ئۆشۆ لەکتێبی بەقورس مەیگرە دەڵێت:"دۆزەخی ئەڵمانی ، ئیتاڵی ، هندی ، یابانی  بەڕووکەش  هیچ جیاوازیەکیان نییە ،ئاگر هەریەکسانە ، سوتان هەریەکسانە ، ئازار هەریەکسانە "  

 هاوڕێیەکم  ووتی : لەیەکێک لەشەقامەکاندا چاوەڕێی برادەرێکم دەکرد  لەوکاتەدا ئارەزووم بۆ کێشانی جگەرەیەک هەستا و جگەرەکەم پێکرد  و نەفەسێکی قوڵم لێدا و چاوەکانم نوقاند  تا چێژ لەتاڵی جگەرەکەم ببینم و ئەو چەند چرکەیە  دورکەومەوە لەوهەمووژاوەژاو  داماویی و هەژاری و پۆخڵیەی  ئەوشەقامە ... لەناکاو دەنگی پیرێژنێک  بەئاگای هێنام و پرسیاری کرد لێم تۆ خاوەنی "حەیاو حورمەتی ، هەی بێ حورمەت" بە ڕاستی هاوڕێکەم  ووتی ئاوڕم دایەوە بۆ دواوە وام زانی لەگەڵ بوکەکەیدا بەشەڕ هاتووە ...!  کەچی کەسم نەدی  ژنە لەجوێندان بەردەوام بوو  ، منیش لەکێشانی جگەرەکەم . ووتی بەرەڵا من  لەگەڵ تۆمە جگەرە بۆ دەخۆی... !؟ 

ووتم   بۆچی دایەگیان خۆ ئێرە بەنزینخانە نییە، پاشان جگەرە ناخورێ دەکێشرێ  ؟

ژنە دەهری بوو بەقسەکەم  ووتی: خۆئاژەڵ نیم دەیبینم   بەرەڵا نازانی مانگی ڕەمەزانە ، تۆ کافری ؟ 

 منیش جگەرەیکم بۆ ڕاگرت و ووتم: کەڕۆژۆکەت قوپان جگەرەیەک داگیرسێنە  با هێندە جوێن لەدەمت نەیەتە دەرەوە  ..

 لەڕەمەزاندا تامی ژیان لەدەست دەچێت ، کە منداڵ بووم لەشەقامی مەولەوی  لەڕەمەزاندا  کەبابخانەکان پەردەیەکی سپیان هەڵدەواسی  خەڵکی دەچوو کەبابیان دەخوارد شەقامەکە پڕدەبوو لەبۆنی ژیان ، ئێوارانیش کەس خۆی نەدەکردە خاوەنی سینیە پاقلاوەو  ڕەحەتەقومەکان ، ڕۆژوان و بێڕۆژۆکان مافی ئەوەیان هەبوو  لەوێ چێژ لەشیرینی و خۆراکەکان ببینن کە کەس نەیدەزانی کێ ئەم کارەی کردوە .

ئێستا هەموویان وون بوون بۆیە لەڕێگەی ڕەمەزانەوە دەیانەوێت خۆیان و ناسنامەیان بدۆزنەوە  ،  دزەکان  پیر بوون مزگەوت  دەکەنەوە    زەرفی خۆراکی تورکی و خەیارو تەماتە  بەسەر  هەژارەکاندا  دابەش دەکەن ،  زۆرکەس  هەر پێی خۆشە سواڵ قبوڵکات  گەرچی پێویستیشی پێی نییە .  چونکە ناسنامە  لەنیشتمانی ئێمەدا لەدوایی ئەنفالەکان وونبووە . هەمووان بەدوایی ناسنامەی خۆیاندا  دەگەڕێن و وێڵن .

 ئێمە هەموو خۆمان داوە بەدەستەوە ، ئەوانەی هەمووشەوێک دەخۆنەوە لەو مانگەدا  خۆیان دوورە پەرێز دەگرن  ، دوایش دەست دەکەنەوە  بەخواردنەوە ، ئەمە لوتکەی ترسنۆکیە ، ئەمە تێنەگەشتنە  لەگەشتی مردن .  ئەوەی لەم مانگەدا دەمرێت  لای خەڵکی ئێمە بەختەوەرترین کەسە ، ئەوان پێیان وایە  ئەو بەدبەختەی لەم مانگەدا مردوە  بەهەشتیە ، جا ڕێکەوتی  ڕۆژی هەینیش بێت ئەوە  بەختی لەسەر دەبڵ داناوە. ئەمە داڕزانی هزر نەبێت ناوی دەنێیت چی؟ 

 دراما پوچەکانی هەمووساڵێک لەڕەمەزاندا  لەکەناڵەکانەوە بڵاوی دەکەنەوە ، هیچ پەیوەندی بەکۆمەڵگای ئێمەوە نییە ، ئەوانە بەو دەم و چاوە قەبیح و ورگەزل و دەمودانە جوانەیانەوە کە نمونەیەکی داڕزاوی کۆمەڵگایەکە  کە لەلێوارمەرگدابێت ، جگەلەوەش  ناوەڕۆکی ئەم درامایانە پڕە لەبێڕێزی کردن بەکۆمەڵگای کورد ..بەڕاستی کەسەیرم کرد هەستم کرد هەمووشتێک  لەنیشتمانی ئێمەدا هەرەسی هێناوە؟  

 وەرە میستەر بین کۆمێدیا بکات و شاپلین  لەڕێگەی کۆمێدیاوە  عەرزی هێتلەر بهەژێنێت ، ئەمانەی ئێمەش  کۆمێدیا دەکەن کە  مرۆڤ  نازانێ بگری یان پێبکەنێ بەم هزرە بەتاڵەی کە  لەم مانگەدا  خۆیان نمایش کردوە ؟ 

 دواجار هەتا ئێمە خۆمان نەدۆزینەوە ناتوانین  ڕێگەیەک بدۆزینەوە بۆ ژیان .شەربەتی هەنارەکەتان جوانە   زەهر  دەخۆنەوەو دەڵێن شەربەت نۆش دەکەین .  ئێمە لەناجێگریەکی بەردەوامداین ، لەناجێگیریدا ماندووین بۆیە بەدوایی ناسنامەیەکدا دەگەڕێین ، دەمانەوێت هەرچۆنێک بێت بڵێن هەین ، ڕوولەمزگەوت دەکەین بەڵام داڵغەمان  لای شفتەو کفتەکەیە و بیرمان لای دراما پوچەکانی تورکی و کوردێکانە کە وێرانی کردووین .

ڕەمەزان مانگێکە  هەموو شتێک تێدا وێران بووە  وونبووین دوای ڕەمەزان  دەکەوینەوەسەر ڕێچکە  خواروخێچەکەی  ژیان  دەخۆینەوە دانە کەلەکانمان  نمایش دەکەینەوە و چکلێت دەجوین ، تاڕۆژێک ناسنامەی خۆمان دەدۆزینەوە .