی و زار و موڵكیان وەرگرتووە، ئیتر فەرمانبەری داماو بۆ خۆت تا دنیا دنیایە فۆرمی زەوی پڕ بكەرەوەو بەهیوای سەد مەتر زەوی بە.
خاڵی پێنجەم/ لەسەردەمی بەعسدا مووچەخۆری حكومەت ژمارەیەكی كەم بوون، لە گەڕەكێكدا مامۆستاو فەرمانبەر لە ژمارەی پەنجەكانی دەست تێنەئەپەڕین كە ئەوانیش تەنها سەرۆك خێزانەكان بوون، بەڵام ئێستا هەموو ماڵێكی كورد یەك بە یەكی ئەندامانی خێزانەكەیان مووچەخۆرن...كە لەسەدا هەشتای مووچەخۆری ئەم حكومەتە بێ بەرهەمن و پلانێك نییە بۆ بەرزكردنەوەی تواناو گۆڕینیان لە بەكاربەرەوە بۆ بەرهەمهێن.. ڕێژەیەكی بەرزی مووچەخۆر چەكدارن، بەو پێیە بێت بەهێزترین سوپامان هەیە، ئەی كە وایە كوا كەركووكەكەتان؟ كوا بەدیهێنانی ماددەی سەدوچلەكەتان؟ كوا پارێزگاریكردنتان لە سنوورەكان؟
خاڵی شەشەم/ لە سەردەمی بەعسدا گوندەكان هەمووی لەناوبران، بەڵام ئەمان دوای ڕاپەڕین هەموو تەركیزێكیان لەسەر بووژاندنەوەو ئاوەدانكردنەوەی ئەم گوندانە بوو تا گەیاندیانە ئەم ئاستەی ئێستامان، خۆ ئێستا هیچ گوندێك لەم كوردستانەدا چۆڵ نییە، هەریەكەی لانی كەم تاقەماڵێكی تێدایە و ئاوەدانە.
خاڵی حەوتەم/ بەعس ڕژێمێكی كاولكەر و بێ بەرهەم بوو، هەرچیمان هەبوو لە كارگەو پیشەسازی وەكو كارگەی شەكر، كارگەی چیمەنتۆ، كارگەی جگەرە، كارگەی ڕستن و چنین، كارگەی جل و بەرگ، كارگەی فەرش و مافوور، كارگەی لەقتوونان و دۆشاو، كارگەی شیرەمەنی... هتد، بەعس هەر هەموویانی وێران كرد، خۆ ئەوە ئەمان نەبوون كە هەموویان دزی و فرۆشتیان بە ئێران، نا ئەمان هاتن هەموو ئەو كارگانەیان خستەوە گەڕ و خەڵكی ووڵاتەكەیان لەسەر دامەزراند و بێكاریشیان ڕەواندەوە، ئەوە نییە یەك بەشەر نابینی بێكار بێت؟ دەرچووی زانكۆ ئەوە هەر بەرناكەوێت، هەموو دەرچوویەكی زانكۆ لە دووسێ شوێن كار ئەكات و بەڵێنیشیان داوە بەو شوێنانەی كە پێویستیان پێیان هەیە لەدەرفەتى گونجاودا كە مەجالیان بۆ پەیدا بوو كار بۆ ئەو شوێنانەش بكەن، هەروا فریا ئەكەون. ئێستا هیچ شتێك نەماوە لەم هەرێمەی خۆمان دروست نەكرێت و تەنانەت ووڵاتانی دراوسێشمان لە سایەی هەناردەكردنی ئەو بەرهەمانەی ئێمە كە لە ئاستی پێداویستى ناوخۆ زیادن حەساونەتەوە.
