لەم کاتەدا، هەوڵ دان بۆ تێك و پێك دانی ئەم جۆرە هێزە، ئایدۆلۆژیایە، ئایینیە ، ئەبێتە کاری سەرەکی و پێویستیەکەی یەکجار مەزن بۆ بەرەنگاربوونەوەی و سەنگەر گرتن لێی و پاشان سڕینەوەی لەسەر نەخشەی جیهان.

لەم ڕوانگەیەوە ، کورد و خۆشبەختانە چەند هێزێکی تر پشکی شێریان بەرکەوت لەو ئەرکە پیرۆزە مرۆڤایەتییەدا بۆ بەرەنگاربوونەوەی ئەم چەتە و ڕێگر، نەخۆش و سەرلێشێواو و بەکرێگراوانەی ئەردۆگان و عەلی قەرەداغی و مەسعود بارزانی و هاوشێوەکانیان. ڕۆڵی ئەمریکا وەك گەورەترین هێزی سەربازی ئەم جیهانە و پشتگیریە ماددی و لۆجستی و سەربازی بۆ کورد بەگشتی و ڕۆژئاوا بەتایبەتی جێگەی دیار و دەست خۆشیە، لەبەر ئەوەی نادیدە کردنی ڕۆڵی ئەمریکا و هاوپەیمانەکان جگە لەوەی فەرامۆشکردنی هێزێکی گەورەیە، لەهەمان کاتیشدا لا سەنگکردنی هاوکێشەکەیە و غوبنێکی گەورەیە دەرهەق بە ڕۆڵی ئەوان. بێ ئەو هێزە ئاسمانیە بەهێزەی ئەمریکا و چەکە پێشکەوتوەکانی ، ڕەنگ بوو سەرکەوتن کات و قوربانی زیاتری لە کورد، داوا بکردایە.

ئەو بەرخوادانە مەزنەی گەلی کوردمان لە ڕۆژئاوا سەلمێنەری ئەو ڕاستییەیە، کە هەرگیز سەرکەوتن لە ژمارەی سەرباز و چەکدارەوە نیە بەقەد ئەوەی پەروەردە و چۆنێتی تێگەیشتن بۆ ئەو ئایدۆلۆژیا و پەیڕەوی کردنە لەسەر زەوی. کاتێ (بەرخودان ژیانە) بەرجەستە ئەکرێ، ئەوا بۆمان دەرئەکەوێ چ هێزێك لەپاڵ ئەم دێرەوەیە.

چ ئەفسانەیەك لەم دوو ووشەیەدا خۆی مەڵاس داوە و هەر کات بیەوێ سەرکەوتن تۆمار ئەکا..کەواتە ئەوەی ڕۆژئاوای سەرخست تێگەیشتنیانە بۆ ژیان و خۆشەویستی مرۆڤایەتی، دەنا هیچ جیاوازیەك بەدی ناکرێ لەنێوان کیژێکی ڕۆژئاوا کە چەتەکانی داعش لەناو ئەبا لەگەڵ کیژێکی باشوور کە تەنها خەریکی خۆجوانکردن و چەکوشکاریە لووت و گوپ و برۆیەتی! ئەوە چیە وا لەوەی ڕۆژئاوا کردوە سڵ لەهیچ نەکاتەوە و بە زەردەخەنەوە ڕوو دەکاتە بەرەکانی جەنگ و دوژمن لێی ئەترسێ، کەچی ئەوەی باشوور هەموو ژیانی لەخەمی دەم و چا و ڕووخساری بڵحیدایە.

بەسەرکەوتنی کۆبانی مرۆڤایەتی هەمووی سەرکەوت، خوێنی ئاڵ و گەشی ئەوانەی لەوێ گیانیان بەختکرد،هەمیشە بەختەوەرترین مرۆڤی ئەم جیهانەن و توانیان لەبری هەموان بەرگری لەهەموان بکەن.