گەندەڵیی و دزینی سامانی گشتی دوژمنی هەرە بەهێزی ناوەخۆییە، وەک داری کڕێمێبوو لەناوەوە پەیکەری دەسەڵاتی سیاسی و ئابووریی دەڕزێنیت، بەرژەوەندیی نەتەوەیی و نیشتمانیی بەرەو هەڵدێر دەبات، دەبێتە مایەی هەژاریی و نەداری بۆ زۆرینەی خەڵکی سادە و هاوڵاتیان.
لەی خایمۆن، ئەندامێکی باڵای حیزبی کۆمۆنیستی چینی و لێپرسراوی یەکەمی کۆمپیانیای ئسولێ چینی حکومی بوو، لە ساڵی ٢٠١٨ لەلایەن دەزگەی دژە گەندەڵی حیزبی کۆمۆنیستی چینی خرایە ژێر لێکۆڵینەوە و بەڵگەکان سەلماندیان، کە ئەو لە ماوەی دەستبەکاربوونی بەرتیلی وەرگرتوە و سامانی گشتی بەهەدەر داوە. لەبەرئەوە لە حیزبەکەی دەرکرا و سزای کوشتنی لەلایەن حکومەتی چینەوە بەسەردا سەپێندرا.
لەو چەند ڕۆژەی ڕابردوودا سزاکەی خرایە بواری جێبەجێکردن. چین سزای لە سێدارەدانی وەک ئامرازێک بەکارهێنا بۆ بنبڕکردنی گەندەڵیی لە دەسەڵاتی سیاسی وڵاتەکەی و بەبێ سڵەمینەوە ئەو هەواڵەی لە میدیاکاندا جاڕدا.
لەعیراق و هەرێمی ئەمڕۆدا، گەندەڵیی و پیسخۆریی بۆتە کۆڵکەی ڕاگرتنی پەیکەری دەسەڵاتی سیاسی و مانەوەی سەڕۆک حیزبەکان. بێگومان دەسەڵاتی گەندەڵکاران لە عێراق و لە هەرێمدا لە سەروی یاسا و دادوەرییەوەیە، بۆیە تا ئەمانە دەسەلاتیان هەبێت مەحاڵە جەنگ دژی گەندەڵی ئەنجام بدرێت و ڕۆژ دوای ڕۆژیش لە پەرە سەندندایە.

پەیامی رۆژی ئەمجارەمان، لەلایەن (ئاشتی برایم ئەفەندی) نووسراوە