خاڵی هەشتەم/ لەكاتی ڕژێمی بەعسدا كەم ماڵ هەبوو ئۆتۆمبیلی هەبێت، زۆبەی ئەو ماڵانەش كە ئۆتۆمبیلیان هەبوو سەر بە ڕژێم بوون، لە هەر شەقامێكی سەرەكی شار ڕابوەستایتایە لەماوەی یەك كاتژمێردا هەمووی 10 سەیارە تێنەئەپەڕی، هەروەها لە سەردەمی بەعسدا پێدانی مۆڵەتی شۆفێری زۆر ئەستەم بوو، بگرەو بەردەی زۆری تیا بوو، كوڕی خۆی ئەویست بتوانێ ببێتە خاوەنی مۆڵەتی شۆفێری،لە سایەی ئەم دەسەڵاتەدا ئێستا ماڵ نییە لانی كەم ئۆتۆمبیلێكیان نەبێت، تەنانەت زۆربەی ماڵەكان ژمارەی ئۆتۆمبیلەكانیان لە ژمارەی ئەندامانی خێزانەكەیان زیاترە، ئێستا بچۆ لەوشەقامەی جاران بوەستە لەماوەی یەك خولەكدا هەزار ئۆتۆمبیل بەلاتا ئەڕوات، خۆ ئەمە هیچ زیانیِكی بۆ سەر ژینگەو مینگە نییە مادەم نەفسییەن هاوڵاتییان مورتاحن، كەس تووشی سەرەتان نەبووە و ڕێژەی تووشبووانی سەرەتان ڕۆژ بە ڕۆژ لە نزم بوونەوەدایە.. جگە لەوەی هێنانی ئەم هەموو ئۆتۆمبیلە سوودی بۆ گیرفانی گەندەڵەكانیش هەیە هەرلە رەسمی گومرگ و وەرگرتنی تابلۆی ژمارەو فەحسی ساڵانە و كرینی بەنزینی دزەكان و ئەم شتانە، كۆمپانیای هێنانی ئۆتۆمبیلەكان خۆ هی ئەمان نییە فەقیرانە. وە ئێستا ئەگەر تەمەنی یاساییشت تەواو نەكردبێ زۆر بە ئاسانی و بە تەلەفۆنێك دەتوانی ببیتە خاوەنی مۆڵەت، ئاساییە جا سەیارە لێخوڕین چییە خۆ تەیارە نییە با هەموو كەسێك مۆڵەتی هەبێ، لێقەومانێكە شتێكە، ئاخر بەقوربان ئەو هەموو كارەساتە مەرگ هێنە هۆكارەكەی ئەو دڵ ڕازیكردنەیە كە بەو شێوەیە شۆفێرەكان ئەخەنە سەر جادە، كاتێكیش كە بچوكترین مەسئولی گەندەڵ بە شەقامێكدا تێپەڕ ئەبێت هەموو سایدەكانی بۆ ئەوەستێنن، بۆ هاوڵاتی داماویش بەتەمان بە كامێرای چاودرێری خێرایی وەزعەكە ئەهوەن بكەنەوە گوایە لەبەرژەوەندی سەرو ماڵی خەڵكن، لە هەمان كاتیشدا لە بەرژەوەندی گیرفانی ئەو مەسئولە گەجەروگوجەرانەیە كە شەقامەكانتان ئاوا لێكرد، كە لە ناڵیشت داو لە بزماریش ئاوای لێ دێت كە لێتان كرد.
خاڵی نۆهەم/ لە سەردەمی بەعسدا تاكە زانكۆ لە هەرسێ شارەكەی كوردستان تەنها زانكۆی سەلاحەددین بوو لە هەولێر، ئاستی زانستیشی زۆر زۆر لە ئێستا بەرزتر بوو، ئێستا زانكۆ وەكو مەكتەبی ئیبتیدائی (ببورن بنەڕەتی) لێهاتووە، شار و قەزاو ناحیەو بگرە گەڕەك نەماوە قیسمێك یان كۆلێجێكی تیا نەكرابیتەوە، ئاخر زانكۆ و عیلم و شەهادە بەم شێوەیە پێش ناكەوێت، بە زیادكردنی ژمارەی زانكۆ پێش ناكەوین وەك چۆن پێش نەكەوتین، زۆر و بۆركردنی بینای بەناوزانكۆ لەكاتێكدا كە ژێرخانی زانستى لەم زانكۆیانەدا لە ژێر ئاستی زانكۆكانی دواكەوتووترین ووڵاتانی جیهانە، ئەبوایە تەركیز بكرایەتە سەر یەك دوو زانكۆ، مەرج نییە نەك هەموو ناحیەو قەزایەك بەلكو هەموو شارێكیش زانكۆی تێدا بێت، باوكێك دوو مناڵ بە ڕێك و پێكی بەخێوبكات باشترە یان دە دوانزە مناڵی بێ سەروبەر؟؟ ئاخر تۆ ئەم هەموو زانكۆیەت كردووەتەوە لە كاتێكدا نە كتێب و سەرچاوەت هەیە و نە گۆڤاری زانستیت هەیە!!! نە تاقیگەو كەرەستەی زانستى و نە مەوادو كەل و پەلی پێویستت هەیەو نە هۆڵی خوێندنی باشت هەیە، نە بەشی ناوخۆیی شایستەشت هەیە! هەمووی بەناو زانكۆیە.. هەمووی بۆ مشغول كردنی چینی گەنجان و بەهەدەردانی تەمەنی جوانی ئەو كوڕوكچە جوانانەیە تا هیچ نەبی چوار پێنج ساڵ لە خشتەیان بەریت و بواریان نەبێت زار هەڵهێنن لە ئاست دزی و فزییەكانتاندا، جگە لەوەی كە ئەو ژمارە زۆرەی قوتابی لە زانكۆكاندا تەخەرروج پێ ئەكەیت و پاشانیش دەسەوسانی لە دامەزراندنیاندا!!! خۆ ئەگەر كەمینەیەكیشیان لیرەو لەوێ كارێكیان دەس بكەوێت جورئەت ناكەن بچنە پێشەوە لەبەر ئەوەی متمانەیان بەو تۆزە عیلمە نییە كە لە زانكۆ ئاست نزمەكەكانتا شەهادەیان وەرگرتووە!!! كۆنترۆڵ كردنی مامۆستای زانكۆشت لەولاوە بوەستێ كە پاش ئەوەی پەشیمانی دادت نادا لە پێدانی سەدەها بڕوانامەی ماستەر و دكتۆرا بە واسیتەو واسیتەكاری و خزمە خزمەو كوڕی چاكە و كوڕی فلانە، لەو لایەنەشەوە ئاستى زانست و بڕوانامەی زانكۆییت وێران كرد، ئێستا لەبەرامبەر زیادبوونی ژمارەی هەڵگرانی بڕوانامەی ماستەر و دكتۆرا و بوونیان بە حساب بە مامۆستای زانكۆ كە من وەك دەرچووی یەكێك لەم زانكۆیانەی هەرێمی كوردستان دان بەو ڕاستییەدا ئەنێم ئەوەی خۆم هەوڵم نەدا بێت لەسەدا دەی ئەو زانیارییەی فێری بووم لە مامۆستاوە نەبووە، خوێندكاریش كە نە مامۆستاو نە قاعەو نەموختەبەری هەبێت خۆ بە موعجیزی رەببانی شت فێر نابێت، ئنجا دێیت و بە هەندێك ڕێ و شوێنی سەقەت چاولە هەندێك وولاتان ئەكەیت بە فیدباكی مامۆستا لەلایەن خوێندكارەوەو كۆرسبووك و ئەم شتە توڕەهاتانە مامۆستا ناچار ئەكەی ئاستی زانستی و پەروەردەیی خۆی چاك بكات؟ ئەم ڕێ و شوێنانە كاتێك لەگەڵ مامۆستای زانكۆدا دەكرێت كە مامۆستای زانكۆ كرێچی نەبێ و كە هات بۆ زانكۆش هەموو ئیمكاناتێكی تەكنیكی لەبەردەستدا بێت و شەش حەوت دكتۆری زانكۆش نەترنجێنیتە ژوورێكی سێ بە چوارەوە.
خاڵی دەهەم/ لە سەردەمی بەعسدا سەدان هەزار تاكی كورد بە گەورەو بچوك و نێر و مێ وە ئەنفالكران بێ ئەوەی كەسێك هەبێت لە بەرامبەردا بێتە گۆ، كە ئەمان هاتن هەوڵی زۆریان دا كار لەسەر دۆسیەی ئەم كارەساتە بكەن تا لە كۆتاییدا توانییان چارەنووسی ئەنفالكراوەكانیش دەربخەن و ئەو كەسانەش كە لە دوایان بەجێ ماون ئێستا هایلایف لە كەمالی ژیانی رەفاهییەتدان و شارێكیان بەتایبەتی بۆ دروست كراوە. خۆ بە ناوی ئەوانەوە هیچ بودجەو پارەیەك نەخوراوەو قۆرخ نەكراوە.
خاڵی یانزەهەم/ بەعسی گۆڕبەگۆڕ دەیان هەزار مرۆڤی بێ تاوانی شاری هەڵەبجەی نازداریان بە گیاندار و بێ گیانەوە كیمیاپرژێن و خاپوركرد.. كە ئەمان هاتنەوە دانەنیشتن یەكسەر دەستیان كرد بە ئاوەدانكردنەوەی هەڵەبجە، ئاوڕێكی وایان لێ دانەوە ئێستا ئەگەر بچیتە ئەو شارە نایناسیتەوە وا ئەزانی بەناو یەكێك لە شارەكانی ژاپۆندا پیاسە ئەكەیت، خەڵكەكەشی هەموو چارەسەر كراوەو ئەسڵەن كارەساتەكەیان هەر لە بیر چووەتەوە.
تێبینی: سەبارەت بە هەردوو خاڵی 10 و 11 كە مەبەستم لە هەردوو كارەساتی جەرگبڕی ئەنفال و هەڵەبجەیە دیارە هەرچەندی لەسەر بنووسرێ هەر كەمە، نەك نووسەرێكی لاوازی وەك من هیچ نووسەرێك ناتوانێ بە ووشە گوزارشتیان لێ بكات چونكە تەنها بە دەم ئاسانەو ئەوەی خۆی لەكارەساتەكاندا نەبووبێت نایزانێ، بۆیە بە داوای لێبووردنەوە زۆر بەكورتی لێی دوواوم.
خاڵی دوانزەهەم/ لە سەردەمی بەعسدا خوێندن بەخۆڕایی نەبوو، كێ ئەیتوانی مناڵ بنێرێتە بەر خوێندن، ئنجا قوتابخانەكان هیچ بایەخیان پێ نەئەدرا، كتێب و دەفتەر و قرتاسیە هەمووی بە پارە بوو، هەندێك قوتابخانەی باش هەبوون بەڵام تایبەت كرابوون بە مناڵی دەوڵەمەند و بەعسییەكان... بەڵام ئیستا هەموو كەس شاهیدى ئەوەن كە بایەخێكی زۆر بە قوتابخانەكان دراوە و ئینجا سستەمی خوێندن بووە بە سویدی و خوێندنگای تایبەت هەر بوونی نەماوە، خوێندنیش لە سەرجەم قوتابخانەكان بەخۆڕاییەو كتێب و دەفتەرو پێداویستى هەر مەپرسە چەند زۆرە، كە ئەشچیتە ناو ئەم قوتابخانانەوە هەر حەز ناكەی بێیتە دەرەوە ئەوەندە پۆلی جوان و تازە و كتێبخانەو توالێتی عەنتیكە و باخچەی گوڵ و گوڵزاری تیایە لە خۆشییا گریانت دێ كە مناڵەكەت ئالێرەدا ئەخوێنێ و ئاهێكیش بۆ ڕابوردووی خۆت هەڵئەكێشى و ئەڵییت خۆزگە ببومایەتەوە بە مناڵ.
خاڵی سیانزەهەم/ هەرچەندە بڕوام بەو ووتەیە نییە كە گوایە ژمارە سیانزە (13) ژمارەیەكی شووم بێت كە نەك هەر لەناو میللەتی كورد لە زوربەی میللەتانی جیهان بەم شێوەیە ئەڕواننە ئەم ژمارەیە، لەبەر ئەوە ئەمەوێت شوومترین خاڵ لە ژمارە سیانزەدا باس بكەم و بیكەم بە خاڵی كۆتایی، ئەگەر نا وەك لە سەرەتاوە ئاماژەم پێكرد، نەك بە سیانزە خاڵ بەڵكو بە سیانزە ڕەفە كتێب شوومی ئەم دەسەڵاتە باس ناكرێت... پشت بەخوا و بە ئیرادەی گەلەكەم ساڵی سیانزەی دوای دوو هەزار دەبێتە مایەی كۆتاییهێنان بەم دەسەڵاتە شوومە و بە دواشیا هەموو شوومییەكان و نەهامەتییەكانی گەلی كورد كۆتایی پێ دێت، بڕوام پێ بكەن بێ ئەوەی پێشتر ئاگاداربم هەر ئێستا لاپەڕەكانی مسوەدەی ئەم نووسینەم ژمارد سیانزە لاپەڕەبوو. بە هەر حاڵ با خاڵی سیانزەكەم بیر نەچێت... لە سەردەمی بەعسدا ڕۆژانە لە هەموو عیراق تەنها نۆسەد هەزار بەرمیل نەوت كە سەد هەزاریشی كەمترە لە یەك ملیۆن دەرئەهێنرا، ئەمە لە كۆتایی هەشتاكان، مەسرەفی ئەو هەموو شەڕەی عیراق و ئیران و شەڕی كوردكوژیشیان لێ دەر ئەكرا، سەددامیش دوای خۆی (10) تۆن ئاڵتوونی داڕشتەی لێ بەجێ ما، هێشتا خەڵكی عیراق بەدەر لە مەسەلەی ترس و تۆقاندن، لە لایەنی گوزەرانەوە لە زۆربەی میللەتانی جیهان باشتر ژیانیان دەگوزەرا، بەڵام ئێستا 3 تا 4 ملیۆن بەرمیل نەوت دەرئەهێنرێت كە زیاترە لە چوار هێندی ئەوسا، بڕوا ناكەم لە بەرامبەردا ژمارەی دانیشتوان چوار هێند بووبێت، ئەو كات دانیشتوانی عیراق هەژدە ملیۆن بوو، ئێستا ئەگەر حەفتا ملیۆنیش بێت كە پەنجاش نییە، بە هەموو پێوەرێك پێویستە خەڵكی عیراق لە هەشتاكان باشتر بژی، بەڵام وانییە.
تێبینی: خوێنەری بەڕێز تكام وایە هەڵە لێكدانەوە بۆ بۆچوونەكانم نەكەیت كە هاتووم بەراوورد لە نێوان رژێمی بەعس و رژێمی پارتی و یەكێتیدا ئەكەم .. هەرگیز نەمووتووەو ناڵێم بەعس باش بووە چونكە بە چاوی خۆم زوڵم و ستەمی بەعسییەكانم بینیوە، لەگەڵ داوای لێبوردنی زۆرم لە كەس و كاری هەڵەبجەو ئەنفالكراوان و كەس و كاری شەهیدان ئەوانەی بە دەستى ڕژێمی بەعس تاڵییان چەشتووە.. مەبەستەكەم ڕوون و ئاشكرایە خۆزگە ئەم دوو حیزبەی پێكهێنەری دەسەڵات كە چارەكە سەدەیەكە حوكمرانی ئەكەن وایان لەخۆیان نەكردایە كە لەگەڵ بەعس بەراوورد بكرێن، ئەمان لە بەعسییەكانیش تاوانبارترن.
ئەوەی گرنگە لەوانەیە تۆی خوێنەر بڵێیت باسەكە لەسەر هەرێمی كوردستانە و پەیوەندی بە عیراقەوە نییە، منیش پێت دەڵێم پەیوەندی زۆری هەیە، ئەوەت بیر دەخەمەوە كە لە دوای پرۆسەی بەناو ئازادی عیراق و لەكاتی دامەزراندنی حكومەتی نوێی عیراقدا هەرچەند عەرەب ویستیان حساب بۆ كورد نەكەن و حكومەتی خۆیان پێك بهێنن بەڵام بەناو سەركردەكانمان خۆیان لەوەش هەڵقورتاند و دەستیان تێ وەردا گوایە ئەمان ئەزموونی دەدوانزەساڵ حوكمڕانی هەرێمی كوردستانیان هەیە و پێویستە عیراق چاو لە كوردستان بكات لە شێوازی بەڕێوەبردندا، ئەمە گەورەترین پەڵەی ڕەشی تاوانبارییە بەنێوچەوانی حاكمە گزگل و گەندەڵەكانمانەوە كە بوونە هەوێنی گەندەڵی لە سەرانسەری عیراقیشدا، لەسەر ئەوەشەوە نەوەستاون، بەڵكو هەموو فەرمانبەرانی حكومی ئەم هەرێمە شاهیدی ئەو راستییەن كە دەیان جار سستەمی مووچە لە عیراق دەسكاری كراوە و چاكسازی و بەرزبوونەوەی تیا ئەنجام دراوە كەچی ئەم دزانەی لای خۆمان لە هەرێم پیادەی ناكەن و ئەو زیادەیەش بۆ خۆیان لووش ئەدەن، تەنانەت جیاوازی زۆر لە دەرماڵەو ئاستی پلەكاندا كراوە لەسیستەمی مووچەی سلێمانی و هەولێر و دهۆكیشداو هەموو خەڵكیش لەوە ئاگادارن.
لە هەموو ئەمانە سەیر تر ئەوەیە ئەم هەلپەرست و پیرەگەندەڵ و ئاخر شەڕانە بیر لە وەچەكانی داهاتوو ناكەنەوە بەڵكو بیر و هۆشیان تەنها لای وەچەكانی خۆیانە كە ئەوەندەیان پارە بۆ كۆكردوونەتەوە كوڕاوكوڕیان بەخۆشترین ژیان و لەهەر دوورگەو ووڵاتێكی دنیا ئەتوانن لاف و گەزافی پێ لێ بدەن.
ئەی ناترسن و شەرم ناكەن لەوەی ئەو هەموو زیادەڕەوییەی كە لە دەرهێنانی نەوتدا ئەیكەن بەشی وەچەكانی داهاتووشە؟؟ یان ئامانجتان مسۆگەركردنی داهاتووی خۆتان و بەچكە نابووتەكانتانەو بەس؟؟ سەرجەم ووڵاتانی خاوەن نەوت لە جیهاندا كە ئەمریكا و هەندێك لە ووڵاتانى ئەوروپاش دەگرێتەوە بە بەرنامەرێژی و پلان و لە پێناوی وەچەكانی ئایندەدا كە ئەوانیش مافیان لە خێروبێرو سامانی ووڵاتدا هەیە بە ڕێژەیەكی دیاریكراو نەوت دەردەهێنن، كەچی لەم ووڵاتەی ئێمە لە سایەی سەری سەرۆكە قەزەم و گەندەڵ و برسییەكانمانەوە كە هەر تێر نەبوون تا سەری خۆشیان خوارد، بەشی دەیان جیلی داهاتووش نەوت دەرهێنراو بەهەدەر درا، لە كاتێكدا نەك جیل و میلی داهاتوو بەڵكو ئەو مرۆڤانەش كە ئێستا لە ژیاندان و بەسەر زیندوون لەو خێروبێرە بێبەش كران، كاتێكت زانی ژیانیش تەواو، یان ئەگەر بمێنی ڕۆژێك لەڕۆژان زەوییەكەش كە تەواو بنكۆڵ بووە بەسەرتا هەرەس ئەهێنێ و ئەوانیش بای بای خۆیان و جنسییەئەمریكی و ئەوروپییەكانیان.......
ئاخر تاكەی ئەم ناپاكی و نادادپەروەرییە قبوڵ بكەین؟؟؟ لەمە باشتر نابێت، مردووش لەمە باشتر ناشۆررێت، لە دەنگدانی ئەم جارەدا با وەلیان كەین، با كۆتاییان پێ بهێنین، ئەوان فرسەتی زۆریان لە ئێمە هێنا، بەڵام ئێمە ئەمە دوا فرسەتمانە لایاننەبەین خۆشیان و ئیمەش لەناوئەچین.
ئەی خەڵكینە ئێوەش نازانن كە هەموو زیادەڕەوییەكانی تر كە لە دوانزە خاڵەكەی پێشوودا باس كران و ئەوانەش كە وەك پێشتر ووتم من نایانزانم هەمووی لە پێناوی زیادەڕەوی نەوت دەرهێنانەكەدایە؟؟ بۆ ئەوەی بۆیان بچێتە سەر كە بەردەوام بن لەم كاولكاری و فەرهودەی ئەیكەن، لە هەر چین و توێژێكی ئوم كۆمەڵگایە بە هەندێك شتی بێ بایەخ و توڕەهات چەند كەسێكیان دەمكوت و لارەخواركردووە، لە كاتێكدا ئەوەی كە بۆتان كراوە لە پیاوەتی مەردایەتى و لە سەر حسابی گیرفانی ئەوان نییە، بەڵكو مافی ڕەوای خۆتە و ئیمكانیات ئەوەندە زۆرە كە زۆر لەوە زیاترت بۆ بكرێت، چونكە ئەگەر بەراوورد بكەین لە نێوان ئەو بڕە بودجەیەی كە بۆمانی خەرج ئەكەن لەگەڵ ئەوەی كە ئەیدزن وەك بەراوردی نێوان ئەو دڵۆپە ئاوەیە كە بە سەرى پەنجەتەوە ئەنووسێت كاتێك كە لە هەڵیدەكێشیت لە بەحرێك ئاو.
كەواتە ئیتر با بەس بێ، خوا ئەمانگرێ ئەگەر ئەمجارە دەنگ بدەین بەهەركام لە پارتی و یەكێتی
برای خۆشەویستم.. خوشكی بەڕێزم ..هاونیشتمانی بە ئەمەك ... ئەی سەرجەم چین و توێژەكانی ئەم كۆمەڵگا زیندووە... ئەی تاك بەتاكی كوردی ستەمدیدەو هەمیشە چەوساوەو هەرگیز خێر لە خۆ نەدیو.. ئەی كەس و كاری سەربەرزی شەهیدان..ئەی ڕۆژنامە نووسان ئەوانەی لە پاڵ ئازادی ڕادەربڕیندا بە هەرشێوەیەك سووكایەتیتان پێ كراوە ... ئەی گەنجان و لاوانی بنیاتنەری داهاتووی ئەم ووڵاتە كە دوا ڕۆژ هەر بۆ خۆتانە ... ئەی كەس و كاری ئەنفالكراوانی هەمیشە غەدر لێكراو چ لە كاتی شۆڕشی شاخ چ لە كاتی پرۆسەی ئەنفال چ لە ئێستادا ... ئەی خەڵكی هەڵەبجەی كارەساتبار و هیچ بۆ نەكراو ... ئەی خوێندكارانی زانكۆ كە زانكۆكانتان لە ئاستى ناوەندیش نزمتر كراوەتەوە و بێ ئەمەلن لە دامەزراندن .. ئەی ئەو دەرچوانەی زانكۆ كە دوای تەمەنێك لە تێكۆشان و دوای چەند ساڵ چاوەڕوانی تا ئێستا دانەمەزرێنراون ... ئەی مامۆستایانی زانكۆ كە هەمیشە پێگەیاندنی دوا وەچە لە ئەستۆی ئیوەیە ، كە بەرەو پێشبردنى زانكۆ و ووڵات تەنها بە ئێوە ئەكرێ و بەچەندین شێواز غەدرتان لێ ئەكرێ... ئەی شۆفێرانی ماندوو .. ئەی خاوەن پێداویستییە تایبەتەكان كە بە بەڵێنی بریقەدار رۆژگارتان پێ ئەبرێتە سەر .. ئەی گوندنشینان .. ئەی خەڵكی ئەو گەڕەكانەی كە دوورە دەست و بێ خزمەتگوزارین ... ئەی خانە نشینان كە مووچەی مانگانەی خۆتان دوای كەمكردنەوەو چەند مانگ جارێك بە بێ ڕێزی و منەت و شاباش وەك ئەوەی خێرتان پێ بكەن ئەتاندەنێ ... ئەی سەرجەم مووچەخۆران كە مووچەكەتان بە چەندین شێواز لێی قرتێنراوەو بەشی 10 ڕۆژ ناكات ... ئەی فەرمانبەران كە چەندین كاری نەشیاوتان لەبەرامبەر مووچەیەكی كەمدا پێ ئەنجام ئەدەن لە كاتێكدا ئەگەر ئیشی دووەم نەكەن حاڵتان واوەیلایە ... ئەی برایان و خوشكانی پارێزەری ئەم ووڵاتە برایان و خوشكانی پێشمەرگەو ئاسایش و پۆلیس ، ئەی ئەوانەی شەوڕۆژی ژیانتان گیانتان لەسەر دەستە لە پێناوی میللەتدا و دەسەڵاتیش بێ منەتە لێتان ... ئەی برایانی پۆلیسی هاتوچۆ كە ڕەمزی جددیات و دڵسۆزین و لە بەیانی تا ئێوارە لە خزمەتی گیانی خەڵكیدان .... ئەی هەژارانی ئەم ووڵاتە كە بە ووتەی ئەم مەسئولە وورگ زل و دایم ئینتەلا كردووانە هەژاری بوونی نەماوە بەڵام نازانن لە سێ بەشی خەڵك دووبەشی هەژار و زەحمەتكێشن ... ئەی ئەو ڕۆحانەی كە لە جەستەیەكی تووشبوو بە شێرپەنجەدا ئەناڵێنن ... ئەی داخ لە دڵەكانی 17ی شوبات كە بە حەماس و دڵسۆزیتان دوومانگی ڕەبەق لەبەرامبەر گوللەو كوتەك و لیسەكانی پارتی و یەكێتیدا خۆڕاگری خۆتان سەلماند تا لە كۆتاییدا بە نەشیاوترین شێوە سەرای ئازادییان لێ زەوت كردن سارد مەبنەوە ئەو داخ و جۆشەتان كە تا ئێستا ئەكوڵێت لە چەند ڕۆژی داهاتوودا دایمركێنن و هەناسەیەكی قووڵی ئازادی ڕەها هەڵمژن .. ئەی كەس و كاری شەهیدانی ڕاستەقینەی 17 ی شوبات و ڕۆژانی دواتر .. ئەی گۆڕانخوازەكان ... ئەی ئیسلامییەكان .. شیوعییەكان .. كۆمۆنیستەكان .. كاكە حەمەكان.. نەكەن لە قسەم دەرچن... نەكەن بابدەنەوە بەلای ئەو دوو حیزبە گەندەڵەدا ... باوكانی دلسۆز بۆ ڕۆڵەكانتان ... ئەی پارتییەكان .. یەكێتییەكان ... ئەوانەی كە بە هەر هۆكارێك ناچارن واخۆتان پیشان بدەن كە یەكێتی یان پارتین بەڵام لەناخەوە خۆشتان ناوێن .. مەڵێن خاوەنی شەهیدین لەو حیزبەدا.. دڵنیابن شەهیدەكانتان ئەمەیان پێ خۆش نییە كە ئیستا ئەگوزەرێت.. بەڵكو بەوە ڕۆحیان ئاسوودە ئەبێت كە ئەمانە كۆتاییان بێت چونكە ئەوان خوێنی خۆیان بەم خاكە بەخشی نەك بەم حیزبانە.. ئەی ئەو یەكێتى و پارتییانەش كە تا ئێستا هۆشتان لای خۆتان نییەو لە بەر بەرژەوەندییەكی كەم ژیانتان بەوانەوە گرێ داوە .. ئیتر بەسە .. بەكۆتایی هاتنی ئەوان ئیوەش كۆتاییتان دێ .. وەرنەوە ریزی گەل .. ئەگەر بۆ لەحزەیەكیش بێ ویژدانی خۆتان ئاسوودە بكەن .. دەنگ بەوان مەدەن ... هاوڵاتیان .. هاونیشتمانیان .. ئەی گەلی كوردی قارەمان ... گەل حیزب دروست ئەكا ... گەل حكومەت دروست ئەكا نەك بە پێچەوانەوە ... وەرن با هەموو پێكەوە حكومەتی كارا و حیزبی دڵسۆز دروست بكەین .. برواو متمانەتان هەبێت من لە هیچ كام لەو حیزبانە نیم .. تەنها جۆش و خرۆشی هەستى نەتەوایەتی و هەژارپەرستى و درك پێكردنی ئەو هەموو خیانەتەی لەلایەن ئەم دووحیزبەوە واتە یەكیتى و پارتی لەو میللەتە جوانە بەسەرجەم چین و توێژەكانییەوە ئەكرێت... ئەم راستیانە ناخمی هێناوەتە سەر كاغەز .. دوا ووشەم بۆ هەر هەمووتان ئەوەیە كە خواش پێی خۆشە ئەو شتەی تاقیت كردووەتەوە و بەدڵت نەبووە لە ئاستی داخوازی تۆدا نەبووە گەمژەییە ئەگەر جارێكی تر تاقی بكەیتەوە ... با هەموومان پێكەوە هەر كەس و لایەنێكی تری دەرەوەی یەكێتى و پارتى تاقی بكەینەوە .. یەكێتى پارتى تاقیكرانەوە و دەرنەچوون .. خۆتان بریار بدەن .. بیر بكەنەوە ....دڵنیابن حەمە شوان ببێت بە سەرۆكمان لەمانەی ئێستا باشتر ئەبێت